1 Corintios 15
15
Babahn zaꞌca Jesucristu loh raꞌ bwiinn guuchi
1Nnah rñiꞌn loh tu bwiitsi raꞌn; gulgasannah stoꞌ tu xcweenta xchiꞌdxyi Dxiohs nin baluꞌyiꞌhn loh tu nin gwachii stoꞌ tu nin cayuhnn nadxiipa lastoꞌ tu. 2Pwihsi neezaa pur xcweenta dxyiꞌdxyi raꞌ riiꞌ basiaꞌpitii Dxiohs xcweenta xtuhlda tu sidela zeezahnee tun cun gaduhbi stoꞌ tu, sidela ayi guunn chiohpa stoꞌ tu.
3Pwihsi nin naa mweergalohtiiꞌ, baluꞌyiꞌhn laꞌhtu dxyiꞌdxyi raꞌ nin basiꞌdxiꞌhn; baluꞌyiꞌhn laꞌhtu xa guhchi Jesucristu pur xcweenta xtuhlda raꞌ nuꞌh, ziga nin caa loh Xchihtsi Dxiohs. 4Guñiꞌn loh tu xa bigaꞌtsi Ñiꞌh, ya babahn Ñiꞌh loh raꞌ bwiinn guuchi chin biohnna dxyih ziga nin rñiꞌ loh Dxihtsi xteenn Dxiohs xcweenta Ñiꞌh, 5ya loh nin babahn Ñiꞌh, baluuꞌyiloh za Ñiꞌh loh Pehdru, ya chiꞌchi baluuꞌyiloh za Ñiꞌh loh raꞌ gadziꞌh bichiohpa xpooxtla Ñiꞌh, 6chiꞌchi baluuꞌyiloh za Ñiꞌh loh raꞌ gaꞌyu gaywaꞌh bwiinn raꞌ tuhbi lahta, ziahan ru raꞌ ba nabahan nnah, per nuu za raꞌ ba laꞌh raꞌ ba ba guhchi. 7Ya seguihdu baluuꞌyiloh za Ñiꞌh loh Jacobo, chiꞌchi loh raꞌ garaa tiiꞌ raꞌ pooxtla.
8Pur luulchimatiiꞌ, yaque baluuꞌyiloh Ñiꞌh loh raꞌ garaa raꞌ ba, chiꞌchi baluuꞌyiloh za Ñiꞌh loon, 9pwihsi naꞌh gulliaꞌyiꞌhn lasahcaꞌhn loh raꞌ snuhn pooxtla, nee nin ayi za ruhn marehsa guiriaꞌhlaan pooxtla, laasii gucaꞌhnaꞌhlaraꞌn xpwiinn guidoꞌ Jesucristu, 10per balahsa duxa stoꞌ Dxiohs naꞌh, niꞌchin naan tuhbi pooxtla nnah, per ayi lliaaꞌzi balahsa stoꞌ Ñiꞌh naꞌh, laasii naꞌh bwiꞌhnnruun dziꞌn loh garaa raꞌ ba; per ayi pur xcweenta gahcadxiꞌhn sino que Dxiohs cayahcanee naꞌh pur nin nadziiꞌhi Ñiꞌh naꞌh, 11per ayi xi ruhnn nicala laꞌh raꞌ ba o naꞌh naa nin mahzi lasahca, sola nin nahpa galuuꞌyi nu naa xa taꞌh bwiinn loh duhlda xcweenta ziga riachii stoꞌ raꞌ ba xchiꞌdxyi Dxiohs; ya ziga gwachii stoꞌ tu guhca gulaꞌh tu loh duhlda.
Xcwenta ziga gabahan raꞌ bwiinn nin guhchi
12Per sidela laꞌhnu cagaluuꞌyi nu xcweenta ziga babahn zaꞌca Jesucristu loh raꞌ bwiinn guuchi, ¿xixnaa chiꞌh nuu raꞌ nin rñiꞌ: “Ayi chuu ziga gabahan raꞌ bwiinn guuchi”? 13Pwihsi sidela ayi gabahan raꞌ bwiinn guuchi, ziꞌchiza nin Crixtu ayi babahn loh guelguhchi, 14ya sidela neezaa ayi babahn Jesucristu loh guelguhchi, pwihsi ziꞌchiza nin xchiꞌdxyi Ñiꞌh nin raluuꞌyi raꞌ nu ayi xi guilasahcan, ya ziga guelriachii stoꞌ nin nuu lastoꞌ tu ayi xi guilasahcazan. 15Sidela ziꞌchi pwihsi laꞌhnuꞌh naa nuꞌh xpwiinn Dxiohs nin rusaguiꞌhizi, nee nicala ya bachiñiꞌ nu Dxiohs bacwaꞌhn laꞌh Jesucristu loh guelguhchi; ya sidela ayi guchii dxiꞌh gabahan raꞌ bwiinn guuchi, pwihsi ayi za guchii dxiꞌh bacwaꞌhn Dxiohs laꞌh Jesucristu loh guelguhchi, 16laasii sidela laꞌh raꞌ bwiinnguuchi ayi gabahan raꞌ ba, pwihsi nin laꞌh za Crixtu ayi za babahn Ñiꞌh loh guelguhchi. 17Ya sidela Crixtu ayi babahn Ñiꞌh loh guelguhchi, pwihsi ziꞌchi za guelriachii stoꞌ nin nuu stoꞌ tu ayi galluꞌyin; ya nuu gahca tu loh duhlda. 18Ya sidela ziꞌchi pwihsi hasta cun bwiinn raꞌ nin naa xpwiinn Ñiꞌh nin baguhchi raꞌ naa raꞌ ba nin baguñihchilohtiiꞌ. 19Ziꞌchiza garaa raꞌ nuꞌh nin nabahan chiꞌh zi loh guidxyiyuh riiꞌ ziga naa dxyiꞌdxyi cabweza raꞌ nuꞌh Jesucristu, naa nuꞌh mahzi bwiinn nin bizaꞌbitiiꞌ loh raꞌ garaa raꞌ bwiinn guidxyiyuh.
20Per ziga ya bacwaꞌhn Dxiohs laꞌh Jesucristu loh guelguhchi, niꞌchin laꞌh Ñiꞌh naa Ñiꞌh mweergaloh nez loh raꞌ bwiinn guuchi raꞌ nin gabiaꞌgarii gabahan raꞌ. 21Pwihsi ziga biinloh guelguhchi pur xcweenta tuhsi ndxiꞌhw loh guidxyiyuh, ziꞌchi za pur xcweenta tuhsi za ndxiꞌhw biinloh gabahan raꞌ bwiinn loh guelguhchi. 22Ziga pur xcweenta tuhbi ndxiꞌhw nin laa Adahn biinloh guelguhchi ziꞌchi za nnah pur xcweenta Jesucristu chuu gabahan raꞌ bwiinn loh guelguhchi, laasii naa raꞌ ba xpwiinn Ñiꞌh. 23Per cada tuhbigah raꞌ nuꞌh ziga bwiꞌhnn Dxiohs lligaaba gaca: Jesucristu naa mweer galoh, ya chin dxiꞌ Ñiꞌh stuhbi garaa nin naa xpwiinn Ñiꞌh dxieꞌgalliꞌh Ñiꞌh loh guidxyiyuh ziga nin nabahan raꞌ tantu ziga nin guhchi raꞌ, 24ya chiꞌchi gadzihn raꞌ dxyih luulchima raꞌ chin guzaꞌloh Crixtu guelrnabwaꞌ raꞌ, garaa raꞌ guelguxchisi raꞌ, nee cun guelrnabwaꞌ raꞌ nin nuu llaaꞌndxibaaꞌ; ya chiꞌchi dxiuꞌn Ñiꞌh ntriehgu guelrnabwaꞌ loh Xtaada Dxiohs Ñiꞌh, 25laasii Crixtu caꞌha Ñiꞌh guelrnabwaꞌ cun para hasta laꞌn dxyih raꞌ nin garah raꞌ bwiinn nin rdxyiꞌchinee laꞌh Ñiꞌh gutsiiga Dxiohs nez loh Ñiꞌh, 26ya luulchima nin rdxyiꞌchinee laꞌh Ñiꞌh nin guzaꞌloh Ñiꞌh naa guelguhchi, 27laasii laꞌh Dxiohs batsiiga garaa raꞌ cohsa raꞌ nez ñaaꞌ Crixtu. Per ziga caa loh Xchihtsi Dxiohs garaa raꞌn gwabiiga nez ñaaꞌ Ñiꞌh, pwihsi guyaa ayi nee dxiꞌh Daada Dxiohs guinabwaꞌ Jesucristu, laasii laꞌh Daada Dxiohs naa nin batsiiga garaa raꞌ cohsa raꞌ nez ñaaꞌ Jesuhs. 28Ya chin laꞌh Crixtu canabwaꞌ garaa raꞌ cohsa raꞌ, chiꞌchi ziuꞌn Ñiꞌh ntriehgu garaa guelrnabwaꞌ loh Xtaada Ñiꞌh nin naa Dxiohs, ya chiꞌchi tuhsi Dxiohs guinabwaꞌ garaatiiꞌ raꞌ cohsa.
29Pwihsi ziga ruhnn tu lligaaba ayi gabahan raꞌ bwiinn loh guelguhchi, ¿xi pur rrohbañihsa chiꞌh tu xcweenta raꞌ bwiinn guuchi nin gwachiistoꞌ ñiꞌh xchiꞌdxyi Dxiohs? Ziꞌchiza sidela laꞌh bwiinn ayi gabahan raꞌ ba loh bwiinn guuchi, ¿xixnaa chiꞌh ruroꞌbañihsa raꞌ ba laꞌhtu xcweenta raꞌ bwiinn guuchi?
30Nee ¿xixnaa chiꞌh za dxuu nuꞌh loh raꞌ xica guelyaꞌdxi raꞌ gaduhbi hohra tiiꞌ? 31Rñiꞌ naannchiꞌpaꞌhn loh tu, bwihtsi raꞌn, cayuhnn lasahcaꞌhn xcweenta tu nez loh Daada Jesucristu Xtaada nuꞌh nin cayuhnn xtsiꞌn Ñiꞌh laꞌn lastoꞌ tu, ya guiñiꞌn loh tu, garaa dxyih rdxihldxinee raꞌ bwiinn naꞌh tin chiinn raꞌ ba naꞌh. 32Pwihsi sidela bwiꞌhnnaꞌhn lligaaba zigazi tuhbi bwiinn guidxyiyuh chin bacaꞌneen laꞌh raꞌ bwiinn raꞌ nin naa raꞌ ziga zi maan ñaꞌlaaꞌdzi raꞌ loh guihdxyi Efesu, ¿xi gahn bwiꞌhnnaꞌhn? Sidela laꞌh raꞌ bwiinn ayi gabahan loh guelguhchi, niꞌchin ¡gulchoꞌho!, guidiꞌhnn nuꞌh ziga rñiꞌ raꞌ bwiinn guidxyiyuh: “Gulchoꞌho guidaꞌw raꞌ nuꞌh nee guidwaa za nuꞌh, laasii guillii gachi raꞌ nuꞌh.”
33Ayi gusaaꞌn tu guisaguiꞌhi tu ziga zi rahbi tuhbi dihchu: “Ayi guchaꞌga luꞌh bwiinn mahn o laꞌn zidiiꞌdxi luꞌh xtuhxa ba.” 34Nin guunn tu nnah gulgahca nasiin, ayi cuꞌtii tu duhlda, laasii nuu raꞌ bwiinn raꞌ loh tu nin ayi nuꞌnbwaꞌ raꞌ laꞌh Dxiohs nin nuu dxibaaꞌ; cañiꞌn yihca tu tin gatuhyi loh tu.
Xcweenta ziga gabahan raꞌ bwiinn raꞌ nin guhchi
35Pwihsi ziuuꞌ nin guinaabadxyiꞌdxyi raꞌ: “¿Xa gabahan raꞌ chiꞌh bwiinn guuchi raꞌ loh guelguhchi? ¿Xa gaca chiꞌh tihxi raꞌ ba?” 36Squiiꞌ rñiꞌn loh bwiinn chi. ¡Bwiinn nahdatiiꞌ! Chin rbahchi luꞌh biñih pwihsi nahpa rachiduꞌh biñih chi o sea rñihchiloh biñih chi tin ziꞌchi rahpa yahguiꞌhn xteenn biñih chi guelnabahan. 37Biñih nin riaaba laꞌn yuh ayi tihxi dxiꞌh biñih chi rahca yahguiꞌhn sino que stoꞌ biñih chi rahca yahguiꞌhn, nicala naa biñih chi trihgu o llooba. 38Ya chiꞌchi laꞌh Dxiohs rudiꞌhi Ñiꞌh foorma laꞌh biñih chi ziga naa xigaaba Ñiꞌh. 39Ayi garaa dxiꞌh tihxi chyu chiꞌhzi naa tuhbiloh. Ziga tihxi bwiinn naan guriin, tihxi guidxaꞌh naa zan guriin, ziga tihxi raꞌ maan raꞌ nin zohba xihyi ñiꞌh guriin naazan; ziꞌchi za tihxi raꞌ bwehlda guriin naaza tihxi raꞌ ma. 40Pwihsi ziꞌchi za nuu raꞌ tihxi raꞌ nin naa xteenn nez llaaꞌndxibaaꞌ, nee cun tihxi za nez loh guidxyiyuh; per ziga foorma xteenn tihxi llaaꞌndxibaaꞌ guriincaa naan loh tihxi xteenn loh guidxyiyuh, 41laasii ziꞌchi za ziga llaꞌñih xteenn gubihdxyi guriin naan lon llaꞌñih xteenn bweꞌhw, ya ziꞌchi za ziga dxih llaaꞌndxibaaꞌ cada tuhbigah raꞌn guriin-guriin naan llaꞌñih raꞌn. 42Ziꞌchi za naa xcweenta ziga guelgabahn bwiinn loh guelguhchi, ziga chin rgaꞌtsi tuhbi bwiinn loh guelguhchi ruuꞌdxyi tihxi ba laꞌn baꞌ nee rñihchilohon, per chin gabahan ba loh raꞌ bwiinn guuchi, guriin gaca tihxi ba, ayi ru guudxin laasii banuu nabahan ba par tuꞌpazi. 43Rgaꞌtsi tihxi nin rbweꞌhestoꞌ bwiinn, ya rabahan tihxi nacuubi nin rwaꞌha zaꞌca bwiinn loh ñiꞌh; rgaꞌtsi tihxi nin ayi jweersi, per rabahan tihxi nacuubi nin rahca nadxiipa duxa. 44Chin rgaꞌtsi tihxi ziga tuhbi bwiinn laꞌn baꞌ, naa tihxi ba chi xteenn guidxyiyuh, ya ziga tihxi cuubi ba chi nin gabahan naan tuhbi tihxi cuubi nin rudiꞌhi Dxiohs. Niꞌchin nin nuu tihxi bwiinn riahcan yuh, ya nuu za tihxi bwiinn ziga nin guzee para dxibaaꞌ.
45Pwihsi ziga za caa loh Xchihtsi Dxiohs, ndxiꞌhw galoh nin laa Adahn, bwiꞌhnn Dxiohs guhca ba tuhbi bwiinn nin gubahan; per ya Adahn nin biꞌ luulchima, niꞌchi naa Jesucristu nin naa tuhbi Spíritu nin runiꞌhi guelnabahan nacuubi laꞌhnuꞌh. 46Galoh naa guelnabahan xteenn guidxyiyuh, ya chiꞌchiyi guyuuꞌ tuhbi guelnabahan nacuubi nin biinloh nez dxibaaꞌ. 47Ziꞌchi za mweer ndxiꞌhw nin bwiꞌhnn chaꞌyi Dxiohs guhca ba cun guxuh xteenn yuh nee naa ba bwiinn guidxyiyuh; ya ndxiꞌhw nin raroopa naa Jesucristu, laꞌh Ñiꞌh biehta Ñiꞌh nez dxibaaꞌ hasta nuu Dxiohs. 48Bwiinn guidxyiyuh raꞌ naa raꞌ ba ziga zi laꞌh Adahn nin bwiꞌhnn Dxiohs cun guxuh, ya bwiinn raꞌ nin naa para dxibaaꞌ naa raꞌ xpwiinn Jesucristu nin biehta nez guiꞌwdoꞌ dxiaa dxibaaꞌ. 49Pwihsi ziga rñah za nuꞌh ziga bwiinn nin guhca cun guxuh xteenn guidxyiyuh, pwihsi ziꞌchi za guluuꞌyi guiñah nuꞌh ziga rñah bwiinn nin nuu llaaꞌndxibaaꞌ.
50Pwihsi xclaaꞌdzihn guiñiꞌn loh tu bwiitsi raꞌn, nin naa bweꞌhla nee dzihta nin guhlanee nuꞌh ayi nuu chuu raꞌn loh xquelrnabwaꞌ Dxiohs, nacuubi gaca garaatiiꞌ; pwihsi nin rñihchiloh ayi nuu chuu niꞌchi loh nin ayi rñihchilohtiiꞌ, 51per xclaaꞌdzihn gacabwaꞌ tu tuhbi cohsa ralaꞌn. Ayi garaa raꞌ dxiꞌh nuꞌh gachi, per garaa raꞌ nuꞌh zahca zidxaꞌh raꞌ nuꞌh. 52Madxihdu zigazi siin luꞌh, nee lwehgugahca guillaala loh luꞌh, chin dxihn tu guiñiꞌ luulchima trompeta, chiꞌchi zabahan raꞌ bwiinn raꞌ nin guhchi ya ayi ru chutiiꞌ dxyih gachi raꞌ ba; ya neezaa laꞌh raꞌ nuꞌh zidxaꞌh za tihxi raꞌ nuꞌh, 53laasii tihxi nuꞌh nin naa xteenn guidxyiyuh guidxaꞌhan tin gaapa nuꞌh tihxi nuꞌh nin naa xteenn llaaꞌndxibaaꞌ, laasii tihxi nuꞌh nin naa xteenn guidxyiyuh rahchin, per ziga tihxi nuꞌh nin naa xteenn dxibaaꞌ ayi para gachin; ba naan para tuꞌpazi. 54Ya ziga chin laꞌh tihxi nuꞌh nin naa xteenn guidxyiyuh bidxaꞌh tin guidxiaapa nuꞌh tihxi nuꞌh nin naa xteenn llaaꞌndxibaaꞌ, nee neezaa chin laꞌh tihxi nuꞌh nin zahca gachi bidxaꞌh tin guidxiaapa nuꞌh tihxi nuꞌh nin ayi gaca gachi, nin chuu para tuꞌpazi; ya chiꞌchi zizohba xchiꞌdxyi Dxiohs nin rñiꞌ squiiꞌ: “Laꞌh guelguhchi guñihchiloh laasii bwiꞌhnn Jesucristu gahn loh guelguhchi.” 55Guelguhchi, ¿cuun xquelrnabwaꞌ luꞌh para guinabwaꞌ luꞌh laꞌhnu? Guelguhchi, ¿cuun xchiꞌh xquelnnah luꞌh nin ñahpa luꞌh? 56Xquelnayaan xteenn guelguhchi naa duhlda, ya xquelrnabwaꞌ duhlda naa lehyi, 57per zuxchiilli Dxiohs, runiꞌhi Ñiꞌh guelrnabwaꞌ laꞌhnuꞌh pur xcweenta xteenn Daada Jesucristu.
58Pwihsi niꞌchin bwiitsi raꞌn, gulchezah nayaa gaduhbi stoꞌ tu; gulguiꞌhnn xtsiꞌn Dxiohs ayi guiriaꞌh gahn tu, laasii laꞌhtu naann tu dziꞌn nin guunn tu xcweenta Dxiohs ayi naan dziꞌn lliaaꞌha.
Currently Selected:
1 Corintios 15: zpv
Highlight
Share
Copy
Want to have your highlights saved across all your devices? Sign up or sign in
© 1990, Wycliffe Bible Translators, Inc. All rights reserved.
