Salmos 145
145
1Jmeenˋ jʉʉhˉ kyahꜗ hneˉ Dio kya̱a̱nꜙ,
hneˉ hi̱ˉ la̱a̱ꜗ dsaˉtaˊ jø̱ø̱hˈ kya̱a̱nꜙ.
Hänˋ kyahˈ läꜙjëꜙ johꜘ jmɨɨˊ chaˉ.
2Gaꜙläꜙjëꜙ jmɨɨˊ baˊ hänˋ kyahˈ,
läꜙja̱ˉ hänˋ kyahˈ läꜙjëꜙ johꜘ jmɨɨˊ chaˉ.
3Peerꜙ jø̱hˈga̱a̱ˉ Dio hi̱ˉ lleˋ hänˊ kiyhˈ.
Niꜙ ja̱a̱ˉ saꜙ läꜙkë̱hˊ jmɨɨˊ läꜙngëëꜘ
haˉ ko̱hꜘ saꜙ jø̱hˈga̱a̱ˉ Dio.
4Läꜙjë̱ë̱ꜙ dsaˉ jmeeyhꜗ juuˈ kihꜗ jo̱o̱ꜘsɨɨyhˊ kihꜗ taˊ kyahˈ.
Hlëëyhꜗ kihꜗ läꜙjëꜙ heˉ gaꜙjmeehˊ kya̱a̱hˊ beꜘ kyahꜗ.
5Ngooꜗ baˊ jnäꜘ jmeenꜙ hʉʉˊdsëˉ haˉ ko̱hꜘ jnaahˈ saꜙ laꜗ
jeeˊ ñehꜘ yaꜙjwɨɨꜗ kyahꜗ
hiꜙ jmeenꜙ hʉʉˊdsëˉ kihꜗ läꜙjëꜙ taˊ kyahˈ
heˉ jmeeꜙ dsa̱a̱˜ dsëˉ jnäähˈ.
6Hlëëhꜗ dsaˉ kihꜗ heˉ jʉhˉga̱a̱ˉ heˉ maˉjmeehˊ kya̱a̱hˊ beꜘ kyahꜗ,
hiꜙ jnäꜘ hlëëhnˊ kihˈ heˉ la̱a̱hꜗ jø̱ø̱hˈ.
7Jähꜙ dsaˉ heˉ lluꜗ hohꜘ chaˉmiihˉ.
Hiꜙ jë̱ë̱ˉ dsëyꜗ häyꜗ, kihꜗ heˉ jmeehˉ heˉ lluꜗ jmahꜗ.
8DSAˉJØ̱Ø̱Hˈ jnänˋ baˊ hi̱ˉ jø̱hˉ dsëꜗ hiꜙ läˉñihꜘ dsëyꜗ.
Saꜙ dsaˉläˉlle̱e̱yꜘ naꜗko̱hꜘ, hiꜙ lluꜗ dsëyꜗ chaˉmiihˉ.
9Lluꜗ baˊ dsëˈ DSAˉJØ̱Ø̱Hˈ jnänˋ kya̱a̱hˊ läꜙjë̱ë̱ꜙ,
hiꜙ jø̱hˉ baˊ dsëyˈ kya̱a̱hˊ läꜙjëꜙ taˊ kiyhˈ.
10Läꜙjëꜙ heˉ gaꜙjmeehˊ miˉjnääꜙ, hneˉ heꜘ la̱a̱hꜗ jø̱ø̱hˈ.
Läꜙja̱ˉ läꜙjë̱ë̱ꜙ hi̱ˉ naˉjngëëˈ kya̱a̱hꜗ häyꜗ kyahꜗ.
11Hlëëyhꜗ kihꜗ haˉ ko̱hꜘ naˊhñaahꜗ saꜙ laꜗ
jeeˊ ñehꜘ jmeehˉ hihꜙ.
Hiꜙ hlëëyhꜗ kihꜗ heˉ chaˉ chaˉmiihˉ beꜘ kyahꜗ.
12Läꜙja̱ˉ läˉñeˉ läꜙjë̱ë̱ꜙ dsaˉ
kihꜗ läꜙjëꜙ heˉ jʉhˉga̱a̱ˉ heˉ gaꜙjmeehˊ.
Hiꜙ läˉñeyˉ haˉ ko̱hꜘ jihˈgye̱hꜗ saꜙ laꜗ
jeeˊ ñehꜘ jmeehˉ hihꜙ.
13Jeeˊ jmeehˉ hihꜙ laꜗ ko̱o̱ˉ yaꜙjwɨɨꜗ heˉ saꜙ lla̱a̱ꜙ ji̱hˊko̱hꜘ.
Hiꜙ läꜙ maˉngooꜗ ja̱ˉbaˊ jmeehˉ hihꜙ läꜙjëꜙ johꜘ jmɨɨˊ chaˉ.
14DSAˉJØ̱Ø̱Hˈ jnänˋ kwayꜙ beꜘ kihꜗ läꜙjë̱ë̱ꜙ hi̱ˉ dsaˉtä̱hꜙ.
Cha̱a̱yhˉ läꜙjë̱ë̱ꜙ hi̱ˉ jëë˜ wɨɨꜘ.
15Läꜙjë̱ë̱ꜙ baˊ jëë˜ taꜙ kyahꜗ, jä̱ä̱y˜ hneˉ,
mahꜗ kwëëhˈ hnihꜘ heˉ kuhˊhɨ̱yhꜗ hor˜ kihꜗ.
16Heˉja̱ˉ ja̱a̱ˊ jaˊgoohˉ, mahꜗ kwaˊ läꜙjëꜙ heˉ kuhˊhɨ̱hꜗ
läꜙjë̱ë̱ꜙ hi̱ˉ cha̱a̱ˉ jmɨˉgyʉʉꜙ läꜙji̱i̱hˈ cha̱a̱ꜘ gaˊ kiyhˈ.
17Heˉ lluꜗ jmahꜗ baˊ jmeeꜙ DSAˉJØ̱Ø̱Hˈ jnänˋ läꜙjëꜙ ji̱i̱h˜.
Hiꜙ jø̱hˉ baˊ dsëyˈ kya̱a̱hˊ läꜙjëꜙ taˊ kiyhˈ.
18Jä̱hꜙ baˊ chehˈ Dio kihꜗ läꜙjë̱ë̱ꜙ hi̱ˉ chu̱u̱ꜘ kya̱a̱yhˊ,
pero cherˊmahꜗ gaꜙchu̱u̱yꜘ kya̱a̱hˊ läꜙka̱a̱ˉ tuhˉdsëyꜗ baˊ.
19Miˉteꜗ bihꜗ läꜙ hyohˉ dsëyꜗ kihꜗ läꜙjë̱ë̱ꜙ hi̱ˉ ga̱yhꜙ.
Läꜙ maˊ ngɨɨyꜙ beꜘ, nuuˉ bihꜗ hiꜙ lä̱ä̱y˜ kaˉlähꜘ.
20DSAˉJØ̱Ø̱Hˈ jnänˋ baˊ hi̱ˉ hä̱ä̱˜ läꜙjë̱ë̱ꜙ hi̱ˉ hnääyꜗ hñiiyꜘ.
Hiꜙ läꜙja̱ˉ miˉlla̱a̱yꜙ läꜙjë̱ë̱ꜙ hi̱ˉ hñaaˉ dsëꜗ.
21Kya̱a̱hˊ waˊhoonꜙ hänˋ kihˈ DSAˉJØ̱Ø̱Hˈ kya̱a̱nꜙ,
hiꜙ läꜙja̱ˉ kaˉlähꜘ waˊ häꜘ läꜙjë̱ë̱ꜙ dsaˉ kiyhꜗ
gaꜙläꜙjëꜙ johꜘ jmɨɨˊ chaˉ.
Currently Selected:
Salmos 145: chz
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
