Mateo 5
5
Kushishqa kawanantsikpaq Jesús yachatsikunqan
Lucas 6.20-23
1Atskaq nunakuna ëllukaqta rikarmi jirkaman witsarkur Jesús täkurirqan. Lädunman discïpulunkuna ëllukäriyaptinnam 2kënö nir yachatsirqan: 3<<Kushishqam kawayanqa Teyta Diosta wanaqkuna. Pëkunapaqmi Teyta Diospa mandakïninqa.
4<<Kushishqam kawayanqa llakikur waqaqkuna. Pëkunatam Teyta Dios shoqanqa.#Isa. 61.2.
5<<Kushishqam kawayanqa alli shonquyuqkuna. Pëkunam mushuq patsata herenciankuna chaskiyanqa.#Sal. 37.11.
6<<Kushishqam kawayanqa mallaqëpanöraq y yakunëpanöraq Teyta Dios munashqannö kawëta munaqkuna.#Isa. 55.1-2. Pëkunatam Teyta Dios yanapanqa.
7<<Kushishqam kawayanqa nuna mayinta ankupaqkuna. Pëkunatam Teyta Dios ankupanqa.
8<<Kushishqam kawayanqa limpiu shonquyuqkuna.#Sal. 24.4. Pëkunam Teyta Diosta rikäyanqa.
9<<Kushishqam kawayanqa nuna mayinta amishtatsiqkuna. Pëkunatam Teyta Dios <wamrämi kanki> ninqa.
10<<Kushishqam kawayanqa Teyta Dios munashqannö kawayashqanpita nunakuna jipatsiyaptin.#1Ped. 3.14. Pëkunapaqmi Teyta Diospa mandakïninqa.
11<<Kushishqam kawayanki noqata chaskiyämashqëkipita nunakuna ashayäshuptiki, jipatsiyäshuptiki y ulikur imëkatapis tumpayäshuptiki.#1Ped. 4.14. 12Tsënö kaptinpis kushikuyë. Qamkunataqa gloriachömi Dios alläpa shumaq premiuta qoyäshunki. Chikiyäshushqëkinöllam unë nunakunapis Teyta Diospa profëtankunata chikiyarqan.#2Crón. 36.16; Hech. 7.52.
Kachinö y aktsinö kanqantsikta Jesús yachatsikunqan
Marcos 9.50; Lucas 14.34-35
13<<Kë patsachö qamkuna kachinömi këkäyanki. Kachi qamläkurirqa manam imapaqpis sirwinnatsu. Tsë kachitaqa jitariyaptinmi pïmëpis jalukun.
14<<Jina kë patsachö qamkuna aktsinömi këkäyanki.#Juan 8.12; 9.5. Jirkachö këkaq markata pïmëpis rikäyashqannömi imanö kawayashqëkitapis rikëkäyäshunki. 15Manam pipis chiwchita sendirkur cajón rurinman churantsu, sinöqa wayichö llapanta aktsinanpaqmi alëruman churan.#Mar. 4.21; Luc. 8.16; 11.33. 16Tsënölla qamkunapis nunakuna rikäyäshunëkipaq tutapëchö atsikyaqnö allikunata rurayë. Tsënö kawayashqëkita rikarmi ciëluchö këkaq Teytëkita alabayanqa.#1Ped. 2.12.
Moisés y profëtakuna qellqayanqankunata Jesús cumplinqan
17<<Ama yarpäyëtsu Moisés qellqashqan leykunata y profëtakuna qellqayashqankunata manakaqpaq churanäpaq shamushqäta. Manam manakaqpaq churanäpaqtsu shamurqü, sinöqa pëkuna qellqayashqankuna noqachö cumplikänanpaqmi. 18Rasunpam niyaq: Ciëlupis kë patsapis manaraq ushakaptinqa manam ni juk letrallapis Diospa leyninpita illakanqatsu. Tsëchö qellqaraqkunaqa llapanmi cumplikanqa.#Luc. 16.17.
19<<Pipis kë mandamientukunata jukllëllatapis mana cäsukur y wakin nunatapis mana cäsuyänanpaq willaparqa Teyta Diospa mandakïninchö manam ima premiutapis chaskinqatsu. Llapan kë mandamientukunata cäsukur y wakin nunatapis cäsukunanpaq yachatsirqa Teyta Diospa mandakïninchömi premiuta chaskinqa. 20Noqam niyaq: Fariseukunapitapis y ley yachatsiqkunapitapis mas alli mana kawarqa Teyta Diospa mandakïninman manam yëkuyankitsu.
Nuna mayintsikwan alli kawanantsikpaq Jesús yachatsikunqan
21<<Qamkuna musyayankim unë nunakunata kënö nishqanta: <Ama nuna mayikita wanutsinkitsu. Wanutsiq kaqqa juzgashqam kanqa>.#Éxo. 20.13; Deut. 5.17. 22Tsënö niyaptinpis noqaqa kënömi niyaq: Pipis nuna mayinwan piñashqa karqa jutsayuqnam këkan. Jina nuna mayinta asharqa juzgashqam kanqa. Nuna mayinta manakaqpaq churarqa infiernuman jitashqam kanqa.
23<<Tsëmi altarman ofrendëkikunata churayänëkipaq këkar nuna mayikita piñatsiyashqëkita yarparqa 24altar nöpanchö ofrendëkikunata jaqirir tsë höra piñatsinakuyashqëkiwan amishtaq ëwayë. Tsëpitaran kutïkur Teyta Diospaq ofrendëkita churayanki.
25<<Pipis demandayäshuptiki autoridäman manaraq char juklla arreglayë. Mana arreglayaptikiqa juezmanmi apatsiyäshunki. Jueznam wardiakunawan carcelman llawitsiyäshunki. 26Rasunpam niyaq: Tsëpitaqa manam yarquyankitsu llapan jaqanta manaraq pagakurqa.
Adulteriu jutsapita Jesús yachatsikunqan
27<<Qamkuna musyayankim Moisés qellqashqanchö kënö nishqanta: <Ama casakushqa këkar jukwan kakunkitsu>.#Éxo. 20.14; Deut. 5.18. 28Noqaqa kënömi niyaq: Juk warmita munaparqa shonqïkikunachönam adulteriu jutsachö këkäyanki.
29<<Tsëmi allawka kaq nawikikuna jutsata ruratsiyäshuptikiqa tsë nawikita jorqurïkur jitariyë. Mas allim kanman infiernuman jitashqa kayänëkipa rantin wiskullapis kayaptiki.#Mat. 18.9; Mar. 9.47. 30Allawka kaq makikikuna jutsata ruratsiyäshuptikiqa tsë makikita roqurir jitariyë. Mas allim kanman infiernuman jitashqa kayänëkipa rantin juk makiyuqllapis kayaptiki.#Mat. 18.8; Mar. 9.43.
Warminpita mana rakikäyänanpaq Jesús yachatsikunqan
Mateo 19.9; Marcos 10.11-12; Lucas 16.18
31<<Tsënöllam Moisés qellqashqan leykunachö kënö nikan: <Pipis warminwan rakikarqa divorciu papelta firmapätsun>.#Deut. 24.1-4; Mat. 19.7; Mar. 10.4. 32Tsënö niptinpis noqaqa kënömi niyaq: Warmin jukwan mana këkaptin mëqan nunapis warminpita rakikarqa jutsayuqmi këkan warmin juk nunawan tärar adulteriu jutsata rurananpaq. Tsënöllam qowanpita rakikashqa warmiwan täraq nunapis adulteriu jutsata rurëkan.#Mat. 19.9; Mar. 10.11-12; Luc. 16.18; 1Cor. 7.10-11.
Mana juranantsikpaq Jesús yachatsikunqan
33<<Tsënöllam qamkuna musyayanki unë nunakunata kënö nishqanta: <Mana cumpliyänëkipaqqa ama jurayankitsu. Jurarqa mana qonqëllata cumpliyanki>.#Lev. 19.12; Núm. 30.2; Deut. 23.21. 34Tsënö kaptinpis noqaqa kënömi niyaq: Ni ima rëkurpis ama jurayankitsu. Tsënö këkaptinqa ama jurayankitsu <ciëlu rëkur> nirpis. Ciëluqa Teyta Diospa trönunmi. 35Ama jurayankitsu <patsa rëkur> nirpis. Kë patsaqa Teyta Diospa chakin jaluränanmi.#Isa. 66.1; Mat. 23.22; Stg. 5.12. Ama jurayankitsu <Jerusalén rëkur> nirpis. Jerusalénqa llapanpaq puëdiq Rey#5.35 Tsë reyqa Teyta Diosmi. tärashqan markam.#Sal. 48.2. 36Ama jurayankitsu <peqä rëkur> nirpis.#5.36 Unë Israel nunakuna peqan rëkur jurarqa por mi vïda nir juranqantsiknömi karqan. Manam puëdiqtsu kayanki aqtsëkita yulaqman ni yanaman tikratsiyänëkipaqpis. 37Änirqa äniyanki, y mana cumpliyänëki kaptinqa ama äniyankitsu. Jurëparaq änirqa Satanás munashqannömi parlëkäyanki.
Chikimashqapis mana chikinantsikpaq Jesús yachatsikunqan
Lucas 6.29-30
38<<Musyankim Moisés qellqashqan leykunachö kënö nishqanta: <Nawinta jorquptinqa kikinpa nawintapis jorqutsun. Kirunta jorquptinqa kikinpa kiruntapis jorqutsun>.#Éxo. 21.24; Lev. 24.20; Deut. 19.21. 39Tsënö niptinpis noqaqa kënömi niyaq: Chikiyäshuptikipis ama chikiyankitsu. Qaqllëkikunachö laqyëkuyäshuptikipis juknin lädu qaqllëkikunatapis kamapïkuyanki.#Lam. 3.30. 40Pipis demandashurniki camisëkikunata qochiyäshuptikiqa ponchïkitapis qoykuyanki. 41Qepinta juk lëwayaq apayänëkipaq obligayäshuptikiqa ishkë lëwayaqpis apayanki. 42Imatapis <qarëkallämë> nir mañakuyäshuptikiqa qarëkuyanki. Tsënölla imatapis <mañëkallämë> niyäshuptikiqa mañëkuyanki.
Chikimaqnintsikta kuyanantsikpaq Jesús yachatsikunqan
Lucas 6.27-28, 32-36
43<<Jina musyayankim nunakuna kënö niyashqanta: <Kuyanakuyashqëkiwanqa kuyanakuyanki. Chikishuqnikitaqa chikiyanki>. 44Tsënö niyaptinpis noqaqa kënömi niyaq: Chikiyäshuqnikikunata kuyayanki. [Ashayäshuptikipis allipa parlapäyanki. Mana allipa rikäyäshuptikipis alli rikäyanki. Allqutsayäshuptikipis y] jipatsiyäshuptikipis pëkunapaq Teyta Diosta mañakuyanki. 45Teyta Diosqa alli nunakunapaq y mana alli nunakunapaqpis intita yarqatsimunmi. Tsënöllam alli nunakunapaq y mana alli nunakunapaqpis tamyatsimun. Ciëluchö këkaq Teytëki ankupäkuq kashqannö qamkunapis ankupäkuq karqa pëpa wamrankunam këkäyanki.
46<<Kuyanakuyashqëkillawan kuyanakurqa ama yarpäyëtsu alli nuna kayashqëkita. Impuestu cobraq nunakunapis kuyanakuyashqanllawanqa kuyanakuyanmi. 47Yanasëkikunallawan alli kawarqa ¿ima allitataq rurayanki? Jutsasapakunapis tsënöllaqa kawayanmi. 48Ciëluchö këkaq Teytëki jutsannaq kashqannö qamkunapis jutsannaq kayë.#Lev. 11.44-45; 19.2; Deut. 18.13.
Currently Selected:
Mateo 5: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.