Daniel 7

Mantsanëpaq chusku animalkunata suëñïninchö Daniel rikanqan

1Babilonia nacionchö rey Belsasar juk wata mandakïkaptinmi Daniel revelacionta suëñïninchö rikëkurqan. Rikashqankunata qellqarirmi 2Daniel kënö nirqan: <<Suëñïnïchömi rikëkurqü kë patsapa chuskun lädupita vientukuna shamur sheqinakuyaptin lamar yaku mantsanëpaq laqchiqsaqta. 3Tsë lamarpitam mantsanëpaq juk juklla chusku jatusaq animalkuna yarqayämurqan.#Apoc. 13.1; 17.8.

4<<Punta kaq animalmi karqan león niraq. Sipsankunam#7.4a Wakin nunakunaqa älankunam niyanmi. karqan pichakpa#7.4b Wakin nunakunaqa äguilapa niyanmi. sipsannö. Rikarëkaptïmi sipsankunata jorquyarqan. Tsëpitam tsë animalta shäritsiyarqan chakinllawan nunanö shäränanpaq. Tsënöllam nunanö yarpakachänanpaq yarpëta qoyarqan.

5<<Ishkë kaq animalmi karqan ösu niraq. Juk kaq lädu waqtannam pallarikashqa këkarqan. Shiminchömi amurëkarqan kima costillakunata. Tsë ösutam kënö niyarqan: <¡Shärirkur melanashqëkiyaq ëtsata mikï!>

6<<Tsëpitanam rikëkurqä leopardu niraq animalta.#Apoc. 13.2. Waqtanchömi karqan chusku sipsankuna. Tsënöllam karqan chusku peqayuq. Tsë animalmi mandakunanpaq autoridä këta chaskirqan.

7<<Tsëpitanam rikëkurqä chusku kaq animalta. Punta kaq rikashqä animalkunapitapis mas jukläyam karqan. Tsë animal karqan alläpa mantsanëpaq feyum. Jina alläpa kallpasapam karqan. Waqunkunapis fiërrupita jatusaq kaptinmi pitapis tarishqan kaqtaqa mikur ushëkurqan. Katupin kaqtaqa chipyëpam jalukur usharirqan. Tsë animalqa karqan chunka waqrayuqmi.#Apoc. 12.3; 13.1.

8<<Tsë waqrankunata rikäpëkaptïmi juk taksha waqra mas winamurqan. Tsë waqra winaptinmi kima kaq waqrankuna kipchukäyarqan. Nawiyuq y shimiyuqmi tsë waqra karqan. Nawinkunaqa nunapa nawinnömi karqan. Tsënöllam shimin chashqanta pitapis asharqan.

Juzgananpaq trönuman Teyta Dios täkurinqan

9<<Tsëchö rikarëkaptïmi trönukunata alistayarqan.

Juk trönumanmi wiñëpa kawaq Awkin täkurirqan.

Ratashninpis rajunö pasëpa yulaqmi karqan.#Apoc. 1.14.

Aqtsanpis yulaq millwanö pasëpa yulaqmi karqan.#Apoc. 20.4.

Täkunan trönunpis y trönunpa ruëdanpis rawrëkaq ninanömi karqan.

10Pëpa nöpanpitam burururllana nina yarqïkarqan.

Waranqapayanmi pëta sirwiyarqan.

Yupëtapis mana puëdipaqmi nöpanchö kayarqan.#Apoc. 5.11.

Juzgar qallëkunanpaqnam librukunata kicharqan.#Apoc. 20.12.

11<<Tsë taksha waqra mantsakëpaq qayapaqtam rikarëkarqä. Tsënö rikarëkaptïmi waqrayuq animalta wanutsiyarqan. Tsëpitanam pedäzu pedäzu roqurir rawrëkaq ninaman jitëkuyarqan. 12Tsënöllam wakin animalkunapa podernintapis qochiyarqan. Qochirirpis tiempun cumplishqanyaqmi kawëkaqta jaqiriyarqan.

Pukutë rurinchö shamuq nuna puëdiq tikranqan

13<<Tsë paqasmi revelacionchö rikarqä ciëlupita pukutë jananchö nunapa tsurinnö shamïkaqta. Pëtam wiñëpa kawaq Awkinpa nöpanman pushayarqan.#Mat. 24.30; 26.64; Mar. 13.26; 14.62; Luc. 21.27; Apoc. 1.7, 13; 14.14. 14Tsë Awkinmi pëta churarqan llapanta mandananpaq, llapanpaq puëdiq kananpaq y llapanpita respetashqa kananpaq. Tsëmi më markapita karpis, mëtsë nacionpita karpis y ima idiömata parlarpis pëta sirwiyarqan. Pëpa mandakïninqa imëyaqpis mana ushakaqmi kanqa. Puëdiq kashqantaqa manam pipis qochinqatsu ni pipis ushakätsinqatsu.#Apoc. 11.15.

15<<Noqa Danielmi tsëkunata rikëkur alläpa mantsakashqa quedakurqä. Rikashqäpita yarpakachar alläpam llakikurqä. 16Tsënam tsë shëkaqkunapa nöpanman witïkur jukninta mañakurqä tsëkunapita käyïkatsimänanpaq. Tsëmi käyitsimar nimarqan: 17<Tsë chuskun jatusaq animalkunaqa chusku nacionkunam këkäyan. Tsë nacionkunam mandakuq tikrarir wakin nacionkunatapis munëninman churayanqa. 18Tsëpitanam poderyuq Teyta Diosman markäkuqkuna mandakïninta chaskiyanqa. Tsë mandakïninchömi imëyaqpis wiñëpa pëkuna kayanqa>.#Apoc. 22.5.

19<<Tsëpitanam chuskun animal imapaq kashqantapis musyëta munarqä. Tsë animalmi imallatapis tsarishqan kaqtaqa pasëpa rachir mikurqan. Katupinkunataqa jalukurmi usharqan. Waqunkunapis fiërrupitam y shillunkunapis broncipitam karqan. Wakin animalkunapitapis mas jukläya karmi alläpa mantsëpaq karqan.

20<<Tsënöllam musyëta munarqä tsë animalpa chunka waqrankuna imapaq kashqanta y taksha waqra imapaq winashqantapis. Tsë taksha waqra winaptin kima kaq waqrankuna kipchukäyarqan. Tsë waqraqa nawiyuqmi karqan. Tsënöllam shimin chashqanta imatapis parlaq. Tsëmi tsë waqra wakin waqranpitapis alläpa mantsëpaq karqan. 21Rikarëkaptïmi tsë waqra Teyta Diosman markäkuqkunata atacar vencirqan.#Apoc. 13.7. 22Tsënö vencirqan wiñëpa kawaq Awkin shamur kuyashqan nunakunaman qaqashqanyaqmi.#Apoc. 20.4. Qaqaptinmi mandakïninta chaskiyarqan.

23<<Tsëpita musyëta munaptïmi tsëchö shëkaq käyitsimar nimarqan: <Tsë chusku kaq animalqa juk nacionmi këkan. Tsë nacionqa kë patsachö wakin nacionkunatapis poderninchömi tsararanqa. Wakin nacionkunapita mas jukläya karmi jalukur lutskëpa lutskar kë patsachö këkaqkunata ushakätsinqa.

24<< <Tsë chunka waqrankunaqa tsë nacionpa chunka reyninkunam këkäyan.#Apoc. 17.12. Pëkuna wanuriyaptinmi juk nunana rey yëkunqa. Pëqa wakin reykunapitapis mas mana alli karmi kima reykunata vencinqa. 25Tsënöllam Teyta Diospa contran parlanqa. Teyta Diosman markäkuqkunatapis alläpam jipatsinqa. Teyta Diospaq rurashqan fiestakunatapis y mandamientunkunatapis trocatsitam munanqa. Teyta Diosman markäkuqkunata kima wata joqta killam munëninchö tsararanqa.#Apoc. 12.14; 13.5-6.

26<< <Tsënö këkaptinmi Teyta Dios juzgaptin tsë reypa poderninta qochir pasëpa ushakätsiyanqa. 27Tsënam puëdiq Teyta Diosman markäkuqkuna kë patsachö llapan mandakuqpitapis mas mandakuq kayanqa. Tsënöllam poderyuqkunapitapis mas puëdiq kayanqa y reqishqa nunapitapis mas reqishqa kayanqa. Teyta Diospa mandakïnin imëpis mana ushakaq kaptinmi kë patsachö llapan nacionkuna pëta sirwiyanqa>.

28<<Tsëtam suëñïnïchö rikëkarqä. Rikashqäkunapita yarpakacharmi noqa Daniel pasëpa yulaqashqa tikrarirqä. Tsë suëñushqätaqa pitapis manam willarqätsu>>.

Currently Selected:

Daniel 7: qwhB

Highlight

Copy

Compare