Amós 5
5
1Israel nunakuna, wanupukï qotsutanö kanan qotsupäyaptiq shumaq wiyayämë.
2Doncëlla shipashnö kuyëllapaq këkarpis nacionniki ushakanqam.
Paqwë ushakashqa kaptinmi pipis shäritsita puëdinqatsu.
3 Teyta Diosmi kënö nin:
<<Israel nacionchö juk markapita juk waranqa (1,000) nunakuna pelyaman ëwar pachakllanam (100) kutiyämunqa.
Juk markapita juk pachak nunakuna pelyaman ëwar chunkallanam kutiyämunqa>>.
4 Teyta Diosmi kënö nin:
<<Israel nunakuna, noqata ashiyämë.
Ashimarqa kawayankim.
5Bet-elman ama ëwayëtsu.
Gilgalman ni Beersebamanpis ama chäyëtsu.
Gilgal markachö täraq nunakunataqa juk nacionmanmi prësu apakuyanqa.
Bet-el markapis pasëpa ushakätsishqam kanqa>>.
6 Teyta Diosta ashirqa kawayankim.
Mana cäsukuyaptikiqa imëkatapis nina ushariqnömi llapëkita ushakätsiyäshunki.
Tsë höraqa Bet-elchö adorayashqëki ïdulukuna manam mëqanpis salvayäshunkitsu.
7Qamkunaqa waktsakuna quejakuyanqantapis manam arreglayankitsu.
Jutsayuqman qaqarmi jutsannaq kaqpa contran shärïkäyanki.
8 Teyta Diosmi kamashqa Pléyades nishqan qoyllurkunata y Orión nishqan qoyllurkunatapis.
Pëmi paqastapis junaqman tikratsin.
Junaqtapis paqasman tikratsin.
Lamarpita pukutëta sharkatsirmi tamyatsimun.
Shutinpis Yahwehmi këkan.
9Kallpasapa nunatapis ushakätsinmi.
Altu tumariq perqayuq markakunatapis ushakätsinmi.
10Qamkunaqa demanduta alli arreglaq kaqta chikikäyankim.
Rasun kaqllata willakuq testïgukunatapis qarquyankim.
11Impuestukunata waktsakunata pagatsirmi mikuyänanpaq ëllukuyanqantapis qochikäyanki.
Tsënö kayanqëki rëkurmi llaqllashqa rumiwan kuyëllapaq wayikunata shäritsirpis täräyankitsu.
Üvasta plantarpis vïnunta manam upuyankitsu.
12Musyämi jutsata rurayanqëkita y mana cäsuyämanqëkitapis.
Qamkunaqa sënita chaskirmi jutsayuqkunaman qaqakäyanki y jutsannaq kaqtana allqutsëkäyanki.
13Tsënö kanqanta musyarmi käyikuq nunakunapis upälläkuyan.
Aksë kayaptikim pïmëpis mantsa mantsallana kawakuyan.
14Alli kawakuyänëkipaq ama llutankunata rurayëtsu, sinöqa alli kaqkunallata rurayë.
Tsëmi llapanta mandaq Teyta Dios yarpäyanqëkinö yanapayäshunki.
15Llutan rurëkunata jaqirir alli kaqkunallatana rurayë.
Despächïkikunachöpis shumaq arregluta rurayë.
Tsënö rurayaptikiqa Josépita miraqkuna llapëki mana ushakäyänëkipaq capazchi llapanta mandaq Teyta Dios ankupëkuyäshunki.
16Poderyuq y llapanta mandaq Teyta Diosmi nin:
<<Pläzakunachö waqakïllam kanqa.
Cällikunachömi alläpa llakikur qapariyanqa.
Chakrachö uryaqkunatapis waqar yanapayänanpaqmi qayayanqa.
Waqakuqkunawanmi juntu waqayanqa.
17Shamur castigayaptiqmi llapan üvas chakrakunachöpis Israel nunakuna waqayanqa>>.
Teyta Diosmi tsënö nin.
18¡Ay, imanöraq kayanki Teyta Dios juzganan junaq chämuptin!
¿Imanirtaq munëkäyanki tsë junaq chämunanta?
Tsë junaq alli kananpaq kanqanta yarpäyaptikipis alläpa mantsakäkïpaqmi kanqa.
19Tsë junaq kanqa leonpita safar ösuwan tinkuqnömi.
Tsënöllam kanqa wayinman yëkur tanupukïkuptin perqa uchkupita makinta culebra kanïkuqnö.
20Tsëmi Teyta Dios juzganan junaq shamuptin kushikuyänanpa rantin alläpa llakikuyanqa.
Paqaschönö kar manam ima rurëtapis puëdiyanqatsu.
21<<Noqapaq fiestata rurayanqëkitapis alläpam melanä.
Ëllukëkur janan shonqulla adorayämanqëkitapis alläpam ajayä.
22Kayana sacrificiukunata y tsaki mikïkunata noqapaq kayayaptikipis manam chaskishaqtsu.#Isa. 1.11-14.
Wiran kaq wishita alli pasakï sacrificiupaq kayayaptikipis manam chaskishaqtsu.
23Arpata tocar kushishqa qotsuyashqëkitapis manam wiyëta munätsu.
24Noqaqa munä nuna mayikikunawan alli kawakur munanqänö kawakuyänëkitam.
Mayu mana ushakëpa ëwanqannö nuna mayikikunawan imëpis alli kawakuyë.#1Sam. 15.22; Prov. 21.3; Jer. 7.22-23; Ose. 6.6; Miq. 6.6-8.
25<<Israel nunakuna, chusku chunka (40) wata chusyaq jirkapa purir manam noqapaqtsu wätakunata y tsaki mikïkunata kayayarqëki.
26Tsëpa rantinmi rey kanqanta yarpar Sicut shutiyuq ïduluta aparishqa puritsiyarqëki.
Jina estrella niraq Quiún ïdulutapis aparishqam puritsiyarqëki.
Tsëkunataqa kikikikunam rurayarqëki diosnikikuna kayänanpaq.
27Tsëmi Damascupita mas washanin läduman qarqatsiyashqëki>>.#Hech. 7.42-43.
Tsënö rurayäshunëkipaqqa Teyta Diosmi nin.
Y shutinqa Llapanta Mandaq Teyta Diosmi#5.27 Hebreo idiömachömi shutin këkan Elohim Tsaba..
Currently Selected:
Amós 5: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
