LUCAS 1
1
¡Diuzh Tiofl!
1Naṉle luu gaṉle, nole bla zha ne bioxco pquiaa zho grë ncuaaṉe goc zeeṉe biaad Jesús meṉ ne pxeeḻ Dios ga. 2Ncuaaṉe nlipaa goca, grë ncuaaṉe pquiaa zho ga, laaw pquiaa zho zigne rzodiidzse miecha leṉ dze rii, zigne rzodiidzsegaa zha ne bzëniepaa mew, zha ne pso me noneew lo miech.
3Yeque naa pquiaa naa wen wen bnabdiidz naa, bleeni naa diidz grëse dieṉ zha psilo grë ncuaaṉ co; ni niina laa naa rquiaw zigne gocsew laaw rxeḻ naa lo luu. Sac rieṉ naa ib nonguieḻa gacnaṉ luuw; 4zeeṉa lozh gacnaṉ luu zha nac diidzli rii, wseed ne blu zho lo luu i.
5Leṉ dze ne nac Herod rey rnabey me dib xtan zha Judé, leṉ dze co no tib pxoz lë Zacarí, me nac tib zha ne nacgrë “Zha Abí”. Niicle tsieel mew, zha xtii pxoz Aarón ziaad wnaa co, lë me Lisabet.
6Zigtaa Zacaríw, zigtaa Lisabeta, noxco me miṉe rnabey Dios, mban mew zigne naca, ni tib xley Dios rguiitsd me. 7Meṉ gol-le nac me grop me, per ni tib mëëd quianied me, sac niaad Lisabet gapd me mëëd.
8Laa tib dzew bgaa grë zha ne nacgrë Zacarí guṉ zho dziin leṉ yadoo. 9Nac xcostumbr grë zha ne nac pxoz, rio zho tib rif dieṉ chopaa ygaa tsielaadz goxyaal leṉ yadoo, dzigo bgaa Zacarí. 10Goxyaal co nolaadz me leṉ yadoo, laa grë miech ne ndxie nëz ley nonabgaa lo Dios, 11tibaque zeeṉe brieequia tib xanjl Dios bzo cue pcoog nëz derech, zaatne nozëëg me yaal ga. 12Zeeṉe goṉ me anjl co bdzieb me, rdzieldraa me zha guṉ me lo dzeb co. 13Dzigo rëb anjl co lo me:
―¡Gdzieebd luu! Diidzse ziaḻnie naa lo luu, gacnaṉ luu gaṉle miṉe bnab luu lo Dios ga, pquiaadiag mew; gane niina laa tsieel luu gap tib mëëdbgui. Zeeṉe gal win, Juan cueelë to win. 14Tib guieḻbley nroob gac win lo to, niicle lo grëragaa miecha, 15sac tib meṉ nziuu gac win lo Dios. Zeeṉe gac win zha broob, ni tib ro nziu guied win, per ni vin yquiaarod win; ansraa gal win, laa Espíritu Sant nacniele win. 16Win gac meṉ ne co guic nzian grë zha Israel, gbiire gbig zho lo Dios, meṉ ne rnabey zho. 17Zigne goc Lí, meṉ ne biaad pteed xtiidz me padzeela, sca gac win tedner win lo me, nroob poder ne gap win. Win gnee lo grë miech rii, gbiire gleynie zho me zigne goc xmeṉgol zho zha ne bleynie me; csaan zho grë xquieḻntseeb zho, gban zho zigne racladz me; zeeṉa niowse gac zho ycaania zho me.
18Pquiab Zacarí rëb Zacarí lo anjl co:
―¡Ncuaaṉe gacd i goṉ rnee luu! Zigtaa naaw, zigtaa tsieel naaw, meṉgol-le nac no.
19Rëbchaa anjl co:
―Bieṉ gaṉle anjl Gabriel nu quianee lo luu, anjl ne tibaque zo lo Dios. Me pxeeḻ naa ziaḻnie naa diidz rii. 20Per ne squi rliladzd luuw, na laa luu guiaaṉ ngop, haxta gaḻ dze ne gac miṉe rne naa lo luu nu, dze co glan xtiidz luu stib.
21Grë miech ne ndxie quianab lo Dios ga, quiambëz zho Zacarí, rnabdiidzlsa zho pe goc me, sac raṉ zho rrieed me zaatne ziezëëg me yaal ga. 22Zeeṉe briee me, goṉ zho gacdraa gnee me, dzigo bieṉ zho no pe blu Dios lo me ga. Teḻ pe racladz me gnee me, niapse señ rlu me.
23Bzase dze ne beeṉ me dziin leṉ yadoo, dzigo laa me zey lidz me. 24Goca bla ngbidz, laa mëëd co pquialo zdoo tsieel me.
Dipse leṉ gaay mëë bio zhuz co ro yu, ib brieed me, rley me rnee me:
25―¡Zha wentaa Dios, bneedz me diidz bdziṉ dze yquianie naa mëëd rii, zeeṉa gzhidzniedraa miech naa!
Güeynie tib anjl diidz laa Jesús gac mëëd
26Goc xoop mëë zoney Lisabet mëëd, pxeeḻ Dios anjl co stib güey me Nazaret, guiedz ne ndxie xtan zha Galilé. 27Ga no tib ndzoop nguieg lë Marí, leṉ dze co no xtiidz ndzoop co ctsieelnia ndzoop tib zha xtii rey David, lë José. 28Bdziṉ anjl co zaatne no ndzoop, pquiaabdiuzh me ndzoop, rëb me:
―¡Dichos luu goṉ, sac tib zha nziuu nac luu lo Dios! Me quianap luu.
29Zeeṉe goṉ Marí anjl co, ni goṉ Marí zha rnee me, bzee zdoo Marí, rieṉd Marí dieṉ pe nac scataa rzë xtiidz me. 30Dzigo rëbchaa me lo Marí:
―¡Gdzieebd luu! Laa Dios goṉ bzooblo luu ygaa luu tib guieḻnzaac nroob. 31Zdoo luu yquiaalo tib mëëdbgui, zeeṉe laa win gal, JESUS cueelë luu win. 32Tib meṉ nroob gac win, zieṉ miech gaṉle Xpëëd Dios ro ne no gbaa nac win; ni so me win gnabey win zig bnabey xmeṉgol win David. 33Win gnabey lo grëse zha Israel, ni gdziṉd dze ne lozh xquieḻrnabey win.
34Pquiab Marí rëb Marí lo anjl co:
―¿Mëëd ye? ¿Per zha grieelo gap naa mëëd, ni tib naa zo nu?
35Rëbchaa anjl co:
―Niapse por poder ne rap Dios gac miṉ co. Zeeṉe laa Espíritu Sant guiaad gacnie luu, hor co laa poder co gacnie luu, laa mëëd co yquiaalo zdoo luu; gacxe waa Xpëëd Dios guṉbey miech win, miṉe rnabey Dios miṉ co guṉ win. 36Ye beḻyeeṉ luu Lisabet, niina lo guieḻgol-le laa tib mëëd pquialo zdoo me; zëëb diidz ib grieelod gap me mëëd, per na racle xoop mëë zoney me mëëd, 37sac par Dios tsod ncuaaṉe grieelod gac.
38Dzigo rëb Marí:
―Teḻ scaw, miṉe rnee luu i, maase gaca. Laa naa zo nu par guṉ naa miṉe gnabeytaa Dios naa.
Blozhse ga, laa anjl co zey.
Güeygaṉ Marí Lisabet
39-40Goc bla dzew, briee Marí ga zie me ziegaṉ me Lisabet tib guiedz win ne ndxie gui glaa ne nac xtan zha Judé. 41Bdziṉ me, wbig me pquiaabdiuzh me Lisabet. Bdiuzh co bnee me, zeeṉe biasoli xpëëd Lisabet zdoo Lisabet; dzigo hor co bdeed Espíritu Sant guieḻbiini lo Lisabet, 42nguiedz bnee Lisabet rëb me lo Marí:
―¡Dichos luu Marí bgaa luu guieḻnzaac qui! Sac goṉ, lo grëraa no nac no meṉ wnaa, luu bzooblo Dios. Mëëd ne zoney luu i, zha nziuu nac win lo me. 43¡Ib guiaaṉladzd naa dze rii, znu biaad luu nac luu xniaa meṉ ne rnabey naa, biaadgaṉ luu naa! 44Haxta mëëd ne zoney naa nu, rley win biasoli win zdoo naa, zeeṉe pquiaabdiuzh luu naa. 45¡Dichos luu, bin luu miṉe në Dios, ni bliladz luu zuṉ mew!
46Dzigo hor co bnee Marí rëb me:
¡Meṉ nroob nac Dios! ¡Gdib zdoo naa rooḻnie naa me!
47-48Rleynie naa me nac me meṉ ne psilaa naa,
sac goṉ niicle peet nond naa, tib nguṉdziin winse nac naa lo me,
per laa me bzooblo naa.
Grë miech, zigtaa leṉ dze riiw, zigtaa leṉ dze ne ziaadragaaw,
ziab zho naa nac tib wnaa ne mazdraa dichos.
49Ne nligaa zha nactaa guieḻnzaac rii bneedz me lo naa.
Meṉ ro, meṉ nroob nac me, ¡guieṉdraa cho zig me!
50Grëse miecha, zha ne rioxco rquiaadiag miṉe rnabey me,
tibaque racnie me zho, ib rsaand me zho.
51¡Goḻwi gaṉle zha nactaa grë ncuaaṉe ruṉ me!
Grë ncuaaṉe no guic zha niats guṉ zho, bnitlo mew,
52ptiche me grë zha ne zob rnabey.
Laa grë zha ndooladz, zha ne rzac miech peet nond,
beeṉnon me zho.
53Grë zha mban ne guieṉd pe yquiin, nroob guieḻnzaac ne bdeed me lo zho,
laa grë zha ne rapcheṉ, scase bzonëz me zho.
54¡Pe zhidaa ziyacnie me grë zha ne nac xtii Israel, meṉgol ne goc zig tib nguṉdziin lo me ga! ¡Tibaque rlu me rleynie me zho!
55Ib biaaṉladzd me xtiidz me miṉe bnee me lo pxozgol ne Abraham,
zeeṉe rëb me gdziṉd dze ne csaan me Abraham, ni grëraa zha ne grieequia lo xtii Abraham.
56Maase tsoṉ mëë biaaṉ Marí ga blëz me lo Lisabet, dzigoraa wbi me ga bdziṉ me lidz me stib.
Gol xpëëd Lisabet
57Bdziṉ dzew, laa xpëëd Lisabet bza mëë, laa me gop win. 58Grë zha ne no gax lidz me, grë zha ne nac meṉlidz me, zeeṉe bin zho scataa pquia zdoo Dios me bdeed Dios mëëd co lo me, rley zho güeygaṉ zho me.
59Dze ne goc mëëdbgui yeeṉ co xon ngbidz, blalaa zha ne güeynaḻ zhits pxoz win, zhits xniaa win güeynie zho win bio win bey ne rio xpëëdbgui zha Israel, parne glu lo Dios ngab win. Tibaque naṉ zho Zacarí nrieelë win, zigne lëque pxoz win, haxta scale nonee zho lo win, 60per hor co rëb Lisabet, led scad gac lë win, Juan grieelë win.
61Dzigo pquiab zho rëb zho:
―¿Pe nacne sca grieelë win? Ni tib meṉlidz to lëd Juan.
62Bnabdiidzaque zho lo pxoz win, blu zho señ lo me dieṉ zha racladz me gac lë win. 63Dzigo bnab me bdeed zho tib lë lo zaatne yquiaa me; bzee zdoo zho zeeṉe blozh pquiaa me goṉ zho rnee lo co: “Juan grieelë win.” 64Loxaque blozh dze sca pquiaa me, zeeṉe laa me wbiire bnee stib, psilo me rdeed me xquizh lo Dios. 65Grë zha ne zo ga, zha ne ruṉbey me, zeeṉe goṉ zhow, per nli rzee zdoo zho.
(Nëzrii nëzrec bzhooṉ diidz laa mëëd co gol, grëse guiedz ne ndxie gui glaa co gocnaṉ miecha. 66Zha ne rona, rza zdoo zho rnee zho: “¿Bay cho gac mëdyeeṉ co?” Sac nligaa rlu nacnie Dios win.)
67Horco bdeed Espíritu Sant guieḻbiini lo Zacarí, psilo me bnee me rëb me:
68¡Xquizh xquieḻnzaac meṉ nroob ne rnabey, meṉ ne nac xDios ne nac ne zha Israel!
Sac goṉ laa me ziaad, ziaadgaṉ me ne, ziadbee me ne lo xquieḻnë ne.
69Nasi laa me pxeeḻ meṉ nroob ne ziaadsilaa ne,
lëë meṉ co ga no grieequia lo zha xtii David, meṉ ne beeṉ xtsiiṉ me ga.
70Padzeelale bzeet me cxeeḻ me meṉ co,
grë zha ne biaad pteed xtiidz me, bzeet zhow.
71Rëb zho, ib sxeeḻ me meṉ ne guiaadsilaa ne ladznia zha ne nosacsi ne, zha ne rlëë lo ne.
72Sac ib gdziṉd dze csaan me grë zha xtii pxozgol ne, rquianëpaa zdoo me zho.
Ib guiaaṉladzd me miṉe rëb me lo Abraham,
73zeeṉe rëb me laa me cxeeḻ meṉ ne csilaa ne,
74zeeṉa dziodzebdraa ne lo zha ne rlëë lo ne, lo zha ne rsacsi ne;
sinque iṉe tibli gac ne dziuuṉ ne miṉe rnabey me.
75Gzataa dze ne gneedz me guieḻmban lo ne,
iṉe mbe zdoo ne, dziuuṉ ne miṉe rleynie me.
76Luu goṉ xin, bzooblo Dios ro ne zob gbaa, cteed xtiidz me lo miech,
luu tedner tsienee luu lo zho, laa meṉ co no guiaad.
77Luu gnee lo grë zha Israel, guieṉ zho gaṉle zha guṉ Dios zho perdon, parne ycaania me zho.
78Ne nligaa rleynie me ne, rquia zdoo me ne,
gane laa me cxeeḻ Xpëëd me, meṉ co gac zig tib biini,
79Biini co gziini lo grë zha ne mban lo guieḻcow,
zeeṉa biini co glu nëz lo ne, guio ne nëz ne peet zhgab, peet dzeb guieṉd.
80Zigse zie dzew, scase scase zieroob mëdyeeṉ co, ni scaquegaa dib zdoo win rleynie win Dios. Zeeṉe laa win broobpaa, dzigo güey win bio win tib dan zit, haxta bdziṉ dze ne laa win psilo pseed miech laa win blulo lo zho.
Currently Selected:
LUCAS 1: zpm
Highlight
Share
Copy
Want to have your highlights saved across all your devices? Sign up or sign in
© 1998, Wycliffe Bible Translators, Inc. All rights reserved.