SAN JUAN 3
PLSNT

SAN JUAN 3

3
Are Jesús nichja ngain Nicodemo
1Vehe ná xifariseo vinhi Nicodemo, mé cjoi ná xí importante ngayé chojni judío. 2Nicodemo jihi ná ttie cjoi para joitsjehe Jesús co ndac̈ho:
―Maestro, nona na que Dios rroanha jaha para sinchecoanna ni ra, ixin ẍonhi chojni nchao sinchehe tsje cosa inchin jaha rrinchehe si Dios coha ngain chojni mé.
3Cottimeja ndac̈ho Jesús:
―Janha rrindattjo ndoa, que ẍonhi chojni nchao rrochonda parte ngain tti ttetonha Dios si jehe tsoncjiha iná.
4Nicodemo ndac̈ho:
―Pero ¿queẍén ná xí ojie rrocjan tsoncjihi iná? ¿Apoco nchao rrocjan xa ngaxinhi tsehe janné xa para rrocjan xa tsoncjihi xa iná?
5Co Jesús ndac̈ho:
―Janha rrindattjo ndoa, que tti chojni que tsoncjixinha de ixin jinda co de ixin Espíritu Santo c̈hoha sehe ngain parte tti ttetonha Dios. 6Tti toncjixin de ngain chojni, jehe jichjon jeho de ngain cuerpoe, co tti otoncjihi de ixin Espíritu Santo, jehe ojichjon de ngain espiritue. 7ẍaonha que rrindattjo: “Cainxin chojni chonda na que tsoncjihi na iná.” 8c̈hintto danotte ttinó jehe rinao, co jaha ttinhi ruido que nchechjian c̈hintto, pero noaha de ttinó ttixin c̈hintto co ni ttinó sattji c̈hintto. Jañá cai chojni c̈hoha ttinxin na queẍén chojni toncjihi de ixin Espíritu Santo.
9Cottimeja, Nicodemo cjan joanchiangui iná:
―¿Queẍén nchao tsonhe jihi?
10Jesús ndac̈ho:
―Jaha, que ná jian maestroe ley de Dios para chojni Israel, ¿aẍa noaha cain cosa jihi? 11Janha rrindattjo ndoa, que janha na nichja na de lo que tti nona na co janha na nichja na de lo que tti vicon na, pero jaha ra ditticaonha ra tti ndattjo ra janha na. 12Si ditticaonnaha ni ra are rrinichjaha ra de ixin cosa ngataha nontte jihi, ¿queẍén sitticaon ra si rronichjaha ra de ixin cosa que jí ngajni?
13’Ẍonhi chojni coajinhi para ngajni, sino janha, tti Xí que joixin de ngajni, co janha rrihi nttiha. 14Co jañá inchin Moisés joinchechjian ná conché de chia co coenganito conché mé nttá ngagaha jna, cai janha, tti Xí que joixin de ngajni, chonda que saringanito ná nttá 15para que cainxin chojni que ditticaon nganji na janha, chojni mé tsjiha na ngain infierno, sino que rrochonda na iná vida naroaxin que ẍonhi tiempo tsjexin.
Queẍén Dios rinao cainxin chojni
16’Dios anto rinao cainxin chojni ngataha nontte, mexinxin joanjo tti nacoaxinxon Xenhe para que cainxin chojni que ditticaon ngain jehe Xan tsjiha na ngain infierno, sino que rrochonda na iná vida naroaxin que ẍonhi tiempo tsjexin. 17Dios jeha rroanha Xenhe ngataha nontte para sinchecastigá Xan chojni; Dios rroanha Xenhe para tsjenguijna Xan cain chojni para rrochondaha na castigo de cainxin cosa jianha que nchehe na.
18’Tti chojni que ditticaon ngain Xenhe Dios, chojni mé rrochondaha na castigo, pero tti chojni que ditticaonha, mé Dios ondac̈ho ixin sinchecastigá na ixin ditticaonha na tti nacoaxinxon Xenhe Dios. 19Dios sinchecastigá tti chojni que ditticaonha Jesucristo ixin are Jesucristo joí ngataha nontte, jehe joí inchin joadingasán, co jehe na icha joincheẍoxinhi na tti naxin xehe ixin vanchehe na cosa jianha. 20Cain chojni que nchehe jianha ningaconhe na joadingasán co tonchienha na ngain tti jí joadingasán para que tsononxinha tti jianha que tenchehe na. 21Pero chojni que tenchehe jian, chojni mé tonchienhe na ngain tti jí joadingasán para que sicon icha chojni que jehe na tenchehe na inchin rinao Dios.
Juan, tti vancheguitte chojni, cjan nichja de ixin Jesús
22Después de cain jihi, Jesús cjoi conixin tti chojni que vacao para ngain nonttehe Judea, co vintte na canxion tiempo nttiha. Co joincheguitte na chojni nttiha. 23Cai tiempo mé, Juan joincheguitte chojni ngain ná rajna que dinhi Enón, chian ngain rajna Salim ixin nttiha vehe atto yé jinda co chojni vaquí na co vajiguitte na. 24Jihi conhe icha saho que are Juan coiaxinhi na ngain cárcel.
25Cottimeja canxion chojni que vacao Juan joinchediscutí na ngain canxion chojni judío de ixin queẍén icha jian ncheguitte na chojni para toroaxin na de tti jianha que nchehe na. 26Mexinxin cjoi na co joindache na Juan:
―Maestro, ¿aẍaxaon tti vehe nganji are jaha joarihi lado c̈hinxin nchanho de río Jordán, tti jaha ndachjenji ni ra? Jai jehe mé jincheguitte chojni co cainxin na teditticaon na jehe.
27Cottimeja Juan ndac̈ho:
―Ni ná chojni c̈hoha rrochonda joachaxin si Dios rrochjeha. 28Jaha ra mismo coinna ra are ndac̈hjan claro que janha jeha tti Cristo que Dios rroanha, pero janha tti chojni que joihi icha saho de jehe. 29Are chojni tottehe na, tti chonda xannovia, mé tti novio, co tti amigoe xinovio jí nttiha co atto ché are ttinhi nichja xinovio. Jañá janha jai cai anto chahna are chojni cjoi na ngain Jesús. 30Jehe chonda que icha co icha importante sehe, co janha chonda que sarihi icha co icha menos importante.
Juan nichja de ixin tti ttixin de ngajni
31Juan ndac̈ho cai:
―Tti ttixin de ngajni chonda icha tsje joachaxin de cainxin. Co tti ttixin de ngataha nontte jehe de ngataha nontte, co nichja de ixin cosa de ngataha nontte. Pero tti ttixin de ngajni, jehe chonda joachaxin ngain cainxin cosa, 32co nichja de ixin tti jehe vicon co tti jehe coinhi, pero ẍonhi chojni ditticaon tti jehe ndac̈ho. 33Pero si c̈hoan ni ditticaon, jañá ẍago ixin jehe ditticaon que Dios ndac̈ho tti ndoa. 34Jehe tti Dios rroanha nichja palabré Dios, ixin Dios danjo Espíritu Santo ngain jehe hasta tti ic̈hoha. 35Ndodé rinao Ndo jehe, co chjé Ndo cainxin joachaxin. 36Chojni que ditticaon Xenhe Ndo chonda na iná vida naroaxin que ẍonhi tiempo tsjexin. Pero tti rinaoha ditticaon Xenhe Ndo, rrochondaha vida mé, co sayé tti anto soji castigoe Dios.

© 1982, Wycliffe Bible Translators, Inc.

Learn More About Tti jian joajné Jesucristo