Roma 1

Rowasu'uwẽ, uburé dama hã

1Wa hã Paulu, Cristu Zezusihi ma romhuri'wa, wa ãma aima rob'ui'éré za'ra wa'wa. 'Re ihâimana u'âsi mono ma tô ĩzô hâ. Ma tô duré ĩpisutu, aimawi tãma 're ĩhâimana mono da, isadawa wasu'u'wa da, Rowasu'uwẽ isimiroti hã te 're 'mahârâ mono da.

2Duréihã 'Re ihâimana u'âsi mono hã ma tô ropisutu zahi hã 'manha, ã hã Rowasu'uwẽ na, tizadawa 'mahârâ'wa norĩ zadawa na, Imreme na Ibaihâ Iwazé pese na rob'ui'éré na. 3Rowasu'uwẽ hã 'Re ihâimana u'âsi mono 'ra, te wasu'u, Wanhib'apito Zezu Cristu hã. Ta hã, ti'ai ãma a'uwẽ hâiba na ma tô podo, Davihi nhihudu na. 4Duré Imama 're ihâimana mono zém ne 're hâimana mono wa, ma tô Imama hã isimiroti pire tãma tisõ, uburé te te 're da'a'madâ'â mono da, 'Re ihâimana u'âsi mono 'ra na, idâ'â hawi te te hâiwa'utu wamhã. 5'Re ihâimana u'âsi mono hã Cristuhu u'âbâ ma tô bâdâ ĩma tisõ, isadawa wasu'u'wa na 're ĩhâimana mono da, uburé dawamri mono bâ 're idahâimana za'ra mono hã Cristu, da te 're saze za'ra mono da, duré isimiroti hã da te 're 'madâ'â pese za'ra mono da zama. 6A norĩ wa'aba zama, te dasiré aihâimana za'ra wa'wa, Cristu te te sima 're i'apisutu mono norĩ siré, ite na tãma 're hâimana za'ra mono da.

7Tahawa, wa ãma aima rob'ui'éré za'ra wa'wa, uburé Roma ãma 're i'aihâimana za'ra wa'aba mono norĩ, uburé 'Re ihâimana u'âsi mono te te 're i'asawi pese za'ra wa'aba mono norĩ, isib'a'uwẽ na tãma 're aihâimana za'ra wa'aba mono da, te te sima 're i'aipisutu za'ra wa'aba mono norĩ ma.

Wamama 'Re ihâimana u'âsi mono nhimizawizé duré ite datoi u'âsi zé, duré Wanhib'apito Zezu Cristuhu te zama, ai'ãma 're ihâimana u'âsi za'ra wa'aba mono da si, iwẽ hã!

Paulu hã te te sima irowẽ uptabi zé, Roma u isazei'wa norĩ te te sabu za'ra da

8Ĩmorĩ'rata na hã Cristuhu u'âbâ, wa ĩte 'Re ihâimana u'âsi mono ãma ĩwata, ai'ãma za'ra wa'aba, daro mono bâ da te dasima 're aiwasu'u wẽ za'ra wa'aba mono wa, Wanhib'apito asina 're i'umnhasi za'ra wa'aba mono zém na hã. 9Ĩpẽ'ẽ na, wa sena na 'Re ihâimana u'âsi mono ma te 're romhuri. Rowasu'uwẽ I'ra wasu'u hã wa te te 're 'mahârâ. Taha na hã, 'Re ihâimana u'âsi mono si te te ĩwaihu'u pese di, tô sena te 're i'mahârâ mono na hã. Duré te te waihu'u pese di, ai'ãma 're ĩpo're pu'u u'âsi za'ra wa'aba mono na hã, 10te tiwi 're rowaptẽrẽ mono sidâpâ. Wa duré 'Re ihâimana u'âsi mono wi te 're waptẽrẽ, te te sima iwẽzéb zarina wamhã, te te ĩma pisutu da, te ãma asabu za'ra wa'aba da. 11E marĩ wa. Te ĩsima wẽ uptabi wa, te ãma asabu za'ra wa'aba da hã, 'Re ihâimana u'âsi mono Pẽ'ẽzani nhoprubzé iwẽ uptabi hã te aima apo'o za'ra wa'aba da, te ãma asiptete za'ra wa'aba da, 12tô duré asiré ĩhâimana za'ra wa'aba ré, wasisiptete za'ra da, Wanhib'apito, wa te wasina 're i'umnhasi za'ra mono zém na.

13Ĩsisãnawã norĩ, wa ĩsima wẽ, waihu'u za'ra wa'aba da. Nimahã na hã wa tô aré ĩsima wẽ ahâ, te ãma asabu za'ra wa'aba da hã. Tane nherẽ, ma tô ĩwi rosawi hã tihâiba, ãwa bâtâ u hã. Wa tô aré ĩsima wẽ upta, marĩ te i'manharĩ wẽ zé hã, i'rãsutu ãma hã te roptehâri da, amnho iwẽ da te 're itehâri za'ra mono ne, Zudeu'õ norĩ ãma te iroptehâri ne hã. 14E marĩ wa. Tô ĩma i'ru zahi hâimana wa, Rowasu'uwẽ uburé te dama 're i'mahârâ mono da hã, 'ri nho'õmo mono bâ 're idahâimana za'ra mono norĩ ma, duré rom na 're idahâimana za'ra mono norĩ ma zama, duré rowaihu'u pese 'wa norĩ ma, isimiromnhoré õ norĩ ma zama. 15Tahawa, wa ĩsima wẽ upta, Roma ãma 're i'aihâimana za'ra wa'aba mono norĩ ma zama, Rowasu'uwẽ hã te aima 'mahârâ za'ra wa'aba da.

Rowasu'uwẽ nhiptetezé

16'Re ĩnhisé mono õ di, Rowasu'uwẽ ma hã. E marĩ wa. Ta hã 'Re ihâimana u'âsi mono waihu'u pe 're hâimana mono wa, uburé te te 're isaze za'ra mono norĩ te te 're i'anho'reptui mono da hã, imorĩ'rata na Zudeu norĩ hã, taha parimhã Zudeu'õ norĩ zama. 17E marĩ wa. Rowasu'uwẽ hã, 'Re ihâimana u'âsi mono, i'uwaibaba 're iwahâimana za'ra mono no te te oto 're iwa'a'madâ'â mono zé te te wama hâi'ré za'ra wa, ãne: Wanhib'apito, wa te wasina 're i'umnhasi za'ra mono zéb zarina, te i'uwaibaba na 're iwahâimana za'ra mono na te te oto 're wa'a'madâ'â, wa te 're isaze na'rata za'ra mono zém hawi, ti'ai ãma wahâimanazé, wa te 're i'rãsutu za'ra mono zéb u. Ãne Ibaihâ Iwazé pese na rob'ui'éré hã, te nomro: “Ni'wam norĩ hã 'Re ihâimana u'âsi mono te te sina 're i'umnhasi za'ra mono zéb zarina, i'uwaibaba na 're ihâimana za'ra mono na te te oto 're i'a'madâ'â mono norĩ si te za 're hâimana u'âsi za'ra, rowẽ u'âsi na.”

'Re ihâimana u'âsi mono, dazada isahizé dapo're õ wa

18'Re ihâimana u'âsi mono hã hâiwa hawi ma tô hâi'ré dazada isahizé hã, uburé 're idawasété za'ra mono norĩ zada, duré uburé marĩ iwasédé, da te 're i'manharĩ za'ra mono norĩ zada. Ta norĩ nhimi'manharĩ wasété u'âbâ, te te dawi 're ro'wa'rutu za'ra, 'Re ihâimana u'âsi mono wasu'u tô sena hã, da te 're waihu'u za'ra mono tõ da. 19E marĩ wa. 'Re ihâimana u'âsi mono, da te 're iwaihu'u za'ra mono zé hã sõ'awi hâimana wa dama hã, si'uihâ na tô ta hã rowaihu hã te te tãma hiri za'ra wa. 20'Re ihâimana u'âsi mono hã te te i'aropoto mono hawim haré, sãmri ãna ihâimanazé, tô si'utõrĩ waihu'u ãna iwaihu'u pe tãma 're ihâimana mono hã, duré hâiwa ãma waihu'u pese na 're ihâimana mono zé hã, ma tô da te 're 'madâ'â za'ra sõ'awi. Ti'ai ãma a'uwẽ norĩ hã uburé marĩ 'Re ihâimana u'âsi mono te te i'apoto mono na te za sãmri ãna ihâimanazé te te 're 'madâ'â za'ra tô. Tahawa, 're dasi'udâ waihu'u za'ra mono õ di, 'Re ihâimana u'âsi mono dama iwaihu'u õ na hã. 21Ti'ai ãma a'uwẽ norĩ hã te te waihu'u pese za'ra di tô, 'Re ihâimana u'âsi mono, sena na 're ihâimana mono na hã. Tane nherẽ, ãma 're wata za'ra mono õ di, sada, wẽ uptabi na 're ihâimana mono zéb zarina. Duré isimizawi pese zéb zarina ãma 're wata za'ra mono õ di. Iwa'rãmi te isimirosa'rata za'ra hã marĩ dai ãna 're hâimana za'ra. Duré simirosa'rata za'ra ãna 're ihâimana za'ra mono zé hã, robra te te tiwi 're upsibi za'ra. 22Te sina 're wata za'ra, 'rã nhimiza'rese na. Tane nherẽ, 'rã nhimiza'rese õ di. 23'Re ihâimana u'âsi mono idâ'â'õ ãma 're wata za'ra mono da nherẽ, te 're wata za'ra, ihâiba'õ norĩ ãma, a'uwẽ hâiba 'manharĩ ne 're ihâimana za'ra mono ãma, niwamhã si norĩ hâiba 'manharĩ ne, niwamhã maparane si'uiwa na ipara na abaze norĩ hâiba 'manharĩ ne, niwamhã di'i na 're inomro mono norĩ hâiba 'manharĩ ne zama.

24Tahawa, 'Re ihâimana u'âsi mono hã ma tô oto hâiba nhomri za'ra, tipẽ'ẽ 're marĩ te te sima 're iwẽ za'ra mono ma, uburé marĩ iwasédé te te 're 'manharĩ za'ra mono da, duré dasina dahâimana na hâimana nhiséb ãna si'ãma 're hâimana za'ra mono da. 25'Re ihâimana u'âsi mono nhimiroti na tô sena rowaihu'u upana, ma ãma apa za'ra, tizadawa nhipese na. 'Re ihâimana u'âsi mono nhimipoto ãma si te 're wata za'ra, i'upana. Ta norĩ ma si, te duré te te 're romhuri za'ra, Ropoto'wai upana. I'ru zahi aré, taha ãma si 're idawata u'âsi za'ra mono da hã. Tane tô!

26Ãne marĩ, da te 're i'manharĩ za'ra mono u'âbâ, ma tô 'Re ihâimana u'âsi mono hã da'ahâiba nho oto, marĩ danhiséb ãna da te 're i'manharĩ wasété za'ra mono ma. Pi'õ norĩ zama te pi'õ si'uiwa tô si'ãma 're hâimana za'ra, ta hã dahâimanazéb zarinai õ nherẽ. 27Tane duré aibâ norĩ hã ma rẽme za'ra, pi'õ na 're ihâimana za'ra mono zé hã. Aibâ si'uiwa si'ãma 're hâimana za'ra mono da si, ma tô sisô te te 're rob'ruiwapari pese za'ra. Siséb ãna te 'râwi si'ãma 're hâimana za'ra, tiwasété uptabi na. Tahawa, 'Re ihâimana u'âsi mono te te tãma 're i'arob'manharĩ wasété mono zé hã te 'râwi te te sisada 're sani za'ra i'uwaibaba na, marĩ te te 're i'manharĩ wasété za'ra mono u'âbâ.

28Duré 'Re ihâimana u'âsi mono 're ihâimana mono zém na tô sena rowaihu te te 're waihu'u za'ra mono da, te te sima 're wẽ za'ra mono õ wa, ãne zarina ma tô 'Re ihâimana u'âsi mono hã rosa'rata wasété ma hâiba nhomri za'ra, te te sima 're iwẽ za'ra mono zép si, te te 're 'manharĩ za'ra mono da. 29Marĩ iwasédé imono bâ te tãma 're hâimana za'ra, marĩ 'manharĩ wasédé hã, marĩ zô si rob'ruiwapari hã, dama rob'manharĩ wasété zéb zô dazada rob'ruiwapari, marĩ iwasété wi dapusi waihu'u õ hã, danhimi'umnhasi pe, dapãrĩ hã, dasi'ahâri, dazadawa nhipe, da'ãma rosa'rata wasédé, dasima dabâsi u'â, 30duré daza're'ra dasima dabâsi pe. 'Re ihâimana u'âsi mono nhitob'ru te 're hâimana za'ra. Duré 'râwi 're isi'madâ'â ze za'ra mono zéb zarina, te te dama 're rob'manharĩ wasété za'ra. Duré tipẽ'ẽ na te danhipai u wẽ na 're ihâimana za'ra mono na te te sina 're rosa'rata za'ra. Marĩ iwasédé te te 're 'manharĩ za'ra mono da, te duré te te sima 're poto za'ra. Duré timama nhimiroti te te 're 'madâ'â pese za'ra mono õ di. 31'Rã nhimiza'rese ãna te 're hâimana za'ra. Duré ropisutu zahi te te dama 're i'manharĩ za'ra mono zé te te ãma 're uwaimrami za'ra mono õ di. Duré te te 're dazawi waihu'u za'ra mono õ di. Duré da'ãma 're siwamri waihu'u za'ra mono õ di. 32Tãma waihu'u pese za'ra di, 'Re ihâimana u'âsi mono nhimiroti zahi inomro na hã, ãne na 're ihâimana za'ra mono hã, za tô i'uwaibaba na 're idâ'â za'ra mono da hã. Tane nherẽ, iwasété uptabi hã te te 're 'manharĩ u'âsi za'ra. Tane nherẽ, taha nhipai u iwasété uptabi hã ãne: Te te duré 're wẽsãmri za'ra, isine za'ra te te 're i'manharĩ za'ra mono norĩ hã.

Currently Selected:

Roma 1: xavBP

Highlight

Copy