San Mateo 3
3
Juan dxegu'e̱ lban le̱'e̱ xixre' lawe' lataj
(Mr. 1.1-8; Lc. 3.1-9, 15-17; Jn. 1.19-28)
1Ca lu zra ca' bla' Juan, bénnea' bchue̱' bénneache nisa, dxegu'e̱ lban le̱'e̱ xixre' lawe' lataj naga nababa Judea. 2Dxenné̱':
―Le xebí'i lazre' lawe' da ba zua gáguze zra nna bea Dios lu xe̱zr la xu nigá.
3Juan nigá naque̱' bénnea' bchalaj Isaías chee̱'. Isaías bchálaje̱' waláz chee̱ Dios gate bzuaje̱' caní:
Dxene chi'i benne' dxebezre xe̱'e̱ le̱'e̱ xixre' lawe' lataj, dxenné̱':
Le gucá'ana chawe' neza naga te Xránadxu.
Le xulí neza lase ca' lau Le̱' naga tée̱'.
4Zra lana Juan nigá nune na xicha zra camello, ne bazxu dxu'a le̱'e̱ chee̱' naca na xide, na' dxawe̱' biche xuaj, ne bzrína'dau' chee̱ bézudau'. 5Belezrín benne' belenne̱' ca da dxuchalaj Juan, benne' zá'aque̱' xe̱zre Jerusalén, ne benne' chee̱ xúgute̱ xe̱zre ca' zaj nababa Judea, ne benne' zá'aque̱' xé̱zredu ca' zaj nnita gáguze xe̱gu Jordán. 6Ca gulexrúale̱pe̱' dul-la chee̱', Juan nigá bchue̱' benne' ca' nisa lu xe̱gu Jordán.
7Gate ble'e Juan benne' zan benne' xudau' fariseo, ne benne' xudau' saduceo zá'aque̱' chee̱ xelexedxúe̱' nisa, na' guzre̱' benne' ca':
―Le'e, be̱ snia. ¿Zua nu guzre le'e guzrúnnajle da ba xa' da za'? 8Le gun da xrlátaje da xelunna bea na ba bebí'i lázrele. 9Quebe guéquele lale, dxennale le'eze: “Nalatu' lawe' da nácantu' xrtia Abraham.” Neda' dxapa' le'e: Dios waca xexune̱' xiaj caní zri'ine xrtia Abraham. 10Le'e nácale ca xaga ca'. Xia waga bache nalá na chee̱ chugu na xaga ca', na' xúgute̱ xaga ca' quebe dxelebía na da zixre chawe' welechugue na, na' xelezxe na lu xi'. 11Da li neda' dxuchúa' le'e nisa, da dxunna bea na ba bebí'i lázrele, san Bénnea' ze̱'e̱ ca te chia' neda', Le̱' gune̱' ca da zéaje̱ xel-la' dxedxúa nisa, guzúe̱' le'e Dios Be' Lá'azxa, ne xi' chee̱'. Benne' nigá nácadxe̱' blau ca neda', na' quebe zaca' cuéajza' zrele̱' xu'u ni'e̱. 12Cá'anqueze nácale ca zrua' xtila. Benne' nigá ba nu'e̱ da dxun be', cuéaje̱' xrte zrua' xtila na', na' xebéaje̱' chalá'ala xizre chee̱ na, na' xuzrá chawe̱' zrua' xtila na' lu da'a chee̱ na, san guzezxe̱' xizre na' lu xi' da quebe xexula na.
Da guca gate gudxúa Jesús nisa
(Mr. 1.9-11; Lc. 3.21-22)
13Nadxa Jesús bezé̱'e̱ naga nababa Galilea, na' bezrine̱' dxu'a xe̱gu Jordán naga zua Juan chee̱ guchúe̱' Le̱' nisa. 14Nédxute̱ Juan quebe guca lazre̱', na' dxe̱'e̱ Jesús:
―Lue' dxal-la' guchú'u neda' nisa. Quebe zaca' neda' guchúa' Lue' nisa.
15Jesús guzre̱' le̱':
―Be̱' lataj gaca caní na'a. Dxun na ba xen gundxu xúgute̱ da xrlátaje lau Dios.
Nadxa Juan be̱ne̱' ca'. 16Gate bexuzre gudxúa Jesús nisa, na' la bxálajte̱ xabáa, na' ble'e Juan Be' Lá'azxa chee̱ Dios dxétaje̱' ca tu gugu chíchidau', zeajsúaba' lawe Jesús. 17Nadxa ben tu chi'i lu be', gunné̱':
―Benne' nigá naque̱' Zrí'inequeza' nazrí'ite̱ lazra'. Dxezaca ba lázrele̱na' Le̱'.
Currently Selected:
San Mateo 3: zat
Highlight
Share
Copy
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.