1 CORINTIOS 12

Cña nu ndu'ni Xtyi'i ycui' Ndyosi cha' caca cua'ni sa scaa na

1Cu'ma̱ tya'a ngusñi na cha' ji'i̱ Jesús, ntsu'u sca cha' nu nti' na' cha' caca cuayá' ti' ma̱ cuentya ji'i̱ cña nu caca ji'i̱ sa scaa na xqui'ya Xtyi'i ycui' Ndyosi.

2Cua jlo ti' ma̱ ñi'ya̱ nu ngua'ni ma̱ tya sa'ni la, nu lo'o bilya cuna ma̱ cha' ji'i̱ Jesús; na nguñilo'o lcui̱ jo'ó ji'i̱ ma̱, jo'ó nu cu'u̱ ti, cha' jlya ti' ma̱ lcua ti lo cha' nu ntsu'u ji'i̱ jo'ó bi'. 3Bi' cha' nti' tsa na' cha' caca cuayá' ti' ma̱ cha' re. Si'i Xtyi'i ycui' Ndyosi ndu'ni cha' ñacui̱ ngu': “Cuiñaja laca nu Jesús bi'”. Ná taca ñacui̱ ngu' jua'a̱ xqui'ya Xtyi'i ycui' Ndyosi. Lo'o ñacui̱ ngu': “Xu'na na laca Jesús”, Xtyi'i ycui' Ndyosi laca nu ndu'ni cha' ñacui̱ ngu' jua'a̱ li'.

4Tyu̱u̱ lo cha' nda ycui' Ndyosi ji'na cha' caca cua'ni na sca cña ji'i̱ Ni, pana sca ti Xtyi'i ycui' Ndyosi ndu'ni cha' taca cua'ni na cña bi'. 5Lo'o jua'a̱ xa' ña'a̱ cña ndyu'ni sa scaa na, pana cuentya ji'i̱ ycui' Ndyosi ndyu'ni lcaa na cña bi'. 6Masi ná stu'ba ndyu'ni lcaa na, pana sca ti ycui' Ndyosi ndu'ni cha' taca cua'ni na cña bi', ca ta'a na. 7Ndu'ni Xtyi'i ycui' Ndyosi lo'o na cha' taca cua'ni lcaa na sca cña cuentya ji'i̱ ycui' Ni, ca ta'a na nu ntsu'u cha' ji'na lo'o Jesús; bi' laca sca lo cña nu xtyucua ji'i̱ ca ta'a na, lo'o jua'a̱ xqui'ya cha' bi' cua jlo ti' na cha' cua ntsu'u Xtyi'i ycui' Ndyosi ne' cresiya ji'na. 8Ndi'ya̱ laca cña nu taca cua'ni na xqui'ya Xtyi'i ycui' Ndyosi: ntsu'u ngu' nu ndacha' liñi ñi'ya̱ nu ngua ji'i̱ Jesús; lo'o jua'a̱ ntsu'u ngu' nu tso'o tsa nclyu'u tyucui̱i̱ cha' xñi na cha' ji'i̱ ycui' Ndyosi; 9lo'o jua'a̱ ntsu'u ngu' nu tso'o tsa jlya ti' ji'i̱ ycui' Ndyosi; lo'o jua'a̱ ntsu'u ngu' nu nchca ji'i̱ cua'ni cha' tyaca tso'o nu quicha chacuayá' ji'i̱ Jesús; 10lo'o jua'a̱ ntsu'u ngu' nu nchca ji'i̱ ndu'ni xa' la cha' tlyu chacuayá' ji'i̱ ycui' Ndyosi, cña nu ná nchca cua'ni ñati̱ nquicha'; cuati ntsu'u xa' la ngu' nu nchca ji'i̱ ndacha' ji'i̱ ñati̱ sca cha' nu nda ycui' Ndyosi lo'o ngu' bi'; cuati jua'a̱ ntsu'u ngu' nu nchca tii ni cña ndu'ni sa scaa ngu', si cuentya ji'i̱ Xtyi'i ycui' Ndyosi ndu'ni ngu' cña, si si'i cuentya ji'i̱ ycui' Ndyosi ndu'ni ngu' cña; lo'o jua'a̱ ntsu'u ngu' nu nchca ji'i̱ nchcui' cha'cña ji'i̱ xa' la ñati̱; jua'a̱ tya ntsu'u xa' la ngu' nu nchca ji'i̱ xtyacui cha' bi', cha' caca cuayá' ti' lcaa ñati̱ ni cha' nda ngu' bi' li'. 11Sca ti Xtyi'i ycui' Ndyosi ndu'ni cha' nchca ji'i̱ ñati̱ cua'ni lcaa cña bi'; bi' laca nu nda sca lo cña cua'ni sa scaa na, ñi'ya̱ nu ntsu'u tyiquee Ni cha' caca ji'na.

Sca ti ñati̱ laca na lo'o lcaa ñati̱ tya'a ngusñi na cha' ji'i̱ Jesús

12Nu ycui' na ni, sca ti ñati̱ laca sca na, masi tyu̱u̱ tsa tya'a tyijya̱ ntsu'u laja cuaña' scaa na. La cui' jua'a̱ laca lo'o ña'a̱ taju tya'a ngusñi na cha' ji'i̱ Cristo; sca ti taju ñati̱ laca na, masi xa' ca ña'a̱ ndu'ni sa scaa na. 13Ca ta'a na, masi ngu' judío, masi ngu' xa' tsu' laca na, masi msu nu ngüi'ya ñati̱, masi msu nu ndi'i̱ tso'o ti laca na, na cua ntyucuatya na chacuayá' ji'i̱ Xtyi'i ycui' Ndyosi; cua ndyanu Xtyi'i ycui' Ndyosi bi' ne' cresiya ji'i̱ sa scaa na, cha' stu'ba ntsu'u tyiquee na lo'o lcua ti tya'a ñati̱ nu ngusñi cha' ji'i̱ Cristo.

14Tyu̱u̱ tsa tya'a tyijya̱ ntsu'u laja cuaña' na nu nxtyucua ji'na nu lo'o ndyu'ni na cña nde chalyuu, si'i sca ti tyijya̱ nu ndulo la ji'na. 15Si ndi'ya̱ chcui' quiya' na lo'o na: “Si'i ya' nu'u̱ laca na', bi' cha' ná ntsu'u cha' jna' lo'o nu'u̱”, ñacui̱ bi'. ¿Ñi'ya̱ ñacui̱ ta na? Pana ná nchca xuu bi', ca ña'a̱ ngalya bi' ji'i̱ tyucui ña'a̱ na. 16Lo'o li' si ndi'ya̱ ñacui̱ jyaca̱ na ji'na: “Si'i cloo nu'u̱ laca na', bi' cha' ná ntsu'u cha' jna' lo'o nu'u̱”, ñacui̱ bi'. ¿Ñi'ya̱ ñacui̱ ta na? Pana ná nchca xuu bi', na ca ña'a̱ ngalya bi' ji'i̱ tyucui ña'a̱ na. 17Ná ntsu'u su cuna na li', si xcui' cloo na laca tyucui ña'a̱ na. ¿Ñi'ya̱ caca cui̱' na sca na si xcui' jyaca̱ na laca tyucui ña'a̱ na? 18Na cua ngusta se'i̱ ti ycui' Ndyosi scaa tyijya̱ laja cuaña' na, cha' ñi'ya̱ nu ndiya ti' Ni, jua'a̱ ngüiñá Ni ji'na. 19Ná laca na sca ñati̱ si sa yu'be ti na; 20pana jua'a̱ laca cha' ji'na cha' sca ti ñati̱ laca sca na, masi tyu̱u̱ tsa tya'a tyijya̱ ntsu'u laja cuaña' na.

21Ná ca ñacui̱ cloo na ji'i̱ ya' na: “Ná cua'nijo'o nu'u̱ 'na”. Lo'o jua'a̱ ná ca ñacui̱ scua' hique na ji'i̱ quiya' na: “Ná ntsu'u su cua'nijo'o nu'u̱ 'na”. 22Masi nti' na cha' xti la cña ndu'ni sca lo tyijya̱ na, bi' laca nu lye la ndulo ji'na; 23lo'o jua'a̱ lacu' na ste' cha' nti' na cha' ná tso'o ña'a̱ xa' la se'i̱ laja cuaña' na. Sca se'i̱ su tacati ji'na, nu ntyuju'u ti' na si ña'a̱ ngu' ji'i̱, lcaa hora ndyacu̱' late' lo se'i̱ bi'; 24pana xa' la se'i̱ laja cuaña' na, nda na chacuayá' masi ná tacu̱' late' lo bi'. Jua'a̱ ngüiñá ycui' Ndyosi ji'i̱ tyucui ña'a̱ na, cha' la cui' se'i̱ laja cuaña' na nu ná ña'a̱ ngu' ji'i̱, bi' laca nu tacati la cuentya ji'na. 25Pana stu'ba ti ndu'ni lcaa tyijya̱ laja cuaña' na cña, stu'ba ti cha' ji'i̱ sca tyijya̱ na su ngalya lo'o xi xa' la tyijya̱ na. 26Lo'o quicha xi sca tyijya̱ na, tyucui ña'a̱ na ti'í li'; lo'o ndaca'a na ji'i̱ sca tyijya̱ na, tyucui ña'a̱ na tso'o nti' na li'. (La cui' jua'a̱ laca ma̱, tyucui ña'a̱ tsaca taju cu'ma̱ nu cua ngusñi cha' ji'i̱ Cristo).

27Ca ta'a cu'ma̱ lacua, stu'ba cha' ji'i̱ ma̱ lo'o lcaa ñati̱ tya'a ngusñi na cha' ji'i̱ Cristo scaa quichi̱; lo'o jua'a̱ sa scaa ma̱ laca ma̱ ñati̱ ji'i̱ Cristo. 28Tso'o tsa ngusubi ycui' Ndyosi ji'i̱ ñati̱ nu caca cña ji'i̱ laja lcaa tya'a ñati̱ nu cua ngusñi cha' ji'i̱ Cristo scaa quichi̱: clyo ngusubi Ni ji'i̱ ñati̱ nu ndya'a̱ xa' quichi̱ tyijyu' la cha' chcui' ngu' cha' ji'i̱ Jesús lo'o ngu' quichi̱ bi'; li' ngusubi Ni ji'i̱ ñati̱ nu ndacha' ji'i̱ tya'a ngu' sca cha' nu cua nda ycui' Ndyosi lo'o ngu'; lo'o jua'a̱ ntsu'u ñati̱ nu liñi tsa nclyu'u cha' ji'i̱ Jesús ji'i̱ tya'a ngu'; lo'o jua'a̱ ntsu'u ñati̱ nu ndu'ni cha' tlyu chacuayá' ji'i̱ ycui' Ndyosi, cña nu ná nchca cua'ni ñati̱ nquicha'; lo'o jua'a̱ ntsu'u ñati̱ nu nchca ji'i̱ cua'ni cha' tyaca tso'o nu quicha chacuayá' ji'i̱ Jesús; lo'o jua'a̱ ntsu'u ñati̱ nu nchca ji'i̱ xtyucua ji'i̱ tya'a ngu' lo'o cua ña'a̱ ca lo cña; lo'o jua'a̱ ntsu'u ñati̱ nu laca cña cuentya ji'i̱ tya'a ngu', ntsu'u ñati̱ nu nchca chcui' cha'cña ji'i̱ xa' la ñati̱. Laja ñati̱ ji'i̱ Ni, nsubi ycui' Ndyosi ji'i̱ ngu' nu caca lcaa lo cña bi'. 29Pana ná lcaa na ndya'a̱ na tyijyu' cha' chcui' na cha' ji'i̱ Jesús lo'o xa' ñati̱, ni ná lcaa na nchca ji'na cacha' na sca cha' nu nda ycui' Ndyosi lo'o ñati̱; jua'a̱ cua laca ti na taca culu'u liñi na cha' ji'i̱ Jesús ji'i̱ ñati̱, cua laca ti na nchca cua'ni na cha' tlyu cuentya ji'i̱ ycui' Ndyosi; 30jua'a̱ ná lcaa na nda Jesús chacuayá' ji'na cha' cua'ni na cha' tyaca tso'o nu quicha; la cui' jua'a̱ ná lcaa na nchcui' na cha'cña ji'i̱ xa' la ñati̱, ni ná lcaa na nchca xtyacui na cha' bi', cha' caca cuayá' ti' xa' ñati̱ ni cha' nda ngu' tya'a na lo'o ngu' li'. 31Bi' cha' nga'a̱ cha' jña ma̱ chacuayá' ji'i̱ ycui' Ndyosi cha' caca cua'ni la ma̱ cña, cha' caca xtyucua ma̱ ji'i̱ xa' la ngu' tya'a ma̱. Lo'o jua'a̱ tya ntsu'u chaca cha' nu ndulo la ji'i̱ ma̱, nu bilya culu'u na' ji'i̱ ma̱; bi' laca cha' nu culu'u na' ji'i̱ ma̱ juani.

Currently Selected:

1 CORINTIOS 12: cta

Highlight

Copy

Compare