2 Pedro 3

Xcweenta chin guibiaꞌgarii Jesucristu

1Pwihsi bwiitsi raꞌn, dee naa nin raroopa dxihtsi nin caguꞌneezahn para laꞌhtu, tin cayuhꞌnnahn ziga dxiagannastoꞌ tu tin cheezah zaꞌca tu loh xchiꞌdxyi Dxiohs nin guhca biñih stoꞌ tu. 2Gulgasannah stoꞌ tu xcweenta dxyiꞌdxyi raꞌ nin guñiꞌ guehtu daada raꞌ nin guñiꞌ xchiꞌdxyi Dxiohs cachieempa rooꞌ duxa, neezaa dxyiꞌdxyi nin guñiꞌ Daada Jesucristu nin baluuꞌyi raꞌ xpooxtla Ñiꞌh laꞌhtu.

3Pwihsi gulgahpa dziꞌtsi dee raꞌ stoꞌ tu: Laꞌn dxyih luulchima raꞌ nin laꞌh guidxyiyuh gaduhbi, ziꞌ raꞌ bwiinn raꞌ nin guibahan laꞌn dxyih raꞌ chi cun cweenta gahca ziga xclaaꞌdzi tihxi raꞌ ba, cun zullihdzinee raꞌ ba xcweenta xchiꞌdxyi Dxiohs, 4ya zinaaba dxyiꞌdxyi raꞌ ba loh tu: “¿Xixnaa ayi xi rsohn dxiꞌ Crixtu ziga biaꞌhan dxyiꞌdxyi? Pwihsi desde chin guhchi raꞌ xtaada guldooꞌ raꞌ nuꞌh, garaatiiꞌ zeezah gahca ayi xi galuuꞌyi xi stuhbi gaca desde chin gurihxchih guidxyiyuh.” 5Bwiinn raꞌ chi ayi xclaaꞌdzi raꞌ ba gacabwaꞌ raꞌ ba, laꞌn naa la desde chiempa rooꞌ bwiꞌhnnchaꞌyi Dxiohs llaaꞌndxibaaꞌ pur xchiꞌdxyi Ñiꞌh, nee pur xchiꞌdxyi Dxiohs za guhcachaꞌyi loh guidxyiyuh nee gubiꞌhyi ñihsa loh guidxyiyuh. 6Chiꞌchi guñihchiloh garaatiiꞌ raꞌ bwiinn raꞌ nin gurih loh guidxyiyuh chin biaaba tuhbi ñihsadxiah xihn nin bañihchiloh laꞌh raꞌ ba. 7Per dxibaaꞌ cun guidxyiyuh nin naa nnah, zaduhbin cun dxih pur laꞌhgahca xchiꞌdxyi Dxiohs; dxih chi gucaꞌdxih laꞌhan loh dxyih nin gaca jwisi, chin guñihchiloh Dxiohs laꞌh raꞌ bwiinn duhlda raꞌ.

8Nee bwiitsi raꞌn, ayi dxiaꞌlda stoꞌ tu para laꞌh Daada Jesucristu, tuhbi dxiꞌh dxyih naa ziga tuhbi mihyi yihza ya tuhbi mihyi yihza naa ziga zi tuhbi dxiꞌh dxyih para laꞌh Ñiꞌh. 9Dxiohs ayi cayahcanagahn dxiꞌh para guzaꞌloh xchiꞌdxyi Ñiꞌh ziga ruhnn nuu raꞌ bwiinn lligaaba, sino que paseensi si cayahpa Ñiꞌh laꞌh raꞌ nuꞌh, laasii ayi xclaaꞌdzi Ñiꞌh nin tuhbi bwiinn ñichiloh sino que garaa raꞌ ba guzee raꞌ ba para dxibaaꞌ.

10Per dxyih nin dxiꞌ Jesucristu stuhbi zahcan ziga zi chin radzihn tuhbi gubaꞌn nin ayi nuu dxyiꞌdxyi tiiꞌ radzihn, ya chiꞌchi zicaꞌdxih llaaꞌndxibaaꞌ cun garaa nin zaꞌbi lohon cun tuhbi bwih duxa nin guunn guidxyihbi duxa raꞌ bwiinn, ya guidxyiyuh cun garaa raꞌ nin rii chiꞌh zi loh guidxyiyuh zicaꞌdxih raꞌn.

11Laasii garaa raꞌ deeꞌ raꞌ ziñihchiloh raꞌn, niꞌchin laꞌhtu gulguibahan nayaa loh guidxyiyuh riiꞌ, ayi gaca tu bwiinn duhlda. 12Gulcwehza nee gulguiꞌhnn para dxiooba gadzihn dxyih chiꞌh zi nin guunn Dxiohs lligaaba dxiꞌ Ñiꞌh. Pwihsi dxyih chi ziñihchiloh llaaꞌndxibaaꞌ cun dxih, ya garaa nin rachidiaꞌha raꞌ nuꞌh nez llaaꞌndxibaaꞌ zicaꞌdxih raꞌn, buꞌhu zi dxiaca raꞌn, 13per laꞌhnuꞌh nin cabweeza nuꞌh gadzihn dxyih nin dxiinloh dxibaaꞌ nacuubi nee loh guidxyiyuh nacuubi nin biaꞌhan dxyiꞌdxyinee Dxiohs loh nuꞌh gachicaꞌha nuꞌh, hasta gaca ganaalla si dziꞌn zaꞌca nee ayi chuꞌtiiꞌ nin tuhbi duhlda.

14Pwihsi niꞌchin bwiitsi raꞌn, loh gaduhbi nin cabweeza raꞌ nuꞌh cohsa raꞌ riiꞌ; gulguiꞌhnn ziga xclaaꞌdzi Dxiohs tin ziꞌchi gwaꞌha Ñiꞌh laꞌhtu guchii naa tu bwiinn nin riidxyii stoꞌ raꞌ ñiꞌh cun xcweenta xchiꞌdxyi Ñiꞌh, sin nin tuhbi xilla cohsa dxaaba, cohsa duhlda. 15Gulgahpa cweenta xcweenta paseensi nin nahpa Daada Jesucristu cun laꞌhnuꞌh, niꞌchi naa ziga taꞌh nuꞌh loh duhlda. Pwihsi ziꞌchi za bacaꞌh bwihtsi dziꞌtsi nuꞌh Pahblu xcweenta ziga badiꞌhi Dxiohs guelnasiin laꞌh ba. 16Garaa raꞌ loh dxihtsi nin bacaꞌh ba guñiꞌ ba garaa raꞌ dxyiꞌdxyi raꞌ riiꞌ, nicala nuu raꞌ dxyiꞌdxyi raꞌ chi nagahn raꞌn para gacabwaꞌ luꞌhn, per bwiinn raꞌ nin gulliaꞌyiꞌhn rahcabwaꞌ, bwiinn nin ruhnn chiohpa stoꞌ raꞌ ñiꞌh, bwiinn raꞌ nin ruxiꞌdxi raꞌ loh xchiꞌdxyi Ñiꞌh, squiiꞌgahcaza ruhnn raꞌ ba loh garaatiiꞌ xchiꞌdxyi Dxiohs, niꞌchin ziñihchiloh raꞌ ba.

17Niꞌchin bwiitsi raꞌn, yaque laꞌhtu naann tu xcweenta dxyiꞌdxyi raꞌ riiꞌ, gulgahca nasiin tin ayi dxiaaba tu loh guelrusaguiꞌhi xteenn raꞌ bwiinn raꞌ nin ayi xclaaꞌdzi guzoꞌbadxiahga xchiꞌdxyi Dxiohs, tin ayi guñihchi tu ziga zeezah dziꞌtsi tu loh xchiꞌdxyi Dxiohs nin zeezahnee tu. 18Niꞌchin mahzi chaꞌyi gulchezah guldxiuꞌnbwaꞌ laꞌh Daada Jesucristu nee gulchiooꞌ ru loh xquelnazaꞌca xteenn Ñiꞌh. Pwihsi ¡ba zaꞌbi dxyiꞌdxyi para laꞌh Ñiꞌh nnah nee para gaduhbi chieempa tiiꞌ! Ziꞌchi gaca pwihsi.

Currently Selected:

2 Pedro 3: zpv

Highlight

Copy