Lucas 4

Jesústa Satanás tentëta munanqan

Mateo 4.1-11; Marcos 1.12-13

1Bautizakurir Espíritu Santupa poderninchöna Jesús këkaptinmi Jordán mayupita chusyaq jirkaman Espíritu Santu pusharqan. 2Tsëchö chusku chunka (40) junaqninpi këkaptinmi diablu tentarqan. Tsë junaqkuna mana imatapis mikurninnam Jesús mallaqarqan.

3Tsënam diablu nirqan: <<Diospa Tsurin karqa mä kë rumita tantaman tikratsi>>.

4Jesúsnam nirqan: <<Teyta Diospa palabranchö kënömi qellqarëkan: <Manam tantata mikurllatsu nuna kawan, [sinöqa Teyta Dios nishqankunata cäsukurpis kawanmi]> >>.#Deut. 8.3.

5Tsëpitanam jatun jirkaman diablu pushëkur jinantin nacionkunata juklla rikëkatsir 6kënö nirqan: <<Llapan rikashqëki nacionkunata y tsëchö këkaq riquëzakunata qoykushqëki. Tsëkunata chaskishqa karmi munashqä kaqta pitapis qoykushaq. 7Qonqurikur adoramaptikiqa kë llapan rikashqëkitam qoykushqëki>>.

8Jesúsnam nirqan: <<[¡Këpita witikï, Satanás!] Teyta Diospa palabranchö kënömi qellqarëkan: <Teyta Diosllatam adorayanki. Y pëllatam sirwiyanki> >>.#Deut. 6.13.

9Tsëpitanam Jerusalénman Jesústa diablu aparqan. Tsëchönam templupa mas altunman shëkatsir kënö nirqan: <<Diospa Tsurin karqa mä këpita jeqarkï. 10Diospa palabranchö kënömi qellqarëkan: <Angelninkunatam Teyta Dios kachamunqa imapitapis tsapëkuyäshunëkipaq. 11Pëkunam tsariyäshunki chakikillatapis rumikunachö mana tsaktanëkipaq> >>.#Sal. 91.11-12.

12Jesúsnam nirqan: <<Jina Teyta Diospa palabranchö kënömi nikan: <Teyta Diosta ama tentankitsu> >>.#Deut. 6.16.

13Jesústa tentëta mana puëdirnam diablu ewkurqan imë karpis Jesúsman yapë kutinanta yarpar.

Galileachö Jesús yachatsikur qallanqan

Mateo 4.12-17; Marcos 1.14-15

14Tsëpitanam Espíritu Santupa poderninwan Galileaman Jesús kutikurqan. Tsë markakunachömi Jesús alli yachatsikuq kanqanta nunakuna parlayarqan. 15Sinagögakunachö alli yachatsikuptinmi pëta alabar niyaq: <<¡Pëqa allim yachatsikun!>>

Nazaret markachö Jesús willakunqan

Mateo 13.53-58; Marcos 6.1-6

16Tsëpitanam winakunqan markan Nazaretman Jesús kutikur costumbrinmannö jamakï junaqchö sinagögaman ëwarqan. Tsëchönam Teyta Diospa palabranta leyinanpaq nunakunapa puntanman ëwarqan. 17Tsënam profëta Isaías qellqashqan rölluta qoriyarqan. Tsëta kicharirmi kënö qellqarëkaqta taririr leyirqan:

18<<Teyta Diosmi Espïritunta noqaman kachamushqa.

Pëmi akramashqa waktsakunata alli willakïninta willanäpaq.

Tsënöllam kachamashqa [llakishqa kawaqkunata kallpatsanäpaq,]

juk lädu nacionman prësu ëwaqkuna librina kayashqanta willanäpaq,

wiskukunata kachakätsinäpaq,

chikiqninkunapa makinchö jipaq nunakunata libranäpaq

19y Teyta Dios salvananpaq kaq tiempu chämushqanta willakunäpaq>>.#Isa. 61.1-2.

20Tsënö leyirirnam rölluta wankurkur sinagögachö yanapakuq nunata kutiratsir täkuriptinna tsëchö këkaq nunakuna rikaräyarqan. 21Tsënam Jesús nirqan: <<Leyimushqächö nishqannömi kanan cumplikärishqa>>.

22Tsëmi llapan nunakuna kushikur kënö ninakuyarqan: <<¡Pëqa shumaqmi parlan! ¿Manaku Josépa tsurinlla këkan?>>

23Tsënam Jesús nirqan: << <Jampikuq karqa kikikiraq jampikunkiman> niyanqannömi qamkunaqa munëkäyanki Capernaúmchö milagruta rurashqänö kë markantsikchöpis milagruta ruranäta>>.

24Tsëpitanam kënö nirqan: <<Rasunpam niyaq: Manam ni mëqan profëtatapis markanchöqa cäsuyantsu. 25Rasunpam niyaq: Profëta Elías kawashqan witsan kima wata y joqta killa mana tamyaptin jinantin Israelchö mallaqëwan jipayarqan. Israelchö atska pajukuna jipëkäyaptinpis 26Teyta Dios ni mëqan pajuman Elíasta kacharqantsu. Tsëpa rantinqa Sidónpa lädun Sarepta markachö pajullamanmi kacharqan.

27<<Jina profëta Eliseo kawashqan witsanpis Israelchö atskaqmi leprawan qeshyayarqan. Tsënö këkaptinpis manam pitapis Eliseo tsëchö kachakätsirqantsu. Tsëpa rantinqa Siria nacionpita Naamánllatam kachakätsirqan>>.

28Jesús tsënö niptinnam sinagögachö këkaq nunakuna alläpa piñakurkuyarqan. 29Tsënam llapankuna sharkur Jesústa markapita jorqurir markankuna kuchun jirkaman#4.29 Wakin nunakunaqa jirkanman niyanmi. apayarqan tsëpita kumarkuyänanpaq. Tsë jirkachömi markankuna këkan. 30Tsënö apëkäyaptinmi pëqa chöpinkunapita ullurir ewkurqan.

Supë löcuyätsinqan nunata Jesús kachakätsinqan

Marcos 1.21-28

31Tsëpitanam Galileachö Capernaúm markaman Jesús ewkurqan. Tsëchömi cada jamakï junaq nunakunata yachatsirqan. 32Shumaq yachatsishqanta wiyarmi nunakuna espantashqa kënö niyarqan: <<¡Pëqa puëdiq kar shumaqmi yachatsimantsik!>>

33Tsë sinagögachömi këkarqan supë löcuyätsishqan nuna. Pëmi qaparir qayarir nirqan: 34<<¡Nazaretpita Jesús, [këpita ewkï]! ¡Imanankitaq noqakunawan! ¿Ushakätsiyämaqnïku shamurqunki? ¡Noqa musyämi Teyta Dios kachamunqan santu nuna kashqëkita!>>

35Tsëmi supëta piñapar Jesús kënö nirqan: <<¡Upälla kë nunapita yarqï!>>

Niptinnam nunakunapa nöpanchö nunata tapsikacharkur mana imanashllapa ewkurqan. 36Tsëta rikëkurmi jukninpis jukninpis mantsakar niyarqan: <<¡Imatanataq rikantsik! ¡Poderninwan niptintaq supëkunapis cäsukurnin ewkuyan!>>

37Supëta qarqushqanta musyëkurmi jinantin Galileachö Jesús puëdiq kashqanta parlayaq.

Pedrupa suegranta Jesús kachakätsinqan

Mateo 8.14-15; Marcos 1.29-31

38 Sinagögapita yarqurirnam Simónpa wayinman Jesús ëwarqan. Tsëchömi Simónpa suegran fiebriwan alläpa qeshyaptin kachakätsinanpaq Jesústa rowayarqan. 39Rowayaptinnam Jesús qeshyaqman witïkur <<amana fiebrïnatsu>> nir fiebrita piñaparqan. Tsënam kachakärir mikïninkuna pëkunata qararqan.

Atskaq qeshyaqkunata Jesús kachakätsinqan

Mateo 8.16-17; Marcos 1.32-34

40Inti jeqëkaptinnam tukïläya qeshyawan qeshyaqkunata Jesúsman apayarqan. Jesúsnam jukllëllapayan pëkunaman makinta churar llapanta kachakätsirqan. 41Tsënöllam supëyuq nunakunapita supëkunapis qaparir yarquyarqan <<¡qamqa Diospa Tsurinmi kanki!>> nir.

Teyta Dios kachamushqan Cristo kashqanta supëkuna niyaptinmi Jesús piñaparqan mana parlakuyänanpaq.

Jesús willakur purinqan

Marcos 1.35-39

42Patsa atsikyäriptinnam chusyaqman Jesús ewkurqan. Tsënam nunakuna ashirnin pë këkashqanman chëkur pëkunapita mana ewkunanpaq rowayarqan. 43Jesúsnam nirqan: <<Teyta Diospa mandakïninpa alli willakïninta wakin markakunachöpis willakunämi precisan. Tsëpaqmi Teyta Dios kachamashqa>>.

44Tsëpitanam jinantin Israel markakunapa purir#4.44 Wakin griego copiakunachömi Galileapa purir niyan. sinagögakunachö Teyta Diospa willakïninta yachatsikurqan.

Currently Selected:

Lucas 4: qwhB

Highlight

Copy

Compare