Amós 3
3
Israel y Judá nunakunata juzgananpaq Teyta Dios ninqan
1Israel y Judá nunakuna, Egiptupita jorqamushuqniki Teyta Dios ninqanta wiyakuyë:
2<<Kë patsachö tsëtsika nunakuna këkäyaptinpis qamkunallatam akrayarquq kuyanqä nunakuna kayänëkipaq.#Deut. 7.6.
Tsëmi jutsata rurayanqëkipita castigayashqëki>>.
3Piwanpis viäjipa ëwayänanpaqqa puntata willanakuyanran.
4Leonpis montichö qaparin wätata mikunanpaq tsarirran.
Mallwa leonpis machëninchö wäpun mikunanpaq imatapis tsarirran.
5Pishqukunapis toqllaman yëkun ima mikïtapis churashqaran.
Ima toqllapis juchun animal yëkuptinran.
6 Cornëtatapis tocayan markachö imapis mantsakëpaq kaptinran.
Tsënöllam markachö ima desgraciapis pasakun Teyta Dios castigaptinraq.#Job 2.10; Isa. 45.7.
7Sirwiqnin profëtakunata manaraq willarqa Teyta Dios manam imatapis mantsëpaq kaqkunata rurantsu.#Gén. 18.17-19; Jer. 7.25; Dan. 9.10.
8León qaparinqanta wiyar ¿piraq mana mantsakanmantsu?
Teyta Dios ninqanta wiyëkar ¿piraq mana willakunmantsu?#Jer. 20.9; 1Cor. 9.16.
9Willakuqkuna, Asdod markaman ëwëkur ninqäta willayë palaciunchö reyta.
Egiptumanpis ëwëkur ninqäta palaciunchö reyta willayë.
Willar niyanki:
<<Samaria markaman y lädun jirkakunaman llapan shayämutsun.
Tsëchömi rikäyanki markachö llutanta rurëkäyaqta y mana ankupashpa nunakunata jipatsiyanqanta.
10Pëkunaqa alli kaqta rurëta manam yachayantsu.
Suwakuyanqanllatam palaciunkunachöpis këkätsiyan>>.
11Tsënö kayanqanpitam Samaria nunakunata Teyta Dios kënö nin:
<<Contrëkikuna mëtsëpita shamurmi atacayäshunki.
Ratakuyänëkipaq shätsiyanqëki jatusaq tumariq perqakunatapis llapantam juchuratsiyanqa.
Palasyïkikunapitapis tariyanqan kaqtaqa llapantam apakuyanqa>>.
12 Teyta Diosmi nin:
<<Imanömi leonpa shiminpita qochiptin üshapa chakinllapis o rinrinllapis quedan, tsënöllam Samariachö täraq Israel nunakunapis wallkaqllana quedayanqa.
Damascupita rantiyämunqan kuyëllapaq sillëtachö täraq nunakunapis wallkaqllam quedayanqa>>.
13Llapanta mandaq Teyta Diosmi kënö nin:
<<Niyanqaqta shumaq wiyayë.
Jacobpita miraq llapan nunakunata kënö willayë:
14<Jutsata rurayanqanpita Israel nunakunata juzganä junaq Bet-elchö këkaq altarkunata llapantam ushakätsishaq.#2Rey. 23.15.
Ushakätsiptïmi altarpa esquïnanchö këkaq waqrankunapis pakikar patsaman shikwayanqa.
15Usya witsan täräyänanpaq ruratsiyanqan wayinkunata y tamya witsan täräyänanpaq ruratsiyanqan wayinkunatapis llapantam juchuratsishaq.
Jina marfilwan adornashqa wayikunatapis llapantam juchuratsishaq.
Llapan alli wayikunatam juchuratsishaq> >>.
Teyta Diosmi tsënö nin.
Currently Selected:
Amós 3: qwhB
Highlight
Copy
Compare
Share
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
