2 Timoteo 3:1-5

Neꞌén so̱ꞌ se vaa asa̱ꞌ nichrunꞌ caꞌna̱ꞌ uún Cristó, ne̱ gu̱un ndoꞌo sayuun a. ꞌO̱ se ga̱a̱ ꞌe̱e̱ uxrá rá nij yuvii̱ man maꞌa̱n yuvii̱, ne̱ gu̱un ndoꞌo rá nij yuvii̱ quiꞌya̱j canaán nij soꞌ saꞌanj, ne̱ cata̱j uxrá nij soꞌ se vaa si̱j sa̱ꞌ ndoꞌo me maꞌa̱n nij soꞌ, ne̱ síí xta̱ꞌ nimán gu̱un nij soꞌ, ne̱ qui̱j ndoꞌo caꞌmi̱i̱ nij soꞌ cheꞌé Yaꞌanj uún a. Se̱ cuno nij soꞌ caꞌmi̱i̱ rej nij soꞌ do̱ꞌ, nii nij soꞌ do̱ꞌ, uún a̱ maꞌ. Se̱ cataj nij soꞌ guun niꞌya̱j níꞌ cheꞌé rasu̱u̱n, ne̱ se̱ guun rá nij soꞌ canoco̱ꞌ nij soꞌ man Yaꞌanj maꞌ. Se̱ gaa ꞌe̱e̱ rá nij soꞌ man tuviꞌ nij soꞌ, ne̱ ꞌo̱ ra̱ꞌyunj tuviꞌ nij soꞌ, ne̱ nano̱ ndoꞌo nij soꞌ cuentó ne̱ cheꞌé tuviꞌ nij soꞌ, ne̱ se̱ guun naꞌa̱j nij soꞌ ni̱ꞌyaj nij soꞌ man nij soꞌ maꞌ. Ne̱ se̱ guun nucua̱j nij soꞌ caꞌne̱ꞌ rá nij soꞌ ga̱ suun chiꞌi̱i̱ nica̱j nij soꞌ maꞌ. Ina̱nj qui̱j ga̱a̱ nij soꞌ na̱nj ado̱nj. Ne̱ ina̱nj nachri̱ꞌ nij soꞌ ni̱ꞌyaj nij soꞌ se sa̱ꞌ na̱nj á. Ne̱ ina̱nj síí tihaꞌ yuꞌunj tuviꞌ gu̱un uún nij soꞌ na̱nj ado̱nj. Ne̱ ina̱nj caꞌne̱j nimán nij soꞌ quiꞌya̱j nij soꞌ chrej chiꞌi̱i̱ na̱nj ado̱nj. Ne̱ ꞌo̱ nda̱a xraan rmaꞌa̱n cuma̱n se nucuiꞌ rá nimán nij soꞌ, ne̱ ina̱nj nano̱ꞌ nij soꞌ rasu̱u̱n me rá maꞌa̱n nij soꞌ a. Se̱ nanoꞌ nij soꞌ a̱ doj man Yaꞌanj a̱ maꞌ. Ase vaa yuvii̱ noco̱ꞌ man Yaꞌanj roꞌ, da̱nj ga̱a̱ nij soꞌ, tza̱j ne̱ daj chiha̱a̱ míj se̱ caꞌvej rá nij soꞌ naquiꞌya̱j sa̱ꞌ Yaꞌanj nimán nij soꞌ maꞌ. Naxu̱u̱n yaníj so̱ꞌ mán so̱ꞌ rihaan nij síí vaa da̱nj á.