MATÍO 2
2
Benne' žejní'il ka' zedjwíagake' x̱kwide' Jesús
1Kate' golj Jesusen' ḻo yež Belén, yežen' nbaben Judea, ẕnna bia' Herodes ga na'. Kate' ža na' bžingak benne' žejní'il ka' ḻo yež Jerusalén, benne' ka' zej nžoje' to yež zi'to' da' žen' zaka' gan ẕḻa' wbíž. 2Wnnabgak benne' ka', na' wnnágake':
—¿Gaẕen' zoa x̱kwiden' žaḻa' nna bia'be' benne' judío ka', x̱kwiden' za' goljbe'? Katen' wzoato' gan ẕḻa' wbíž bḻe'elto' belj baní' da' nak bian' ba goljbe'. Za'to' nga nich wká'n ẕento'-be'.
3Kate' Herodes, bennen' ẕnna bi'e, benle' da' ni, gok zedle'. Ḻezca' gok zédgekle yógo'te benne' ka' wnníta'gake' yež Jerusalén. 4Naž Herodes na' bḻiže' yógo'te bx̱oz wnná bia' ka' ḻen benne' yodo' wsedle ka', na' wnnable' ḻégake' gaẕe žaḻa' galj Benne' Criston', Bennen' žx̱en ḻáže'gak benne' judío ka' ḻe'e nich nna bi'e ḻégake'. 5Góžgake' ḻe':
—Ḻo yež Belén, da' nbaben Judea. Ki naken dan' bzoj to benne' bchaḻje' ḻo wláz Dios da' ẕnnan ki:
6Yež Belén, da' nbaben Judá, bi nakžen ka'ze ḻaw Dios,
ka zej nak yež blo ka' zej nnitan' yežlyó nga,
dan' ḻo yež Belén na' galj to Benne' gake' blo,
Bennen' gape chi'e benách chia' ka', benne' Israel ka'.
7Naž Herodes na' bḻiže' benne' žejní'il ka' ži žize, na' wnnable' ḻégake' nich nnezle' binlo gáka'te ba gok katen' bḻa' ḻaw beljen' da' bḻé'egekle'. 8Naž bseḻe'e ḻégake' chjake' ḻo yež Belén. Gože' ḻégake':
—Le chej ga na', na' le chejnnáb binlo kan nak che x̱kwiden'. Kate' ba bežéḻ-lele-be', le da nich wḻoé'elele neda', nich ḻezka' cha'a neda', chejká'n ẕena'-be'.
9Wdé béngekle benne' žejní'il ka' dan' wnná Herodes na', jake' ga na', na' beljen' da' bḻé'egekle' katen' wnníta'gake' lážgake', wyejen ḻáwlegake', na' bejsóan ža'le gan de x̱kwiden'. 10Kate' bḻé'egekle' beljen', bebéḻe'egekle'. 11Kate' wyó'ogake' ḻo yo'on', bḻé'egekle' bi' byodon', zóaḻenbe' Lia, x̱na'be'. Naž bzoa ẕíbgake' ḻawle gan debe', na' bka'n ẕéngake'-be'. Wdé na' bsáljwgake' kakdo' ka' chégake', na' bnéẕjwgake'-be' oro, na' yale, na' neždo' da' ẕḻa' ẕix̱ che yag mirra. 12Dan' ba bzejní'il Dios ḻégake' ḻo bichgale nich bi yeyéjgake' gan zoa Herodes na', che ḻen beyéjgake' lážgake' nez yoble.
Jwsé ḻen Lia želchi'e x̱kwide' Jesús ḻo yežlyó Egipto
13Wdé beza'gak benne' žejní'il ka' ga na', naž bḻa' ḻaw to wbás che ya'abá ḻo bichgale gan ẕtas Jwsé, na' gože' ḻe':
—Wyase. Bche' x̱kwiden' ḻen x̱na'be', na' bẕonnj nga. Wyéj ḻo yežlyó Egipto. Ga'no' ga na' kate' yapža' neda' le' yetó. Ki gono' dan' yeyílj Herodes x̱kwide' ni nich gote'-be'.
14Naž wyase Jwsén', kate' ne nak žel, na' bchi'e x̱kwiden' ḻen x̱na'be', na' jake' ḻo yežlyó Egipto. 15Bgá'ngake' ga na' na' zejte got Herodes na'. Ka' goken, bžin da' wnná X̱anžo Dios ḻo na' benne' bchaḻje' ḻo wlaze' Ḻe', katen' wnné': “Ḻo yežlyó Egipto bḻiža' Ẕi'na'.”
Herodes žseḻe'e benne' ka' nich gótgake' x̱kwide' ka'
16Kate' gókbe'ele Herodes bi bengak benne' žejní'il ka' kan gože' ḻégake', naž bže'e, na' bseḻe'e benne' ka' chjake' ga na' nich gótgake' yógo'te bi' byodo' ka' nníta'gakbe' ḻo yež Belén, na' do ẕente gan že' Belén na', x̱kwide' ka' ba žóngakbe' chopiz, ḻen bi'do' ka' zej nžé'nžebe'. Ki ben Herodes na' kan bsaka' yenne'e, kan gok ža katen' bḻa' ḻaw beljen', ža na' bzejní'igekle benne' žejní'il ka' ḻe'. 17Ka' goken, bžin da' wnná Jeremías, bennen' bchaḻje' ḻo wláz Dios ža ni'te, katen' wnné':
18Ḻo yež Ramá žéngekle chi'igak
benne' ka' ẕbéžegake', na' ẕbeže nyáche'gake'.
Rakel ẕbeže' ni'a chegak ẕa'sóe' ka'.
Bi gak no benne' gon ẕene' ḻe', dan' zej natbe'.
19Wdé got Herodes na', naž bḻa' ḻaw wbás che ya'abán' ḻo bichgale gan zoa Jwsén' ḻo yežlyó Egipto, 20na' gože' ḻe':
—Wyase. Beché' bi' byodon' ḻen x̱na'be', na' beyéj gan nbab Israel, dan' ba gotgak benne' ka' gónegekle' gótgake' bi' byodo' ni.
21Naž wyase Jwsén', na' bechi'e bi' byodon' ḻen x̱na'be', na' beyéjgake' gan nbab Israel. 22Benle Jwsén' ẕnna bia' Arkelao gan nbab Judea dan' ba got Herodes na', x̱a Arkelaon'. Che ḻen bžebe Jwsén' yeyeje' ga na'. Kate' bzejní'il Dios ḻe' ḻo bichgale, wyeje' gan nbab Galilea. 23Kate' bžine' ga na', bejsóe' ḻo yež Nasaret. Ki goken, bžin da' bzojgak benne' ka' bcháḻjgake' ḻo wláz Dios ža ni'te kan žaḻa' gak che Jesusen', nnagak benách ka' nake' Benne' Nasaret.
Currently Selected:
MATÍO 2: zty
Highlight
Share
Copy
Want to have your highlights saved across all your devices? Sign up or sign in
© 2002, Wycliffe Bible Translators, Inc. All rights reserved.