Tito 2

Shumaq yachatsikunanpaq Tituta käyitsinqan

1Qamqa Jesucristupa willakïnin nishqannölla wawqikunata y panikunata yachatsi. 2Awkinkunata yachatsinki imatapis llutanta mana rurayänanpaq, allillata rurar pïmëpitapis respetashqa kayänanpaq y shumaq yarpakachar imatapis rurayänanpaq. Tsënölla yachatsinki Teyta Diosman llapan shonqunkunawan markäkuyänanpaq, ankupäkuq kayänanpaq y pacienciakuq kayänanpaq.

3Tsënölla chakwankunatapis yachatsinki Teyta Dios munashqannö shumaq kawayänanpaq, pitapis mana tumpayänanpaq y machakuq mana kayänanpaq. Sinöqa wakintapis shumaq kawakuyänanpaq yachatsiyätsun. 4Tsënölla shipashkunata yachatsiyätsun qowankunata y wawankunata shumaq kuyayänanpaq. 5Jina yachatsiyätsun shumaq yarpakachärir imatapis rurayänanpaq, qowankunata mana engañayänanpaq, wayinchö imapis rurëninkunata shumaq rurayänanpaq, ankupäkuq kayänanpaq y qowanta cäsukuyänanpaq. Tsënö alli kawakuqta rikarmi Teyta Diospa palabranta pipis manakaqpaq churanqatsu.

6Tsënölla jövinkunatapis käyitsinki shumaq yarpakachar allillata rurayänanpaq. 7Rikäyäshunëkipaq kikikipis shumaq kawakï. Pitapis yachatsirqa Teyta Diospa willakïnin nishqanllata shumaq yachatsinki. 8Pipis mana penqapäshunëkipaq rasun kaqllata yachatsikunki. Tsënö alli yachatsikuptikiqa contrantsik kaqkunapis penqakurmi wasantsik rimayanqatsu.

9Esclävukunatapis yachatsinki patronninkunata cäsukuyänanpaq y mandashqantapis kushi kushilla rurayänanpaq. Tsënölla yachatsinki patronninkunata mana contestayänanpaq 10y imantapis mana suwayänanpaq. Tsëpa rantinqa patronnin markäkunanpaq allillata rurayätsun. Jesucristuta chaskikuq esclävunkuna tsënö kawaqta rikarmi käyikuyanqa salvamaqnintsik Teyta Diospa willakïnin alli kashqanta.

11Llapan nunakunata salvananpaqmi Teyta Dios ankupämarnintsik Jesucristuta kachamurqan. 12Pëmi käyitsimantsik kikintsik munashqantsiknö kawanantsikpa rantin jutsa rurëkunata jaqirir pë munashqannö allillata rurar kawakunantsikpaq. 13Tsënö kawarmi salvamaqnintsik Jesucristo kutimunqanyaq alistakur shuyakïkäshun. Pëmi alläpa poderyuq Diosnintsik kar llapan nunakuna rikarëkäyaptin chipapëkar kutimunqa.#Fil. 3.20. 14Jutsa rurëpita jorqamänantsikpaqmi wanurqan.#Mat. 20.28; Mar. 10.45; Gál. 1.4; 1Tim. 2.6. Perdonamarnintsikmi ëllumarquntsik kuyashqan nunakuna kanantsikpaq y llapan shonquntsikwan imatapis allillata ruranantsikpaq.#Éxo. 19.5; Deut. 7.6; 14.2; 1Ped. 2.9.

15Wawqi Tito, kë yachatsishqaqkunata pitapis mana mantsakushpa yachatsinki, kallpatsanki y käyitsinki. Y pipis manakaqpaq mana churashunëkipaq shumaq kawakunki.

Currently Selected:

Tito 2: qwhB

Highlight

Copy

Compare