Salmos 35
35
1Xran, bsizre benne' ca' dxelenné̱' chia'.
Gudíl-lale̱ benne' ca' dxeledíl-lale̱ne̱' neda'.
2Gudá gucu'uju' neda' lu wedil-la,
ne gúcale̱ neda'.
3Gude̱l-la xia chee̱ wedil-la chee̱ guzagu' benne' ca'
dxululague̱' neda'.
Guzre neda' nacu' Benne' dxuselé̱' neda'.
4Be̱n xelexedué'e, ne xeleque zréaje benne' ca'
dxelaca lazre̱' xelútie̱' neda'.
Be̱n xuluzrunnuj, ne xelexedué'e benne' ca' dxelaca lazre̱'
xelune̱' chia' da cale̱la.
5Be̱n xelaque̱' ca tu xizre be̱be da dxua be',
ne gusel-la gubáz chee̱ xabáa chiu' chee̱ gulague̱' benne' ca'.
6Be̱n chul-la neza naga xeledée̱', na' gaca na naga xelebile̱',
ne gusel-la gubáz chee̱ xabáa chiu' chee̱ gulague̱' benne' ca'.
7Bulucache̱' tu xralaj chee̱ que̱la na neda',
ne quegá bi nuna' chee̱'.
Gule̱ne̱' tu xe̱dxu naga cheajcházia' neda',
ne quegá bi de̱ da dxagu na zria chia'.
8Gusel-la da guzría xi na benne' ca', ne quebe xeleque be'ene̱'.
Be̱n que̱la xralaj chee̱' na' lé̱queze̱',
ne cheajlecházie̱' naga xelebía xi'e̱.
9Nadxa béle̱'e̱quezda' ca naca da nun Xránadxu Dios.
Sua' lu da ba neza lawe' da bselé̱' neda'.
10Xúgute̱ zrita xu'a xelenná na: Xran, ¿núzraqueze naca
ca nacu' Lue'?
Dxuseláu' benne' xache' lu na' benne' wál-ladxa ca le̱',
ne benne' dxexazrje lu na' benne' dxebane̱' da du de̱ chee̱'.
11Belasa benne' dxelexeche̱be̱' da we̱n lazre'.
Gulawe̱' zria neda' chee̱ tu da quebe dxaca be'eda'.
12Belexebi'e̱ neda' da cale̱la chee̱ tu da xrlátaje da be̱na',
chee̱ xuluzúe̱' neda' lu da ba xa'.
13Neda', gate quebe chawe' gulezúe̱', bewi'ine lazra'.
Be̱na' gubasa da bsaca zi na neda',
ne du lazra' bláwizra' Dios chee̱ xexune̱' benne' ca'.
14Bewi'ine lazra' chee̱ benne' ca' ca dxuna' chee̱
le sa' ljwezra', u chee̱ bi bíchequeza'.
Guzúa' lu da baxache' ca dxun benne' chee̱ xrne̱'e̱ gate dxatie̱'.
15Gulebé benne' ca' gate zua' lu da ba xa', ne belezrague̱'.
Belezraga benne' dxeledábague̱' neda',
benne' we̱n da cale̱la, na' chadite̱ gule̱l-le̱' neda'.
Tu belúezqueze̱' neda', ne quebe gulezúa zrie̱'.
16Bulusaca zi'e̱ neda', ne belún le̱' chia',
ne gulagu lazxe̱' lu xel-la' dxelezrá'a chee̱' neda'.
17Xran, ¿ájate̱ scha' gu'u latja da dxelune̱'?
Bselá neda' lu na' benne' caní dxuluzría xi'e̱ neda',
benne' zaj naque̱' ca be̱zre xixre' ca'.
18Xapa' Lue': Xcalenu', láwela benne' zan ca' zaj
nadupe̱' chiu' Lue'.
Tu güe lá'anazqueza' Lue' ládujla benne' zan ca'.
19Quebe gu'u lataj xelebé benne' ca' dxeledábague̱' neda',
ne quebe bi nuna' chee̱'.
Quebe gu'u lataj xelún la benne' ca' chia',
benne' dxelecuídene̱' neda',
ne quebe bi de̱ da dxagu na zria chia'.
20Benne' caní quebe dxelaca lazre̱' xelezúe̱' lu
xel-la' dxebeza zri lazre',
na' lu xel-la' dxelezí xe̱ chee̱' dxelenné̱' chee̱ benne' ca'
dxelebeza zri lazre̱' lu xe̱zr la xu nigá.
21Belún le̱' chia'.
Gulenné̱': “¡E! ¡E! ¡Ba blé'entu' da nune̱'!”
22¡Xran, ba blé'equeznu' da dxelune̱'!
¡Quebe sua zriu'!
¡Xran, quebe gusanu' neda'!
23¡Guxasa, guzúa guchi'u chia'!
¡Gudá, Xrana' Dios, chee̱ gácale̱nu' neda'!
24¡Bchi'a chia' lu da xrlátaje chiu', Xrana' Dios!
¡Quebe gu'u benne' ca' lataj xuluzrizre̱' chia'!
25¡Quebe gu'u lataj xelenné̱': “Ba guca da dxezá lázredxu!”
¡Quebe xelenné̱': “Ba bendxu chie̱'!”
26Be̱n xelexedué'e, ne xeleque zréaje xúgute̱ benne' ca'
dxelebene̱' gate bi dxaca chia'.
Bsi'e̱ xel-la' stu', ne be̱n xelaca xala benne' ca'
dxeledábague̱' neda'.
27Be̱n xelúl-la, ne xelebé benne' ca' zaj de̱'e̱ neda',
chee̱ xelennáqueze̱': “Tu xegá'ana szrénzqueze Xránadxu,
Bénnea' dxezá lazre̱' sua lu xel-la' dxebeza zri lazre'
benne' we̱n zrin chee̱'!”
28Tu guchálajzqueza' chee̱ da xrlátaje chiu',
ne chee̱ da dxue lá'anaqueze na Lue' te zra chizrela.
Currently Selected:
Salmos 35: zat
Highlight
Share
Compare
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.
