San Juan 4
4
Dxuchálajle̱ Jesús tu nu'ula chee̱ tu xe̱zre nababa na Samaria
1Benne' fariseo ca' belenne̱' zjácale̱ benne' zandxa Jesús ca benne' zjácale̱ne̱' Juan, na' dxuchúa Jesús benne' zandxa nisa ca benne' dxuchúa Juan nisa. 2Quebe dxuchúaqueze Jesús bénneache nisa. Benne' ca' dxusé̱dene̱' dxuluchúe̱' bénneache nisa. 3Gate guque be'e Jesús da nigá, na' bezé̱'e̱ naga nababa Judea, xexíaje̱' naga nababa Galilea.
4Ca xu'u Jesús neza, be̱n na ba xen tée̱' naga nababa Samaria. 5Ca'an guca, bzrine̱' tu xe̱zre naga nababa Samaria nazí le na Sicar, da dxe' gáguze naga zua xe̱zr la xu na' bnezruj Jacob chee̱ zrí'ine̱', bi le̱be' José. 6Lu xe̱zr la xu na' gudé̱n Jacob, zre sua Abraham, tu beaj situj. Ba dxeajxreque Jesús xu'e̱ neza, na' gudxé'e̱ dxu'a beaj na'. Naca na zran wagubizra. 7-8Benne' ca' dxuse̱de Jesús xjaque̱' lu xe̱zre Sicar, xeajlegá'awe̱' da xelawe̱'. Dxácate̱ na' bzrin tu nu'ula Samaria dxu'a beaj na' zeajxri'e̱ nisa, na' Jesús guzre̱' le̱':
―Be̱nna nisa xí'aja'.
9Nadxa nu'ula na' beche̱be̱':
―¿Ájazra naca, lue', benne' judío, dxenabu' neda' nisa, naca' nu'ula Samaria?
Caní gunné̱' lawe' da quebe zaj zra' chawe' benne' judío ca' nen benne' Samaria ca'. 10Nadxa beche̱be Jesús:
―Chela nézenu' da dxunna Dios, ne nua' dxenabe̱' lue' nisa xí'aje̱', lue' nábenu' neda', na' neda' gunna' lue' nisa da gunna na lue' xel-la' nabán.
11Na' nu'ula na' guzre̱' Le̱':
―Benne', quebe bi nuxru' cuéaju' nisa, na' beaj nigá nácale̱'e̱ na situj. ¿Ájazra na' gunu' gunnu' neda' nisa chee̱ xel-la' nabán? 12Xra xrtáuntu', Jacob, be̱nne̱' netu' beaj nigá, naga güé'equeze le̱' nisa, ne naga gulé'ajqueze zrí'ine̱', ne be̱ xixre' chee̱'. ¿Nácadxu' szrendxa ca le̱'?
13Jesús beche̱be̱':
―Xúgute̱ benne' dxelé'aje̱' nisa chee̱ beaj nigá welexebílequezne̱' nisa. 14Nu benne' xí'aje̱' nisa da gunézruja' neda', québedxa bílene̱' na, lawe' da nisa na' dxunézruja' neda' galaj na lu xichaj lázrdawe̱' ca tu beaj nisa da gunna na le̱' xel-la' nabán da zeajlí canna.
15Nadxa nu'ula na' guzre̱' Le̱':
―Benne', be̱nna neda' nisa na', chee̱ québedxa gun na ba xen xida' nigá xedajxrí'a nisa.
16Na' Jesús guzre̱' nu'ula na':
―Guxíaj xeajnné̱ benne' chiu', na' xídale nigá.
17Na' beche̱be nu'ula na':
―Quebe nu chilá' benne' chia'.
Nadxa Jesús guzre̱' le̱':
―Da li dxennáu' quebe nu chilá' benne' chiu', 18lawe' da ba guzúale̱nu' gazxu' benne', na' bénnea' zúale̱nu' na'a quebe naque̱' benne' chiu'. Ca naca da nigá gunnáu' da li.
19Gate nu'ula' benne̱' da nigá, na' gunné̱':
―Xran, dxéqueda' nacu' lue' benne' dxuchalaje̱' waláz chee̱ Dios. 20Xra xrtáuntu' ca' bulucá'ana szrene̱' Dios lu xi'a nigá, na' le'e, benne' judío, dxennale dxun na ba xen gucá'ana szrendxu Dios xe̱zre Jerusalén.
21Na' beche̱be Jesús:
―Guxéajle̱ chia', nu'ula. Ba za zra gate le'e gucá'ana szrenle Xradxu Dios, ne quebe gun na ba xen xídale lu xi'a nigá, ne quebe gun na ba xen chéajle Jerusalén. 22Le'e, benne' Samaria, quebe núnbeale nua' dxucá'ana szrenle. Netu' núnbeantu' Nua' dxucá'ana szrentu', lawe' da za' benne' weselá ládujla benne' judío ca'. 23Wazrín zra, ne ba dxezrín zra na', gate benne' ca' da li dxulucá'ana szrene̱' Xradxu Dios, xelune̱' na ne̱ chee̱ Be' Lá'azxa, ne ne̱ chee̱ da li, lawe' da dxaca lazre' Xradxu Dios xulucá'ana szren bénneache Le̱' caní. 24Dios naque̱' Be', na' benne' dxulucá'ana szrene̱' Le̱', dxun na ba xen xulucá'ana szrene̱' Le̱' ne̱ chee̱ Be' Lá'azxa, ne ne̱ chee̱ da li.
25Na' nu'ula na' guzre̱' Le̱':
―Neda' nezda' walá' benne' Mesías (da zéaje̱ na Cristo), na' gate la' Le̱', na' guzéajni'ine̱' dxi'u ca naca xúgute̱.
26Jesús guzre̱' le̱':
―Neda' naca' Bénnea', dxuchálajle̱na' lue'.
27Ca gunné̱' ca', na' belexezrín benne' ca' dxuse̱dene̱', na' belexebánene̱' lawe' da dxuchálajle̱ Jesús tu nu'ula Netúe̱' quebe bexázrjene̱' guche̱be̱' Le̱' bi da dxaca lazre̱', u bizra chee̱n dxuchálajle̱ne̱' nu'ula na'. 28Nadxa nu'ula na' bca'ane̱' dxe'e chee̱' dxu'a beaj na', na' bezé̱'e̱ zexíaje̱' xe̱zre na' naga xeaje̱zre̱' benne' ca':
29―Le da lé'ele tu benne' guzre̱' neda' xúgute̱ da ba be̱na'. ¿Quegá benne' nigá Cristo, Bénnea' sel-la Dios?
30Nadxa beledxúaj benne' ca' xe̱zre na', zjaque̱' naga zua Jesús. 31Dxácate̱ na', benne' ca' dxuse̱de Jesús gulata' xuene̱' Le̱', gulenné̱':
―Benne' Wese̱de, gudagu late'.
32Jesús guzre̱' benne' ca':
―De̱ da dxawa', da quebe núnbeale le'e.
33Nadxa benne' ca' dxuse̱de Jesús gulezú lawe̱' dxuluche̱be ljwezre̱', dxelenné̱':
―¿Núteca bedajgú'e̱ da gudawe̱'?
34Jesús guzre̱' le̱':
―Xela wagu chia' naca na chee̱ guna' da dxaca lazre' Xra', Bénnea' nasel-le̱' neda', ne chee̱ gusexuzra' guna' zrin chee̱'. 35Le'e dxennale: “Xetapa beu' xelápadxu.” Neda' dxapa' le'e, le nna' bénneache zaj naque̱' ca tu lina, da bache naca na xelápadxu. 36Benne' dxelape̱' dxezi'e̱ lazruj chee̱', na' da dxelape̱' naca na chee̱ xelapa bénneache xel-la' nabán da zeajlí canna, chee̱ sua xel-la' dxebé benne' dxaza tu zren nen benne' ca' dxelelape̱'. 37Da li naca ca da dxelenná bénneache: Tu benne' dxaze̱', na' xetúe̱' dxelape̱'. 38Neda' gusel-la' le'e xelápale naga quebe gúzale. Ca' naca na, benne' xula belune̱' zrin gulaze̱', na' le'e dxezile ba neza zrin da belún benne' ca'.
39Benne' zan, benne' xe̱zre na' naga nababa Samaria, guléajle̱'e̱ chee̱ Jesús ne̱ chee̱ xrtizra' nu'ula na', gunné̱': “Guzre̱' neda' xúgute̱ da ba be̱na'.” 40Gate belelá' benne' Samaria ca' naga zua Jesús, na' gulata' xuene̱' Le̱' xegá'ane̱' nen le̱', na' begá'ane̱' na' chupa zra. 41Benne' zandxa guléajle̱'e̱ chee̱ Jesús gate belenne̱' ca da dxenná Le̱'. 42Nadxa gulé̱'e̱ nu'ula na':
―Na'a dxéajle̱ntu' chee̱' quegá tuze ne̱ chee̱ da guzru' lue' netu', na' cá'anqueze lawe' da bénquezentu' netu' chee̱', na' nézentu' da li naque̱' Cristo, Bénnea' guselé̱' ca naca bénneache.
Jesús dxexune̱' zri'ine tu benne' we̱n zrin blau chee̱ xu'u lawe'
43Gudé chupa zra bezá' Jesús xe̱zre ca' zaj nababa Samaria, na' guzé̱'e̱ zéaje̱' naga nababa Galilea. 44Guxíaje̱' na' lawe' da gunnáqueze Jesús, gunné̱': “Tu benne' dxuchalaje̱' waláz chee̱ Dios, quebe dxelapa benne' lazrie̱' le̱' ba lá'ana.” 45Gate bezrine̱' naga nababa Galilea, benne' zaj zre̱'e̱ na' belezí' lu ne̱'e̱ Le̱' du lazre̱', lawe' da xjácaqueze le̱' Laní Pascua da guca na Jerusalén, na' belelé'ene̱' xúgute̱ da be̱n Jesús lu laní na'.
46Nadxa bezrín Jesús xe̱zre Caná naga nababa Galilea naga be̱ne̱' bexaca nisa xrise uva wal-la. Zua lu xe̱zre Capernaum tu benne' we̱n zrin blau chee̱ xu'u lawe', zua tu zrí'ine̱' bi biu quebe chawe' zúabe'. 47Gate ben benne' we̱n zrin blau nigá ba bezá' Jesús naga nababa Judea, ne ba bezrine̱' naga nababa Galilea, na' guxíaje̱' xeajnné̱'e̱ Jesús, na' gutá' xuene̱' Le̱' chéaje̱' lizre̱' xexune̱' bi biu chee̱', bi na' ba zua gátebe'. 48Nadxa Jesús guzre̱' le̱':
―Le'e quebe chéajle̱le chia' che quebe lé'ele xel-la' waca chee̱ xabáa da dxulé'eda'.
49Benne' we̱n zrin blau na' gunné̱':
―Xran, gudázega na'a quebe ne gate zri'ina'.
50Nadxa guzre Jesús le̱':
―Bexíaj lizru'. Naca ban bi chiu'.
Benne' we̱n zrin blau na' guxéajle̱'e̱ chee̱ da guzre Jesús lé̱', na' bezé̱'e̱ zexíaje̱'. 51Gate ba zua xezrine̱' lizre̱', na' benne' we̱n zrin chee̱' xeajlexezrígale̱' le̱', na' gulé̱'e̱ le̱':
―Naca ban zri'inu'.
52Nadxa bche̱be̱' benne' ca' bátala guzú lau bexácabe', na' gulé̱'e̱ le̱':
―Ná'aqueze dxedé wagubizra bedxúaj da la da xu'ube'.
53Nadxa benne' we̱n zrin blau na' bexúnene̱' guca na la' ná'queze gate guzre Jesús le̱': “Naca ban zri'inu'.” Ca'an guca, le̱', ne xúgute̱ benne' zaj zra' lizre̱' guléajle̱'e̱ chee̱ Jesús.
54Da nigá naca na xel-la' waca zren da gudxupe' da be̱n Jesús gate bezrine̱' naga nababa Galilea.
Currently Selected:
San Juan 4: zat
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.