YouVersion Logo
Search Icon

2 Corintios 2

2
1Pwihsi niꞌchin bwiꞌhnnaꞌhn xigaabagahcahn ayiru ñieꞌldaguiaꞌhahn cuun tu tin ayi ziꞌchi ñibiinnzi stoꞌ tu, 2laasii sidela naꞌh sola chiꞌhyihn nez guibiin stoꞌ tu, ya ¿chyuulla guunn chiꞌh para ziga chuu nasaa stoꞌn sidela sola bwixꞌhnnaꞌhn bibiin stoꞌ tu? 3Niꞌchin sola bacaꞌhn dxihtsisi riiꞌ loh tu, laasii ayi xclaaꞌdzihn ñieꞌldahn tin ayi ñibiinzi lastoꞌ tu, xlawaaꞌha ziga ñiguuꞌ nasaa tu stoꞌn. Pwihsi naꞌpahn siguhra sidela dxiin stoꞌn guelnasaa, ziꞌchi za garaatiiꞌ za tu ziin stoꞌ tu guelnasaa. 4Pwihsi loh nin cagacaꞌhn dxihtsi riiꞌ, ziahan lligaaba duxa bwiꞌhnnaꞌhn, hasta ñihsabwii biaaba loon; per ayi bacaꞌhñin tin gusabiinan stoꞌ tu, sino que tin gacabwaꞌ tu cuun guelnadziiꞌhi nin naꞌpahn cun laꞌhtu.
Guyuuꞌ pardohn xcweenta bwiinn nin bwiꞌhnn duhlda
5Per sidela chyuulla cayuhnn nuu guelrbiin stoꞌn, ayi tuhsi dxiꞌh stoꞌn cagasabii ba sino que neezaa lastoꞌ tu cagasabii ba; gulliaꞌyiꞌhn dxyiꞌdxyi guiñiꞌn laasii ayi xclaaꞌdzihn guunn tu lligaaba duxa. 6Banaa ziꞌcachiꞌh basaꞌcazii ziahan bwiinn laꞌh daada ca, ayi ru gusaꞌcazii tu laꞌh ba nnah, 7yannah mas nin guunn tu gulgasiaꞌlda stoꞌ tu xtuhlda ba nee gulgasiaꞌlda stoꞌ ba, tin ayi chuu guelrbiin stoꞌ ba. 8Niꞌchin nin rnaꞌbaꞌhn loh tu gulgaluuꞌyi xa naa guelnadziiꞌhi lasaaꞌ nin nahpa tu cun laꞌh ba nin naa desde galohyi. 9Pwihsi niꞌchin cun chieempa bacaꞌhn dxihtsi loh tu tin guiduꞌhun zuzoꞌbadxiahga tu dxyiꞌdxyi raꞌ nin rñiꞌn loh tu. 10Yannah ziga bwiinn nin gusiaꞌlda stoꞌ tu xtuhlda ñiꞌh pur xi chiꞌh zi cohsa, neezaa naꞌh zusiaꞌlda stoꞌn xtuhlda bwiinn chi. Laasii sidela guyuuꞌ xa pura basiaꞌlda stoꞌn laꞌhtu, bwiꞌhnnañin nez loh Jesucristu, 11tin ziꞌchi ayi nuu xa guunn bwiinndxaaba gahn laꞌhnuꞌh; laasii naannloh nuꞌh ziga naa xtsiꞌn ba.
Guyuuꞌ Pahblu guelrzaaꞌ chin badzihn ba loh guihdxyi Troas
12Chin badzihnaꞌhn loh guihdxyi Troas para guluꞌyiꞌhn xchiꞌdxyi Daada Jesucristu, seguihdugahca badxiꞌloon nuhn bwiinn nin xclaaꞌdzi dxinndxiahga xchiꞌdxyi Jesucristu, 13per ayi gurihdxyii stoꞌn laasii ayi badxiꞌloon Titu bwihtsi nuꞌh. Pwihsi niꞌchin gunaꞌzu neezahn para nez guihdxyi Macedonia.
Jesucristu ruhnn ridiꞌhnn nuꞌh gahn
14Per zuxchiilli Dxiohs zenee Ñiꞌh laꞌhnuꞌh nez loh xneziuh Jesucristu nin rahcanee ridiꞌhnn nuꞌh gahn loh garaatiiꞌ, ya pur laꞌhnuꞌh ruhnn Ñiꞌh xa dxiuꞌnbwaꞌ raꞌ bwiinn nin rii garaa lahta loh guidxyiyuh xchiꞌdxyi Dxiohs nin naa ziga zi tuhbi bwih nin xchiaꞌhnahxi dzihn. 15Laasii laꞌh nu naa nu ziga zi guxaꞌhla nin rutiꞌdxi Crixtu nez loh Dxiohs, ya rzaꞌbi guhxa chi nez yihca raꞌ nin rlaꞌh loh duhlda nee cun yihca raꞌ za nin cagañihchi raꞌ. 16Para laꞌh raꞌ nin riigañihchi raꞌ, guxaꞌhla riiꞌ naan ziga zi tuhbi xchiaꞌ dxaaba nin rusazaꞌ stoꞌ laꞌh raꞌ ba pura guelguhchi nin cabweeza laꞌh raꞌ ba, per para laꞌh raꞌ nin rlaꞌh loh duhlda naa guxaꞌhla riiꞌ para laꞌh raꞌ ba ziga tuhbi xchiaꞌ nahxi xteenn guelnabahan nacuubi nin gudiꞌhi Dxiohs laꞌh raꞌ ba. ¿Chyu laa nin rahcabwaꞌ lasaaꞌ raꞌ cohsa raꞌ ca? 17Pwihsi ayi chyu gaca ziga bwiinn raꞌ nin rutooꞌ xchiꞌdxyi Dxiohs, laasii laꞌh nu raluuꞌyi nu cun sola ziga bacaꞌbi Jesucristu gaca, nee cun ziga nin naa guchiipaꞌh gaca nezloh Dxiohs.

Currently Selected:

2 Corintios 2: zpv

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy