Juan 2
2
1Ja cꞌa chi rox kꞌij cꞌo jun cꞌulbic bantaji, ja cꞌa ruteꞌ ja Jesús cꞌo triꞌ. Jariꞌ cꞌulbic bantaj chipan ja tinamit Caná ja cꞌo pa rcuenta Galilea. 2In chakajaꞌ banon invitar ja Jesús e rachbil ja rdiscípulo. 3Pro chaka jalal tok qꞌuisi ja vino in bix tre ja Jesús rmal ja ruteꞌ:
—Pakasaꞌ vino qꞌuisi, neꞌxi.
4—Ixok, takaꞌan ma junan ta nkachꞌob awqꞌuin, majaꞌn waꞌan terilaꞌ ja tiempo chi ja winak xticotakij nak nbanic, neꞌ tre. 5Cꞌacꞌariꞌ ja ruteꞌ xbij chique ja ilinelaꞌ:
—Xa nak ta nbij ja Jesús chewe tebanaꞌ, neꞌ chique.
6Triꞌ cꞌo wiꞌ wakiꞌ rcꞌolbal tak yaꞌ, abaj ocnak, ja jujun cꞌo la wukuꞌ waxakiꞌ cucuꞌ yaꞌ nbe chipan. Ja rsamaj noc wiꞌ ja yaꞌ jariꞌ banbal quicostumbre ja raj Israel ja nquichꞌachꞌojirsbej nakun jeꞌe ja caniꞌ nrajoꞌ ja quireligión chi nqueban. 7Ja cꞌa Jesús quewaꞌ xbij chique ja ilinelaꞌ riꞌ:
—Tenojsaj ja rcꞌolbal tak yaꞌ leꞌ, neꞌ chique. In queriꞌ queban, xequicꞌamaꞌto ja yaꞌ, quinojsaj. 8Ja cꞌa tok nojstaj cumal cꞌacꞌariꞌ bix chic chique rmal ja Jesús:
—Camic tepuluꞌel juleꞌ, jecꞌutuꞌ chwach ja rachi ja paꞌl trij ja waꞌim xin cꞌulbic, xecheꞌxi. In queriꞌ queban, quepulel. 9Ja ilinelaꞌ ja xepuluꞌel ja yaꞌ ejeꞌeꞌ cotak chi qꞌuextaji ja yaꞌ in xoc vino pro ja rachi ja paꞌl trij ja waꞌim xin cꞌulbic arjaꞌ ma rotak ta. Tok xunaꞌ ja vino chi congana buena cꞌacꞌariꞌ xsiqꞌuij ja rachi ja cꞌuleꞌe 10in quewaꞌ xbij tre riꞌ:
—Canojel ja winak ja nechomini ja nimak tak waꞌim ejeꞌeꞌ utzlaj vino ja nquecoj nabey tok nmajtaji ja waꞌim. Ja cꞌa tok qꞌuiy chic ja vino quitijon chic ja winak cꞌacꞌariꞌ nya̱ꞌ chic chique ja vino ja ma kas ta buena. Pro ja ratat camic cꞌa pa rqꞌuisbal takaꞌan xacoj ja vino ja más chi na utz. Queriꞌ xbij tre.
11Jawaꞌ nabey milagro xuban ja Jesús, pa Caná xuban wiꞌ ja cꞌo pa rcuenta Galilea, jawaꞌ xcꞌutbej chiquewach ja rdiscípulo chi congana nim rukꞌij in yukeꞌ quecꞌuꞌx ruqꞌuin.
12Ja Jesús tok tzur can rmal awaꞌ wariꞌ cꞌacꞌariꞌ be chipan ja tinamit rbinaꞌan Capernaum rachbil ja ruteꞌ e rachbil chakajaꞌ ja rchꞌalal in ja rdiscípulo. Ja cꞌa tok xeꞌekaji, triꞌ xeqꞌuejeꞌ wiꞌ jun caꞌiꞌ kꞌij.
* * * * * * * * * *
13Ja tok nnakajinto ja nmakꞌij pascua quixin ja raj Israel be ja Jesús pa Jerusalén. 14Ja cꞌa tok xekaji xoc chipan ja nimlaj templo xin Dios. Chipan ja templo ecꞌo juleꞌ winak quimajon quicꞌayixic wacax, carnelo, palomax in ecꞌo juleꞌ qꞌuexol tak pwok chakajaꞌ. 15Ja Jesús xbanlaꞌ jun asial in tok tzur rmal xeꞌerlasajto ja winak chipan ja templo, majun xutoꞌ ta riꞌ, in xeꞌerlasajto chakajaꞌ ja carnelo e cachbil ja wacax. Ja cꞌa qꞌuexol tak pwok ejeꞌeꞌ chicax chiquewach ja quipwok rmal in chꞌakix pa tokꞌulew ja quimesa chakajaꞌ. 16Cꞌacꞌariꞌ xbij ja Jesús chique ja rajcꞌay tak palomax: —Queꞌewasajel jutzꞌit ja wariꞌ, ma teban ta tre ja rochoch ja nataꞌ Dios caniꞌ jun mercado, neꞌ chique. 17Ja cꞌa rdiscípulo tok quicꞌaxaj ja xbij xurkaj chique ja tzij ja tzꞌibtal can chipan ja rtzobal Dios quewaꞌ nbij riꞌ: —Congana ntiꞌon chwe ja tok matiban respetar ja rawochoch in xa rmalariꞌ tok xtiqueban pokon chwe ja winak, neꞌe ja Cristo tre ja Tatixel. Queriꞌ ja tzꞌibtal can. 18Ja cꞌa raj Israel quibij tre ja Jesús:
—¿Nak cꞌa nacꞌutbej chikawach chi cꞌol akꞌaꞌ tre ja cꞌa xaban chipan ja templo riꞌ? xecheꞌ tre.
19—Teyojoꞌ mpeꞌ ja templo riꞌ in ja ranin xa chi oxiꞌ kꞌij nyic chi wiꞌ jutij, neꞌe ja Jesús chique. 20Ja cꞌa raj Israel quibij tre:
—Jawaꞌ templo riꞌ tuban cuarentiséis junaꞌ majtajnakto rbanic in ¿nak moda cꞌariꞌ chi xa chi oxiꞌ kꞌij nayic chi wiꞌ jutij atat? xecheꞌ tre. 21Pro ja templo ja xnataj ja Jesús jariꞌ ja rcuerpo arjaꞌ. 22Ja cꞌa tok cꞌastajnak chic chiquicojol camnakiꞌ bien xurkaj chique ja rdiscípulo ja rbin can tre ja templo chi xa chi oxiꞌ kꞌij nuyic chi wiꞌ jutij. Quinimaj ja tzꞌibtal can chipan ja rtzobal Dios ojer in quinimaj chakajaꞌ ja tzij ja rbin can ja Jesús.
23Ja cꞌa tok majtaji ja waꞌim rxin ja nmakꞌij pascua chipan ja tinamit Jerusalén triꞌ qꞌuejeꞌ wiꞌ ja Jesús in e qꞌuiy chique ja winak yukeꞌ quecꞌuꞌx ruqꞌuin rmal ja milagro ja xuban jeꞌe chiquewach. 24Pro ja Jesús arjaꞌ ma xyukeꞌ ta rucꞌuꞌx cuqꞌuin como bien rotak janiꞌ quinaꞌoj canojelal ja winak. 25Arjaꞌ ma rjawaxic ta tre xtichꞌob ta na chwach janiꞌ quinaꞌoj como bien rotak ja cꞌo pa tak canma ja winak xa nak ta chi winakil.
Currently Selected:
Juan 2: tzjW
Highlight
Share
Copy
Want to have your highlights saved across all your devices? Sign up or sign in
© 2010, Wycliffe Bible Translators, Inc. All rights reserved.