Zacarías 11
11
1¡Líbano nación, punkïkikunata kichë nina yëkur cedru qerïkikunata rawrar ushananpaq!
2Ciprés qerukuna, waqayë cedru qerukuna ishkiriyashqanpita.
Kuyëllapaq cedru qerukuna ushakashqanam këkäyan.
Basánchö këkaq encina qerukuna, jatun monti ushakaptin waqayë.#Isa. 2.12-13.
3Moqllallëkaq qewakuna tsakishqanam këkäyan.
Tsëmi üsha mitsiqkuna qaparipa qayaripa waqëkäyan.
Jordán mayu pampachö montikunapis ushakashqanam këkäyan.
Montikuna manana kaptinmi leonkunapis qaparikäyan.
Ishkaq mitsikuqman iwalatsipa käyitsinqan
4 Teyta Diosnïmi nimarqan: <<Pishtakänanpaq këkaq üshakunata shumaq mitsi. 5Üshakunata rantiqkunaqa mana ankupashpam pishtëkäyan. Rantikuqkunapis kënömi niyan: <¡Payllä! ¡Teyta Diospa bendicionninwanmi rïcu tikrariyarqü!> Üsha mitsiqkunapis manam üshankunata ankupäyantsu.#11.5 Üshakunaqa Teyta Dios kuyashqan nunakunam këkäyan. Üsha mitsiqkunaqa autoridäninkuna y sacerdötikunam këkäyan. Üshakunata rantiqkunaqa Teyta Dios kuyashqan nunakunapa contrankunam këkäyan. Rantikuqkunaqa contrankunapa poderninman churaqkunam këkäyan.
6<<Tsënöllam noqapis kë nacionchö täraq nunakunata ankupäshaqnatsu. Tsëmi chikiqninkunapa y reykunapa makinman churashaq. Chikiqninkuna kë nacionta ushakätsiyaptin manam imanöpapis salvashaqtsu. Noqa Teyta Diosmi tsënö nï>>.
7Tsëmi üshata rantikur negociu ruraqkuna contratayämaptin pishtayänanpaq këkaq üshankunata shumaq cuidarqä. Cuidanäpaqmi ashirqä ishkë tukruta#11.7a Wakin nunakunaqa shukshuta niyanmi.. Juk kaq tukrupa shutinmi churarqä Alli Kawakï shutiyuq kananpaq. Juk kaq tukrupaqnam shutin churarqä Jukllatsashqa nir. Tsë tukrükunawanmi#11.7b Üshata mitsinanpaq tukruqa väranö jatunmi këkan. Puntanpis doblashqam këkan üshata sutamunanpaq. üshakunata mitsirqä. 8Makïchö këkaq kimaq mitsiqkuna chikimar piñatsiyämaptinmi juk killallachö pëkunata qarqurirqä.
9Tsëpitanam üshakunata kënö nirqä: <<¡Manam qamkunata mitsiyashqëkinatsu! ¡Wanuyaptikipis, wanutsiyäshuptikipis y kikikipura wanutsinakuyaptikipis manam imapis qokamanqanatsu!>>
10Tsënö nirmi Alli Kawakï shutiyuq tukrüta pakirirqä. Tsënö pakirmi käyitsirqü jinantin nación nunakunawan rurashqan pactuta Teyta Dios ushakäratsishqanta. 11Tsëmi tsë junaq ushakärirqan pëkunawan Teyta Dios pactu rurashqan. Pakishqäta rikëkurmi üshata rantir negociuta ruraqkuna käyiyarqan pactu rurashqanta Teyta Dios ushakäratsishqanta.
12Tsëmi kënö nirqä: <<Qamkunapaq alli kaptinqa mitsishqäpita paguëkayämë. Pagayämëta mana munarqa amapis pagayämëtsu>>.
Tsëmi mitsipashqäpita pagayämarqan kima chunka (30) qellëta.
13Tsënö pagayämaptinmi Teyta Dios nimarqan: <<Mitsinëkipaq qamta churëkaptiqqa wallkallata pagayäshurniki noqatapis manakaqmanmi churëkäyäman. Uryapashqëkipita ichikllata pagayäshushqëki qellëtaqa templuchö baúlman winë>>.
Tsëmi tsë kima chunka (30) qellëta apar templuchö këkaq baúlman winarqä.#Mat. 27.9-10. 14Tsëpitanam Jukllatsashqa shutiyuq tukrüta pakirirqä. Tsënömi musyatsirqä Judá nunakunawan Israel nunakuna chikinakur kawayashqanta.
15Tsënam Teyta Dios nimarqan: <<Kananqa mana alli mitsikuq nunanömi tikrarinki. 16Kananpitaqa kë nacionman juk mitsiqtanam churashaq oqrakashqatapis mana ashiqta, mallwatapis mana cäsuqta, chakin pakishqatapis mana jampiqta y uyukunatapis alli qewaman mana qatiqta. Shumaq mitsinanpa rantinmi wira kaqkunata mikukurkur shillunllatana jaqirinqa>>.#Eze. 34.2-4.
17¡Allaw, mana sirwiq mitsikuq nuna!
Mitsikashqëki üshata jaqirishqëkipita allawka kaq makikitapis pishtëpa pishtayätsun.
Allawka kaq nawikitapis espädawan jorquyätsun.
Rikrëkipis wanukätsun.
Allawka kaq nawikipis wiskuyar ama rikätsunnatsu.
Currently Selected:
Zacarías 11: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
