Juan 2
2
Yakuta vïnuman Jesús tikratsinqan
1Tsëpita kima junaqtanam casakï fiesta karqan Galileachö këkaq Caná markachö. Tsë fiestachömi këkarqan Jesúspa mamäninpis. 2Tsëmanmi Jesústapis discïpulunkunatawan invitayarqan. 3Fiesta manaraq ushaptinnam vïnu ushakarqan. Tsëmi Jesústa mamänin kënö nirqan: <<Vïnunkunam ushakärishqa>>.
4Tsënam Jesús kënö nirqan: <<Mäma, ¿imanirtaq tsënö nimanki? Manaran hörä chämunraqtsu>>.
5Jesúspa mamannam sirwiqkunata kënö nirqan: <<Jesús niyäshunqëkita llapanta rurayë>>.
6Tsëchömi këkarqan rumipita rurashqa joqta kuntukuna. Tsë kuntukunamanmi costumbrinkunamannö yakuta winayaq purificäkuyänanpaq. Tsë kuntukunaman juk pachak (100) litrunömi yaku yëkuq. 7Sirwikuqkunatam Jesús kënö nirqan: <<Tsë kuntukunaman yakuta junta winayë>>.
Tsënam yakuta winayarqan juntashqanyaq. 8Juntaratsiyaptinnam Jesús nirqan: <<Ichikllata chaqarir mayor kamachïku llaminanpaq apayë>>.
Tsënö niptinnam Jesús nishqannölla chaqarir apayarqan. 9Kamachïku llamirirnam mëpita apayashqanta mana musyarpis alli vïnu kashqanta mäkurirqan. Yanapakuqkunallam mëpita kashqantapis musyayarqan. Llamirirnam casakuq jövinta qayarir 10nirqan: <<Wakin nunakunaqa fiesta qallananllachömi allin kaq vïnuta qarakuyan. Alli upuriyaptinran común kaqtana qarayan. Qamqa fiesta ushaptinraqtaq allin kaq vïnuta qarëkätsinki>>.
11Tsënömi Galileachö këkaq Caná markachö Jesús rurarqan punta kaq milagruta. Puëdiq kashqanta rikarmi discïpulunkuna pëman creyikuyarqan.
12Tsëpitanam mamäninwan, wawqinkunawan y discïpulunkunawanpis Capernaúm markaman Jesús ewkurqan.#Mat. 4.13. Tsëchömi juk ishkë junaqkuna quedakuyarqan.
Templuchö rantikuqkunata Jesús qarqunqan
Mateo 21.12-13; Marcos 11.15-17; Lucas 19.45-46
13Israel nunakunapa Pascua#Éxo. 12.1-27; Deut. 16.1-8. fiestankuna qallëkunanpaq këkaptinmi Jerusalénman Jesús ëwarqan. 14Chärirnam templupa patiunchö törukunata, üshakunata y urpëkunatapis nunakuna rantikïkäyaqta tarirqan. Tsënöllam tarirqan qellë trocaqkunata.#2.14 Jesús kawanqan witsanmi Roma nunakunapa qellëninta Israel nunakuna inshiyaq imatapis rantiyänanpaq. Teyta Diosnintsikpaq ofrendata apayänanpaqqa templuman apayänanpaq kaq qellëtaran trocatsiyaq. 15Tsënö tarïkurmi chikutita rurarir llapan rantikuqkunata üshantawan töruntawan templupa patiunpita Jesús qarqurqan. Qellë trocatsiqkunapa mësankunatapis jitakacharkurmi qellëninkunatapis ramakacharkurqan. 16Urpë rantikuqkunatanam nirqan: <<¡Këkunata jorquyë! ¡Imanirtaq Teytäpa wayinta mercäduman tikratsiyarqunki!>>
17Jesús tsënö ruraptinmi discïpulunkuna yarpäriyarqan Teyta Diospa palabranchö kënö qellqarëkashqanta: <<Templïkitaqa wanunqäyaqmi respetatsishaq>>.#Sal. 69.9.
18Israel autoridäkunanam Jesústa kënö niyarqan: <<¿Ima podernikiwantaq rantikuqkunata qarqurqunki? Mä puëdiq kashqëkita musyayänäpaq milagruta ruramï>>.
19Jesúsnam nirqan: <<Kë templuta juchuratsiyë y kima junaqllatam sharkatsimushaq>>.#Mat. 26.61; 27.40; Mar. 14.58; 15.29.
20Tsënö niptinnam autoridäkuna kënö niyarqan: <<Kë templutaqa chusku chunka joqta (46) watatam sharkatsiyashqa. ¿Imanöpataq qam kima junaqllata sharkatsinkiman?>>
21Tsënö parlarqa Jesús manam templupaqtsu parlëkarqan, sinöqa templuman iwalatsikurmi kikinpaq parlarqan. 22Jesús wanushqanpita kawarimuptinnam discïpulunkuna yarpäyarqan tsënö nishqanta. Tsënöpam Jesús nishqanta y Teyta Diospa palabran nishqantapis creyiyarqan.
Nunakuna imata yarpäyanqantapis Jesús musyanqan
23 Pascua fiestachö milagrukunata Jesús rurashqanta rikarmi Jesúsman atskaq nunakuna creyikuyarqan. 24Tsënö kaptinpis janan shonqulla creyiyashqanta musyarmi pëkunaman Jesús markäkurqantsu. 25Mana willëkäyaptinmi nunakuna imata yarpäyashqantapis musyarqan.
Currently Selected:
Juan 2: qwhB
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.