Éxodo 16
16
Israelita aina yuatnun Yuus susamu
1Israelita aina Egipto nugkanam pujuina jiintramurigka chikichik nantu nuiya quince tsawan ejéniaru ainawai. Tumawar nugka Elimnumia pujuina jiintrar aya nugkanmag we wenakua Elim nugka mura Sinaíjai iinias amaunam Sinnum jeawaruiti. 2Nui pujusar Moisésan, tura Aarónjai pegkerchau 3chicharainak: Atumka aya nugkanmag yujasar tsukai jinati tusarum Egipto nugkanam pujarin jiikratkin ainarme. Yuus Egipto nugkanmag jinati tusa turamin akaigka imajnikar tsukai waitu yujamaitsuji. Egipto nugkanam pujusrika olla ainanam namag aimkar inarkamu aina shir yuar ejémarar pujumiaji, tusar tiaruiti.
4Tusa tuinakai Yuus Moisésan chicharuk: Yutain nita yuatnun nayaimpinmayan shir nukap akuptukartatjai. Turamu asar ashi tsawantin jukar yuartatui, turasha chikichik tsawantin yumainan iisar juwartatui. Wina chichamrun umirtukartimpash tusan nunaka nekapsan iiyakun turawartatjai. 5Turasha seis tsawanta nuigka jimar tsawan yumainan juukartatui, tusa Yuus tinaiti. 6-8Tusa takai Moisés Aarónjai israelita ainan chicharuk: Ika imanchau asar, atum yumainka sumaitsujrume. Atum chicharum nuka Yuus pegkerchau chicharkurum tarume. Niyaiti ina nu turatarma tusa turamuka. Atum pegkerchau chichakurme nuna, Yuus anturtamkaurme. Israelita ainati Egipto nugkanam pujarin jiirmarua nuka Yuusaiti, ii ainatsji. Tuma asamtai yamai etsa agkuantai atum yuatnun namagken amasmatai, yuattarme turarum Yuus ijai puja nu nekattarme. Tura kashin kashikmaska atum yuatnun pankan shir nukap akupturmaktatrume, tusa tinaiti.
9Tura nuiyasha Moisés Aarónkan chicharuk: Nita pegkerchau chichamurin Yuus anturkau asamtai, ashi israelita aina Yuusan emtin irumrata, tusa tinaiti. 10Tusa takai Aarón israelita ainan irumrauwaiti. Tura nitajai chichaak pujai, aya nugkanmag muranam Yuus tsaaptin jas yuragminam pachitkau wantinun wainkaru ainawai.
Yuus israelita ainan yutai maná tutain akuptukmau
11Yuus Moisésan chicharuk: 12Amee shuar aina wina pachittsar chichaina nuna antajai, tuma asamtai nita chicharainakum: Arum agkuantai namag yuattarme, antsu kashikmaska pankan nayaimpinmayan yuawar shir ejémakartatui. Tumawar wii nitan Yuusriyaitaj nuna nekarawartatui, tusa tinaiti.#Jn 6.31-35 13-14Tusa tinu asa nu tsawantinig etsa agkuantai nanamtin waya numamtin codorníz tutain ishiakuiti, nu turamu kaunak nita pujuinamunka nugkan ashi enetkauwaiti. Tura kashin tsawak kashikmaska maná tutain Yuus akupeak yumi yutina numamtin amajkauwaiti. Tura maná kakekauka puju jas nugkanam asauwaiti. 15Turamun wainkarsha nekainachu asar, nitak chichainak: ¿Jusha warimpaita? tusa tuinakai Moisés chichaak: Junaka nayaimpinmayan atum yuatnun yutain, Yuus akupturmakurme. 16Tuma asamtai atum yamai yuatin, tura atumin jeen urutma shuara pujarum nu yuatnusha nekapmasrum, chiki chikichik shuarnau jimar litro tumainan jukiarti, tusa Yuus turamrume tinaiti.
17Tuinamu asar chikich ima nukap juinai, chikich ainaka ishichik jukiaru ainawai 18Yutain nukap jukiaru aina nunausha ampinturcharu ainawai. Tura yutain ishichik jukiaru aina nusha atsumacharu ainawai.#2Co 8.15 Chiki chikichik shuar aina nita yumaina turusag jukaru ainawai. 19Nuna turawarmatai Moisés nitan chicharuk: Chikichkitirmeksha kashin yuatin tusarmeka ampirumka ikuschattarme, tusa tinaiti.
20Tusa timau ainayat, kashi tsawaku yuatnuncha ampirar ni ikuaka ikusaru ainawai. Nu turamu ainaka akarkar shir pegkerchau mejena. Tuma asamtai Moisés shir senchi nitan kajerkauwaiti. 21Ashi tsawanti káshikmas chiki chikichik nita yumaina turusag juwa jakaruiti. Antsu aa irunuka etsa yaki jak sukuam entsamna megkajakuiti.
Siete tsawanta nuigka ayamratarma tusa Yuus israelita ainan timau
22Chiki chikichik shuar aina dos litro jukiarti tusa timauwa nuna inagkas seis tsawanta nuigka cuatro litro tumainan pankan jukiaru ainawai. Nuna turawaru asarmatai israelita apuri aina Moisésan jeari ujakaru ainawai. 23Turam Moisés nitan chicharuk: Kashinka Yuus wina ememattruinak pujusarti timauwa nu tsawan atatui. Tumatin asamtai yutai yamaiya juik inarkarum yuatarma, tura yutai ampintramtaigka kashin yuatin yamaiya juik inarkarum ikustarma, tusa tinaiti.
24Timau asar Moisés timaun metek uminak, yutain nukap juukar inarak yuinak ampintraunka ayamtai tsawan tsawaarmatai yuatnun ikusaruiti. Turamsha nuka akarkacharuiti, tura mejearcharu ainawai. 25Tumamtai Moisés nitan chicharuk: Yutai ampira ikusmauka yuatarma, ju tsawanta junaka ayamtai tsawan atii tusa Yuus pegkermamtikamua nuwaiti. Ju tsawanta juika aa jiinkirum yutai eakrumsha pegkesha wainkashtatrume. 26Atum yutai aina juktinka seis tsawanta nuketi. Turasha siete tsawanta nuigka, ayamtai tsawan asamtai yutaigka atsuttawai, tusa tinaiti.
27Tusa timau aig, ayamtai tsawan tsawarmataisha yutain juukartasa ujumak shuar jiinkiar eainaksha pegke wainkacharu ainawai. 28Tumainakai Yuus Moisésan chicharuk: Atumka wina chichamruka pegkesha umirtatsrume. 29Seis tsawanta nui atum yuatnun jimar tsawan pujusa yumainan amajrum nunaka siete tsawantin ayamainak jeag pujusar yuawaruiti, tusan turajrume, tusa tinaiti.
30Timau asar siete tsawanta nuigka ayamraru ainawai. 31Israelita aina nu yutain maná tu jakaru ainawai. Nuka culantro jigkaiya numamtin ajakuiti, tura pan napa yumirijai pachimramu yumina numamtin ajakuiti. 32Moisés Yuus timaun israelita ainan ujak: Egipto nugkanam pujuinan jiiran aya nugkanmag ewekasan, yutai maná tutain ayurawaruitaj nuna, nita weantu nekawarat tusar inaktustinan dos litron jukiar ikusarti, tusa Yuus turamrume tinaiti.
33-34Nuiyasha Moisés Aarónkan chicharuk: Yuus manán ina ayurtamawaitaj nuna ii weantu aina nekawartin, maná dos litros jukim chikichik ichignanam egkeata. Turam Yuus chicham umikmau egkeamu arca puja nui apujsata, timau asa Aarón turusag umikuiti. 35-36Yutai maná tutain yusa yujasar, cuarenta uwí ejéniar nita pujustinnum Canaán nugkanam jeawaru ainawai.#Jn 6.31-35, 41, 48-51, 55-59; 2Co 8.15; He 9.4
Currently Selected:
Éxodo 16: hubDBL
Highlight
Copy
Compare
Share
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.
