2 Tesalonicenses 3
3
Cyiñ der lo Ñgyoozh nu nac de̱ ya̱
1Zeꞌ laab nii la stub coz nu ne̱e̱ lo der bicy na, ndeꞌ nu cyiñ der lo Ñgyoozh nu nac de̱ ya̱. Cyiñ der lom nu dzach grush las de riidz ni Shuaan den Jesuuz dela lugaar nunu cyiñ der lom nu ca lagy de mbecy loñ gal nu guc lat de ru. 2Niꞌ ziꞌl cyiñ der lom nu cueꞌ zaan mi nu shiñ gyicy nu de mbecy a̱ꞌ nap de̱ ya̱. Gun walab dela mbecy ricy cup dey consuel lo de riidz ni Shuaan na. 3Tees Shuaan den Jesucrisht, mi zeꞌ nac mi biñ nu ricy paa. Nunu mi zeꞌ cuic mi fers ni der. Nunu co chum der lo nuras a̱ꞌ nap. 4Nunu mi zeꞌ ricy mi nu gyicy cup de̱ consuel lo der, gun rad lagy de̱ nu ricy der de coz nu mne̱e̱ de̱, nunu segur la zaab gyicy la der ñii par lo.
5Na Shuaan den Jesuuz locyuub mi der nu ca der de mbecy, gal nu rca Ñgyoozh den, nunu cuic mi fers ni der par nu gagye der ornu gzac zir.
Rlagy ñi gyicy den riiñ
6Der bicy na, ya̱ rne̱e̱ lo der nu nac rishbeey ni Shuaan den Jesucrisht nu gruu chu der lo ca ziꞌl na bicy na nu walagy gyicy riiñ, gal nu lo de yu nu wagyicy gal nu rnii de riidz nu blyu̱u̱ de̱ ni der. 7De ru nap rad lagy der nu rlagy ñi gyicy der gal nu bicy de̱. Walab nu wangyicy de̱ riiñ lat nu pcyiiñ de̱ lat der. 8Nunu wanta̱w leew de̱ gyit, sinu brish de̱ gyiꞌñ. Lugaar nu gazed de̱, ca nu bloo lo̱ de̱ nu bicy de̱ riiñ dzi rel la, gun wangalagy de̱ nu riiba̱ de nu ndeꞌ ic der. 9Yad ñi nu diñ de̱ nu da̱w lo der. Tees wantiñ de̱ gun rlagy de̱ nu gyicya̱ tub mod nap par nu zac der, gun orzeꞌ gyicy der gal nu bicy de̱ ya̱. 10Lat nu pcyiiñ de̱ lat der, i mod mne̱e̱ de̱ lo der: “Mbecy nu washet ic nu gyicy riiñ, orzeꞌ yu zeꞌ cueꞌ goy gyit.” 11Bi neñ de̱ nu yuꞌ la be mbecy lat der nu wagyicy yu riiñ. Se la la coz ricy dey. Nomaas nu rneꞌ ziꞌl ruꞌ dey lat asunt ni mbecy. 12Orzeꞌ nu nac rishbeey ni Shuaan den Jesucrisht, ya̱ rne̱e̱ lo de mbecy zeꞌ nunu rdu̱ꞌ riiñ yaa dey nu cueꞌ nid ruꞌ dey, sinu gyicy dey riiñ par nu gad coz nu gow dey.
13Der bicy na, cueꞌ gazed der nu gyicy der de coz nap. 14Benu ca na tub mbecy walagy yu zuub gyidag yu de riidz nu rne̱e̱ lo der lo gyicy ii, orzeꞌ bduꞌ cuen der yu, nunu cueꞌ gac nu der yu. Gun orzeꞌ gat loy. 15Tees cueꞌ gyicy ruy par losaꞌ yuur, sinu byoo rishloy gal nu ricy nur bicy ru.
16Orzeꞌ Shuaan den Jesuuz, biñ nu rbic gyel ri zu, zeed mi gyel ri zu lat der dub laa tiem nunu dela mod. Mi zeꞌ gac num dela der.
17Ya̱ Baly, zeeda̱ ñgyoozh ni der nu letr nu rca̱a̱ nu ya̱a̱. Ni mod rca̱a̱ nu la̱ lo dela gyicy nu rzeeda̱ lo mbecy. Ni mod rca̱a̱. 18Shuaan den Jesucrisht gyicy mi faboor nu nap gyicy num dela der.
Currently Selected:
2 Tesalonicenses 3: zpz
Highlight
Share
Copy
Want to have your highlights saved across all your devices? Sign up or sign in
© 2004, Wycliffe Bible Translators, Inc. All rights reserved.