EFESIOS 4

Sca ti cha' ntsu'u ji'i̱ ca ta'a na nu cua ngusñi na cha' ji'i̱ Cristo

1Preso laca na' juani xqui'ya cha' nda na' cha' ji'i̱ nu Xu'na na lo'o ñati̱. Pana nchcui' na' lo'o ma̱ cha' tso'o ti cua'ni ma̱ lo'o xa' ñati̱; ñi'ya̱ nu nchcui' cha' ji'i̱ ycui' Ndyosi nu ngua tsa'a̱ ma̱ tya lo'o ngusubi Ni ji'i̱ ma̱ tya clyo, la cui' jua'a̱ cua'ni ma̱ lo'o xa' ñati̱. 2Ná cua'ni tyucuaa ti' ma̱ lo'o tya'a ñati̱ ma̱, tso'o ti chcui' ma̱ lo'o lcaa ngu', talo tyiquee ma̱ ji'i̱ ngu'; jua'a̱ xtyucua ma̱ ji'i̱ ngu' cha' ca cuayá' ti' xa' ñati̱ cha' chañi cha' ntsu'u tyiquee ma̱ ña'a̱ ma̱ ji'i̱ tya'a ñati̱ ma̱. 3Cua'ni cña ti' ma̱ lacua, lo'o jua'a̱ xtyucua Xtyi'i ycui' Ndyosi ji'i̱ ma̱, cha' sca ti cha' taca tyu'u tyiquee ma̱ lo'o ngu' tya'a ntsu'u cha' ji'i̱ ma̱ lo'o Cristo lcaa tsa̱. Lo'o jua'a̱ cua'ni stu'ba cha' ji'i̱ ma̱ lo'o tya'a ma̱ cha' taca tyi'i̱ tso'o ti ma̱ lo'o ngu'. 4Lcaa na nu ngusñi na cha' ji'i̱ Cristo, sca ti ñati̱ laca na, sca ti Xtyi'i ycui' Ndyosi ndi'i̱ lo'o na; ndu̱ ti' na cha' stu'ba ti tyacua cha' ji'na chalyuu ca nde loo la, bi' cha' cua ngusubi Ni ji'na. 5Sca ti Xu'na na ntsu'u ji'i̱ ca ta'a na, sca ti cha' jlya ti' na cuentya ji'i̱ Cristo, sca ti cuayá' ntyucuatya na cuentya ji'i̱ Cristo, 6cha' sca ti ycui' Ndyosi ntsu'u; la cui' Sti lcaa na laca bi', lo'o jua'a̱ la cui' bi' laca loo ji'i̱ lcaa na. Ndu'ni Ni cña laja lcaa ñati̱ nu cua ngusñi cha' ji'i̱ Ni, lo'o jua'a̱ ndi'i̱ Ni lo'o lcaa ñati̱ ji'i̱ Ni.

7Pana cua nda Ni sca cña cha' cua'ni scaa na cuentya ji'i̱ Ni; tsa ña'a̱ juersa nu nda Cristo ji'i̱ scaa na, jua'a̱ taca cua'ni na cña bi'. 8Ndi'ya̱ nscua lo quityi cusu' bi':

Nu lo'o ngutu'u Ni ndyacuí̱ Ni ndyaa Ni nde cua̱, ndyalo'o Ni ji'i̱ quiña'a̱ tsa ñati̱ nu ngua preso nde chalyuu.

Lo'o li' nda tsa Ni tyu̱u̱ lo cha' tso'o ji'i̱ ñati̱ chalyuu nu ngusñi cha' ji'i̱ Ni.

Jua'a̱ nscua lo quityi bi'.

9¿Ni cha' laca nacui̱ quityi cha' cua ndyaa Ni nde cua̱? Na cua ngua'ya ti'i̱ Ni clyo, ñaa Ni loyuu chalyuu ca su ndi'i̱ ñati̱ cuxi tya'a na. 10La cui' Jesús nu ngua'ya nde loyuu ni, bi' laca nu ndyacuí̱ ndyaa ca su tlyu la, ca su ntucua ycui' Ni ca nde cua̱. Lo'o juani cua ntsu'u Xtyi'i ycui' Jesús tyucui ña'a̱ loyuu chalyuu, lo'o jua'a̱ ntsu'u Xtyi'i ycui' Jesús lcaa se'i̱ nde cua̱. 11Xqui'ya cha' tyu̱u̱ lo cha' tso'o nda Jesús lo'o ñati̱ chalyuu, bi' cha' taca cua'ni ñati̱ cña nu nda Ni ji'i̱ ngu' cha' cua'ni ngu': clyo cua ngua'a̱lo Cristo cña ji'i̱ la cui' ñati̱ nu ngua tsa'a̱ ji'i̱ yu; lo'o jua'a̱ cua nda Ni cña ji'i̱ ngu' cha' caca chcui' ngu' na laca nu cua cua'ni ti ycui' Ndyosi chalyuu; lo'o xa' la ñati̱ ji'i̱ Ni ntsu'u cña ji'i̱ cha' cacha' liñi ji'i̱ ñati̱ ñi'ya̱ caca clyaá ngu' ji'i̱ nu cuxi; lo'o jua'a̱ ngua'a̱lo Ni cña ji'i̱ ñati̱ nu caca loo ji'i̱ tya'a, cha' caca ngu' bi' mstru, cha' culu'u ngu' bi' cha' ji'i̱ ycui' Ndyosi ji'i̱ tya'a ngu'. 12Jua'a̱ ndu'ni cho'o Ni ji'na, ñati̱ nu ntsu'u cha' ji'i̱ lo'o Ni, cha' taca cua'ni na cña ji'i̱ Ni, cha' tachaa la tyanu cha' ne' cresiya ji'na nu tsa tlyu ti ngusñi na cha' ji'i̱ Cristo. 13Lo'o jua'a̱ lcaa na lo'o tya'a na, sca ti cuayá' taca xñi na cha' ji'i̱ Cristo, sca ti cuayá' taca tyuloo na ji'i̱ Jesús nu sca ti Sñi' ycui' Ndyosi. Li' caca na ñati̱ tyucui tyiquee, taca caca na ñi'ya̱ nu nti' Cristo cha' caca na. 14Li' nga'aa cua'ni na ñi'ya̱ ndu'ni nu sube nu lu'ba ti ncha'a̱ cña ji'i̱, cha' nu ndijya ngu'; ni ná ta na chacuayá' cojolaqui ngu' ji'na xa' tyucui̱i̱, nu lo'o chcui' ngu' lo'o na cua ña'a̱ ca cha' nu bilya cuna na ji'i̱. Ntsu'u tsa cha' cuiñi nu nda ñati̱ nu tajua' tsa nchcui' lo'o na, ñati̱ nu nti' tsa cha' tsalo'o ji'na nde tyucui̱i̱ cuxi. 15Pana xa' ña'a̱ cua'ni na. Chcui' na lo'o ngu' ji'i̱ lcaa cha' liñi nu ntsu'u ji'i̱ ycui' Ndyosi; culu'u na ji'i̱ ngu' cha' ntsu'u tsa tyiquee na ña'a̱ na ji'i̱ lcaa tya'a ñati̱ na, cha' nga'a̱ cha' xñi tso'o na lcaa cha' ji'i̱ Cristo cha' caca stu'ba cha' ji'na lo'o ycui' Ni. Nu Cristo bi' ni, la cui' bi' laca loo ji'i̱ lcaa tya'a na nu tsa tlyu ti ngusñi na cha' ji'i̱ Ni; 16xqui'ya Cristo, bi' cha' ndyaca na sca ti ñati̱ cuentya ji'i̱ ycui' Ndyosi. Ntsu'u cña cha' cua'ni sa scaa na lo'o tya'a na; nga'a̱ cha' cua'a na ji'i̱ tya'a na cha' ná xñi na tyucui̱i̱ cuxi, cha' jua'a̱ stu'ba ti ntsu'u tyiquee na lo'o tya'a na. Si tso'o ti ndi'i̱ na lo'o tya'a na, li' tsa tlyu ti xtyucua na ji'i̱ tya'a na, cha' tachaa la tyanu cha' ji'i̱ Jesús ne' cresiya ji'i̱ scaa na, xqui'ya cha' ntsu'u tsa tyiquee na ña'a̱ na ji'i̱ tya'a na.

Chalyuu cucui nu ngujui ji'na xqui'ya Cristo

17Chacuayá' ji'i̱ ycui' nu Xu'na na chcui' na' xi lo'o cu'ma̱ juani: Nti' tsa na' culo na' cña ji'i̱ cu'ma̱ cha' nga'aa cua'ni ma̱ ñi'ya̱ nu ndu'ni ngu' nu ná nslo ji'i̱ ycui' Ndyosi tsiya' ti; cua ña'a̱ ca cha' cuxi nu nda'ya hique ngu', xcui' jua'a̱ ndu'ni ngu' bi' chalyuu. Sca cha' tonto tsa ndu'ni ngu' bi', 18talya tsiya' ti chalyuu nu ntsu'u ji'i̱ ngu' bi'; bi' cha' ná nchca ca cuayá' ti' ngu' tsiya' ti. Ná ntsu'u cha' ji'i̱ ngu' bi' lo'o chalyuu cucui nu cua nda ycui' Ndyosi ji'na cha' tyi'i̱ tso'o ti na, xqui'ya cha' ná jlo ti' ngu' bi' tsiya' ti, cha' ná ntaja'a̱ ngu' bi' xñi tyiquee ngu' sca cha' liñi. 19Nga'aa nchca ca tyuju'u ti' ngu' bi', bi' cha' quiña'a̱ la cha' cuxi ndyu'ni ngu', ña'a̱ cuayá' nda ngu' chacuayá' ji'i̱ cua ña'a̱ ca cha' cuxi cha' caca bi' loo ji'i̱ ngu'. Ná tucui caca cua'a ji'i̱ ngu' bi' lo'o ndu'ni ngu' cua ña'a̱ ca cha' suba' lo'o tya'a ngu'. 20Pana nu cu'ma̱ ni, si'i na ngua tsa'a̱ ma̱ ji'i̱ Cristo cha' cua'ni ma̱ cha' cuxi bi'. 21Chañi cha' cua ndyuna ma̱ cha' ji'i̱ Cristo, cua ngua tsa'a̱ tso'o ma̱ cha' liñi ji'i̱ Jesús nu ngulu'u ngu' ji'i̱ ma̱; 22bi' cha' cua'ni tye ma̱ ji'i̱ cha' cuxi nu ngua'ni ma̱ tya sa'ni la. Quiña'a̱ tsa cha' ndatsaa cha' cuxi bi' ji'i̱ ma̱ nu ngua li', ndacui tsa ti' ma̱ ji'i̱ cha' cuxi bi', ña'a̱ cuayá' nu chcuna' tsiya' ti chalyuu ji'i̱ ma̱ xqui'ya cha' cuxi bi'. 23Juani nga'a̱ cha' cua'ni cucui ma̱ ji'i̱ lcaa cha' nu ntsu'u ne' cresiya ji'i̱ ma̱, jua'a̱ lcaa cha' nu ca'ya hique ma̱; 24nga'a̱ cha' xñi tso'o ma̱ cha' ji'i̱ ycui' Ndyosi cha' xa' ña'a̱ cua'ni ma̱ su ndi'i̱ ma̱ chalyuu, cha' taca cua'ni ma̱ ñi'ya̱ nu nti' ycui' Ndyosi cha' cua'ni ma̱. Bi' cha' xcui' cha' tso'o cua'ni ma̱ chalyuu, xcui' cha' lubii cua'ni ma̱, si chañi cha' laca ma̱ ñati̱ ji'i̱ ycui' Ndyosi.

25Juani nga'aa chcui' ma̱ cha' cuiñi lo'o tya'a ñati̱ ma̱ lacua; xcui' cha' liñi chcui' scaa ma̱ lo'o tya'a ma̱, cha' sca ti ñati̱ laca na, sca ti cha' ntsu'u ji'na lo'o tya'a na.

26Lo'o ntsu'u quiya' ñasi̱' ma̱ xi, cui'ya ma̱ cuentya cha' ná tyanu qui'ya ji'i̱ ma̱ li'; ná tso'o si caca ñasi̱' ti' ma̱ tyucui tsa̱, tsa tyeje tacui ti cha' cua'ni ma̱ ji'i̱. 27Ná ta ma̱ tyempo tsiya' ti ji'i̱ nu xña'a̱ cha' caca bi' loo ji'i̱ ma̱.

28Cu'ma̱ nu nguaana ma̱ na nu ntsu'u ji'i̱ ñati̱ tya tsubi' la, nga'a̱ cha' xtyanu ma̱ cña bi' ji'i̱ ma̱, clyana ma̱ cña tso'o la nu cua'ni ycui' ma̱; tso'o la si cua'ni ma̱ cña lo'o ya' ycui' ma̱, cha' jua'a̱ caja xi ñi'ya̱ nu xtyucua ma̱ ji'i̱ tya'a ma̱ nu lyiji tsa ji'i̱.

29Ná chcui' ma̱ cha' ti'í lo'o tya'a ñati̱ ma̱; clyana ma̱ cha' tso'o nu chcui' ma̱ lo'o tya'a ma̱; clyana ma̱ ñi'ya̱ nu caca xtyucua ma̱ ji'i̱ ngu' cha' tyatí̱ la ti' ngu' ji'i̱ ycui' Ndyosi, cha' tyanu sca cha' tso'o ne' cresiya ji'i̱ ngu' nu lo'o cuna ngu' cha' nu chcui' ma̱. 30Ná cua'ni ma̱ cha' ca xñi'i̱ ti' Xtyi'i ycui' Ndyosi; nu Xtyi'i ycui' Ndyosi ni, ñi'ya̱ laca si cua ngusta Ni cuayá' nu ji'i̱ ycui' ca Ni hichu̱' na, cha' laca na ñati̱ ji'i̱ Ni, jua'a̱ laca bi'. Tyanu bi' lo'o na ña'a̱ cuayá' nu tye chalyuu ji'na, ña'a̱ cuayá' nu tyalaa tsa̱ nu cua'ni lyaá Ni ji'na.

31Cua'ni tye ma̱ ji'i̱ lcaa cha' su chi̱i̱ nti' ma̱ ña'a̱ ma̱ ji'i̱ tya'a ñati̱ ma̱ lacua; jua'a̱ cha' liye' ti' ma̱, jua'a̱ cha' ñasi̱' ti' ma̱, cua'ni tye ma̱ ji'i̱ lcaa cha' bi'. Nga'aa xi'ya cui̱i̱ ma̱ cha' suba' ji'i̱ tya'a ma̱, nga'aa chcui' ma̱ cuentyu ji'i̱ tya'a ma̱, nga'aa ntsu'u cha' chcui' cuxi ma̱ ji'i̱ tya'a ma̱ tsiya' ti. 32Xa' ña'a̱ cua'ni ma̱ juani. Xcui' tso'o ti cua'ni ma̱ lo'o tya'a ñati̱ ma̱, tyu'u tsa cha' clyu ti' ji'i̱ ma̱ lo'o tya'a ma̱; cua'ni clyu ti' ma̱ ji'i̱ qui'ya nu ntsu'u ji'i̱ ngu', cha' jua'a̱ cua ngua'ni clyu ti' ycui' Ndyosi ji'na xqui'ya Cristo.

Currently Selected:

EFESIOS 4: cta

Highlight

Copy