Jueces 15
15
Sansón filisteo ainan nepetkamu
1Sansón nukap tsawan pujus, cabra uchirin juki nuwen iistasa wuwaiti. Tuma jeaa nina wearin chicharuk: Nuwarun iistasan taajai, tusa tinaiti. Takai weari chicharuk: “Atsaa, wayaawaipa. 2Wina nawantrunka nakitakpapi inaisaya tusan chikich shuarnum surukmajai, tusa tinaiti. Turasha nawantur chikich shir shiram puja nu nuatkata”, tusa tinaiti. 3Tusa tama Sansón chicharuk: “Atum filisteo ainatirmin yamai ijinattajrume. Wii atumin turamtai urukamtai aitka tusa turutmainka atsawai”, tusa tinaiti.
4Nuna tusa Sansón kajek jiinki wuwaiti. Tuma kujancham ainan trescientos achir ujuknum apa apatak jigkakuiti. 5Tura ujuknum ekeemar trigo juuka irumramunam, uva arakmaunam, tura olivo arakmaunmanisha akuprauwaiti. Turamu asar árak ainan ashi ekeemararuiti.
6Turamun filisteo aina wainkar, junasha yáki aitka tusar tiaruiti. Tusar junaka Sansón, nina nuwe chikich shuarnum surutkamu asa yapajmak jutikayi, tusar tiaruiti. Tuina asar Sansónkan nuwen aparijai ekeemakaruiti. 7Turawarmatai Sansón nitan chicharuk: “Atum nu tura asaakrumin, nekas umiktin asan tajai. Atumin ikiachkunka wika pegkesha ayamrashtatjai”. 8Nuna tusa Sansón shir senchi kajek: Filisteo ainan nukap maawaiti. Tura Judá weantu aina matsatmaunam wuwaiti, tuma muchig wa amaunam uumak pujusuiti. 9Tumattamaun filisteo aina nekaawar, Sansón achikmi tusar Judá weantu aina matsatmaunam weriaruiti. 10Tumainakai Judá weantu aina chichainak: ¿Urukamtai juisha kaunkaurme? tusar tiaruiti. Tama nita chichainak: Sansón ina yuwimramu asamtai achiktasar taaji, tusar tiaruiti.
11Tuinakai israelita aina tres mil shuar, Sansónkan jeari chicharainak: ¿Filisteo aina ina nagkatamas ima kakaram aina nuka nekatsmek? 12Ika ame achikar filisteo ainanam suruktasar taaji, tusar tiaruiti. Tuinakai Sansón chichaak: Turasha ¡mantuawairpa! tusa tinaiti. 13Takai nita chichainak: Atsaa maatsuk filisteo ainanam achikar suruktatjame, tusar tiaruiti. Tuina asar Sansón uumak pujaun naek jimarjai kuntunam jigkaawar filisteo ainanam jukiaruiti. 14Turamun filisteo aina wainkar, Sansónkan achik inimainawai tusar pampantaina. Turasha Sansón Yuusa Wakaní yayámu asa, kuntunam naekjai apatkar jigkaamunka, uruch japikir tsurimaina numamtuk tsuriaruiti. 15Tura nui oveja jagken tepaun wainak juki, filisteo ainan mil shuaran maawaiti. 16Nuna tura Sansón chichaak:
“Burro jagkejai shuar ainan mil maamjai.
Turan nita iyashi ainanka irumkamjai”, tusa tinaiti.
17Nuna tusa inagnak, burro jagken achiakmaurin nagkimawaiti. Tura nu nugkan Ramat-lehi anaikauwaiti.
18Tuma senchi kitama asa Yuusan aujeak: “Ame yaintsakmin filisteo ainan nepetkarjai, tusa tinaiti. Turasha senchi kitamajai, tuma asan kakaarchamnau nekapeajai. Tuma asamtai nita yuusrimamurin eme anentas iin aina nu, wina mantuawartatui”, tusa tinaiti.
19Tusa tama Yuus entsan muchignumian jinaiti. Turamtai entsan umar kakaram jasuiti. 20Sansón Israel shuar ainan apuri jas veinte uwí pujusuiti.
Currently Selected:
Jueces 15: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
