COLOSENSES 1
1
1-2Joꞌon Pabloun, joꞌon yajtacbalalun li Jesucristoe yuꞌun jech iscꞌan li Diose. Chajcꞌoponotcutic batel ta carta jchiꞌuc li Timoteoe, joꞌoxuc li snichꞌnaboxuc Dios li te ta jteclum Colosas li jun avoꞌonic ta stojol li Cristoe, li quermano xa jbatic ta sventa li Cristoe. Acꞌo yacꞌboxuc slequilal yutsilal li Jtotic Diose. Acꞌo spasboxuc ta jun avoꞌonic li jujunoxuque.
Jaꞌ scꞌoplal ti scotol cꞌacꞌal tscꞌoponbe Dios ta stojolic li buchꞌutic yichꞌojic ta mucꞌ li Cajvaltic li Pabloe
3Scotol cꞌacꞌal ta jcꞌoponcutic Dios ta atojolic, ta xcalbecutic coliyal li Diose, jaꞌ li Stot li Cajvaltic Jesucristoe. 4Yuꞌun caꞌiojcutic acꞌoplalic ti lec achꞌunojic ti jaꞌ Avajcoltavanejic li Jesucristoe, schiꞌuc ti cꞌux ta avoꞌonic scotol li buchꞌutic coꞌol avichꞌojic ta mucꞌ Dios achiꞌuquique. 5Schiꞌuc achꞌunojic ti chba achiꞌinic sbatel osil te ta vinajel li Diose. La achꞌunic li cꞌalal la avaꞌiic li scꞌop Dios ti jaꞌ melele, jaꞌ ti chijcol o sbatel osil ta sventa li Cajvaltique. Jaꞌ jech achꞌunojic o cꞌalal to tana. 6Li scꞌop li Cajvaltic li la avichꞌic albeel li cꞌalal lic achꞌunique, jaꞌ xa chaꞌiic eꞌuc scotol crixchanoetic li avie yuꞌun ipuc xa batel. Li buchꞌutic la xa schꞌunique yacal xa ta xtuqꞌuibic jech chac cꞌu chaꞌal latuqꞌuibic li cꞌalal la achꞌunic li joꞌoxuque. Yuꞌun la achꞌunic ti melel ti ta slequil noꞌox yoꞌon chascoltaic li Diose. 7Li scꞌop Cajvaltic li avaꞌiique, jaꞌ laj yalboxuc li quermanotic Epafras li coꞌol chijtuncutic yuꞌun li Cristoe, li lec jcꞌanojcutique, li staoj o yav yoꞌon ta xtun te ta atojolique. 8Jaꞌ laj yalbuncutic ti chacꞌuxubinan abaic ta sventa li Chꞌul Espíritue.
9Cꞌalal jech laj caꞌicutic acꞌoplalique, scotol cꞌacꞌal ta jcꞌoponcutic Dios ta atojolic. Ta jcꞌanbecutic ti más acꞌo xanaꞌic li cꞌustic tscꞌan ti acꞌo xapasique, schiꞌuc más acꞌo yacꞌboxuc apꞌijilic yoꞌ cꞌuxi lec chbat avuꞌunic li cꞌusi chayacꞌbe anaꞌique. 10Jech lec chbat scꞌoplal avuꞌunic li Cajvaltique yuꞌun jaꞌ chapasic li cꞌustic lec chile. Jech más to chacꞌ anaꞌic li cꞌustic lec ti acꞌo xapasique schiꞌuc más chavilic cꞌu sba chcoltavan li Diose. 11Schiꞌuc más chayacꞌbeic stsatsal avoꞌonic li Diose yuꞌun li stuque echꞌem schꞌultsatsal. Jaꞌ yuꞌun xamuybajic noꞌox yuꞌun chcuch avuꞌunic li cꞌustic chtal ta atojolique. 12Jech chavalbeic coliyal li Jtotic Diose yuꞌun jaꞌ ta sventa ti xuꞌ avuꞌunic ta spasel li cꞌustic lec jech chac cꞌu chaꞌal ta spasic scotol li snichꞌnabtaque. 13Yuꞌun li Diose lisloqꞌuesutic xa ta scꞌob li pucuje. Li avie jaꞌ lijyacꞌutic xa ta scꞌob li Snichꞌon li toj cꞌux ta yoꞌone. 14Jaꞌ li laj yacꞌ sba ta milel ta scoj jmultique, jaꞌ yuꞌun ta jꞌechꞌel lijlocꞌ o ta scꞌob li pucuje. Jaꞌ ta sventa li Snichꞌon ti ta jꞌechꞌel la spasbutic o perton yuꞌun li jmultic li Diose.
Jaꞌ scꞌoplal ti coꞌol xa coꞌon jchiꞌuctic li Dios ta sventa ti la jchꞌuntic ti laj yacꞌ sba ta milel ta jcojtic li Cristoe
15Li Diose mu xquiltic. Pero cꞌalal iꞌay ta balumil li Snichꞌone, iquiltic xa o li Dios yaꞌele yuꞌun junic noꞌox. Yuꞌun li Snichꞌone te onoꞌox oy li cꞌalal muꞌyuc toꞌox li cꞌustic oye. 16Li Snichꞌon li Diose jaꞌ la spas scotol li cꞌustic oy ta vinajele, schiꞌuc scotol li cꞌustic oy liꞌ ta balumile. Maꞌuc noꞌox la spas li cꞌustic xquiltique; jaꞌ la spas nojtoc li chꞌul ángeletic li mu xquiltique. Jaꞌ la spas li banquilal chꞌul ángeletique schiꞌuc li itsꞌinal chꞌul ángeletique. Oy jun banquilal chꞌul ángel icꞌataj ta banquilal pucuj; li itsꞌinal chꞌul ángeletique oy icꞌatajic ta itsꞌinal pucujetic. Scotol li cꞌustic oye jaꞌ la spas li Snichꞌon li Diose ti acꞌo ichꞌeuc ta muqꞌue. 17Li Nichꞌonile te onoꞌox oy li cꞌalal muꞌyuc toꞌox li cꞌustic oye. Jaꞌ ta sjuꞌel lec oy scotol li cꞌustic oye. 18Joꞌotic li jchꞌunojtic xa ti jaꞌ Cajcoltavanejtique, jaꞌ jol coꞌontic yuꞌun jaꞌ chispasutic ta mantal. Li joꞌotique sbecꞌtalutic yaꞌel. Jaꞌ ta sventa ti chijchaꞌcuxiutique yuꞌun jaꞌ sba laj yichꞌ yachꞌbecꞌtal ti cꞌalal ichaꞌcuxie. Jaꞌ yuꞌun stuc noꞌox ichꞌbil o ta mucꞌ. 19Li Jtotic Diose jech la scꞌan ti coꞌol stsatsal sjuꞌel slequil yutsil schiꞌuc li Snichꞌone. 20La scꞌan nojtoc ti scotol ta xchaꞌlecub nojtoc ta sventa li Snichꞌone yuꞌun chopol chil Dios ti soquem scotole. Yuꞌun ta sliqueb li cꞌalal la spas scotol li cꞌustic oye, lec scotol. Tsꞌacal to isoc. Pero ta sventa ti laj yacꞌ sba ta milel ta cruz ta scoj jmultic li Snichꞌone, jaꞌ te ilaj o stsatsal li yabtel li pucuje, jaꞌ yuꞌun ta xcꞌot scꞌacꞌalil ti ta xchaꞌlecub scotol nojtoque. Ta xchaꞌlecub scotol cꞌalal ta vinajel balumil schiꞌuc crixchanoetic.
21Ta voꞌone acontrainojic toꞌox li Diose yuꞌun chopol li cꞌustic la anopique schiꞌuc li cꞌustic la apasique. 22Li avie lec xa chayilic li Diose ta sventa ti la achꞌunic ti laj yacꞌ sba ta milel ta cruz ta scoj jmultic li Snichꞌone. Jaꞌ yuꞌun muꞌyuc amulic li cꞌalal chacꞌotic ta stojole. 23Jaꞌ jech chacꞌotic mi staoj o yav avoꞌonic ta stojol li Cristoe, mi ta jꞌechꞌel achꞌunojic o ti jaꞌ chascoltaique, schiꞌuc mi mu xavictaic schꞌunel ti ta onoꞌox xacolic ta sventa li Cajvaltic jech chac cꞌu chaꞌal avaꞌiojique. Jaꞌ li iꞌalbatic xa scotol li crixchanoetic ta spꞌejel balumile. Joꞌon li Pabloune jaꞌ cabtel yalel.
Jaꞌ scꞌoplal li Pablo ti jaꞌ yabtel ta xalbe scꞌop Dios li buchꞌutic maꞌuc jꞌisraeletique
24Li avie ximuybaj noꞌox ta xquichꞌ vocol ta aventaic, joꞌoxuc li jyanlumal crixchanooxuque, yuꞌun ta jtsꞌacubtas li vocol ti cꞌu yepal yaloj ti chiyacꞌbe li Cristoe jech acꞌo coluc li snichꞌnabtaque. Jaꞌ yuꞌun sqꞌuexolun Cristo yaꞌel yuꞌun ta xquichꞌ vocol ta aventaic. 25Jaꞌ cabtel yacꞌojbun Dios ti chacalbeic ti xuꞌ chacolic ta sventa Cajvaltic eꞌuc, joꞌoxuc ti maꞌuc jꞌisraeloxuque. Yuꞌun jech onoꞌox yaloj li Diose. 26Jaꞌ li muc onoꞌox bu snaꞌic li crixchanoetic ta voꞌonee. Li avie lijyacꞌbutic xa jnaꞌtic li Diose, joꞌotic li snichꞌnabutic xae. 27Yuꞌun jech la scꞌan Dios ti laj yacꞌ jnaꞌtic ti chasventainic eꞌuc li Cristoe, joꞌoxuc li maꞌuc jꞌisraeloxuque. Toj lec ti jech chcꞌot ta pasele, jaꞌ yuꞌun xanaꞌic xa eꞌuc ti chba achiꞌinic Dios sbatel osile.
28Jaꞌ yuꞌun ta xcalbe scotol crixchanoetic ti jaꞌ noꞌox chijcol ta sventa li Cristoe. Ta xcalbe ti acꞌo yictaic li cꞌustic chopol ta spasique schiꞌuc li cꞌustic schꞌunojic ti mu meleluque. Ta jchanubtas scotolic li cꞌu yepal xuꞌ cuꞌune yoꞌ jech más acꞌo yaꞌibeic smelol, yoꞌ jech scotolic acꞌo yacꞌ sbaic ta scꞌob li Cristoe. 29Jaꞌ cabtel o ti jech ta jpase. Ti jech xuꞌ chitune, yuꞌun jaꞌ quichꞌojbe stsatsal li Cristo li liꞌ sventainojune.
Currently Selected:
COLOSENSES 1: tzoSA
Highlight
Share
Copy
Want to have your highlights saved across all your devices? Sign up or sign in
© 1983, Wycliffe Bible Translators, Inc. All rights reserved