John 20
20
Jesus Come Back Alive
(Songs 16:9-10)
1Da firs day in da week, Mary from Magdala come back to da place dey wen bury Jesus. She come dea wen dark still yet. She see da big stone Jesus frenz wen use fo close da place afta dey bury um. But now, da stone stay on da side. 2So she run ova dea wea Simon Peter stay, an me, da guy dat Jesus get love an aloha fo, I stay dea wit Peter. She tell us, “Dey wen take Da One In Charge away! He no stay inside da place dey wen bury um! We donno wea dey put um!”
3So me an Peter run fo go dat tomb. 4Us guys run togedda, but me, I run mo fas an come to da place firs. 5I bend down, an look inside, an I spock all da linen kine cloths laying ova dea, da ones dey wen wrap Jesus inside. But I neva go inside da place dey bury Jesus.
6Den Peter come afta. He go inside da place dey wen bury Jesus, an see da cloths dey use fo wrap Jesus inside fo bury him. Da cloths stay lay ova dea too. 7He see da odda cloth dat was aroun Jesus head, all fold up on da odda side. 8Den me, dat wen come dea firs, I go inside too. An I see wat stay dea, an I come shua bout wat Jesus tell befo time, dat he goin come back alive. 9Cuz us guys still yet neva undastan wat da Bible tell from befo time dat Jesus gotta come back alive from mahke. 10Den us two Jesus guys go back da place we stay.
Mary From Magdala See Jesus
11Mary stay outside da place dey wen bury Jesus, an she stay crying. Wen she still crying, she bend down, an look inside. 12She spock two angel guys wit white clotheses. Dey sit ova dea wea Jesus body wen stay befo time, one by wea da head wen stay, an da odda by wea da feets wen stay. 13Dey tell, “Lady, how come you stay crying?”
She tell dem, “Cuz dey take away Da One In Charge a me, an I donno wea dey put um.” 14Afta she tell dat, she turn aroun an spock Jesus stay standing dea. But she neva know was Jesus.
15Jesus tell her, “Lady, how come you stay crying? Who you looking fo?”
She tink he da guy dat take kea da trees an she tell, “Mista, if you wen take him away, tell me wea you put him, an I goin take da body fo bury.”
16Jesus tell, “Eh, Mary!”
She turn aroun an tell, “Rabboni!” Dass how da Jew guys tell, “Teacha!”
17Jesus tell, “No touch me, cuz I no go up by my Faddah yet. But go by my braddahs an sistahs an tell um, I goin go up dea by my Faddah an yoa Faddah, an by my God an yoa God.”
18Den Mary from Magdala go an tell his guys, “Eh! I wen see Da One In Charge, az Jesus!” Den she tell um wat Jesus tell her.
Jesus Guys See Him
19Was da same day Sunday, da firs day a da week, an da sun go down awready. Jesus guys stay togedda an da doors lock, cuz dey sked a da Jews. Den Jesus show up in da middo a dem. He tell um, “Aloha! I like you guys stay so notting bodda you!” 20An wen Jesus tell dat, he show dem da scars on top his hands an his side. An his guys come real good inside wen dey see Da One In Charge a dem. 21Den Jesus tell dem one mo time, “I like you guys stay so notting bodda you. Jalike my Faddah wen sen me all ova, dass how I goin sen you guys all ova.” 22Wen he tell dat, he breave on top dem, an tell, “I give you guys da Good An Spesho Spirit. Take um. 23#Matt 16:19; 18:18Whoeva do bad kine stuff, an you guys let um go, God goin let um go too. Whoeva do bad kine stuff, an you guys no let um go, God no goin let um go too.”
Jesus An Thomas
24One a Jesus twelve guys, Thomas, dey call him “Da Twin.” He no stay ova dea wit dem wen Jesus come. 25Dass why da odda guys tell um, “Eh, us guys wen see Da One In Charge, you know.”
But he tell um, “If I no see da puka from da nails inside Jesus hands, an put my finga inside da puka in his side, no way I goin come shua he alive fo real kine!”
26One week layta da guys stay togedda one mo time inside da house, an Thomas stay dea too. Da doors stay shut, an Jesus show up in da middo a dem. An he tell, “Aloha! I like you guys come so notting bodda you.”
27Den he tell Thomas, “Put yoa finga ova hea an check out my hands. Put out yoa hand, an touch my side. Now, no tell you no stay shua I alive fo real kine. Come shua!”
28Thomas tell Jesus, “You, you Da One In Charge a me! You my God!”
29Jesus tell him, “Thomas, cuz you see me, you stay shua I alive. Goin get peopo dat neva see me, but dey goin come shua I alive too. Dey da ones goin stay good inside.”
How Come Get Dis Book
30Jesus do plenny odda awesome stuff fo show who him, but I neva write all dat inside dis book. 31But da tings I wen write, I write um so you guys goin stay shua fo real kine dat Jesus da Christ Guy, da Spesho Guy God Wen Sen, an he God Boy. Wen you guys trus him, you goin live foeva fo real kine cuz you his guys.
Currently Selected:
John 20: HPB
Highlight
Share
Copy
Want to have your highlights saved across all your devices? Sign up or sign in
©2020 Hawaii Pidgin Bible Ministries
hawaiipidginbible.org
Learn More About Hawaii Pidgin Bible