Lucas 24
24
1Ja cꞌa xin domingo kas nsamukeꞌe xebe chic jutij ja rixokiꞌ, xequitzꞌataꞌ ja panteón, cucꞌan ja rakꞌom ja quichominel. Ecꞌo chic juleꞌ ixokiꞌ ja recachbilanel. 2Ja tok xeꞌekaji quetzꞌat chi lasan chic ja rabaj ja tzꞌapben ruchiꞌ ja panteón. 3Xeꞌoc cꞌa chipan ja panteón pro ja tok quetzꞌat mchita ja cuerpo rxin ja Jesús chipan. 4Congana sachnak quinaꞌoj rmal ja tok chaka jalal ecꞌo caꞌiꞌ achiꞌiꞌ xequetzꞌat epaꞌl pa tak quixquin, congana ncꞌacꞌoti ja quitziak. 5Congana quixben quiꞌ ja rixokiꞌ, xetiqueꞌe. Ja cꞌa caꞌiꞌ achiꞌiꞌ quewaꞌ quibij chique riꞌ: —¿Nak tre ja tok chiquicojol camnakiꞌ necanoj wiꞌ ja cꞌasli? 6Camic, ma waweꞌ chi ta cꞌo wiꞌ ja Jesús, arjaꞌ cꞌastaj waꞌan rwach ariꞌ. Turkaj chewe ja xbij can chewe ja tok cꞌa cꞌo na ewqꞌuin pa Galilea, 7quewaꞌ xbij can chewe riꞌ: —Ja Ralcꞌwalaxel ja xoc alaxic cuqꞌuin ja winak rjawaxic chi nja̱ch na pa quekꞌaꞌ ja rajmaquiꞌ, rjawaxic chi ncamsax na chwach cruz pro ja chi rox kꞌij ncꞌastaj na, neꞌ can chewe, xecheꞌe ja caꞌiꞌ achiꞌiꞌ chique. 8Ja cꞌa rixokiꞌ ejeꞌeꞌ xurkaj chique ja bin can chique rmal ja Jesús. 9Cꞌacꞌariꞌ xeꞌelel chipan ja panteón, xemeloji, xebe cuqꞌuin ja julajuj apóstol ja bar quimolon wiꞌ quiꞌ cuqꞌuin ja juleꞌ chic cachbil, xequicholoꞌ chiquewach nojel awaꞌ ja quitzꞌaton riꞌ.
10Ja rixokiꞌ ja xecholo chiquewach ja rapóstol quewaꞌ quebiꞌ riꞌ, jun María Magdalena, in jun chic Juana, in jun chic María ja ruteꞌ ja Jacobo in cꞌa ecꞌo na más ja cachbil. 11Ja cꞌa rapóstol ejeꞌeꞌ ma xquinimaj ta ja bix chique cumal ja rixokiꞌ, xa juleꞌ tzij ma chꞌobol ta ja bix chique ja nquechꞌob ejeꞌeꞌ. 12Pro ja cꞌa Pedro arjaꞌ yictaji, cꞌamcꞌol ranim be ruqꞌuin ja panteón. Ja tok xekaji cayoc chipan ja panteón, xutzꞌatoc ja utzlaj tak tziak rxin ja camnak chi xa ruyon chic cꞌo can. Cꞌacꞌariꞌ meloji ja chi rochoch, kas rmajon kaj rchꞌobic pa ranma nojel ja bantaji como congana cꞌascꞌoꞌi xutzꞌat.
* * * * * * * * * *
13Ecꞌo cꞌa caꞌiꞌ rdiscípulo ja Jesús jariꞌ mismo kꞌij quimajon binem, ebenak pa jun aldea rbinaꞌan Emaús. Ja raldea cꞌo la oxiꞌ legua rcojol ruqꞌuin ja tinamit Jerusalén. 14Ja cꞌa caꞌiꞌ discípulo ejeꞌeꞌ quimajon rtzijoxic chibil tak quiꞌ nojel ja bantaj chipan ja jun caꞌiꞌ kꞌij ja kꞌaxnak can chic. 15Kas cꞌa quimajon tzij in cꞌoli ja quimajon rcꞌaxaxic chibil tak quiꞌ ja tok xekaji ja mismo Jesús cuqꞌuin in xerachbilajel pa bey. 16Pro ja rejeꞌeꞌ ma xyataj ta chique chi ncotakij rwach chi Jesús. 17Ja cꞌa Jesús quewaꞌ xbij chique riꞌ:
—¿Nak cꞌa ja remajon rtzijoxic chibil tak ewiꞌ pa bey in nak tre ja tok nixbisoni? neꞌ chique. 18Cꞌo cꞌa jun chique Cleofas rubiꞌ, arjaꞌ xbij tre:
—¿La ma awotak ta cꞌa ja bantaj chipan ja tinamit Jerusalén chipan ja jun caꞌiꞌ kꞌij ja kꞌaxnak can? Pro ja juleꞌ chic winak ja xeqꞌuejeꞌ pa Jerusalén ejeꞌeꞌ bien cotak ja bantaji pro ni canojelal. ¿La xcꞌa ayon atat ja ma awotak ta? neꞌe ja Cleofas tre ja Jesús.
19—¿Nak cꞌa ja bantaji? neꞌe ja Jesús chique. Ja cꞌa rejeꞌeꞌ quewaꞌ quibij tre riꞌ:
—Noktzijon tre ja Jesús ja raj Nazaret. Ja Jesús arjaꞌ jun profeta xin Dios, congana nimak tak milagro xuban in congana poder rcꞌan ja rtzobal, jariꞌ bien kꞌalaj chwach ja Dios in bien kꞌalaj chiquewach canojel ja winak chakajaꞌ. 20Ja cꞌa jefe quixin sacerdote e cachbil ja kꞌetol tak tzij rxin ja katinamit ejeꞌeꞌ quejach ja Jesús pa rukꞌaꞌ ja Pilato utzcꞌa chi nkꞌe̱t tzij trij chi ncamsaxi in queriꞌ queban quicamsaj chwach cruz. 21Pro ja rajoj congana yukeꞌ kacꞌuꞌx ruqꞌuin chi arjaꞌ ntoꞌo kaxin ja rok aj Israel pa quekꞌaꞌ ja kacꞌulel pro camsaxi in cꞌuluto tuban oxiꞌ kꞌij ticamsaxi. 22In jun chic, ecꞌo juleꞌ ixokiꞌ e kachbil cꞌoli quibij chake ja congana cꞌascꞌoꞌi kacꞌaxaj. Ejeꞌeꞌ kas nsamukeꞌe xebe ja bar cꞌo wiꞌ ja panteón. 23Ja cꞌa tok xeꞌekaji quetzꞌat chi mchita ja cuerpo rxin ja Jesús chipan. Cꞌacꞌariꞌ xemelojto kuqꞌuin, xurquibij chake chi ecꞌo ángel xewinakar chiquewach in bix chique cumal ja ángel chi cꞌastajnak chic ja Jesús. 24Ecꞌo cꞌa juleꞌ achiꞌiꞌ e kachbil, ejeꞌeꞌ xebe chic ruqꞌuin ja panteón in tok xeꞌekaji quetzꞌat chi ni katzij wiꞌ ja bix chique cumal ja rixokiꞌ. Pro ja Jesús jariꞌ ni mta wiꞌ rwach quetzꞌat ta triꞌ. Queriꞌ cꞌa ja bantaji, xecheꞌe ja caꞌiꞌ discípulo tre ja Jesús. 25Ja cꞌa Jesús quewaꞌ xbij chique riꞌ:
—Ixix xa matichꞌobtaj emwal nojel ja quibin can ja rojer tak profeta xin Dios, ma nojel ta ecꞌuꞌx ma nojel ta ewanma eniman nojel ja tzꞌibtal can cumal chipan ja rtzobal Dios. 26Ja Cristo arjaꞌ bien kꞌalaj chi ni rjawaxic wiꞌ tre nabey chi xurtijaꞌ nojel awaꞌ ja rpokonal ja cꞌa xebij chwe riꞌ in cꞌa después na nbe pa gloria ja bar nkꞌalajin wiꞌ chi congana nim rukꞌij, neꞌ chique. 27Cꞌacꞌariꞌ xumaj rchꞌobic chiquewach nojel ja tzꞌibtal can tre chipan ja rtzobal Dios, xumajto rchꞌobic chiquewach ja tzꞌibtal can rmal ja Moisés cꞌacꞌariꞌ xuchꞌob chic chiquewach ja tzꞌibtal can cumal ja juleꞌ chic profeta.
28Ja cꞌa tok xeꞌekaj chipan ja raldea ja bar ebenak wiꞌ ja cꞌa Jesús xuban caniꞌ laj xeruyaꞌ can. 29Pro ja cꞌa rejeꞌeꞌ congana quecoj pa chꞌaꞌoj chi nqꞌuejeꞌ kaj cuqꞌuin: —Xuban waꞌan kꞌij, xajalal majaꞌn toc akꞌaꞌ. Mejor catqꞌuejeꞌ kaj kuqꞌuin, xecheꞌ tre. In queriꞌ xuban, xoc pa jay utzcꞌa chi nquꞌejeꞌ cuqꞌuin. 30Ja cꞌa tok tzꞌubul chic pa mesa cuqꞌuin cꞌoli ja caxlanway xucꞌam, xmaltioxij tre ja Dios, xuwechꞌ in xuyaꞌ chique. 31Chaka cꞌa jalal ja tok yataj chique chi cotakij rwach chi Jesús. Ja cꞌa Jesús ni jariꞌ hora sach chiquewach. 32Ja cꞌa rejeꞌeꞌ quemaj chic tzij chibil tak quiꞌ, quewaꞌ quibij riꞌ: —Ja tok arjaꞌ rmajon tzij kuqꞌuin pa bey in tok rmajon rchꞌobic chikawach ja rtzobal Dios jariꞌ ni katzij wiꞌ chi congana jun nimlaj quicotemal xunaꞌ ja kanma rmal, xecheꞌe.
33Ni jariꞌ hora xeyictaji, xemeloj chic jutij pa Jerusalén. Ja tok xeꞌekaji xequewil ja julajuj apóstol ja quimolon quiꞌ cuqꞌuin juleꞌ chic cachbil. 34Quewaꞌ bix chique cumal ja rapóstol riꞌ: —Cꞌastajnak chic waꞌan ja kajaw Jesús, xucꞌut waꞌan riꞌ chwach ja Simón, xecheꞌxi ja caꞌiꞌ discípulo. 35Cꞌacꞌariꞌ quemaj rcholic chiquewach nojel ja bantaji ja tok ebenak chipan ja raldea Emaús in quechꞌob chiquewach chakajaꞌ nak rbanic ja tok yataj chique chi cotakij rwach ja Jesús tokoriꞌ tok xuwechꞌ ja caxlanway chiquewach.
* * * * * * * * * *
36Kas cꞌa quimajon tzij ja tok chaka jalal winakari ja Jesús chiquicojol in quewaꞌ xbij chique riꞌ: —Ja quicotemal xin Dios tiqꞌuejeꞌ checojol, neꞌ chique. 37Pro ja cꞌa rejeꞌeꞌ congana nqueban rmal ja xbeben riꞌil como ja nquechꞌob ejeꞌeꞌ ranma jun camnak ja nquetzꞌat. 38Ja cꞌa Jesús xbij chique:
—¿Nak tre ja tok sachnak enaꞌoj? ¿Nak tre tok matenimaj chi anin ja rin Jesús? 39Tetzꞌataꞌ mpeꞌ ja pa nukꞌaꞌ, tetzꞌataꞌ mpeꞌ ja pa wakan, kas bien mpeꞌ techꞌoboꞌ chi anin in Jesús. Quinechapaꞌ mpeꞌ in bien quinetzꞌataꞌ como ja ranma jun camnak jariꞌ mta rchꞌacul nixtacꞌa cꞌo ta rbakil chakajaꞌ pro bien netzꞌat chi anin cꞌo nchꞌacul in cꞌo nbakil chakajaꞌ, neꞌ chique. 40Ja cꞌa tok bitaj queriꞌ rmal cꞌacꞌariꞌ xucꞌut chiquewach ja pa rukꞌaꞌ in pa rkan. 41Ja cꞌa rejeꞌeꞌ quewaꞌ quimajon kaj rchꞌobic pa tak canma riꞌ:
—Congana takaꞌan quiꞌil ja wariꞌ pro ma katzij la, xecheꞌe. Ja cꞌa Jesús xbij chique:
—¿La cꞌoli neyaꞌ chwe can ntij? neꞌ chique. 42Cꞌo cꞌa jalal chꞌuꞌ saꞌon jariꞌ queyaꞌ tre rachbil jalal raxcab. 43Ja cꞌa rarjaꞌ xucꞌam chique in xumaj rtijic pro ni chiquewach. 44Cꞌacꞌariꞌ xbij chique:
—Camic bantaj cumplir ja tzij ja xinbij chewe tokoriꞌ tok majaꞌn quincami como ja xinbij chewe chi puersa nbantaj na cumplir nojel ja tzꞌibtal can chwe chipan ja rtzobal Dios caniꞌ tre ja tzꞌibtal can rmal ja Moisés in cumal ja juleꞌ chic profeta xin Dios in chakajaꞌ ja tzꞌibtal can chwe chipan ja libro xin salmo, neꞌ chique. 45Cꞌacꞌariꞌ xuchꞌob más chiquewach ja rtzobal Dios, 46quewaꞌ xbij chique riꞌ:
—Tzꞌibtal can chipan ja rtzobal Dios chi ja Cristo arjaꞌ nurtijaꞌ na ja rpokonal in ncamsax na in chi rox kꞌij ncꞌastaj na chiquicojol camnakiꞌ, queriꞌ nbij. 47In tzꞌibtal can chakajaꞌ chi pa rubiꞌ ja Cristo nekaj na rbixic cuqꞌuin canojel ja winak ja recꞌo pa tak nación jeꞌe chi rjawaxic chi nqueqꞌuex ja quinaꞌoj in nqueyaꞌ can ja ritzelal utzcꞌa chi ncuytaji ja quil quemac, jariꞌ pa Jerusalén nmajtajel wiꞌ rbixic. 48Ixix etzꞌaton nojel awaꞌ ja cꞌa xinbij chewe riꞌ, ixix nixkꞌalasan na chiquewach ja winak. 49Bien tecꞌwaxaj ja xtinbij chic chewe riꞌ, anin ntakto na ja rEspíritu Santo ewqꞌuin ja caniꞌ tzujunto rmal ja nataꞌ Dios. Pro quixqꞌuejeꞌ waweꞌ chipan ja tinamit Jerusalén, cꞌa tokoriꞌ nixel chipan ja tok xtiyataj chewe ja poder rxin ja rEspíritu Santo ja xtikajto chilaꞌ chicaj, neꞌe ja Jesús chique.
* * * * * * * * * *
50Cꞌacꞌariꞌ xerucꞌamel, xebe cꞌa pa Betania. Ja cꞌa tok xeꞌekaji xuyic chicaj ja caꞌiꞌ rukꞌaꞌ in xcꞌutuj ja rutzil xin Dios pa quewiꞌ. 51Kas cꞌa rmajon rcꞌutuxic ja rutzil pa quewiꞌ ja tok chaka jalal be, cꞌamarel chilaꞌ chicaj. 52Ja cꞌa rejeꞌeꞌ congana queyaꞌ rukꞌij cꞌacꞌariꞌ xemeloj chipan ja tinamit Jerusalén, congana jun nimlaj quicotemal cꞌo pa tak canma. 53Kꞌij kꞌij ni nepi wiꞌ chipan ja nimlaj templo, xajutij quimajon ryaꞌic rukꞌij ja Dios. Amén.
Currently Selected:
Lucas 24: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.