Números 11
11
Shuar aina pegkerchau chichainakai Yuus kajerkamu
1Israelita aina waitu pujuina asar pegkerchau chichaina. Tumaina asarmatai Yuus nuna nekaa kajerak nita pujuinamunam jin akuptuk ekemak ujumak shuaran ijinawaiti. 2Yuus turakai israelita aina Moisésan Yuusjai chichasti, tusa ujakaruiti. Turam Moisés ji kea nu nagkankati, tusa Yuusan aujsauwaiti. Turamtai ji keamun nagkankauwaiti. 3Tuma asamtai nu nugkan Tabera anaikaruiti, Tabera ta nunaka Yuus jina akuptuk ekemakmau taku tawai. 4Israelita ainajai chikich shuar ainasha nitajai iruuntrar yujaina asar senchi tsukamainak, yutain pachisar chichamruina. Tumaina asarmatai israelita ainasha chichainak: “¡Yáki ii yuatnuncha amastaj!”, tusa tuina. 5-6Yuus manán akupkamun aya nunak yuina asar, yawettrar chichainak: Namagken ina surammainka atsawai, Egipto nugkanam pujusrika pepino aina, araka nere aina, namak, cebolla, tura ajos aina nu yuwaji. Turasha yamaika aya manák yuina asar yawettraji. Juigka tsukai waitainaji, Egipto nugkanmagka shir yuar pujuyaji, tusar tiaruiti. 7Manáka cilantro tutai jigkai shikapchichia nunin ajakuiti. Tura iimigka numi puari yagkutakua numamtin ajakuiti. 8Maná kugkuntigka harina aceitejai pachimra torta najanamun kugkuntijai metek ajakuiti. Tumaina asar nitaka káshikmas aa jiintrar manán jukar kayajai nekearar panka numamtinan najanawar inarujakaruiti. 9Káshika sana kakeakai manásha nui pachitkau nita pujuinamunam kakea jakuiti.
Moisés Quebrotnum pujus pegkerchau chichakmau
10“Israelita aina ii wakeramu yuatsji, tusar nita jeen waitiri pujusar útainamun, Yuus nekaa nitan kajerkauwaiti. Tura Moiséscha tumasag nita tuinamun nakitrauwaiti. 11Yuusan aujeak, wii amina inatairam aisha ju shuar aina jukim umata tusam wina inaitursamsha urukamtai waitkaram. 12Wika nita aparinchuitjai, tura nita nukurinchuitjai, tumau asan nita yaruaknaka ame nita uuntri aina nugka anajmatawaitam nuigka ejémaitsujai. 13Ju shuar aina namag sukartusta, tusar útainawai. Turasha namag atsau asamtai wika nitanka namagnaka sumaitsujai. 14Wika ju shuar aina junaka, wikika yaruakan wemaitsujai, ¡nu turataj tamauka winigka shir iturchataiti! 15Wii tajam nu umirtumainchau akumka waitu pujui tusam jakati turutta. Nu turutawakminka waittanka inaisattajai”, tusa Moisés Yuusan tinaiti.
16Takai Yuus Moisésan chicharuk: “Wina emematrutai aaknum israelita apuri araantusa iitai ame nekamu aina setenta itawarta, turam nitajai nakarsata. 17Tumawakmin wii nui taan amijai chichastatjai, tura Wakan Pegker amina yainmauwa nuna nitancha susartajai. Turamu asar ame takamaina nuna nitasha yainmakarti. Turutmainakaigka imanikmeka waittsashtatme”, tusa Yuus tinaiti.
18Nuiyasha Yuus Moisésan chicharuk:
“Israelita aina kashin namagken yuawartin asamtai, pegkermakatarma tusam tiarta. ¡Yáki namagnasha amastaj! ¡Egipto nugkanmagka shir pujuyaji! Tusar nita útmaun antukmajai, tuma asan namagken yuawarti tusan susartatjai, turam yuawartatui. 19Nuka chikichik tsawan tumachkusha jimarchik tsawanchau, tumachkusha cinco tsawan tumachkusha diez tsawanchikchau tura veinte tsawankechu. 20Wii nitajai pujamun nekainayat wina nakitruinak chichainak: ¡Egipto nugkanmayagka jinmainchau jintrauwaitji! Tusar tiaru asarmatai kashin nagkamas namagken yui yuinakua chikichik nantun ejéniartatui, tumawar yawettrar nakitiartatui, tura nuiyasha nujinmasha itakartatui”, tusa Yuus Moisésan tinaiti.
21Takai Moisés Yuusan ayak:
“Israelita ainaka nuwaka nekapmatsuk aya aishmag uun aina nuke seiscientos mil shuar ainawai, ima nukap aina nusha namagsha tuiya suakmea chikichik nantusha ejéttam. 22Vaca aina, tura oveja aina ashi kajegkar ayurkursha ejémaitsui. Tura nayantsanmaya namak aina jukar ayurkursha ejémaitsui, tusa Moisés Yuusan tinaiti. 23Tama Yuus, Moisésan chicharuk: Wii tujinmainka atsawai, tuma asamtai wii tajam nu metek uminkattawai”, tusa tinaiti.
24Tusa timatai Moisés we israelita ainan Yuus timaun ujakuiti. Tura nita apuri ainan setenta irumar Yuus ememattasa iruuntai aaknum Yuusan nakasuiti. 25Nui pujuinai Yuus yuragminam pachitkau tarauwaiti, tuma Moisésjai chichasuiti. Nuna tura Wakan Pegker Moisésan yayájakua nuna nitancha susauwaiti. Nu turamu asar nitasha Yuusa chichamen etserkaruiti. Turasha nuka atak awenagka tumachuiti. 26Setenta apu ajakaru nuiya etegkamu ainayat Yuus ememattasa iruuntai aaknumka wetsuk nita pujutairinig juakaru ainawai. Tumawaru ainakaisha Wakan Pegker nitancha pujursaru ainawai, turamu asar nitasha Yuusa chichamen nita pujuinamunam etseraina. Nuka Eldad tura Medad nu ajakaruiti.
27Tumainakai chikichik uchi tsekegki we Moisésan chicharuk: “Eldad tura Medadjai Yuusa chichamen etserainawai”, tusa ujakuiti.
28Nun ajakua nuna uchiri Josué uchichik nagkamas Moisésan yayájakua nu pujau asa, Moisésan chicharuk:
“¡Wina apuru, Moisésa jimar shuar Yuusa chichamen etseraina nu itatmamtikata”, tusa tinaiti!
29Turasha Moisés chichaak: Winak kajertakum tame. ¡Wika Yuusnau ainaka Wakan Pegker yayasaram ashi shuar aina Yuusa chichamen etserkarti, tusan wakerajai! tusa tinaiti.
30Nuna tusa inaiyak Moisés tura Israel shuar ainan apuri ainajai nita pujutainam wakettraru ainawai.
Codorníz ainan Yuus israelita aina pujuinamunam ishiakmau
31Nuna tinu asa kashin tsawak Yuus nasen akupkauwaiti, turam senchi nasentuk codorníz tutain waya numamtin ainan nayantsanmayan shir nukap ikaankauwaiti. Nita pujuinamunam nagkama chikichik tsawan jeamainnum enetkauwaiti, nuiyasha patamtuniar chikichik metro tumain nupar asauwaiti. 32Tumamtai israelita aina chikichik tsawan, chikichik káshi tura kashin tsawaksha turusag jukaruiti. Turawaru asar dos mil kilo tumainan jukaru asar ashi tinamnaikaru ainawai. 33Tura codornízan apawar eke nawainatsaig Yuus nitan kajerkauwaiti. Tura asa jatan akuptuk israelita ainan nukap ijinawaiti. 34Tuma asamtai nu nugkanka Quibrot-hataava anaikaruiti. Nunaka shuar aina aya yutanak enentaimtin aina nu jinamu taku tawai. 35Israelita aina nu nugkanam pujuina jiintrar we wenakua Haserotnum jeawar, nui pujusaru ainawai.
Currently Selected:
Números 11: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
