San Mateo 28

Ca guca gate bebán Jesús

(Mr. 16.1-8; Lc. 24.1-12; Jn. 20.1-10)

1Ca gudé chee̱ zra dxulupá'ana judío ca', ca za dxaní' zra nedxu, na' María Magdalena, ne xetú María na' xjaque̱' xeajlenné̱'e̱ ba chee̱ Jesús. 2Chadite guzrú'le̱'e̱ na lawe' da betaj tu gubáz chee̱ xabáa chee̱ Xránadxu, na' bzrine̱' dxu'a ba na', ne bequé̱'e̱ xíajta'a zren na' da zrua na dxu'a ba na', na' gudxé'e̱ lawe na. 3Gubáz na' dxácatite legale̱', ne naca chiche zra lane̱' ca bezxe'. 4Gate belelé'e benne' dxjaque̱' wedil-la gubáz chee̱ xabáa na', na' belezrízene̱' xel-la' dxelezrebe, ne belexegá'ane̱' ca benne' gate ca'. 5Nadxa gunná gubáz chee̱ xabáa na', dxe̱'e̱ nu'ula ca':

―Quebe zrébele. Nezda' dxexílajle Jesús, bénnea' gudé̱'e̱ xaga béguaj. 6Quebe zue̱' nigá lawe' da ba bebane̱', cáte̱ze na' gunné̱'. Le da nna'le lu ba naga gulegú'e̱ Le̱'. 7Le cheajxáquezega, le cheaje̱zre benne' ca' bsé̱dene̱' ba bebane̱' ládujla benne' gate, na' chéaje̱' ga nababa Galilea nédxudxa ca le'e. Na' lé'ele Le̱'. Da nigá naca na da nabaga'a xapa' le'e.

8Nadxa nu'ula ca' besiá'que̱' dxu'a ba na', zeajxaca chégüe̱'. Dxelezrebe̱', ne dxelebene̱'. Zjaque̱' zeajlegue̱zre̱' benne' ca' bse̱de Jesús. 9Dxácate̱ na' Jesús bchague̱' nu'ula ca', ne bgape̱' le̱' diuzre. Belezrine̱' lau Jesús, dxelúe lá'ane̱' Le̱', ne bulunide̱' ni'a Jesús. 10Le̱' guzre̱' nu'ula ca':

―Quebe zrébele. Le chjaca, le cheajé̱zre bi bícha'dau' ca' dxal-la' chjaque̱' naga nababa Galilea. Na' xelexelé'ene̱' neda'.

Ca da gulenná benne' dxjaque̱' wedil-la

11Dxácate̱ zjaca nu'ula ca', na' benne' ca' dxjaca wedil-la gulu'e̱ xe̱zre, ne buluchálajle̱ne̱' benne' xíchaje̱ ca' chee̱ bxruze ca' ca da guca. 12Benne' xíchaje̱ ca' buluchálajle̱ne̱' benne' gula sina ca' chee̱ xelune̱' tuze dizra'. Nadxa bulunézruje̱' benne' dxjaque̱' wedil-la dumí zrente̱. 13Dxelenné̱':

―Le nna le'e belelá' benne' ca' bse̱de Jesús na' chizrela, dxácate̱ dxásele le'e, na' belexexú'e̱ be̱l-la' dxen chee̱'. 14Che benne' dxenná be̱'e̱ na' xenne̱' da nigá, netu' guchálajle̱ntu' le̱', ne gucá'ana cháwentu' chee̱ quebe bi gaca chee̱le le'e.

15Nadxa benne' dxjaque̱' wedil-la gulezí' lu ne̱'e̱ dumí na', na' besiá'que̱' belune̱' ca bache zaj nézene̱'. Da nigá naca na ca dxelenná judío ca' zéajte̱ lu zra na'a zra.

Jesús dxesel-le̱' benne' gubáz chee̱' ca'

(Mr. 16.14-18; Lc. 24.36-49; Jn. 20.19-23)

16Nadxa xjaca benne' chinéaj ca' bse̱de Jesús, na' belezrine̱' lu xi'a naga ba guzre Jesús le̱'. 17Gate belelé'ene̱' Jesús, na' bulucá'ana szrene̱' Le̱'. Bal-le̱' gulaca chupa lazre̱'. 18Nadxa Jesús gubigue̱' naga zaj zra' benne' ca', na' guzre̱' le̱':

―Neda' ba nazí' lu na'a ca naca xel-la' dxenná bea xabáa, ne lu xe̱zr la xu nigá. 19Chee̱ le̱ na' le chjaca, le cheajchálajle̱ benne' zaj zre̱'e̱ du ca naca xe̱zr la xu nigá, ne le cheajsé̱dene̱' ca naca da bsé̱deda' le'e. Le guchúe̱' le̱' nisa lu La Xra', ne lu La Zrí'ine̱', ne lu La Be' Lá'azxa. 20Le gusé̱de-ne̱' xelaque̱' wezúa dizra' ca naca da ba gunná be'eda' le'e, na' neda' tu súale̱zqueza' le'e xúgute̱ zra cadxa cheajsé̱ chee̱ xe̱zr la xu nigá. ¡Ca'an gaca na!

Currently Selected:

San Mateo 28: zat

Highlight

Copy