Hebreos 1
1
Dios ba bchálajle̱ne̱' dxi'u lu dxu'a Zrí'inequeze̱'
1Dios bchálajle̱ne̱' xra xrtáudxu ca' gate nate zane' lasa, ne zane' ca bchálaje̱' lu dxu'a benne' ca' buluchálaje̱' waláz chee̱'. 2Na'a, lu zra caní, Dios ba bchálajle̱ne̱' dxi'u lu dxu'a Zrí'inequeze̱'. Dios be̱ne̱' xe̱zr la xu nigá lu na' Zrí'ine̱' nigá, ne ba be̱ne̱' naca chee̱' xúgute̱ da ca' be̱ne̱'. 3Zri'ine Dios nigá naque̱' Benne' dxulé'ene̱' ca naca xel-la' szren chee̱ Dios, ne naque̱' ca da nácaqueze Dios, na' nuxre̱' xúgute̱ da ca' nune̱', dxuchínene̱' dizra' chee̱' da nápale̱'e̱ na xel-la' waca. Gate ba gudúe̱' dul-la da nabágadxu xeajxedxé'e̱ chalá'a xabe̱la chee̱ lataj blau chee̱ Dios xabáa.
Zri'ine Dios nácadxe̱' blau ca gubáz chee̱ xabáa ca'
4Zri'ine Dios nácadxe̱' blau ca gubáz chee̱ xabáa ca' chee̱ Dios, ca naca La Cristo da bzua Dios, nácadxa na blau ca la gubáz chee̱ xabáa ca'. 5Dios cabata' guzre̱' tu gubáz chee̱ xabáa ca guzre̱' Cristo, gunné̱':
Lue' nacu' Zri'ina'.
Neda' nácaqueza' Xrau' na'a zra.
Cá'anqueze cabata' guzre̱' tu gubáz chee̱ xabáa ca gunné̱' chee̱ Cristo:
Neda' gaca' Xre̱',
na' Le̱' gaque̱' Zri'ina'.
6Gate bzue̱' Zrí'ine̱' lu xe̱zr la xu nigá, gunné̱':
Xúgute̱ gubáz chee̱ xabáa ca' xelue lá'ane̱' Le̱'.
7Ca naca chee̱ gubáz chee̱ xabáa ca', Dios gunné̱':
Dsesel-le̱' gubáz chee̱' ca' ca tu be' da dxaca,
ne dxuchínene̱' gubáz we̱n zrin chee̱' ca' ca tu xi'.
8Ca naca chee̱ Zrí'ine̱', gunná Dios:
Lataj blau chiu' lue', Dios, zúate̱queze.
Xel-la' dxenná bea chiu' naca na xlátaje̱.
9Nazri'inu' da xlátaje̱, ne dxezra'u da cale̱la.
Chee̱ le̱ na' Dios chiu' ba bé̱nnadxe̱' Lue'
xel-la dxebé ca da bnézruje̱' bi ljwezru' ca'.
10Cá'anqueze guzre̱' Le̱':
Lue', Xran, nédxudaute̱ be̱nu' xe̱zr la xu.
Nen xel-la' waca chiu' be̱nu' xabáa.
11Da caní weledé chee̱ na, san Lue' súate̱quezu'.
Xúgute̱ da caní welaca gula ca zra lana bénneache.
12Na' xutubu' na ca tu ladxe',
ne gucha'u na ca dxun tu benne' dxuché̱'e̱ zra lane̱'.
Lue' zúaquezu' chadía chacanna,
na' xel-la' nabán chiu' quebe téqueze chee̱ na.
13Dios cabata' guzre̱' tu gubáz chee̱ xabáa ca guzre̱' Zrí'ine̱', gunné̱':
Gudxe'e chalá'a xabe̱la chia',
cadxa guzúa' benne' ca' dxeledábague̱' Lue' zran ni'u.
14Xúgute̱ gubáz chee̱ xabáa ca' zaj naque̱' be' ca' dxelún zrin chee̱ Dios, na' dxesel-le̱' gubáz chee̱ xabáa ca' chee̱ xelácale̱ne̱' benne' ca' dxelezi'e̱ xel-la' weselá.
Currently Selected:
Hebreos 1: zat
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.