Roma 6
6
Cristuhu ãma 're idanomro mono zép té
1Tahawa, e niha wa za rowasu'u za'ra ni. E wawasété na, wa za 're wahâimana u'âsi za'ra, 'Re ihâimana u'âsi mono nhimizawi pese zé hã wama 're sa'ẽtẽ u'âsi za'ra mono da hã. 2Mare uptabi di! Wa norĩ hã wawasété wi wadâ'â ne, wa oto 're wahâimana za'ra. E niha wa za tawamhã bété wawasété na wahâimanazéb u'âsi na, wa te ãma 're uzusi za'ra. 3E ma tô bété aipo're simrami za'ra wa'wa, uburé wasiré isazei'wa norĩ ãma, Cristu Zezusihi ãma oto 're wahâimana za'ra mono da, â dawabzuri, wa te 're 'manharĩ za'ra mono wamhã, taha na idâ'âzém na zama isiré 're iwahâimana za'ra mono na hã. 4Ãne, â dawabzuri, wa te 're 'manharĩ za'ra mono wamhã, isiré ma tô da te wa'ãma 're ti'a za'ra, isiré 're wadâ'â za'ra mono wa. Ãne hã ma tô 're hâimana, Cristu hã Imama tiwaihu'u pese uptabi na te te ihâiwa'utu ne, tane wa norĩ zama 're wahâimana za'ra mono da, dahâimanazé itém na.
5E marĩ wa. Idâ'âzém ne 're wadâ'â za'ra mono wa, isiré 're wahâimana za'ra mono wamhã, tane wa za duré isiré 're wahâimana za'ra, ihâiwa'utuzém ne 're wahâiwa'utu za'ra mono wa. 6E marĩ wa. Wama waihu'u pese za'ra wa, wahâimanazé i'ratare hã Cristuhu siré oto idâ'â za'ra na, wedepo'o nhonhi'rãmi na, wahâimanazé iwasédé hã tô dâ'â da oto, duré ãne wamhã, oto wawasété wi, wasitété waihu'u za'ra ãna 're wahâimana za'ra mono tõ da. 7E marĩ wa. Ni'wa hã oto dâ'â wamhã, te za sima iwẽ na 're hâimana, dawasété nhiptetezé wi hã. 8Tahawa, Cristuhu siré oto wadâ'â za'ra wamhã, wa duré saze za'ra ni, isiré za 're iwahâimana za'ra mono na hã. 9Wama waihu'u pese za'ra di, Cristu Imama te te ihâiwa'utu na hã, duré niwa za oto idâ'â zahu õ na hã, dadâ hã siptete na tãma hâimana waihu'u õ wa oto. 10Cristu hã dâ'â wamhã, dadâ'â nhiptetezé te te uprosi da, ma tô dârâ, misi haré. Ãhã na hã ihâimanazé itém na te oto 're hâimana, 'Re ihâimana u'âsi mono ma. 11Ãne te za duré 're asi'madâ'â za'ra wa'aba mo, aiwasété ma atâ'â ne 're i'aihâimana za'ra wa'aba mono na hã. Tane duré, Cristu Zezusihi ãma 're aihâimana za'ra wa'aba mono wa, 'Re ihâimana u'âsi mono ma, aihâiba ré na te za 're asi'madâ'â za'ra wa'aba mo.
12Tahawa, ma'ãpé 're asi'madâ'â pese za'ra wa'aba mono, aihâiba za'ra wa'wa idâ'â pesere ma, aiwasédé te te tãma 're rob'ru za'ra wa'aba mono tõ da, duré 'râwi marĩ iwasédé asima 're iwẽ za'ra wa'aba mono zéb zarina, aiwasédé 're 'manharĩ za'ra wa'aba mono tõ da. 13Duré ma'ãpé nimahã aihâiba mana wawi aipru wa'wa aima 're ihâimana za'ra wa'aba mono hã 're 'ru za'ra wa'aba mono tõ, aiwasédé ãma 're 'manharĩ za'ra wa'aba mono da hã, marĩ iwasété 'manharĩ'wa na 're 'maihâimana mono tõ da. Tazahã, dadâ'â hawi dahâiba ré u 're idawairébé mono ne, wahuré aihâiba hã 'Re ihâimana u'âsi mono ma si 're sõmri za'ra wa'aba mono, Õ hã marĩ i'uwaibaba si 're 'manharĩ za'ra wa'aba mono da, te te 're ai'manharĩ za'ra wa'aba mono da. 14Aiwasédé hã te te oto aima 're roti za'ra wa'aba mono õ di za, Mozésihi nhimi'ui'éré na roti zahi nhimiwada'uri zarina oto 're aihâimana za'ra wa'aba mono õ wa, 'Re ihâimana u'âsi mono nhimizawizém na si oto 're aihâimana za'ra wa'aba mono wa.
'Re ihâimana u'âsi mono ma si, 're idahâimana za'ra mono zé
15Tawamhã bété e marĩ, wa za 'manharĩ za'ra ni. E 'Re ihâimana u'âsi mono te te 're iwa'azawi pese mono zéb zahâpâ 're wahâimana za'ra mono wẽ te, wa za wawasété na wa te 're uzusi u'âsi za'ra, Mozésihi nhimi'ui'éré na roti zahi nhimiwada'uri zarina na oto 're wahâimana za'ra mono õ wẽ te. Mare uptabi di! 16Aima waihu'u pese uptabi za'ra wa'aba di, marĩ ma, asihâiba nhomri za'ra wa'aba wamhã, te za tãma 're aihâimana za'ra wa'aba mo, titede'wai ma wada'uri zarina romhuri'wa ne. Tawamhã taha nhimiwada'uri si te za 're i'madâ'â pese za'ra wa'aba mo. Ãne wa, dawasété ma, asisõmri za'ra wa'aba wamhã, te za atâ'â za'ra wa'wa. Duré niwamhã 'Re ihâimana u'âsi mono nhimiroti si 're 'madâ'â pese za'ra wa'aba mono da, 're asisõmri za'ra wa'aba mono wamhã, te za tô te te 're ai'a'madâ'â 'wa, i'uwaibaba na 're i'aihâimana za'ra wa'aba mono na. 17Tane nherẽ, 'Re ihâimana u'âsi mono ãma, wa 're wawata u'âsi za'ra ãhã na hã, dawasété nhimiwada'uri zarina si aré 're aihâimana za'ra wa'aba mono nherẽ, aipẽ'ẽ na isimiroti tô sena hã 're 'madâ'â pese za'ra wa'aba mono wa oto, danhimirowahudu iwapari za'ra wa'aba zarina. 18'Re ihâimana u'âsi mono hã aiwasété hawi ma tô asani za'ra wa'wa. Tahawa, te oto ãhã na hã i'uwaibaba na dahâimanazé ma si, 're aihâimana za'ra wa'aba mo. 19Damreme isadaihu'u wapu na wa aima roti za'ra wa'wa, zahadu asib'uware za'ra wa'aba wa. Duréihã 're saze za'ra wa'aba mono õ ré hã, aihâiba wahuré te 're isõmri za'ra wa'aba mo, danhiséb ãna dasina dahâimana ma, duré uburé marĩ iwasété uptabi ma, iwasété uptabi nhimiwada'uri zarina 're aihâimana za'ra wa'aba mono da. Tane duré ãhã na hã, ma'ãpé aihâiba hã wahuré sõmri za'ra wa'aba, i'uwaibaba na 're aihâimana za'ra wa'aba mono da, 'Re ihâimana u'âsi mono ma si.
20Dawasété nhimiwada'uri zarina 're aihâimana za'ra wa'aba mono ré, marĩ i'uwaibaba hã aré 're 'manharĩ waihu'u za'ra wa'aba mono õ di. 21Taha ré hã, e marĩ, ma tô iwa'â iwẽ hã iwaibui wa'wa. Marĩ õ di. Marĩ iwasété si ma tô aré aima 're hâimana za'ra wa'wa, ãhã na te te aiwi 're irowazéb za'ra wa'aba mono hã. Ta hã te aré dadâ'âzép si te te aima sina 're ãwisi za'ra wa'wa. 22Tane nherẽ, ãhã na hã 'Re ihâimana u'âsi mono, ma tô aiwasété hawi asani za'ra wa'wa, isimiwada'uri zarina si marĩ 're 'manharĩ za'ra wa'aba mono da. Tahawa, Õhõ ma si te oto aihâimanazé hã aima 're hâimana za'ra wa'wa. Taha zarina dahâimanazé isi'utõrĩ'õ hã te za iwaibui wa'wa. 23Dawasété na 're idanomro mono wa'â hã, dadâ'â u'âsi 're idanomro mono zép si. Tazahã, 'Re ihâimana u'âsi mono nhoprubzé iwẽ uptabi hã, ta hã dahâimanazé isi'utõrĩ'õ, Wanhib'apito Cristu Zezusihi ãma 're wanomro mono wa, wama 're ihâimana za'ra mono.
Currently Selected:
Roma 6: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.
Roma 6
6
Cristuhu ãma 're idanomro mono zép té
1Tahawa, e niha wa za rowasu'u za'ra ni. E wawasété na, wa za 're wahâimana u'âsi za'ra, 'Re ihâimana u'âsi mono nhimizawi pese zé hã wama 're sa'ẽtẽ u'âsi za'ra mono da hã. 2Mare uptabi di! Wa norĩ hã wawasété wi wadâ'â ne, wa oto 're wahâimana za'ra. E niha wa za tawamhã bété wawasété na wahâimanazéb u'âsi na, wa te ãma 're uzusi za'ra. 3E ma tô bété aipo're simrami za'ra wa'wa, uburé wasiré isazei'wa norĩ ãma, Cristu Zezusihi ãma oto 're wahâimana za'ra mono da, â dawabzuri, wa te 're 'manharĩ za'ra mono wamhã, taha na idâ'âzém na zama isiré 're iwahâimana za'ra mono na hã. 4Ãne, â dawabzuri, wa te 're 'manharĩ za'ra mono wamhã, isiré ma tô da te wa'ãma 're ti'a za'ra, isiré 're wadâ'â za'ra mono wa. Ãne hã ma tô 're hâimana, Cristu hã Imama tiwaihu'u pese uptabi na te te ihâiwa'utu ne, tane wa norĩ zama 're wahâimana za'ra mono da, dahâimanazé itém na.
5E marĩ wa. Idâ'âzém ne 're wadâ'â za'ra mono wa, isiré 're wahâimana za'ra mono wamhã, tane wa za duré isiré 're wahâimana za'ra, ihâiwa'utuzém ne 're wahâiwa'utu za'ra mono wa. 6E marĩ wa. Wama waihu'u pese za'ra wa, wahâimanazé i'ratare hã Cristuhu siré oto idâ'â za'ra na, wedepo'o nhonhi'rãmi na, wahâimanazé iwasédé hã tô dâ'â da oto, duré ãne wamhã, oto wawasété wi, wasitété waihu'u za'ra ãna 're wahâimana za'ra mono tõ da. 7E marĩ wa. Ni'wa hã oto dâ'â wamhã, te za sima iwẽ na 're hâimana, dawasété nhiptetezé wi hã. 8Tahawa, Cristuhu siré oto wadâ'â za'ra wamhã, wa duré saze za'ra ni, isiré za 're iwahâimana za'ra mono na hã. 9Wama waihu'u pese za'ra di, Cristu Imama te te ihâiwa'utu na hã, duré niwa za oto idâ'â zahu õ na hã, dadâ hã siptete na tãma hâimana waihu'u õ wa oto. 10Cristu hã dâ'â wamhã, dadâ'â nhiptetezé te te uprosi da, ma tô dârâ, misi haré. Ãhã na hã ihâimanazé itém na te oto 're hâimana, 'Re ihâimana u'âsi mono ma. 11Ãne te za duré 're asi'madâ'â za'ra wa'aba mo, aiwasété ma atâ'â ne 're i'aihâimana za'ra wa'aba mono na hã. Tane duré, Cristu Zezusihi ãma 're aihâimana za'ra wa'aba mono wa, 'Re ihâimana u'âsi mono ma, aihâiba ré na te za 're asi'madâ'â za'ra wa'aba mo.
12Tahawa, ma'ãpé 're asi'madâ'â pese za'ra wa'aba mono, aihâiba za'ra wa'wa idâ'â pesere ma, aiwasédé te te tãma 're rob'ru za'ra wa'aba mono tõ da, duré 'râwi marĩ iwasédé asima 're iwẽ za'ra wa'aba mono zéb zarina, aiwasédé 're 'manharĩ za'ra wa'aba mono tõ da. 13Duré ma'ãpé nimahã aihâiba mana wawi aipru wa'wa aima 're ihâimana za'ra wa'aba mono hã 're 'ru za'ra wa'aba mono tõ, aiwasédé ãma 're 'manharĩ za'ra wa'aba mono da hã, marĩ iwasété 'manharĩ'wa na 're 'maihâimana mono tõ da. Tazahã, dadâ'â hawi dahâiba ré u 're idawairébé mono ne, wahuré aihâiba hã 'Re ihâimana u'âsi mono ma si 're sõmri za'ra wa'aba mono, Õ hã marĩ i'uwaibaba si 're 'manharĩ za'ra wa'aba mono da, te te 're ai'manharĩ za'ra wa'aba mono da. 14Aiwasédé hã te te oto aima 're roti za'ra wa'aba mono õ di za, Mozésihi nhimi'ui'éré na roti zahi nhimiwada'uri zarina oto 're aihâimana za'ra wa'aba mono õ wa, 'Re ihâimana u'âsi mono nhimizawizém na si oto 're aihâimana za'ra wa'aba mono wa.
'Re ihâimana u'âsi mono ma si, 're idahâimana za'ra mono zé
15Tawamhã bété e marĩ, wa za 'manharĩ za'ra ni. E 'Re ihâimana u'âsi mono te te 're iwa'azawi pese mono zéb zahâpâ 're wahâimana za'ra mono wẽ te, wa za wawasété na wa te 're uzusi u'âsi za'ra, Mozésihi nhimi'ui'éré na roti zahi nhimiwada'uri zarina na oto 're wahâimana za'ra mono õ wẽ te. Mare uptabi di! 16Aima waihu'u pese uptabi za'ra wa'aba di, marĩ ma, asihâiba nhomri za'ra wa'aba wamhã, te za tãma 're aihâimana za'ra wa'aba mo, titede'wai ma wada'uri zarina romhuri'wa ne. Tawamhã taha nhimiwada'uri si te za 're i'madâ'â pese za'ra wa'aba mo. Ãne wa, dawasété ma, asisõmri za'ra wa'aba wamhã, te za atâ'â za'ra wa'wa. Duré niwamhã 'Re ihâimana u'âsi mono nhimiroti si 're 'madâ'â pese za'ra wa'aba mono da, 're asisõmri za'ra wa'aba mono wamhã, te za tô te te 're ai'a'madâ'â 'wa, i'uwaibaba na 're i'aihâimana za'ra wa'aba mono na. 17Tane nherẽ, 'Re ihâimana u'âsi mono ãma, wa 're wawata u'âsi za'ra ãhã na hã, dawasété nhimiwada'uri zarina si aré 're aihâimana za'ra wa'aba mono nherẽ, aipẽ'ẽ na isimiroti tô sena hã 're 'madâ'â pese za'ra wa'aba mono wa oto, danhimirowahudu iwapari za'ra wa'aba zarina. 18'Re ihâimana u'âsi mono hã aiwasété hawi ma tô asani za'ra wa'wa. Tahawa, te oto ãhã na hã i'uwaibaba na dahâimanazé ma si, 're aihâimana za'ra wa'aba mo. 19Damreme isadaihu'u wapu na wa aima roti za'ra wa'wa, zahadu asib'uware za'ra wa'aba wa. Duréihã 're saze za'ra wa'aba mono õ ré hã, aihâiba wahuré te 're isõmri za'ra wa'aba mo, danhiséb ãna dasina dahâimana ma, duré uburé marĩ iwasété uptabi ma, iwasété uptabi nhimiwada'uri zarina 're aihâimana za'ra wa'aba mono da. Tane duré ãhã na hã, ma'ãpé aihâiba hã wahuré sõmri za'ra wa'aba, i'uwaibaba na 're aihâimana za'ra wa'aba mono da, 'Re ihâimana u'âsi mono ma si.
20Dawasété nhimiwada'uri zarina 're aihâimana za'ra wa'aba mono ré, marĩ i'uwaibaba hã aré 're 'manharĩ waihu'u za'ra wa'aba mono õ di. 21Taha ré hã, e marĩ, ma tô iwa'â iwẽ hã iwaibui wa'wa. Marĩ õ di. Marĩ iwasété si ma tô aré aima 're hâimana za'ra wa'wa, ãhã na te te aiwi 're irowazéb za'ra wa'aba mono hã. Ta hã te aré dadâ'âzép si te te aima sina 're ãwisi za'ra wa'wa. 22Tane nherẽ, ãhã na hã 'Re ihâimana u'âsi mono, ma tô aiwasété hawi asani za'ra wa'wa, isimiwada'uri zarina si marĩ 're 'manharĩ za'ra wa'aba mono da. Tahawa, Õhõ ma si te oto aihâimanazé hã aima 're hâimana za'ra wa'wa. Taha zarina dahâimanazé isi'utõrĩ'õ hã te za iwaibui wa'wa. 23Dawasété na 're idanomro mono wa'â hã, dadâ'â u'âsi 're idanomro mono zép si. Tazahã, 'Re ihâimana u'âsi mono nhoprubzé iwẽ uptabi hã, ta hã dahâimanazé isi'utõrĩ'õ, Wanhib'apito Cristu Zezusihi ãma 're wanomro mono wa, wama 're ihâimana za'ra mono.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.