2 Corintios 13

Teyta Dios munanqannö kawayänanpaq Pablo käyitsinqan

1Kananwanqa kima kutinam qamkunaman watukayaqniki shamushaq. Teyta Diospa palabranchö kënö qellqarëkashqanta yarpäyë: <<Ishkë o kima testïgukuna shimpiyaptinran pipis jutsayuq kashqan musyakanqa>>.#Deut. 19.15.

2Qamkuna kaqman shamurmi jutsa ruraqkunata jutsankunata jaqiyänanpaq unëna nirqä. Kananpis nöpëkikunachö këkaqnömi llapëkita yapë niyaq: Kanan kutimur tsënölla jutsata rurëkaqta tarirqa manam ankupäyashqëkitsu. 3Tsëran musyayanki qamkunata niyashqaqkuna Jesucristo munashqannö kashqanta.

Jesucristupis manam mëqëkitapis jutsëkipita tsapäshunkitsu. Tsëpa rantinmi jutsa rurëta mana jaqiyaptiki poderninwan piñapäyäshunki. 4Poderninnaq nunanö cruzchö wanuriptinpis Teyta Dios poderninwan pëta kawaritsimushqa. Tsënöllam noqakunapis Jesucristuman markäkur kikïkunallapitaqa poderninnaq karpis Teyta Diospa poderninwan qamkunata piñapäyashqëki.

5Jesucristuman rasunpa markäkuyashqëkita o mana markäkuyashqëkitapis kikikikuna käyikuyë. ¿Manaku käyiyanki Jesucristo qamkunawan këkashqanta? Pëman mana markäkuyaptikiqa manam qamkunawantsu këkan. 6Rasunpa pëman markäkurqa Jesucristo kachamashqantam käyikuyankiman.

7Teyta Diostam mañakïkäyä nishqäkunata chaskikur jutsa rurëkunata jaqiriyänëkipaq. Manam puëdiq kayashqäta käyiyänëkipaqtsu mañakuyä, sinöqa poderninnaq kayashqäta yarparpis Teyta Dios munashqannö kawayänëkipaqmi. 8Tsënö niyaq Teyta Diospa alli willakïninpaq ima tsapapis mana kananpaqmi. Pëpa willakïnintaqa pïmëpis chaskikuyänantam munayä.

9Tsëmi Teyta Diosta mañakïkäyä llapanchöpis pë munashqannö kawayänëkipaq. Pë munashqannö kawayaptikiqa poderninnaq kayashqäta nunakuna yarpäyaptinpis kushikuyämi. 10Kë qellqamushqäkunata cäsukuyaptiki qamkuna kaqman chämur imatapis mananam niyashqëkinatsu. Manam llakitsiyänaqpaqtsu apóstol këman Teyta Dios churamashqa, sinöqa kallpatsar yanapayänaqpaqmi.

Cartapa ushanan

11Wawqikuna y panikuna, imëpis kushikuyë. Teyta Dios munashqannö kawayänëkipaq jukniki juknikipis kallpatsanakuyë. Mana chikinakushpa juk shonqulla kawakuyë. Tsënö kawayaptikim ankupäkuq y alli kawëta qomaqnintsik Teyta Dios imëpis yanapayäshunki. 12Jukniki juknikipis qaqllëkikunachö mutsanakur napanakuyë. 13Këchö këkaq llapan wawqikuna y panikunam napayäshunki.

14Señor Jesucristo, Teyta Dios y Espíritu Santu imëpis ankupëkulläyäshï. [Tsënö katsun.]

Currently Selected:

2 Corintios 13: qwhB

Highlight

Copy

Compare