Juan 21
21
Qanchis discïpulunkunata Jesús yuripunqan
1Tsëpitanam Tiberias#21.1 Tiberias nishqan qochaqa Galilea qocham këkan. qocha kuchunchö discïpulunkunata Jesús yapë yuripurqan. 2Tsëchömi këkäyarqan Simón Pedro, Millish nishqan Tomás y Natanael. Natanaelqa karqan Galileachö këkaq Caná markapitam. Tsënöllam Zebedeupa ishkë tsurinkunapis y mas ishkë discïpulukunapis këkäyarqan. 3Pëkunatam Simón Pedro kënö nirqan: <<Pescädu tsariqmi ewkü>>.
Tsënö niptinnam pëkunapis niyarqan: <<Noqakunawanpis aku ëwashun>>.
Tsënö nirmi barcuman lloqarkur llapan jeqariyarqan. Tsë paqas waraqninpi pesquëkarpis manam jukllëllatapis tsariyarqantsu.#Luc. 5.5. 4Patsa wararëkaptinnam qocha kuchunchö juk nuna këkaqta rikäriyarqan. Rikarpis Jesús kashqanta manam musyayarqantsu. 5Pëmi qayakur kënö nirqan: <<Yanasakuna, ¿pescäduta tsariyämurqunkiku?>>
Pëkunanam niyarqan: <<Manam, tëtë, ni jukllëllapis kantsu>>.
6Tsënö niyaptinnam nirqan: <<Barcupa allawka kaq läduman atarräyata jitayë. Tsëchöqa tsariyankim>>.
Tsëman atarräyata jitarirnam sutëtapis mana puëdiyashqanyaq atska pescäduta tsarïkuyarqan.#Luc. 5.6. 7Tsëmi Jesús kuyashqan kaq discïpulunqa Pedruta kënö nirqan: <<¡Pëqa Señornintsiktaq!>>
Tsënö niptinnam ratashninta tseqllanman watakurkur Simón Pedruqa Jesús kaqman nadëpa ras ëwarqan. 8Wakin kaq discïpulukunanam atarräyachö atska pescäduta barcuwan qarachashqa ëwayarqan. Qocha kuchunman chäyänanpaqqa juk pachak (100) metrunöllanam pishirqan. 9Barcupita yarqurirnam rikäyarqan tantata y shansha#21.9 Wakin nunakunaqa shanka niyanmi. jananchö pescädu kankakëkaqta.
10Jesúsnam nirqan: <<Tsariyämushqëki pescäduta juk ishkëta apayämï>>.
11Tsënö niptinnam Simón Pedro barcuman lloqarir atarräyata qarachämurqan pescädukunata apananpaq. Tsë atarräyachömi karqan juk pachak pitsqa chunka kima (153) jatusaq pescädukuna. Tsëtsika pescäduwanpis atarräya manam rachirqantsu. 12Jesúsnam nirqan: <<Mikuq shayämï>>.
Señor Jesús kashqanta musyarmi mëqan discïpulunpis pï kashqantapis tapuyarqantsu. 13Pëkuna këkäyanqanman witïkurnam tantata y pescäduta Jesús qararqan.
14Tsëchö yuripunqanwanqa kawarimunqanpita kima kutinam discïpulunkunata Jesús yuripurqan.
Simón Pedruwan Jesús parlanqan
15Mikur usharirnam Simón Pedruta Jesús kënö tapurqan: <<Jonáspa tsurin Pedro, wakin discïpulükunapita ¿masku kuyamanki?>>
Pedrunam nirqan: <<Awmi Teyta, qam musyankim kuyashqaqta>>.
Jesúsnam nirqan: <<Achkasnïkunata shumaq rikanki>>.
16Jina yapënam kënö tapurqan: <<Jonáspa tsurin Simón, ¿kuyamankiku?>>
Pedrunam jina kënö nirqan: <<Awmi Teyta, qam musyankim kuyashqaqta>>.
Niptinnam nirqan: <<Üshäkunata shumaq mitsinki>>.
17Tsëpitanam jina yapë tapurqan: <<Jonáspa tsurin Simón, ¿rasunpaku kuyamanki?>>
Tsënö kima kuti tapuptinnam Pedro llakikur kënö nirqan: <<Qamqa llapantapis musyankim, Teyta. Kuyashqaqtapis musyankim>>.
Jesúsnam nirqan: <<Üshäkunata shumaq rikanki. 18Rasunpam niq: Jövinllaraq karqa ratashnikita yakakurmi munashqëkipa ëwarqëki. Awkinyarqa rikrëkita mashtaptiki juknam yakatsishunki.#21.18 Juknam yakatsishunki nirqa Jesucristo manam ratashninta yakatsiyänanpaqtsu nirqan, sinöqa crucificäyänanpaq kashqantam. Tsënöllam ëwëta mana munashqëkipa apayäshunki>>.
19Tsënö nirmi Pedruta Jesús käyitsirqan Teyta Dios munashqannö kawar imanö wanunanpaq kashqanta. Tsëpitanam Pedruta kënö nirqan: <<Qatimë>>.
Librupa ushanan
20Pedrunam tumëkur rikëkurqan Jesúspa kuyë discïpulunta. Tsë discïpulunmi Pascua mikïchö Jesúspa lädunchö karnin tapurqan mëqan discïpulun contran shärinanpaq kashqanta.#Juan 13.25. 21Tsënö rikarmi Jesústa Pedro kënö tapurqan: <<Teyta, pëtaqa ¿imataq pasanqa?>>
22Jesúsnam nirqan: <<Kutimunqäyaq pë kawakuptinpis qamtaqa ¿imataq qokushunki? Qamqa qatirämë>>.
23Jesús tsënö nishqanta musyarirmi mëtsëchöpis wawqikuna y panikuna yarpäyarqan tsë discïpulun imëpis mana wanunanpaq kashqanta. Tsënö yarpäyaptinpis Jesúsqa manam mana wanunanpaq kashqantatsu nirqan, sinöqa nirqan: <<Noqa munaptïqa kutimunqäyaqpis kawanmanchi. ¿Imanirtaq pëpaq tapumanki?>>
24Jesús kuyashqan discïpulum kë libruta qellqashqa. Llapan qellqashqankunaqa rasun kaqmi këkan. 25Jesús rurashqankunaqa mas atskaran kan. Llapanta qellqaptinqa kë patsachö papelpis pishinmanchi. [Amén.]
Currently Selected:
Juan 21: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.