SALMOS 80
80
1Benle cheto', Dios.
Le' žape chi'o benne' Israel ka'.
Le' žape chi'o ẕa'só Jwsé ka' ka ẕila' ka'.
Ži'o latje blo chio' dan' zoan ḻáwlegak wbás chio' ka' nzi' lágake' kerubín.
2Bḻoe'e ḻaw yeḻa' ẕen chio' ḻawgak ẕa'só Efraín, na' Benjamín, na' Manasés.
Bḻoe'e ḻaw yeḻa' wak chio', na' da, yesló' neto'.
3Bezí' neto', Dios.
Beyache' ḻaže'l neto', na' yelato'.
4X̱anto' Dios, napo' dot yeḻa' wak.
¿To chi'ize žo'o neto' na' bi yenlo' da' nnablto' Le'?
5Beno' Le' ga žak nyache' ḻáže'to',
na' nis ẕbežto' naken da' že'j žawto'.
6Bi'o latje benne' gawze ka' bká'ngake' neto' ka'ze.
Benne' ka' ẕžá'agake' neto' ben dítjgekle' neto'.
7Bezí' neto', Dios. Napkzo' Le' dot yeḻa' wak.
Beyache' ḻaže'l neto', na' yelato'.
8Bebejo' neto' ka to lba uba ḻo yežlyó Egipto.
Blago' benne' ka' wnníta'gake' nga, na' gozo' lba uba na' nga.
9Wdape chi'o lba uba na' nich golen.
Ben lba uba na' lwen, na' bgakwn yežlyón'.
10Wló'on ẕoḻ yógo'te ya'a ka',
na' ni'a ne'n ka' wló'ogaken ẕoḻ yag sedro ẕen ka'.
11Bzáḻa'gaken ni'a ne'n, da' ka' bžíngaken žoa'a nisdo',
na' bžíngaken žoa'a yegw Eufrates.
12¿Biẕ chen' bkwaso' le'je da' wdáp chi'in lban'?
Na'a benne' ka' ẕdégake' ga na' ẕbángake' uba chen.
13Ẕlejgak koch yix̱e' ka' lba uba na',
na' bia yix̱e' ka' žáwgakban'.
14Bedá cheto', Dios, napkzo' Le' dot yeḻa' wak.
Bwia neto' zaka' ya'abá, gan zoakzo',
na' da yedjḻe'elo' da' žaken che lba uba chion'.
15Da, yesló' lba uba ni, dan' gozkzo' Le'.
Ẕiže lba uba na', dan' bzoa chochon' naken chio'.
16Benne' ka' bi ẕḻé'egekle' neto' chawe' bchóggake' lba na', na' bẕéngaken' yi'.
Bwia benne' ka' ḻo yeḻa' ẕža'a chio', na' bžia yi' ḻégake'.
17Bzoa choch, na' wdáp chi'i benne' ka' ba wžío',
na' ẕi'ngak benne' ka' bzoa chocho' ḻégake'.
18Batkle yebéj yichjto' Le' nitó chi'i.
Bkache' chawe' neto', na' wx̱én ḻáže'to' La la'y chio'.
19X̱anto' Dios, napkzo' Le' dot yeḻa' wak, bezí' neto'.
Beyache' ḻaže'l neto', na' yelato'.
Currently Selected:
SALMOS 80: zty
Highlight
Share
Compare
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.
