ISAÍAS 26
26
Israelitame quihuicatise TOTECO
1Ipan nopa tonali nochime ipan tlali Judá huicase ni huicatl:
“Ama tijpiyaj se altepetl catli cuali huan quipiya chicahualistli.
TOTECO catli techmaquixtijtoc, techyahualohua quen se hueyi tepamitl para techmocuitlahuis.
2Xijtlapoca puertas para ma calaquica nochi nopa masehualme catli itztoque xitlahuaque.
Xiquincahuaca ma calaquica nochi catli temachme.
3TOTECO, mojmostla tiquinmacas yoltlasehuilistli nopa masehualme catli motemachíaj ipan ta, nochi catli quisenhuiquilíaj mitztemohuaj.
4Yohuali tonali ximotemachica ipan TOTECO pampa san yaya TOTECO Catli Más Quipiya Tlanahuatili huelis anmechmanahuis para nochipa.
5Yaya quinechcapantlalía nopa masehualme catli mohueyimatij.
Quintepexihuía nopa altepeme catli ipan itztoyaj.
Quintlahuisohua hasta tlalchi huan quihuelonía inintepa.
6Ama nopa teicneltzitzi catli quintlaijiyohuiltiyayaj ipan moquejquetzaj catli mocahua tlen inialtepe.”
7TOTECO tijchihua nopa ojtli catli quitoquilíaj catli xitlahuaque moixpa amo cana fiero, niyon amo ixtlejcolis.
Pampa ta, TOTECO, amo titemaca se ojtli catli fiero o catli amo cuali. Ta tijxitlahua nopa ojtli huan tijchihua yejyectzi.
8TOTECO, tojuanti tijtoquilíaj moojhui catli xitlahuac huan timochiyaj san ipan ta.
Techpactía miyac tijchihuase catli ta tijnequi.
Ipan toyolo san tijnequij timitzhueyichihuase.
9Seyohual nimitztemohua ica nochi noyolo.
Huan quema niisa ica ijnaloc noja nimitztemohua.
Pampa fiero masehualme amo quicahuase quichihuase catli amo cuali huan quipehualtise quichihuase catli xitlahuac,
hasta quema ta tihualas para tiquintlajtolsencahuaqui huan tiquintlatzacuiltiqui catli itztoque ipan ni tlali.
10Pero masque tiquinnextilía teicnelijcayotl nopa masehualme catli fiero ininnemilis, amo moxitlahuaj.
Quisenhuiquilíaj quichihuaj tlamantli catli amo cuali ipan nopa tlali campa sequinoc quichihuaj catli xitlahuac.
Huan amo quichihuilise cuenta mohueyitilis, TOTECO.
11Inijuanti amo mitztlacaquilíaj quema tiquintlacahualtía.
Huan quema tijtlanana momax para tiquintlatzacuiltis, inijuanti amo quiitaj, niyon quichihuilíaj cuenta.
Pero xiquinnextili quenicatza tiquinicnelía momasehualhua, huan mopinahuase.
Huan nopa tlitl catli ticajoctoc para mocualancaitacahua ya eltoc para quintzontlamiltis.
12TOTECO, ta catli techmaca tlasehuilistli.
Nochi catli cualquisa catli tojuanti tijchihuaj eltoc pampa ta tijchijtoc nopa tequitl ipan tojuanti.
13TOTECO ta catli titoDios, quipiya miyac tonali technahuatiyayaj sequinoc tecojme,
pero ama san ta timitzhueyitlepanitase.
14Nochi inijuanti catli tiquintequipanojque, ama ya mictoque huan ayacmo hualase sempa,
ixpolijque huan ayacmo quema motlananase.
Pampa ta tiquintlatzacuilti huan tiquintlamiixpolihuilti.
Ama ayacmo aqui quinelnamiqui.
15TOTECO, ta tiquinmiyaquilijtoc momasehualhua ipan totlal.
Tijchijqui para más ma monextis mohueyitilis.
Huan tijchijtoc totlal nojquiya ma eli más hueyi.
16TOTECO, quema israelitame tlaijiyohuiyayaj, timitztemojque.
Quena, quema ta techtlatzacuilti, timotlatlajtijque ica ta.
17Tiitztoyaj moixpa quen se sihuatl catli momimilohua ica tlacuajcualoli quema quitlacatiltía icone.
18Tojuanti tiitztoyaj ica tlacuajcualoli huan tichocayayaj quen se sihuatl,
pero san tlapic titlaijiyohuijque pampa amo tleno tijtlacatiltijque.
Amo tihuelque titlatlanise para totlal huan amo tleno quisqui tlen totlaijiyohuilis.
Amo aqui tlacatqui para mochihuase más masehualme ipan ni tlaltipactli.
19Pero tijpiyaj ni camanali catli temachtli:
Nochi catli ya mictoque catli moaxcahua TOTECO, sempa moyolcuise
Huan inintlacayohua sempa motlananase campa quintlalpachojtoque.
Quena, nochi catli itztoque ipan tecacahuatl sempa isase huan huicase ica paquilistli.
Itlahuil TOTECO catli temaca nemilistli motlalis ipan inijuanti quen elisquía ajhuachtli.
Tlatzacuiltili huan tlayancuilistli
20Annomasehualhua, xiyaca amochaj huan xijtzacuaca amopuertas campa anitztose temachtli. Ximotlatica se tlatoctzi hasta quema ya panotos icualancayo TOTECO huan ya quintzontlamiltijtos nochi icualancaitacahua. 21TOTECO quisas tlen ichaj huan hualas ipan ni tlaltipactli para quintlatzacuiltiqui nochi masehualme por inintlajtlacolhua. Huan monextis ajqueya temictijtoc ipan ni tlaltipactli huan ayacmo huelis motlatis. Mopannextise nochi catli quihuicaj tlajtlacoli.
Currently Selected:
ISAÍAS 26: nhwW
Highlight
Copy
Compare
Share
Want to have your highlights saved across all your devices? Sign up or sign in
© 2005, Wycliffe Bible Translators, Inc. All rights reserved
