Sofonías 1
1
Teyta Dios castiganan junaq imanö kananpaq kanqan
1Këchömi qellqarëkan Teyta Diospa willakïninta Sofonías willakushqan. Sofonías willakurqan Amónpa tsurin Josías Judá nacionpa reynin këkänan witsanmi.#2Rey. 22.1—23.30; 2Crón. 34.1—35.27. Sofoníasqa karqan Cusipa tsurinmi. Cusi karqan Gedalíaspa tsurinmi. Gedalías karqan Amaríaspa tsurinmi. Amarías karqan Ezequíaspa#2Rey. 18.1—20.12. tsurinmi.
2 Teyta Diosmi kënö nin:
<<Kë patsachö kaqkunataqa chipyëpam ushakätsishaq.
3Nunakunata y animalkunatapis llapantam ushakätsishaq.
Pishqukunatapis lamarchö pescädukunatapis llapantam ushakätsishaq.
Mana cäsumaq nunakunatapis chipyëpam ushakätsishaq.
Kë patsachö llapan nunakunatam ushakätsishaq>>.
Teyta Diosmi tsënö nin.
4<<Judá nunakunata y Jerusalénchö täraqkunatapis castigashaqmi.
Baalta adoraqkunata y ruratsiyashqan ïdulukunatapis llapantam ushakätsishaq.
Baalta sirwiq sacerdötikunatapis llapantam ushakätsishaq.
5Wayi jananman lloqëkur ciëluchö këkaq qoyllurkunata qonqurikur adoraqkunatapis ushakätsishaqmi.#2Rey. 23.4-14.
Qonqurikur adorëkämarnïpis dios Molocta adoraqkunata ushakätsishaqmi.
6Tsënöllam ushakätsishaq mana cäsukamaqkunata, mana ashimaqkunata y mana rowakamaqkunatapis>>.
7 Teyta Diospa nöpanchö llapëki upälläkuyë.#Hab. 2.20; Zac. 2.13.
Juzganan junaq chëkämunnam.
Tsë junaqpaqqa Teyta Diosmi sacrificiuta alistashqa.
Sacrificiuman invitashqa nunakunapis listunam këkäyan.#1.7 Kë versïculuchömi Judá nunakunata sacrificiuman iwalatsin. Judá nunakunapa chikiqninkunatam sacrificiuta mikuyänanpaq qayatsishqan nunakunaman iwalatsin.
8 Teyta Diosmi kënö nin:
<<Tsë juzganä junaqmi castigashaq nación mandakuqkunata, reypa tsurinkunata y juk lädu nunakunapa costumbrinta qatirar mana adoramaqkunatapis.
9Tsë junaqmi ïdulu adoraqkunata llapanta castigashaq.
Tsë nunakunaqa adorayashqan ïdulukunapa templunman churayänanpaqmi suwakïpa engañëpa y imatapis mälas qochikurnin imëkatapis ëlluyan>>.
10 Teyta Diosmi kënö nin:
<<Tsë junaqqa chikiqninkuna atacayaptin Pescädu shutiyuq punkupitam alläpa qapariyashqan wiyakunqa.
Markapa kuchun barriuchö qapariyashqanpis wiyakunqam.
Lädun jirkakunachö qapariyashqanpis alläpa mantsakäkïpaqmi wiyakunqa.
11<<Mactes barriuchö täraqkuna, llapëki waqayë.
Tsë junaqmi llapan negociu ruraqkuna wanuyanqa.
Rantikuqkunaqa llapanmi ushakäyanqa.
12Tsëpinmi chiwchiwan aktsïkur Jerusalénchö täraqkunata imanö kawëkäyashqantapis rikäshaq.
Tsëchömi jutsata rurar yamë këkaq nunakunata castigashaq.
Tsë nunakunaqa shonqunkunachömi kënö niyan:
<Teyta Diosqa manam castigakuntsu.
Pëqa manam allitapis ni mana allitapis rurantsu>.
13Tsënö nikäyaptinmi chikiqninkuna llapan imëkankunatapis apakuyanqa.
Wayinkunatapis juchutsirmi ushayanqa.
Täräyänanpaq sharkatsiyashqan wayikunachöpis manam täräyanqatsu.
Üvaskunata plantarpis vïnunta manam upuyanqatsu>>.
14 Teyta Dios juzganan junaq chämunanpaqqa ichikllanam pishikan.
¡Tsë junaqqa chëkämunnam!#Isa. 13.6; Eze. 30.2-3; Joel 1.15; Amós 5.18, 20; Mal. 3.2; Apoc. 6.17.
Tsë junaq alläpa mantsakëpaq kaptinmi puëdiq nunakunapis qapariyanqa.
15Tsë junaqqa Teyta Dios alläpam piñakunqa.
Tsëmi nunakuna alläpa llakikur ima rurëtapis puëdiyanqatsu.
Qaparikarmi ushakäriyanqa.
Pasëpam paqasyakurkunqa.
Yanëpa yanar pukutë kaptinmi mantsakäkïpaq paqasyakurkunqa.
16Tsë junaqmi tumariq alli perqashqa markakunaman y jatusaq törrikunaman ratakuyaptinpis contran nunakuna atacayanqa.
Atacayaptin mantsakarmi cornëtata tocarnin qapariyanqa.
17Teyta Diosmi kënö nin:
<<Nunakunata castigaptïmi llakikurnin paqaschönö puriyanqa.
Tsënö kayanqa mana cäsumashpa jutsata rurayashqan rëkurmi.
Yawarninkunapis patsachömi qocharanqa.
Ayankunapis wätapa ismaninnömi mashtaräkunqa>>.
18 Teyta Dios juzganan junaqqa manam qellëninkunapis ni qorinkunapis nunakunata salvanqatsu.
Pëmi alläpa piñarkur kë nacionta chipyëpa ushakätsinqa.
Imëka qemtsiqnöllam kë nacionchö täraqkunata llapanta ushakäratsinqa.
Currently Selected:
Sofonías 1: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
