EFESIOS 6
6
1Cu'ma̱ ngu' cuañi' ni, tucuá ma̱ cña nu culo ngu' cusu' ji'i̱ ma̱, cha' cua nti' tsa ycui' Ndyosi nu Xu'na na cha' cua'ni ma̱ jua'a̱. 2Sca cha' nu nda ycui' Ndyosi lo'o ñati̱ tya clyo, ndi'ya̱ nscua cha' bi': “Cua'ni chi̱ ma̱ loo sti ma̱, loo xtya'a̱ ma̱”. Lo'o li' nda ycui' Ndyosi chaca cha' lo'o na si cua'ni na jua'a̱: 3“Cha' jua'a̱ caca tso'o tyiquee ma̱; lo'o li' quiña'a̱ yija̱ talo ma̱ tyi'i̱ ma̱ chalyuu”, nacui̱ ycui' Ndyosi.
4Cu'ma̱ nu laca ma̱ sti nu sube ni, ná su'ba ñasi̱' ma̱ ji'i̱ sñi' ma̱. Laja lo'o ndyu'ni cu'ú ma̱ ji'i̱ sñi' ma̱, tya'ni ngu' xi si chañi cha' cuxi ndyu'ni ngu'; culu'u tso'o ma̱ ji'i̱ ngu' cha' taca taquiya' ngu' cha' ji'i̱ ycui' nu Xu'na na.
5Cu'ma̱ ngu' msu nu ngüi'ya ñati̱ ji'i̱ ma̱ cha' cua'ni ma̱ cña ji'i̱ ngu' laja ti, cua'ni ma̱ lcaa cña nu culo xu'na ma̱ ji'i̱ ma̱ nde loyuu chalyuu. Cube xi ti' ma̱ ñi'ya̱ nu cua'ni ma̱ cña ji'i̱ ngu', cha' tyucui tyiquee ma̱ cua'ni ma̱ cña bi'; cua'ni ma̱ cña bi' ñi'ya̱ laca si cña ji'i̱ Cristo laca cña nu ndyu'ni ma̱.
6Cua'ni ma̱ cña ji'i̱ ngu' lacua; si'i na cua'ni ti ma̱ jua'a̱ cha' tyanu tso'o ma̱ lo'o ngu', nu lo'o ndu̱ ti ngu' ndyi'ya ngu' cuentya ji'i̱ ma̱ si ndyu'ni ma̱ cña. Tso'o la si tyi'u ti' ma̱ cha' la cui' msu ji'i̱ Cristo laca ma̱, bi' cha' tyucui tyiquee ma̱ cua'ni ma̱ lcaa ña'a̱ cña nu nti' ycui' Ndyosi cha' cua'ni na. 7Tso'o ti cua'ni ma̱ lcaa cña lacua, tyi'u ti' ma̱ cha' cña ji'i̱ ycui' nu Xu'na na laca nu ndyu'ni ma̱, si'i cña ji'i̱ ñati̱ chalyuu ti. 8Ná ndu'ni cha' masi msu nu ngüi'ya ti ñati̱ laca ma̱, masi msu nu ndi'i̱ tso'o ti laca ma̱; cua jlo ti' na cha' ycui' nu Xu'na na tya cha' tso'o ji'i̱ lcaa ñati̱ nu ndu'ni cña tso'o cuentya ji'i̱ Ni.
9Nu cu'ma̱ ngu' xu'na msu bi' ni, la cui' jua'a̱ nga'a̱ cha' cña'a̱si̱i̱ tso'o ma̱ ji'i̱ msu ji'i̱ ma̱. Ná xcutsi̱i̱ ma̱ ji'i̱ ngu', ni ná cua'ni tyaala ma̱ lo'o ngu' bi'; tyi'u ti' ma̱ cha' sca ti nu Xu'na na laca loo ji'i̱ cu'ma̱ lo'o ji'i̱ ngu' bi', lo'o jua'a̱ sca ti cuayá' ndu'ni Ni lo'o cua ña'a̱ ca ñati̱.
Ya' xña nu cua'nijo'o ji'i̱ ngu' nu ngusñi cha' ji'i̱ Cristo, cha' xu̱u̱ tya'a ngu' lo'o nu xña'a̱
10Juani ni, cua'ni ma̱ cha' caca nguula ti' tyiquee ma̱, cha' stu'ba ti ndu'ni ma̱ cña lo'o ycui' nu Xu'na na, lo'o jua'a̱ nguula tsa juersa ntsu'u ji'i̱ ycui' Ni. 11Lcaa tyempo tyi'u ti' ma̱ lcaa cha' nu cua nda ycui' Ndyosi lo'o ma̱, cha' taca cua'a ma̱ ji'i̱ ycui' ca ma̱, cha' ná cñilo'o nu xña'a̱ ji'i̱ ma̱. 12Si'i na nxu̱u̱ tya'a na lo'o ñati̱ chalyuu ti, siya' la juersa ntsu'u ji'i̱ ngu' bi'; tya'a cusu̱u̱ na laca lcaa cui'i̱ cuxi nu ntsu'u nde cua̱. Nguula tsa nu bi', hasta ngua ti' bi' tyiji̱loo ji'i̱ ycui' Ndyosi; pana ná ngua ji'i̱. La cui' laca nu ngua ti' caca xu'na chalyuu, lo'o jua'a̱ nclyo bi' cña ji'i̱ ñati̱ cha' cua'ni ngu' lcaa lo cha' cuxi nde chalyuu juani. 13Pana cha' nu cua nchcui' ycui' Ndyosi lo'o na ni, ñi'ya̱ laca ste' sendaru nu ndya'a̱ cusu̱u̱, jua'a̱ laca cha' bi'; xcui' chcua̱ laca ste' sendaru cha' cua'a ji'i̱ ycui' ca ngu'. Taquiya' ma̱ ji'i̱ cha' bi', xñi tso'o ma̱ ji'i̱ cha' bi' juani; lo'o tyalaa tyempo cuxi bi', li' taca talo ma̱ cha' xu̱u̱ tya'a ma̱ lo'o nu xña'a̱, cha' ngusñi ma̱ cha' tso'o bi', masi tya'a cusu̱u̱ na laca nu xña'a̱ bi'. Si jua'a̱ cua'ni ma̱, nu lo'o tye cha' cusu̱u̱ bi', li' tya tyu̱ ma̱ ñi'ya̱ nu ndu̱ ti ma̱. 14Bi' cha' cua'ni tajua' ma̱ lacua; ñi'ya̱ lo'o ndyaaca̱' ne' sendaru lo'o juata cha' xñi ca'a̱ tso'o ste' ngu', jua'a̱ cu'ma̱, xñi tso'o ma̱ cha' nu nchcui' Ni bi'. Xcui' cha' liñi chcui' ma̱, cha' li' taca xu̱u̱ tya'a ma̱ lo'o nu cuxi. Sca sendaru ni, ndyacu̱' chcua̱ lo tyiquee yu lo'o nde chu̱' yu, cha' cua'a yu ji'i̱ tyiquee yu. Lo'o jua'a̱ cu'ma̱, ná taca sta ngu' qui'ya ji'i̱ ma̱ si xcui' cha' liñi ndu'ni ma̱. 15Ndyu'u xapatu quiya' sendaru. Lo'o jua'a̱ cu'ma̱ ni, quiñi ti' ma̱ cha' tsaa chcui' ma̱ cha' ji'i̱ ycui' Ndyosi lo'o ñati̱; chcui' ma̱ cha' taca cua'ni lyaá Ni ji'i̱ ngu' bi' cha' taca cua'ni Ni cha' ti̱ ti tyi'i̱ tyiquee ngu'. 16Lo'o jua'a̱ ndacui sca chcua̱ cuaja' ya' sendaru; nu lo'o cu̱ tya'a cusu̱u̱ yu clya nu nga'a̱ quii' lo ji'i̱ yu, li' cua'a yu ji'i̱ ycui' ca yu lo'o chcua̱ cuaja' bi'. Jua'a̱ caca ji'i̱ ma̱ si chañi cha' ngusñi ma̱ cha' ji'i̱ ycui' Ndyosi, taca cua'a ma̱ ji'i̱ ycui' ca ma̱ lcaa hora cha' ná cua'ni lya' ti' nu cuxi ji'i̱ ma̱. 17Smalyu chcua̱ ntucua hique ngu' sendaru cha' cua'a ji'i̱ hique ngu'. Lo'o jua'a̱ cu'ma̱, cua ngua'ni lyaá Ni ji'i̱ ma̱, bi' cha' ntsu'u nu ña'a̱si̱i̱ ji'i̱ ma̱ li'. Xñi ma̱ lcaa cha' nu nda Xtyi'i ycui' Ndyosi lo'o ma̱ cha' caja ñi'ya̱ nu chcui' ma̱ lo'o sca ñati̱, ñi'ya̱ laca si cua ngusñi ma̱ sca maxtyi cusu̱u̱ ji'i̱ sendaru. 18Chcui' ma̱ lo'o ycui' Ndyosi nu lo'o nxu̱u̱ tya'a ma̱ lo'o nu cuxi, cha' jña ma̱ chacuayá' ji'i̱ Ni; lcaa tyempo xtyucua Xtyi'i ycui' Ndyosi ji'i̱ ma̱ cha' taca chcui' ma̱ lo'o Ni. Lo'o jua'a̱ chcui' ma̱ lo'o Ni cuentya ji'i̱ lcaa ñati̱ nu cua ngusñi cha' ji'i̱ Ni. Bi' cha' lacua, tii ti ti' ma̱ chcui' ma̱ lo'o Ni, cha' ná ca taja ti' ma̱. 19La cui' jua'a̱ tso'o si chcui' ma̱ lo'o ycui' Ndyosi Sti na cuentya jna', cha' tya ta la Ni cha' nu chcui' na' lo'o ñati̱, cha' caca tlyu la tyiquee na' chcui' na' lo'o ñati̱ ña'a̱ cuayá' nu ca cuayá' ti' ngu' cha' taca cua'ni lyaá Cristo ji'i̱ ngu' ya' nu cuxi; sca cha' nu bilya cuna ngu' laca bi'. 20Cua ngusubi Ni 'na cha' tsa'a̱ tyijyu', cha' ta na' cha' bi' lo'o ñati̱; bi' cha' laca na' preso juani. Chcui' ma̱ lo'o ycui' Ndyosi cuentya jna' lacua, cha' taca chcui' liñi na' cha' bi' lo'o ñati̱, ñi'ya̱ nu nga'a̱ cha' chcui' na'.
Ngusalya' Pablo lo'o ngu'
21Cua nda na' ji'i̱ yu Tíquico cha' ca̱a̱ slo ma̱. Tso'o tsa ntsu'u tyiquee ya cha' stu'ba tsa ndu'ni ya cña ji'i̱ ycui' nu Xu'na na lo'o yu. Cacha' lyiji yu ji'i̱ ma̱ lcaa cha' ñi'ya̱ nu ndyaca 'na ca nde, ñi'ya̱ cña nu ndyu'ni na'. 22Bi' cha' cua nda na' ji'i̱ yu lijya̱ yu slo cu'ma̱, cha' tso'o la tyanu tyiquee ma̱ lo'o cuna ma̱ ñi'ya̱ nu ndyaca cha' ji'i̱ cuare.
23Chcui' na' lo'o ycui' Ndyosi Sti na, lo'o jua'a̱ lo'o Jesucristo nu Xu'na na cuentya ji'i̱ cu'ma̱ tya'a ngusñi na cha' ji'i̱ Cristo; cua'ni Ni cha' ti̱ ti tyi'i̱ tyiquee ma̱, cha' tso'o ti tyu'u tyiquee ma̱ ña'a̱ ma̱ ji'i̱ tya'a na, cha' lcaa tyempo jlya ti' ma̱ ji'i̱ ycui' Ndyosi. 24Lo'o jua'a̱ nti' na' cha' ña'a̱ ti cua'ni Ni cha' tso'o lo'o lcaa cu'ma̱ nu ntsu'u tyiquee ma̱ ji'i̱ Jesucristo nu Xu'na na, cu'ma̱ nu nga'aa nti' tya'a̱chu̱' ma̱ ji'i̱ Cristo. Chañi cha' jua'a̱ caca cha' bi'.
Currently Selected:
EFESIOS 6: cta
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.