ÉFÉSUS 2
2
Oné-mai Mata Nggere-oné Mosé
2:1-10
1Danong méu poli matas landing le lagéng agu ndékoks. 2Du hitu méu mosé lut ruku de lino ho’o, te lorong ata cau kuasa de awang ngong nai hitut weger kéta oné bahi-réha ata toé junggu agu Mori Keraéng. 3Bo danong sanggéd taung ité cama kolé ného isé. Du hitu mosé dité lut kaut belek da’at de weki agu nai dité. Ce-tu’ungn ité du hitu hena le rabo de Mori Keraéng cama ného ata bana situ. 4Maik ali mésén lembak de Mori Keraéng, Hia momang tu’ung ité 5wiga du rémé mata naid landing le sanggéd lagéng, Hia pandé mosé kolét ité cama-cama agu hi Kristus. Jari, tara selamaks méu, landing le nai di’a de Mori Keraéng. 6Woko ité poli nai ca anggit agu hi Kristus Yésus, Mori Keraéng pandé mosé kolét ité cama-cama agu hi Kristus kudut perenta cama oné Surga. 7Pandé hitu le Mori Keraéng kudut du nggere-olon tai, manusia ngancéng noing, co’oy mésén momang de Mori Keraéng. Momang méséN hitu toto oné ité létang laing hi Kristus Yésus. 8Woko méu imbi oné hi Yésus Kristus, itu tara momang agu pandé selamaks méu le Mori Keraéng. 9Selamak de méu hitu toé cir landing le réboks, maik ali widang de Mori Keraéng, wiga néka manga ata mésé nai landing le hitu. 10Ité ho’o ata dédék de Mori Keraéng ai nai ca anggit hi Kristus Yésus kudut pandé sanggéd gori di’a, ata bolon polig ambin le Mori Keraéng. Ngoéng Diha kudut ité selamak moséd.
Nai Ca Anggit Oné Hi Kristus
2:11-22
11Oé asé-ka’én ca imbi, meu ata toé wa'u Yahudi! Damang nuk dé, co’oy mosé de méu danong: ata Yahudi situt poli sunatd caro méu “ata toé sunatm”, ngong ata poli wetik wekid le limé de manusia. 12Du hitu méu toé di nai ca anggit agu hi Kristus. Méu ata long agu toé rékéng ného ro’éng Israel ata pilé le Mori Keraéng. Du hitu, méu toé tiba maki oné wérét hitut poli rekén. Ali hitu, mosé de méu oné lino ho’o toé manga bengkes agu toé manga Mori Keraéng. 13Maik te ho’on ga, méu poli nai ca anggit agu hi Kristus Yésus hiot danong “tadang”, poli cirik “ruis” landing le mata Diha oné haju panggol. 14Ai weki Run hi Yésus Kristus ciri ata hambor ité. Hia pandé nai ca anggit sanggéd ata Yahudi agu ata toé Yahudi te ciri ca wa’u. Turéng rahit isé, ngong maca tau disé, polig rencon li Kristus oné condo weki Run. 15Adak Taurat data Yahudi agu sanggéd perentan polig koarn li Yésus Kristus wiga sua wa’u situ ciri ca wa’u weru ata nai ca anggit agu Hia. Le hitu dé, hi Kristus pandé hambor. 16Le mata di Kristus oné haju panggol, Hia poli pandé neki cad sua wa’u situ, wiga ampusd maca tau disé. 17Hia mai te ba keréba hambor-libur latangt méu ata toé Yahudi ata “tadang” oné-mai Mori Keraéng, agu latang ata Yahudi atat “ruis” agu Mori Keraéng. 18Lut hi Yésus Kristus, Nai Nggeluk pandé ruis agu Mori Keraéng Ema sanggéd ité ata Yahudi ko ata toé Yahudi. 19Nenggitu dé, méu toég kolé rékéng ného ata long ko ata mai pé’ang-mai, maik cama-cama ciri ro’éng de Mori Keraéng. 20Méu poli hesé bétan ligéng ata tena le sanggéd rasul agu le sanggéd nabi, agu hi Kristus Yésus dé ciri watu menggin. 21Hia dé ata pandé heséd sanggéd mbaru situ, ciri mbaru ngaji latangt Mori Keraéng. 22Ai nai ca anggit agu hi Kristus, méu kolé pandé hesé ciri osang ka’éng de Mori Keraéng agu Nai NggelukN.
Currently Selected:
ÉFÉSUS 2: BMNT
Highlight
Copy
Compare
Share
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.
ÉFÉSUS 2
2
Oné-mai Mata Nggere-oné Mosé
2:1-10
1Danong méu poli matas landing le lagéng agu ndékoks. 2Du hitu méu mosé lut ruku de lino ho’o, te lorong ata cau kuasa de awang ngong nai hitut weger kéta oné bahi-réha ata toé junggu agu Mori Keraéng. 3Bo danong sanggéd taung ité cama kolé ného isé. Du hitu mosé dité lut kaut belek da’at de weki agu nai dité. Ce-tu’ungn ité du hitu hena le rabo de Mori Keraéng cama ného ata bana situ. 4Maik ali mésén lembak de Mori Keraéng, Hia momang tu’ung ité 5wiga du rémé mata naid landing le sanggéd lagéng, Hia pandé mosé kolét ité cama-cama agu hi Kristus. Jari, tara selamaks méu, landing le nai di’a de Mori Keraéng. 6Woko ité poli nai ca anggit agu hi Kristus Yésus, Mori Keraéng pandé mosé kolét ité cama-cama agu hi Kristus kudut perenta cama oné Surga. 7Pandé hitu le Mori Keraéng kudut du nggere-olon tai, manusia ngancéng noing, co’oy mésén momang de Mori Keraéng. Momang méséN hitu toto oné ité létang laing hi Kristus Yésus. 8Woko méu imbi oné hi Yésus Kristus, itu tara momang agu pandé selamaks méu le Mori Keraéng. 9Selamak de méu hitu toé cir landing le réboks, maik ali widang de Mori Keraéng, wiga néka manga ata mésé nai landing le hitu. 10Ité ho’o ata dédék de Mori Keraéng ai nai ca anggit hi Kristus Yésus kudut pandé sanggéd gori di’a, ata bolon polig ambin le Mori Keraéng. Ngoéng Diha kudut ité selamak moséd.
Nai Ca Anggit Oné Hi Kristus
2:11-22
11Oé asé-ka’én ca imbi, meu ata toé wa'u Yahudi! Damang nuk dé, co’oy mosé de méu danong: ata Yahudi situt poli sunatd caro méu “ata toé sunatm”, ngong ata poli wetik wekid le limé de manusia. 12Du hitu méu toé di nai ca anggit agu hi Kristus. Méu ata long agu toé rékéng ného ro’éng Israel ata pilé le Mori Keraéng. Du hitu, méu toé tiba maki oné wérét hitut poli rekén. Ali hitu, mosé de méu oné lino ho’o toé manga bengkes agu toé manga Mori Keraéng. 13Maik te ho’on ga, méu poli nai ca anggit agu hi Kristus Yésus hiot danong “tadang”, poli cirik “ruis” landing le mata Diha oné haju panggol. 14Ai weki Run hi Yésus Kristus ciri ata hambor ité. Hia pandé nai ca anggit sanggéd ata Yahudi agu ata toé Yahudi te ciri ca wa’u. Turéng rahit isé, ngong maca tau disé, polig rencon li Kristus oné condo weki Run. 15Adak Taurat data Yahudi agu sanggéd perentan polig koarn li Yésus Kristus wiga sua wa’u situ ciri ca wa’u weru ata nai ca anggit agu Hia. Le hitu dé, hi Kristus pandé hambor. 16Le mata di Kristus oné haju panggol, Hia poli pandé neki cad sua wa’u situ, wiga ampusd maca tau disé. 17Hia mai te ba keréba hambor-libur latangt méu ata toé Yahudi ata “tadang” oné-mai Mori Keraéng, agu latang ata Yahudi atat “ruis” agu Mori Keraéng. 18Lut hi Yésus Kristus, Nai Nggeluk pandé ruis agu Mori Keraéng Ema sanggéd ité ata Yahudi ko ata toé Yahudi. 19Nenggitu dé, méu toég kolé rékéng ného ata long ko ata mai pé’ang-mai, maik cama-cama ciri ro’éng de Mori Keraéng. 20Méu poli hesé bétan ligéng ata tena le sanggéd rasul agu le sanggéd nabi, agu hi Kristus Yésus dé ciri watu menggin. 21Hia dé ata pandé heséd sanggéd mbaru situ, ciri mbaru ngaji latangt Mori Keraéng. 22Ai nai ca anggit agu hi Kristus, méu kolé pandé hesé ciri osang ka’éng de Mori Keraéng agu Nai NggelukN.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Bahasa Manggarai New Testament © Indonesian Bible Society, 2013.