Roma 14

Dahâimanazéb zarina asiwi 're dawẽ'õ za'ra wa'aba mono tõ

1Isazei'wa nherẽ, isib'uwa norĩ hã asitẽme 're waibui wẽ wa'aba mono, isimirosa'rada hã aimawi nherẽ, ãma 're wasu za'ra wa'aba mono ãna. 2Ni'wam norĩ hã te ãma 're simizaze za'ra, uburé dasa te te 're ihuri waihu'u pese mono na. Tane nherẽ, isazei'wa nherẽ, isib'uwa norĩ hã rob'rã norĩ duré wesuirã norĩ si te te 're huri. 3Ni'wa hã uburé dasa te te 're i'a'masi mono hã, isine te te 're i'manharĩ mono õ nhipai u 're si'madâ'â zei mono tõ. Duré ni'wa hã rob'rã norĩ duré wesuirã norĩ si te te 're i'a'masi mono hã, te te siwi wẽ'õ pese tõ, uburé dasa te te 're i'a'masi mono hã. E marĩ wa. 'Re ihâimana u'âsi mono hã te te âri wẽ wa. 4E marĩ na aihâimana bâ, asiré ma romhuri'wa asiwi iwẽ'õ da hã. Isib'apito si te za waihu'u, isimiromhuri iwẽ na niwamhã iwasété na hã. Tawamhã ta hã te za marĩ na ai'uté tô, Wanhib'apito hã te te pawapto waihu'u pese wa, marĩ na te te ai'uté da hã.

5Ni'wam norĩ hã te te 're rosa'rata za'ra, nima norĩ bâdâ ipire na hã isiré bâdâ ihâimana za'ra nhipai u, ni'wam norĩ hã te te 're rosa'rata za'ra mono nherẽ, uburé bâdâ aiwap si na. Dahâiba mono bâ te za danhimirosa'rata na danhiptete sina 're dahâimana za'ra. 6Ni'wa hã nimahã bâdâ ipire na te te 're 'madâ'â mono wamhã, Wanhib'apito te te 're wazé mono da, te za te te 're 'manharĩ. Duré ni'wa hã uburé dasa te te 're i'a'masi mono hã Wanhib'apito te te 're wazé mono da, te za te te 're 'manharĩ, 'Re ihâimana u'âsi mono ãma dasa na 're wata mono wa. Duré ni'wa hã nimahã dasa te te 're i'masi mono õ hã Wanhib'apito te te 're wazé mono da, te za duré te te 're 'manharĩ. 'Re ihâimana u'âsi mono ãma te za duré 're wata. 7E marĩ wa. Wa norĩ hã 'râwi wasima si wahâiba ré 're wahâimana waihu'u za'ra mono õ wa, duré wasima si 're wadâ'â waihu'u za'ra mono õ wa. 8Wahâiba ré 're wahâimana za'ra mono ré wamhã, Wanhib'apito ma si, wa 're wahâimana za'ra. Duré 're wadâ'â za'ra mono wamhã, Wanhib'apito ma, wa 're wadâ'â za'ra. Ãne, wahâiba ré 're wahâimana za'ra mono ré wamhã, duré 're wadâ'â za'ra mono wamhã, wa norĩ hã Wanhib'apito te si. 9Ãne da, Cristu hã ma tô dârâ, duré ma tô hâiwa'udu, idâ'â norĩ nhib'apito na 're hâimana mono da, duré ihâiba ré norĩ te na. 10Tahawa, a hã rob'rã norĩ duré wesuirã norĩ si 're i'a'masi mono hã, e marĩ wa, te asisãnawã hã asiwi 're iwẽ'õ pese mo. Duré a hã uburé dasa 're i'a'masi mono, e marĩ wa, te asisãnawã hã 're i'ruiwapari mo. Wa norĩ hã 'Re ihâimana u'âsi mono nho're uburé za wasimasa wa, te te wa'ãma arowairébé da hã. 11Ibaihâ Iwazé pese na rob'ui'éré hã te tinha, ãne:

“Uburé Danhib'apito te tinha, ãne: ‘Wa hã ĩhâimanazém na wa ropisutu zahi hã 'manha. Uburé ĩnho're te za dahi'rãtitõ ĩma ana ni za.

Duré uburé te za dasiwi ĩwasu'u ni za, wa hã 'Re ihâimana u'âsi mono na hã.’”

12Ãhã zarina, wahâiba mono bâ, wa za 'Re ihâimana u'âsi mono ma wasiwasu'u za'ra ni za, marĩ, wa te 're i'manharĩ za'ra mono zém na ti'ab ré hã.

13Tahawa, wa te sahâri za'ra wa'aba, dahâimanazéb zarina wa te wasiwi 're idawẽ'õ pese za'ra mono zé hã. Tazahã, aihâiba mono bâ asima 're waihu'u za'ra wa'aba mono, marĩ 're 'manharĩ za'ra wa'aba mono tõ da, asisãnawã norĩ, ãma 're si'morõpãrĩ za'ra mono õ'umnhasite, duré tiwasété u ãma 're rere'e mono õ'umnhasite. 14Wanhib'apito Zezusihi ãma 're ĩhâimana mono wa, sena na wa ĩsina waihu'u, nimahã dasa isiwamnarĩ na 're ihâimana mono õ na hã. Tazahã, nimahã dasa isiwamnarĩ na 're ihâimana mono na, ni'wa te te 're rosa'rata mono wamhã, tawamhã te za tô siwamnarĩ na tãma 're hâimana. 15A hã dasa 're i'a'masi mono u'âbâ, asisãnawãi wi 're robzei'õ mono wamhã, ãne wamhã, asimizawi zarina 're 'manharĩ mono õ di. Ma'ãpé ãma 're pibui pese mono, ni'wa Cristu sada idâ hã, asa 're i'a'masi mono u'âbâ sisimini tõ da. 16Duré ãma 're pibui pese mono, marĩ hã wẽ na aima 're ihâimana mono na da te aiwi 're wasété mono tõ da. 17E marĩ wa. 'Re ihâimana u'âsi mono da'ãma 're isib'a'uwẽ mono zéb 'remhã, dasa hã duré da te 're i'âhuri mono hã, pire na 're hâimana za'ra mono õ di. Pire na 're ihâimana za'ra mono hã, ã norĩ si: I'uwaibaba na si dahâimana, duré rowẽ na si, duré datoi u'âsi na si, 'Re ihâimana u'âsi mono Pẽ'ẽzani te te dama 're i'anhomri mono zarina. 18Ni'wa hã Cristuhu ma, te te 're romhuri mono wa, ãne zarina 're hâimana mono wamhã, te za 'Re ihâimana u'âsi mono ma rowẽ, tihâimanazém na. Te za duré dasiwi wẽsãmri ni.

19Tahawa, marĩ rowẽ te te 're isani za'ra mono zô si, wa za sô 're wanhopré u'âsi, duré Wanhib'apito wa te wasina 're i'umnhasi za'ra mono zém na ãma 're iwasisiptete za'ra mono zéb zô si. 20Dasai u'âbâ 're prub za'ra wa'aba mono tõ, 'Re ihâimana u'âsi mono nhimiromhuri hã. Uburé dasa hã da te 're huri waihu'u pese mono di. Tazahã, tô i'upa siwa'ru dasa, da te 're ihuri mono u'âbâ, ni'wa tiwasété na si'morõwĩrĩ wamhã. 21Tahawa, romnhi hã 're huri aba mono tõ, duré uva 'rãi wa'u isé 're âhuri aba mono tõ, duré siwa'ru marĩ 're 'manharĩ aba mono tõ, ãne zarina, asisãnawã norĩ, tiwasété na 're si'morõpãrĩ za'ra mono õ'umnhasite. 22Tazahã, ãne na roti asimizazezé hã asi'rep si iré aihâimana, 'Re ihâimana u'âsi mono siré. Ni'wai ma 're rowẽ uptabi mono di, marĩ i'uwaibaba na te te ãma 're i'arosa'rata mono zarina te te 're i'ab'manharĩ waihu'u pese mono na hã, 're siwẽ'õ waihu'u mono ãna. 23Tane nherẽ, ni'wa hã nimahã dasa na 're isai mono na ãma 're siwawãi mono wamhã, 'Re ihâimana u'âsi mono hã te za siwi wẽ'õ, ta hã dasa te te 'rẽne wamhã. E marĩ wa. Marĩ te te 're i'ab'manharĩ mono zé hã, 'Re ihâimana u'âsi mono, da te dasina 're i'umnhasi za'ra mono zéb zarina 're hâimana mono õ wa. Marĩ 'Re ihâimana u'âsi mono, da te dasina 're i'umnhasi za'ra mono zarina ihâimana õ hã, ta hã dawasédé.

Currently Selected:

Roma 14: xavBP

Highlight

Copy