1 Tesalonicenses 5
5
1-2Beṉe' migw, bitw chyažjen gwzoja' cont gwzenda' le'e bi ža bi hor yid X̱ancho Jesúsen' yeto. Ṉezele con yalzelaže'le žin ža žin hor can' chžin beṉe' gwban beṉe' chda šeže'le. 3Na' šlac chesena beṉe': “Mba zoacho, bibi chac c̱hecho”, cate' concze žin ža yesebiaye'e. Can' chac c̱he no'ole cate' yalzelaže' chaque' bes c̱he yeḻa' san, ca'czen' zjayalzelaže' yesebiayi' beṉe' ca' bi chesejnilaže'ne'. Bitw gac yosoxoṉje'. 4Perw chio' beṉe' migw, bi nc̱hoḻe yic̱hjlažda'ochon', da'nan' bitw gac c̱hecho can' chac c̱he beṉe' chzenyal gwbanṉa' ḻe'. 5Diosen' ba bzejni'ide' chio' nombia'chone' na' be'ni' c̱hen' ba chseṉin' len chio'; da'nan' bitw nc̱hoḻe yic̱hjlažda'ochon'. 6Cheyaḻa' gonyaṉe'cho xbab naquen' chaclaže' Diosen' goncho na' ṉabia' cuincho goncho can' chazlaže'na'. 7Beṉe' ca' cbi chosozenag c̱he Diosen' zjazaca'lebe' ca beṉe' zjantas na' ca beṉe' chesezože. 8Perw ba bzejni'i Diosen' chio' cont bi goncho can' chesone'na'. Da'nan' cheyaḻa' ṉabia' cuincho goncho can' chazlažen'. Cheyaḻa' šejnilaže'cho Diosen' na' gaque ḻježcho na' yebecho dan' ṉezecho šjayzoacho len Diosen'. Še goncho yogo' da' ca' gaccho ca soldadw ben' nyaze' to de ya da' chcue'ejen ḻe' cont bibi chac c̱he' cate' chdiḻe' len beṉe'. 9Gague gwlej Diosen' chio' cont saca'zi'cho c̱he xtoḻa'chon'. Gwleje' chio' cont šejnilaže'cho X̱ancho Jesucriston' na' šjayzoacho len ḻe'. 10Na' Jesucriston' bnežjw cuine' ṉec̱he chio' cate' gosot beṉe' ḻe' cont šjayzoacho len ḻe' ḻa'czḻa' še mbancho o še ba gotcho cate' yide' da' yoble. 11Da'nan' ḻe gonch can' ba chonḻe, ḻe gon c̱hac̱h laže' ḻježle tole yetole na' ḻe gaclench ḻježle cont soac̱hac̱hle šejnilaže'le Jesucriston'.
Pablon' bzejni'ide' beṉe' chesejnilaže' Jesucriston' can' cheyaḻa' yesone'
12Chata'yoeto' le'e beṉe' migw, gaple bala'aṉ beṉe' ca' cheson xšin X̱ancho Jesucriston' chosogüia cheseṉe'e le'e na' chosozejni'ide' le'e naquen' cheyaḻa' soa cuezle. 13Gapchgualne' bala'aṉ na' gaquechgüele ḻegaque' dan' chesone' xšin Diosen' do laže'. Na' ḻe soa binḻo len ḻježle tole yetole.
14Ca'cze beṉe' migw, ḻe tiḻe beṉe' bi chesaclaže' yeson žin, ḻe gon c̱hac̱h laže' beṉe' chesacde' zdebe chosozenague' c̱he Jesucriston', na' ḻe gaclen beṉe' biṉa' yesejni'ide' naquen' cheyaḻa' yesone'. Ḻe soa ḻe gap yeḻa' chxenḻaže' len yogo'ḻoḻ beṉe'.
15Še bi da' mal cheson beṉe' len le'e, ḻe gon byen bi yoži'ile da' mal len ḻegaque'. Ḻe yeyiljwlaže' naclen' gonḻe güen len ḻježle tole yetole na' len note'tez beṉe'.
16Do tiemp ḻe yebe. 17Ḻe soateze ḻe soa ḻe yoḻ güiž Diosen'. 18Ḻe güe' yeḻa' chox̱clen c̱he Diosen' bite'tez da' chac c̱hele, ḻe da'nan' chaclaže' gon chio' chejnilaže'cho Cristo Jesúsen'.
19Bitw gwžonḻe gon Spiritw c̱he Diosen' can' chaclažen' gonen len le'e o len beṉe' yoble. 20Bi gwzoale ca'ale dan' chesena beṉe' cheso'e diža' dan' ba gož Diosen' ḻegaque'. 21Na' ḻe gonyaṉe' xbab c̱he yogo'ḻoḻ diža' da' cheso'e cont soale gwzenagle c̱he da' nac güen. 22Na' bitw gonḻe bite'tez da' nac da' mal.
23Diosen' chone' ca chzoa chbezcho binḻo len xbab dan' yo'o ḻo' yic̱hjlažda'ochon'. Na' chṉabda'ne' gone' cont lažda'olen' gacyaṉen' xilaže'. Na' ḻecze gonšque' cont bibi da' mal gonḻe len yic̱hjlažda'olen' ṉeca len cuerp c̱helen' cont bibi doḻa' gaple caten' yid X̱ancho Jesucriston' yeto. 24Diosen' ben' ba gwleje' chio' cont naccho xi'iṉe' chone' con da' že' gone', na' da'nan' gone' cont gac lažda'ochon' xilaže'.
Pablon' gwṉabe' gaclen Diosen' beṉe' Tesalónican'
25Beṉe' migw, ḻe soa ḻe ṉab gaclen Diosen' neto'.
26Na' cate' chežagle ḻe gwnopa' na' ḻježle cont nacbia' chaque ḻježle.
27Chona' mandadw gwlable cart nga ga yesene yogo'ḻoḻ beṉe' ḻježcho ca' nita' gan' zoalna', ḻe can' chaclaže' X̱ancho Jesucriston' gonḻe.
28Na' soateze X̱ancho Jesucriston' gaclenšque' le'e. Da' na'ze chzoja' ṉa'a.
Currently Selected:
1 Tesalonicenses 5: zpq
Highlight
Share
Copy
Want to have your highlights saved across all your devices? Sign up or sign in
© 1987, Wycliffe Bible Translators, Inc. All rights reserved.