YouVersion Logo
Search Icon

Juan 1

1
Lee diiz Naban ngok men
1Leettsa ter yo neeka thib kwaa, lee diiz naban nzoʼa, ne lee diiz naban ndo kon Diox, ne leeka diiz naban nak Diox. 2Lee diiz naban ree ndoʼa kon Diox desde ndala. 3Ne por diiz naban mdexkwaa reta kwaa, ne os nagte por diiz naban neeka thib re kuu nzo nal gatexkwaate. 4Lee diiz naban ree nak yalnaban, ne lee yalnaban nak xni lo re men yezlyu. 5Lee xni ree ndaa xni lo yalkow, ne lee yalkow gagt tuyye.
6Ngoo thib mbyi kuu le Juan, Diox mtaal Juan, 7tsa myaad Juan par mndaa Juan kwent chaan xni, tsa yelaaz re men zha kuu nak xni por lee Juan. 8Nagt Juan xni, per lee Juan nak thib zha kuu mtaal Diox mndaa kwent chaan xni. 9Tsa lee xni kuu wlipaa nak xni kuu nteni lo re men, ndyaad lo yezlyu ree.
10Lee zha kuu nak diiz naban myaad lo yezlyu ree, ne tegal por lee zha mdexkwaa Diox yezlyu ree; per lee re men yezlyu ree mlebeet zha zha. 11Lee zha myaad por re tawlaz zha, per lee re tawlaz zha mkayaat zha zha. 12Per lee re zha kuu mkayaa zha ne ngwalaaz zha, mndaa zha diiz lo re zhaʼa, par gak re zhaʼa zhiinn Diox. 13Lee re zha ree nak zha zhiinn Diox, tak tata nlaaz Diox, ne nagte tak nlaaz xut zhay o xnaa zhay.
14Lee diiz naban ngok men, mban zha ne ngoo zha xid re nee, mwii nee yalnkelaaz chaan zha ne mne nee wli kuu nzhab zha. Ne noga mwii nee yalnabee chaan zha kuu mndaa Xut zha lo zha; ne yalnabee ree mloo beeta lee zha nak Xgann Diox. 15Juan mndaa kwent chaan zha, leettsa nzhab Juan:
―Zha ree nak zha kuu mtethʼn lo goo leettsa mnin: “Lee zha kuu ndyaad tut bluz nake na, mas nataak zhaʼa nake na, tak nzoʼa zhaʼa desde ndala leettsa terka galʼn”.
16Ne retalee nkayaaʼaa yalwen lo zha, thibe ne tedibe nkayaaʼaa. 17Moisés nak cho mndaa ley chaan Diox lo re men, per lee yalnkelaaz chaan Diox ne kuu wli myaad por Jesucrist. 18Neeka thib men ter wii Diox, beeta Xgann Diox kuu thita lo Diox, kuu thibka ndo lo Diox mwii lo Diox, ne lee Xgann Diox nak cho mloo naa xa nak Diox.
Juan kuu mtsowleyy mndaa kwent chaan Jesús
(Mt. 3:11‑12; Mr. 1:7‑8; Lc. 3:15‑17)
19Leettsa lee re zha Israel zha Jerusalén, mtaal re ngwleyy ne re zha kuu ntsow ayud re ngwleyy ngwanaabdiz lo Juan, naa cho nak Juan. 20Tsa lee Juan mkab lo re zha, ne nzhab Juan:
―Nagtʼn Crist Kuu Mtaal Diox Nabee.
21Tsa lee re zha mre mnaabdiz lo Juan, ne nzhab:
―¿Cho naka tsa? ¿Chu lu nak Lí, profet kuu ngoo ndala?
Juan mkab ne nzhab:
―Nagte na.
Tsa mre re zha nzhab:
―¿Chu lu nak tedib re profet kuu ngoo ndala, kuu naka diiz yaad?
Lee Juan mkab ne nzhab:
―Nagte na.
22Tsa mre re zha mnaabdiz zha:
―¿Cho naka tsa? Tak ndoblo gab nee thib kwaa lo re zha kuu mtaal nee. ¿Chu tak neʼa lo nee naa cho naka?
23Juan mkab ne nzhab:
―Na, nak taxal thib bos kuu nii thib ta yubiz, taxal nzhab profet Isaí zha ndala, or kuu nzhab zha: ¡Bxaal goo thib net nali par te Zha Nabee! [Is. 40:3]
24Tsa lee re zha kuu mtaal re fariseo lo Juan, mre mnaabdiz lo Juan, 25ne nzhab:
―Os leeʼa nagta Crist Kuu Mtaal Diox Nabee, neeka nagta Lí, ne neeka nagta thib re profet, ¿chebee ntsowleyya re men tsa?
26Juan mkab, ne nzhab:
―Na ntsowleyy re men kon nit, per xid goo ndo thib zha kuu nlebeet goo, 27lee zha ndyaad tut bluz nake na, per masraa nataak zha nake na, ne kona neeka korre dits labyid zha ndoblotʼn xakʼn.
28Ne reta koree ngok thib ta le Betania, tedib lad roo yoo Jordán, ta mtsowleyy Juan re men.
Jesús nak Mbak zhiil Diox
29Ne lee tedib wiza mwii Juan lee Jesús ndyaad lo Juan, tsa nzhab Juan:
―¡Wii goo, zha ree nak Mbak zhiil Diox, kuu nkib falt chaan re men yezlyu ree! 30Zha ree nak zha kuu mndan kwent lo goo or kuu mnin: “Tut bluz nake na ndyaad thib zha kuu mas nataak nake na, tak nzoʼa zha desde ndala leettsa terka galʼn”. 31Tegal mlebeetʼn zha, per mtsowleyyʼn re men kon nit, par lebee re zha Israel zha.
32Ne noga mndaa Juan kwent ne nzhab Juan:
―Mwiin lee Mbi Nayon mroo lobee taxal thib palom mla dits zha. 33Ne lee na netʼn cho nak zha tsya. Per lee zha kuu mtaalʼn tsowleyyʼn re men kon nit, ne lon: “Loka zha kuu wiiʼa la Mbi Nayon dits ne yaan Mbi Nayon lo, zhaʼa nak zha kuu tsowleyy kon Mbi Nayon”. 34Ne na mwiiy, ta mod ndan kwent lo re men, lee zha nak Xgann Diox.
Jesús mrez Ndres ne Pey
35Ne lee tedib wiza, leeka tya ndo Juan kon chop zha kuu ngeteed lo Juan. 36Or mwii Juan lee Jesús nderid tya, tsa nzhab Juan:
―¡Wii goo, zha baa nak, Mbak zhiil Diox!
37Ne mbin rop zha kuu ngeteed lo Juan kuu nzhab Juan, tsa mndeke rop zha dits Jesús. 38Or mtsere lo Jesús lee rop zhaʼa ndeke dits Jesús, tsa mnaabdiz Jesús lo rop zha, ne nzhab Jesús:
―¿Kwan nkwaan goo?
Lee rop zha mkab ne nzhab:
―Maestr, ¿pa nzoʼa?
39Jesús mkab ne nzhab lo rop zha:
―De goo, tsa ne gooy.
Tsa ngwa rop zha, ne mwii zha pa nzo Jesús, ne myaanka rop zha kon Jesús wiza, tak ndaʼa or, ora nzhak teeka las cuatro wiza.
40Ne lee Ndres wets Simún Pey, nak thib zha lo rop zha kuu mbin kuu nzhab Juan, ne mndeke zha dits Jesús. 41Ne or mzal Ndres wets Ndres kuu le Simún, tsa nzhab Ndres lo Simún:
―Mwiiʼa nee Zha Kuu Mtaal Diox Nabee (zha le Crist).
42Tsa ndano Ndres Simún ta ndo Jesús, ne or mwii Jesús lo Simún, tsa nzhab Jesús lo Simún:
―Lu nak Simún, xgann Jonás, per desde nal leeʼa role Cefas (diiz ree nak “Pey”).
Jesús mrez Lip ne Natanael
43Ne tedib wiza lee Jesús mroo nda yezlyu Galilea. Tsa mwii Jesús Lip ne nzhab Jesús lo Lip:
―Bteke ditsʼn.
44Ne lee Lip nak zha yez Betsaida, tawlaz Ndres rop Pey nak Lip. 45Tsa ngwakwaan Lip Natanael, ne or mzal Natanael lo Lip, nzhab Lip:
―Mzala nee zha kuu mndaa Moisés kwent lo libr chaan ley, leeka zha kuu mndaa re profet kwent. Lee zha nak Jesús xgann Che zha Nazaret.
46Tsa nzhab Natanael:
―¿Chu tak roo thib zha ro yez Nazaret?
Lip mkab ne nzhab:
―De, tsa ne luy.
47Or mwii Jesús lee Natanael ngebig lo Jesús, tsa nzhab Jesús:
―Baa ndyaad thib zha kuu wlipaa nak zha Israel, thib zha kuu nkedit.
48Tsa lee Natanael mnaabdiz lo Jesús ne nzhab:
―¿Xomod nlebeeʼa na?
Jesús mkab lo Natanael ne nzhab:
―Or kuu ter kwez Lipa, mwiin leeʼa ndob xann ya ig.
49Tsa nzhab Natanael lo Jesús:
―Maestr, ¡lu nak Xgann Diox, lu nak rey lo re zha Israel!
50Jesús mkab lo Natanael, ne nzhab:
―¿Nyelaaza na tak nin loʼa: Leeʼa ndob xann ya ig? Per nalraa wiiʼa masraa re kuu thoz nake koree.
51Noga nzhab Jesús lo re zha:
―Wlipaa na nin: Desde naltseree wii goo lee lobee zhaal, ne lee re mandad chaan Diox ndeke ne ndela lo na, Kuu Mzin Ngok Men.

Currently Selected:

Juan 1: zao

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy