Éxodo 39

Sacerdötikunapa ratashninkunata rurayanqan

1Moisésta Teyta Dios ninqannöllam Tinkuna Sagrädu Tolduman sacerdöti yëkunanpaq ratashta rurayarqan azul, granäti y puka millwa jïlukunapita. Tsënöllam Aarónpaq sagrädu ratashtapis rurayarqan.

Efodta rurayanqan

Éxodo 28.6-14

2 Efodta rurayarqan qori jïlupitam, azul, granäti y puka millwa jïlukunapitam y llanulla putskashqa lïnu jïlupitam. 3Qoripita jïluta rurayänanpaqmi qorita tsaktëpa llapshatärir llanullata rutuyarqan. Tsë jïlupitam, azul, granäti y puka millwa jïlukunapitam y llanulla putskashqa lïnu jïlupitam efodta shumaq awayarqan.

4Efodpa ishkan kuchunchömi tirantikunata rurayarqan omrunman shawayänanpaq. 5Wachukuwan efodpis tsë piëzallam karqan. Tsëtapis rurayarqan qori jïlupita, azul, granäti y puka millwa jïlukunapita y llanulla putskashqa lïnu jïlupitam. Moisésta Teyta Dios ninqannöllam llapanta rurayarqan.

6Tsënöllam ónice rumikunata alistarir tsaraqninkunata qoripita rurëkur segurayarqan. Nïkurnam sëlluta rumipita ruraqnö tsë rumikunaman Israelpa tsurinkunapa shutinkunata qellqayarqan. 7Tsë rumikunatam efodpa tirantinkunaman churayarqan Israel trïbukunapa shutinkunata imëpis yarparänanpaq. Moisésta Teyta Dios ninqannöllam llapan tsëkunata rurayarqan.

Pechërata rurayanqan

Éxodo 28.15-30

8Tsënöllam kuyëllapaq awashqa pechëratapis rurayarqan. Efodta rurayanqannöllam qori jïlupita, azul, granäti y puka millwa jïlukunapita y llanulla putskashqa lïnu jïlupita rurayarqan. 9Pechërata rurëkur doblayarqan pikshanö cuadrädu kananpaqmi. Largunpis anchunpis ishkë chunka ishkë (22) centïmetrum karqan. 10Pechëra jananmannam churayarqan chusku fïla kuyëllapaq rumikunata. Punta kaq fïlamanmi churayarqan sárdica rumita, topacio rumita y carbunclo rumita. 11Ishkë kaq fïlamannam churayarqan esmeralda rumita, zafiro rumita y diamanti rumita. 12Kima kaq fïlamanmi churayarqan jacinto rumita, ágata rumita y amatista rumita. 13Chusku kaq fïlamannam churayarqan berilo rumita, ónice rumita y jaspe rumitapis. Tsë rumikuna mana yarqunanpaqmi qoripita tsaraqninkunata rurëkatsir segurayarqan. 14Fïlallaman churayanqan rumikuna kayarqan chunka ishkëmi. Tsënö chunka ishkë karqan Israelpa tsurinkuna chunka ishkë kayaptinmi. Cada rumimanmi juk tsurinpa shutinta qellqayarqan rumipita rurashqa sëllunö kananpaq.

15Tsënöllam pechërapaq cordonkunata qori püru jïlupita piltayarqan. 16Tsënöllam rumikunata segurayänanpaq ishkë tsaraqta y ishkë taksha argöllakunata qoripita rurayarqan. Tsë argöllakunata churayarqan pechërapa jana kaq ishkan esquïnanmanmi. 17Tsëpitanam tsë argöllakunapa qoripita piltashqa cordonta pasatsiyarqan. 18Cordonpa ishkan puntankunatanam watayarqan omrunchö kaq tsaraqninkunaman. Tsëqa pëchunchömi watararqan. 19Tsënöllam ishkë taksha argöllakunata qoripita rurarir pechërapa ura kaq kuchunkunaman churayarqan. Tsë argöllakuna pechëra rurinchö karmi efod jananchö karqan. 20Tsënöllam ishkë taksha argöllakunata qoripita rurarir efodpa wachukun jana lädunman churayarqan. Tsëkunam efodpa tirantinkunachö kar pechërapa costüranman tinkurarqan. 21Pechërapa y efodpa argöllankunata azul cordonwanmi watayarqan efodpita mana yarqunanpaq. Moisésta Teyta Dios ninqannöllam llapantapis rurayarqan.

Sacerdötipa wakin ratashninkuna rurayanqan

Éxodo 28.31-43

22Tsënöllam efodpa rurinman yakakunanpaq azul jïlupita sotänata awayarqan. 23Peqan yëkunanpaq kunkayuqta rurarkurmi sotänapa kunkan mana rachinanpaq rebëtin jirayarqan. Tsë rebëtiqa qara casäcapa rebëtinnöran karqan. 24Sotänapa ura kuchunpam llanulla putskashqa lïnu jïluwan y azul, granäti y puka puru millwa jïlukunawan granadïllatanö bordayarqan. 25Tsënöllam tsë kuchunpa qoripita rurashqa campanillakunata churayarqan. Tsënöpam sotäna kuchunman granadïllakunatawan qori campanillakunata tumariq churayarqan. 26Tsë sotänachöqa llapan kuchunpa tumariq karqan juk granadïlla, juk qori campanilla, juk granadïlla, juk qori campanilla. Moisésta Teyta Dios ninqannöllam Tinkuna Tolduman yëkur yakakunanpaq tsë sotänata rurayarqan.

27Aarónpaq y tsurinkunapaqmi tünicakunatapis llanulla putskashqa lïnu jïlupita awayarqan. 28Tsënöllam llanulla putskashqa lïnu jïlupita rurayarqan görrata, görrapa adornunkunata y calzoncïllukunata. 29Wachukutapis awayarqan llanulla putskashqa lïnu jïlupitam y azul, granäti y puka millwa jïlukunapitam. Awarirnam wachukuman kuyëllapaqta bordayarqan. Moisésta Teyta Dios ninqannöllam llapanta rurayarqan.

30Tsënöllam qoripita sagrädu vinchata rurëkur rumipita rurashqa sëllunö kananpaq tsëman qellqayarqan kënö nir: <<Teyta Diospa karmi santu>>. 31Moisésta Teyta Dios ninqannöllam tsë vinchata azul cordonwan görraman watayarqan.

Sagrädu Tolduta rurar ushayanqan

Éxodo 35.10-19

32Tsënömi Tinkuna Sagrädu Tolduta rurar ushayarqan. Moisésta Teyta Dios ninqannöllam Israel nunakunaqa llapantapis rurayarqan. 33Nïkurmi Sagrädu Tolduta y llapan inshinankunata Moisésman apayarqan. Jina apayarqanmi Sagrädu Toldupaq rurayanqan ganchukunata, marcukunata, traviskunata, jorcunkunata, jawiränanta, 34Tinkuna Tolduta qatayänanpaq pukaman tiñishqa üsha pergashta, fïnu qarakunata, baúlta tsaparaq cortïnata, 35Pactu Baúlta, baúlta puritsikuyänan mantëkunata, baúlpa tsapananta, 36mësata, inshinankunata, Teyta Diospa nöpanchö churaränanpaq kaq tantata, 37qoripita rurayanqan candelabruta, candelabrupa puntankunaman churayänanpaq kaq mechërukunata, candelabrupa inshinankunata, aktsi rawrananpaq aceitita, 38qoripita rurashqa altarta, sagrädu aceitita, pukutaq inciensuta, Tinkuna Toldupa punkunta tsaparaq cortïnata, 39broncipita rurashqa altarta, broncipita rurashqa rejïllata, altarta puritsikuyänan mantëkunata, altarchö inshinankunata, lavatoriuta täkunantawan, 40patiupa cortïnankunata, patiupa jorcunninkunata, jorcunkunapa jawiränanta, patiupa punkunta tsaparaq cortïnata, patiupa estäcankunata llanu waskatawan y Tinkuna Sagrädu Toldupa llapan inshinankunatapis. 41Tsënöllam apayarqan Tinkuna Sagrädu Tolduchö sacerdöti yakakunanpaq kaq ratashta. Tsë ratashkunaqa karqan sacerdöti Aarónpa sagrädu ratashninkuna y tsurinkuna yakakuyänanpaq ratashkunam.

42Moisésta Teyta Dios ninqannöllam Israel nunakunaqa llapantapis rurayarqan. 43Teyta Dios ninqannö llapantapis rurayanqanta rikarmi Moisésqa pëkunata bendisïkurqan.

Currently Selected:

Éxodo 39: qwhB

Highlight

Copy

Compare