Oseas 5
5
Israel nunakunata castigananpaq ninqan
1<<Sacerdötikuna, niyanqaqta shumaq wiyakuyë.
Precisaq Israel nunakuna, niyanqaqta shumaq käyikuyë.
Mandakuq rey, qampis castëkikunapis nishqäta shumaq cäsukuyë.
Mana cäsuyämashqëki rëkurmi juzgayashqëki.
Nunakunata ishkitsiyänëkipaq waskata sutaqnömi Mizpachö kayarqunki.
Tabor jirkachöpis atarräyanömi kayarqunki.
2Sitim partichö nunakunata imëka pözuman jitarkuqnömi kayanki.
Tsënö kayashqëki rëkurmi llapëkita castigayashqëki.
3Israel nunakuna, musyämi imanö kayashqëkitapis.
Imëka qowanta warmi jaqirir jukwan kakuqnömi qamkunapis juk dioskunamanna markäkïkäyanki.
Tsënöpam pasëpa penqakïpaq këkäyanki.
4Llutan rurëkunaman yarparäkurmi perdonta mañakamëtapis yarpäyankitsu.
Manam ichikllapis reqiyämankitsu>>.
5Israel nunakuna nuna tukuq këninkunam willakïkan mana alli kayashqanta.
Pëkuna jutsayuq kayashqan rëkurmi castigashqa kayanqa.
Judá nunakunapis jutsata rurayashqan rëkurmi ushakäyanqa.
6Üshankunata y wäkankunata sacrificiupaq kayar Teyta Diosta ashirpis manam tariyanqatsu.
Teyta Diosqa pëkunapita witikushqanam.
7 Teyta Diosllaman imëpis markäkuyänanpaq änikurpis manam cumplikäyantsu.
Tsurinkunapis juk lädu dioskunamannam markäkïkäyan.
Tsë rëkurmi juk killallachö ushakäyanqa.
Posesionninkunatapis forastëru nunakunam duëñu tukuyanqa.
8Guërra qallëkunanpaq Gabaachö waqrata tocayë.
Ramáchöpis alistakuyänanpaq cornëtata tocayë.
Bet-avénchöpis mäkuq mäkuqlla kayänanpaq willakuyë.
Benjamín trïbu nunakunatapis mäkuq mäkuq kayänanpaq musyatsiyë.
9Teyta Dios castiganan junaqmi Efraín nunakuna ushakätsishqa kayanqa.#5.9 Efraín nunakunapaq parlarqa Israel nación nunakunapaqmi parlan.
Rasunpa tsënö pasakunanpaq kashqantaqa llapan trïbu Israel nunakunatam willëkäyaq.
10 Teyta Diosmi nin:
<<Judá nunakunapa autoridäninkunaqa imëka jukpa mojunninta duëñutukuq nunanömi këkäyan.#Deut. 19.14; 27.17; Prov. 22.28.
Tsënö kayashqan rëkurmi piñënïwan mirashqa mayunöraq pëkunata ushakätsishaq.
11Efraín nunakunaqa ïdulukunata adorayashqanpita alläpam jipayanqa.
12Puyu imëkatapis ushariqnömi Efraín nunakunata ushakäratsishaq.
Judá nunakunatapis qeruta puyu ushaqnömi ushakäratsishaq.
13<<Efraín nunakunaqa qeshyëkaq nunanömi këkäyan.
Judá nunakunapis pasëpa maqëkushqa nunanömi këkäyan.
Tsënö kayashqanta käyikurmi Asiria nacionpa reyninman ëwëkur Efraín nunakuna mañakuyarqun yanapayänanpaq.#2Rey. 15.19; 16.7.
Tsënö kaptinpis tsë reyqa qeshyaqta kachakätsita ni jampita mana puëdiqnömi yanapëta puëdirquntsu.
14Ima wätatapis león tsarirkur ushakäratsishqannömi Efraín nunakunata y Judá nunakunata ushakäratsishaq.
Ushakätsiptï manam pipis kanqatsu washäyänanpaq.
Tsënö ushakäratsirmi ewkushaq.
15Täkunäman kutïkurmi täkushaq jutsayuq kayashqanta käyikur perdonta mañakayämashqanyaq.
Pëkunaqa alläpa llakikïchö karran ashiyämanqa>>.
Currently Selected:
Oseas 5: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
