Salmos 102
102
1Hneˉ DSAˉJØ̱Ø̱Hˈ kya̱a̱nꜙ,
nʉʉˉ kihꜗ läꜙjëꜙ heˉ chu̱u̱nꜘ kya̱a̱hˊ hneˉ.
He̱e̱hˋ läꜙjëꜙ heˉ ngɨɨnˊ kyahˈ.
2Taꜙ waˊ läꜙø̱ø̱hꜘ kinꜙ läꜙ maˊ jëën˜ heˉ wɨɨꜘ.
Jmeeˊ heꜗ kinꜙ, je̱e̱hˋ kinꜙ naꜗko̱hꜘ.
3Läꜙko̱o̱ˉ dsaˉä̱ä̱hꜗ ñeˊ, läꜙja̱ˉ ngooꜗ dsaˉlla̱a̱ꜙ jnäꜘ.
Peerꜙ kuˈji̱i̱ꜙ kinꜙ,
laꜗ läꜙko̱o̱ˉ heˉ häˊ jeˉ nehꜙ mooˈ kinꜙ.
4Niꜙ miihˉ saꜙ cha̱a̱nˉ lluꜗ,
la̱a̱nꜗ läꜙko̱o̱ˉ nuuˉ heˉ maˉläˉki̱i̱ꜙ.
Läꜙji̱i̱hˈ moꜙsoꜙ gwaꜘ dsënꜙ kuhˉhuhnꜙ.
5Maˉdsa̱a̱ꜗ maˉläˉkye̱e̱nꜙ
kihꜗ heˉ kɨˊhoohnˊ chaˉmiihˉ.
6La̱a̱nꜗ läꜙko̱o̱ˉ ta̱ˈjahꜘ hi̱ˉ cha̱a̱ˉ hwaꜗ ki̱i̱ꜙ.
La̱a̱nꜗ läꜙko̱o̱ˉ ja̱a̱ˉ guuˋ hi̱ˉ ngëꜙ hñiiꜘ jeeˊ laˈ naˉhøøꜘ.
7Saꜙ gwaꜘ gwɨ̱ɨ̱nꜚ hwëˈ,
la̱a̱nꜗ läꜙko̱o̱ˉ ta̱ˈjahꜘ hi̱ˉ chehꜗ kihꜗ hñiiꜘ gyʉʉhˈ hneˉ.
8Läꜙjë̱ë̱ꜙ hi̱ˉ naˉhøøhˊ kinꜙ,
läꜙta̱a̱ˈ jmɨɨˊ baˊ miˉkwa̱yhꜗ jnäꜘ.
Peerꜙ hä̱ä̱yˈ kya̱a̱hˊ jnäꜘ, jwäy˜ dsoˊjwɨɨꜘ nëˊ kinꜙ.
9Tʉˊjwaˉ baˊ laˈ maꜗ kinꜙ.
Jmɨɨˉ heˉ huhnꜙ naˉka̱ˉ naˉgwë̱h˜
kya̱a̱hˊ jmɨɨˉ heˉ tu̱u̱ˉ mɨˈnënꜙ,
10kwa̱a̱t˜ kihꜗ heˉ lle̱e̱hꜘ kya̱a̱hˊ jnäꜘ.
Toˉnëˊ gaꜙcha̱a̱hˋ jnäꜘ mahꜗ maˉjwä̱ä̱hꜙ jnäꜘ taꜙ hwaꜗ.
11Läꜙko̱o̱ˉ dsaˉnʉʉꜙ, läꜙja̱ˉ ngooꜗ gaꜙdsa̱a̱ꜗ ji̱ˉñeˉ kinꜙ.
Maˉdsa̱a̱ꜗ maˉläˉkye̱e̱nꜙ,
la̱a̱nꜗ läꜙko̱o̱ˉ nuuˉ heˉ maˉläˉki̱i̱ꜙ.
12Pero hneˉ DSAˉJØ̱Ø̱Hˈ kya̱a̱nꜙ,
cha̱a̱hˉ gaꜙläꜙjëꜙ johꜘ jmɨɨˊ chaˉ.
Läꜙ maˉhiiꜘ ja̱ˉbaˊ juuˈ kyahꜗ tä̱ä̱ꜘ.
13Jnäꜘ manꜙ noohˈ jeeˊ ñehꜘ
mahꜗ läˉñihꜘ hohꜘ kihꜗ hi̱ˉ cha̱a̱ˉ jwɨɨˉ Sión,
jëëhꜘ maˉtëꜘ hor˜ heˉ ko̱o̱hˈ hohꜘ kiyhꜗ.
Naꜗ baˊ raˉ si˜ maˉdsë̱ë̱ꜗ jmɨɨˊ.
14Läꜙjë̱ë̱ꜙ jnäähˈ hi̱ˉ jmeeꜙ taˊheꜗ kyahꜗ,
läˉñihꜘ dsëˉ jnäähˈ läꜙkye̱ˉ mɨˈku̱u̱ˊ heˉ naˉlaꜚ naˊhyahˉ kihꜗ jeeˊ jwɨɨˉ ja̱ˉ.
Läꜙkye̱ˉ kihꜗ waˊhløøˉ kihꜗ chaˊjwëꜗ jʉʉhˉ,
läˉñihꜘ dsëˉ jnäähˈ.
15Ja̱ˉgaˊ naꜙ dsaˉ hi̱ˉ tä̱ä̱hˊ läꜙka̱a̱ˉ jeeˊ jwɨɨˉ
läꜙga̱yhꜙ hneˉ DSAˉJØ̱Ø̱Hˈ kya̱a̱nꜙ.
Hiꜙ läꜙja̱ˉ läꜙjë̱ë̱ꜙ dsaˉtaˊ ka̱a̱hˊ hi̱ˉ cha̱a̱ˉ hwaꜗ laꜗ
jmeeyꜗ jʉʉhˉ kyahꜗ,
16gaˊ maˉjëëyꜙ, DSAˉJØ̱Ø̱Hˈ jnänˋ maˉjmeeyhꜗ jeeˊ jwɨɨˉ ja̱ˉ.
Maˊja̱ˉ läꜙjnäꜘ haˉ ko̱o̱ˉ jø̱ø̱hˈ saꜙ la̱a̱yꜗ.
17Nuuꜗ baˊ DSAˉJØ̱Ø̱Hˈ jnänˋ
kihꜗ läꜙjëꜙ heˉ chu̱u̱ꜘ hi̱ˉ llaˉkya̱a̱ꜗ.
Jmeeyꜗ baˊ heꜗ kihꜗ läꜙjëꜙ heˉ ngɨɨyꜗ.
18Läꜙ maˉngooꜗ ja̱ˉbaˊ naˉsɨɨˉ juuˈ laˉ
läꜙji̱i̱hˈ yaˉnääꜘ jñahꜘ hi̱ˉ ja̱ˉgaˊ läꜙcha̱a̱ˉ.
Läꜙja̱ˉ ngooꜗ baˊ jmeeꜙ dsaˉ jʉʉhˉ kihꜗ DSAˉJØ̱Ø̱Hˈ jnänˋ.
19Jëëhꜘ läꜙ gaꜙtëꜘ yaꜙjwɨɨꜗ jeeˊ gyaˈ DSAˉJØ̱Ø̱Hˈ jnänˋ
gaꜙjëëyꜗ haˉ läꜙ maˊ tä̱ä̱hˊ maˊ ha̱a̱ˊ dsaˉ hwaꜗ laˉ.
20Gaꜙnuuꜘ bihꜗ kɨˉhooh˜ hi̱ˉ maˊ tä̱ä̱hˊ nehꜙñeˈ.
Hiꜙ gaꜙlä̱ä̱ꜗ bihꜗ kihꜗ heˉ maˊ naˉbä̱ä̱yhˋ ju̱u̱yꜘ.
21Heˉja̱ˉ jmeeyꜗ jʉʉhˉ kihꜗ DSAˉJØ̱Ø̱Hˈ jnänˋ jeeˊ jwɨɨˉ Sión,
läꜙja̱ˉ häyꜗ kiyhꜗ kaˉlähꜘ.
22Läꜙja̱ˉ jmeeyꜗ waˊraˉ gaꜙku̱hꜗ läꜙjë̱ë̱ꜙ nëëˈ dsaˉ
mahꜗ jmeeyꜗ jʉʉhˉ kihꜗ DSAˉJØ̱Ø̱Hˈ jnänˋ.
23Ji̱i̱hˈ ko̱ˉhnooˈ jwëꜘ baˊ gaꜙkwayꜘ beꜘ kinꜙ.
Cha̱hꜘ baˊ maˊ tëëyꜙ jnäꜘ.
24Heˉja̱ˉ gaꜙjwɨɨnꜗ Dio kya̱a̱nꜙ:
“Taꜙ tëëˋ jnäꜘ naꜗ gaˉjʉhˉ jeeˊ hä̱ä̱nˊ ko̱ˉhnooˈ jwëꜘ.
Jëëhꜘ hneˉ cha̱a̱hˉ gaꜙläꜙjëꜙ johꜘ jmɨɨˊ chaˉ.
25Läꜙ maˊ toˉnëˊ hneˉ gaꜙjmeehˊ hwaꜗ laˉ.
Hñaahꜗ baˊ hneˉ gaꜙjmeehˊ gyʉʉhˈ jmɨˉgyʉʉꜙ.
26Läꜙjëꜙ heˉ ja̱ˉ llaꜙ baˊ, pero hneˉ, läꜙ maˉcha̱a̱hˉ naˉ baˊ.
Dsaˉgyu̱hꜙ baˊ gyʉʉhˈ hwaꜗ, läꜙko̱o̱ˉ dsaˉgyu̱hꜙ saˊhmɨɨhˉ.
Läꜙko̱o̱ˉ bä̱ä̱˜ dsaˉ saˊhmɨɨhˉ,
läꜙja̱ˉ bä̱ä̱hˊ gaꜙläꜙjëꜙ heˉ ja̱ˉ, hiꜙ läˉsɨɨꜗ kaˉlähꜘ.
27Pero hneˉ, läꜙ maˉla̱a̱hꜗ naˉ baˊ,
ji̱hˊko̱hꜘ saꜙ gyu̱hꜙ.
28Jo̱o̱ꜘsɨɨhˊ hi̱ˉ jmeeꜙ taˊheꜗ kyahꜗ
läꜙ maˉcha̱a̱yˉ ja̱ˉbaˊ kya̱a̱hˊ hneˉ.
Saˊju̱ˉ kiyhꜗ dsaˉta̱a̱yhˋ tä̱ä̱ꜘ kya̱a̱hˊ hneˉ.”
Currently Selected:
Salmos 102: chz
Highlight
Share
Compare
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.
