Mateo 22

Casakï fiestaman iwalatsikïpa Jesús yachatsinqan

Lucas 14.15-24

1Yapëpis iwalatsikïpa yachatsirmi Jesús kënö nirqan: 2<<Teyta Diospa mandakïninqa casakï fiestanömi këkan. Juk reyshi ollqu tsurin casakuptin fiestata ruranaq. 3Tsëshi sirwiqninkunata kachanaq invitashqan nunakunata qayayämunanpaq. Qayatsiptinpis manash ëwëta munayänaqtsu. 4Tsëpitanash wakin sirwiqninkunatana kachar ninaq: <Törükunata y wira kaq wätäkunatam pishtaratsir mikïkunata arutsirqüna. Llapanpis alistashqanam këkan. Invitashqä nunakuna shayämutsunna>. 5Tsënö nir qayatsiptinpis manash mëqanpis fiestaman ëwayänaqtsu. Wakinshi chakran uryaq ewkuyänaq. Wakinshi negociun rantikuq ewkuyänaq. 6Wakinnash reypa sirwiqninkunata maqar wanuratsiyänaq.

7<<Tsëshi reyqa alläpa piñar soldädunkunata kachanaq. Chärirnash sirwiqninkuna wanutsiq nunakunata wanuratsir markankunatapis kayayänaq. 8Tsëpitanash sirwiqninkunata kënö ninaq: <Tsurï casakunanpaq llapanpis alistashqanam këkan. Tsënö këkaptinpis invitashqä nunakuna manakaqpaq churamarmi shayämushqatsu. 9Kananqa nänikunapa ëwar tariyashqëki nunakunata qayayämï casakï fiestaman shayämunanpaq>.

10<<Tsënö niptinshi sirwiqninkuna nänikunapa ëwar llapan tariyashqan nunakunata willayänaq. Tsëshi alli nunapis aksë nunapis wayi junta fiestaman chäyänaq. 11Invitashqan nunakunata rikaq yëkurshi tsë rey rikänaq juk nuna trocakunni këkaqta. 12Tsëshi tsë nunata kënö tapunaq: <Yanasa, casakï fiestaman invitëkaptiqqa ¿imanirtaq mana trocakushpa shamurqunki?> Tsënö tapuptinshi tsë nuna ima nitapis puëdinaqtsu. 13Tsëshi sirwiqninkunata rey kënö ninaq: <Kë nunata chakinta makinta pankarkur mantsëpaq tutapëman jitarkuyë. Tsëchömi alläpa waqar kiruntapis ruchuchütsinqa> >>.#Mat. 8.12; 25.30; Luc. 13.28.

14Tsënö willapäkurirmi Jesús kënö nirqan: <<Atskaqtam Teyta Dios qayashqa. Tsënö kaptinpis wallkaqllatam akrashqa>>.

Impuestuta pagayänanpaq Jesústa tapuyanqan

Marcos 12.13-17; Lucas 20.20-26

15Tsëpitanam fariseukuna templupita yarqurir parlayarqan Jesústa imanöpapis llutanta parlatsiyänanpaq. 16Tsëmi shumaq yachatsinakurir fariseukuna kachayarqan discïpulunkunata y Herodesman qaqaq nunakunata. Pëkunam Jesústa kënö niyarqan: <<Rabí, noqakuna musyayämi rasun kaqllata yachatsikushqëkita. Manam nunakuna alabayäshunëkita munartsu yachatsikunki, sinöqa Teyta Dios munashqannöllam. 17Kanan mä niyämë. Romachö mandakuq Césarpaq ¿impuestuta pagashwanku o manaku?>>#22.17 Israel nunakuna niyarqan Romapaq impuestuta pagar Teyta Diospa contran këkäyashqantam. Tsëmi: <<Impuestuta pagashun>> niptinqa Diospa contran Jesús parlashqanta niyanman karqan. <<Ama pagashuntsu>> niptinqa Roma autoridäkuna piñakuyanman karqan.

18Llutanta parlatsiyänan rëkur tapuyashqanta käyirmi Jesús kënö nirqan: <<¡Alli tukuq nunakuna! ¿Imanirtaq llutanta parlatsimëta munayanki? 19Mä impuestu pagana qellëta rikätsiyämë>>.

Tsënö niptinmi katsiyashqan qellëta Jesústa qoriyarqan. 20Tsëta rikëkurmi Jesús tapurqan: <<Kë qellëchö ¿pipa reträtuntaq këkan? Jina ¿pipa shutintaq qellqarëkan?>>

21Pëkunanam niyarqan: <<Mandakuq Césarpam>>.

Jesúsnam nirqan: <<Césarpa kaqtaqa Césarta qoykuyë. Teyta Diospa kaqtaqa Teyta Diosta qoykuyë>>.#22.21 Teyta Diospa kaqqa kawënintsikmi këkan.

22Tsënö niptinmi tsë nunakuna mantsakashqa ewkuyarqan.

Kawarimïpaq saduceukuna tapukuyanqan

Marcos 12.18-27; Lucas 20.27-40

23Tsë junaqllam saduceukuna Jesústa tapuq ëwayarqan. Pëkuna manam creyiyantsu wanuqkuna kawariyämunanpaq kashqanta.#Hech. 23.8. 24Tsëmi Jesústa tapuyarqan: <<Rabí, Moisés qellqashqanchömi kënö nikan: <Warmiyuq nuna tsurinnaq wanuptin wawqinmi pajunwan täranqa. Tsënöpam wamrankuna kaptin tsë wanuq wawqinpa wamrannö kayanqa>.#Deut. 25.5. 25Kanan niyashqëki. Juk kutish qanchis wawqikuna kayänaq. Wamaqshu kaqshi juk warmiwan casakunaq. Pëshi manaraq tsurin kaptin wanukïkunaq. Tsëshi qepa kaq wawqinna tsë pajuwan casakunaq. 26Pëpis tsurin manaraq kaptinshi wanurinaq. Tsëpita mas qepan kaqnash tsë pajuwan casakunaq. Pëpis tsurin manaraq kaptinshi wanurinaq. Tsënöllash llapan wawqinkuna tsë pajuwan casakuyänaq. Tsurinkuna manaraq kaptinshi llapanpis wanukuyänaq. 27Tsëpitanash tsë pajupis wanukunaq. 28Wanushqakuna kawariyämunan junaqqa ¿mëqanpa warminraq kanqa, qanchis wawqiwan casakushqa këkaptinqa?>>

29Jesúsnam nirqan: <<Qamkunaqa llutantam yarpäyanki. Manam Teyta Diospa palabranta ni Teyta Dios puëdiq kashqantapis käyiyankitsu. 30Kawarimurqa manam pipis casakunqanatsu, sinöqa ciëluchö [Teyta Diospa] angelninkunanöllanam kayanqa. 31Wanushqakuna kawariyämunanpaq kashqanta ¿manaku Teyta Dios niyäshushqëkita leyiyarqunki? Palabranchömi kënö nin: 32<Noqaqa Abrahampa, Isaacpa y Jacobpa Diosninmi kä> nir.#Éxo. 3.6. Teyta Diosqa manam wanushqakunapa Diosnintsu, sinöqa kawëkaqkunapa Diosninmi>>.

33Tsënö yachatsishqanta wiyëkurmi nunakuna alläpa kushikuyarqan.

Mas precisaq kaq mandamientu

Marcos 12.28-34; Lucas 10.25-28

34 Saduceukunata upällätsishqanta musyarirmi fariseukuna Jesús kaqman ëllukäyarqan. 35Tsëchömi ley yachatsikuq juk fariseo nuna Jesús yachashqanta o mana yachashqantapis musyëta munar kënö tapurqan: 36<<Rabí, ¿mëqan mandamientutaq mas cäsushwan?>>

37Jesúsnam nirqan: << <Teyta Diosta kuyayanki llapan shonqïkikunawan, llapan kawënikikunawan y llapan yarpënikikunawan>.#Deut. 6.5. 38Kë mandamientum llapan mandamientupitapis mas precisaq këkan. 39Tsënöllam juk kaq mandamientupis kënö nikan: <Kikiki kuyakushqëkinö nuna mayikita kuyanki>.#Lev. 19.18. 40Tsë ishkan mandamientuta cumplirqa Moisés qellqashqan llapan mandamientukunata y profëtakuna willakuyashqantapis cumplikäyankim>>.#Luc. 10.25-28.

Davidpitapis Cristo mas mandakuq kanqan

Marcos 12.35-37; Lucas 20.41-44

41 Fariseukuna tsëchö ëllukashqa këkäyaptinmi Jesús kënö tapurqan: 42<<Cristo ¿pï kashqantataq yarpäyanki? ¿Pipa Tsurintaq këkan?>>

Tsënö tapukuptinmi niyarqan: <<Davidpa Tsurinmi, Teyta>>.#22.42 Cristupaqqa David casta kaptinmi nunakuna niyarqan Davidpa Tsurin kashqanta. Tsënö niyarqan rey Davidpita miraq imëyaqpis mandakunanpaq Teyta Dios änikushqa kaptinmi. Tsëpita masta musyanëkipaq leyinki 2Sam. 7.10-16; Sal. 89.1-4, 19-37; 132.11-12.

43Jesúsnam nirqan: <<Davidpa Tsurin kaptinqa ¿imanirtaq Espíritu Santu käyitsiptin kikin Davidpis reynin kashqanta nirqan? Pë nishqanqa kënö nirmi qellqarëkan:

44<< <Mandamaqnïtam Teyta Dios kënö nirqan:

<<Allawka kaq lädüman täkamï llapan chikishuqnikikunata munënikiman churamushqäyaq>> >.#Sal. 110.1.

45Kikin Davidpis reynin kashqanta nikaptinqa ¿imanöpataq Cristuqa Davidpa Tsurin kanman?>>#22.45 Jesucristuqa manam David casta kanqanta negarqantsu, sinöqa Davidpita mas puëdiq kanqantam nirqan.

46Tsënö niptin manam pipis yaskita puëdirqantsu. Tsë junaqpita patsa manam pipis Jesústa tapïta almitirqannatsu.

Currently Selected:

Mateo 22: qwhB

Highlight

Copy

Compare