1 Tesalonicenses 4

Teyta Dios munanqannö kawanapaq

1Wawqikuna y panikuna, Señornintsik Jesucristupa shutinchömi rowayaq yachatsiyashqaqnölla Teyta Dios munashqannö imëpis kawakuyänëkipaq. Pë munashqannö kawëkäyashqëkita musyarpis waran waran tsënö kawëta sïguiyänëkipaqmi kallpatsëkäyaq.

2Musyayankim Señornintsik Jesucristupa willakuqnin kar imata yachatsiyashqaqtapis. 3Jutsannaq kawayänëkita Teyta Dios munarmi fornicación jutsata rurayänëkita munantsu, 4sinöqa warmikikunawan y qowëkikunawan respetanakur alli kawakuyänëkitam munan. 5Manam munantsu Jesucristuta mana chaskikuqkunanö ërayashqa lluta purikuyänëkita. 6Tsënö kaptinqa ama mëqëkikunapis jukpa warminwan kakuyëtsu. Tsënö kakurqa nuna mayikitam engañëkanki. Willayashqaqnam tsënö kaqkunataqa Señor Jesucristo mana ankupashpa castigananpaq kashqanta.

7Manam jutsata rurar purikunantsikpaqtsu Teyta Dios akramarquntsik, sinöqa pë munashqannö kawanantsikpaqmi akramarquntsik. 8Kë yachatsiyashqaqkunata pipis mana chaskirqa manam noqakunatatsu manakaqpaq churëkäyäman, sinöqa Espíritu Santuta qomaqnintsik Teyta Diostam.

9Jukniki juknikipis kuyanakur alli kawayänëkipaqmi Teyta Dios käyitsiyäshurqunki. Tsëmi wanayankinatsu kuyanakuyänëkipaq käyitsiyänaqtaqa. 10Macedonia provinciachö täraq llapan wawqikunawan y panikunawan shumaqshi kuyanakïkäyanki. Tsënö kaptinpis qamkunata kallpatam qoyaq masraq kuyanakuyänëkipaq.

11Piwanpis mana liryakushpa kawakuyë. Nuna mayiki imanö kawakushqantapis rikapar ama puriyëtsu. Tsëpa rantin käyitsiyashqaqnölla ima uryëllachöpis uryakuyë. 12Tsënö uryayaptikim imëkikunapis pishinqatsu y Jesucristuman mana markäkuqkunapis respetayäshunkim.

Señornintsik Jesucristo kutimunanpaq ninqan

13Wawqikuna y panikuna, wanurirpis kawarimunantsikpaq kashqanta musyayänëkitam munä. Wakin nunakunaqa wanurir pamparäyashqanllachö ushakäyänanpaq kashqanta yarparmi wanupukur alläpa llakikuyan. Noqantsikqa ama pëkunanö llakikushuntsu. 14Musyantsikmi wanushqanpita Jesucristuta Teyta Dios kawaritsimushqanta. Tsënöllam pëta chaskikuqkunatapis Teyta Dios kawaritsimur Jesucristuwan apamunqa.

15Tsëmi Jesucristo yachatsikushqannö noqapis qamkunata niyaq: Mëqantsikpis Jesucristo kutimushqan junaqyaq kawarqa manam wanushqakunapita puntatatsu pëwan tinkuq ëwashun. 16Ciëlupita Jesucristo kutimuptinmi mandakuq ángel qaparipa qayakamunqan y Teyta Diospa cornëtanta tocamushqanpis wiyakamunqa. Tsë höram Jesucristuman markäkïkar wanushqakuna puntata kawariyämunqa. 17Tsëpitanam kawëkaqkunatapis ëllumäshun. Pukutë jananchömi Señornintsik Jesucristuwan llapantsik tinkushun. Tsëpitanam pëwan juntu wiñëpa kawakushun.#Mat. 24.30-31; Mar. 13.26-27; 1Cor. 15.51-52. 18Tsëmi kë yachatsiyashqaqkunata yarpätsinakur jukniki juknikipis kallpatsanakuyë.

Currently Selected:

1 Tesalonicenses 4: qwhB

Highlight

Copy

Compare