Marcus 1

Zuwã Batista hã te te dama 're irob'mahârâ mono zé

Mateus 3.1-12; Lucas 3.1-20; Zuwã 1.19-28

1Ã hã 'Re ihâimana u'âsi mono 'ra, Zezu Cristuhu wasu'uwẽ na rob'ui'éré isãna'ratazém na wa za aima rowasu'u za'ra wa'wa, 2'Re ihâimana u'âsi mono zadawa 'mahârâ'wa Izaias hã te te ãma irob'ui'érézéb zarina, ãne:

“Wa hã wa za satõ aiwana ĩmreme 'wapéi'wa hã. Ta hã te za ate bâdâdi hã aiwana asô ropese.”

3“Ni'wa hã te hârâ 'rãihâ na dama rob'mahâ, rop si 're irosa'wari mono ãma:

Sa'ra pese aba mono bâdâdi hã, Uburé Danhib'apito ma.

Imana 'rãmi bâdâdi hã awa'awi sô sa'ra aba mono.”

4Tawamhã ãne zarina, ma tô oto Zuwã Batista hã sihâi'ré. Tahawa, te â dawabzuri hã te te dama 're a'manharĩ, rop si 're irosa'wari mono ãma. Te duré te te dama 're rob'mahârâ, dawasété na 're dasisãmri za'ra mono wa, 'Re ihâimana u'âsi mono ma, 're dasiwẽ'õ za'ra mono da, te te oto da'ãma 're a'madâ'â mono tõ da, taha zarina â dawabzuri hã da te 're 'manharĩ za'ra mono da.

5Tawamhã da'ahâ uptabi na te itẽme 're dasito, Zudéa na ti'a nhisi hawimhã, duré Zeruzalẽ na 'ri nho'õmo nhisi hawib zama. Tame dasisõ'a dawasété na, 're dasiwasu'u za'ra mono wa, ma tô â dawabzuri hã te te dama 're a'manharĩ Zuwã hã, Zodã pa na â nhisi ãma. 6Tawamhã Zuwã hã te 're si'uza, awaru ba'õmore zéré 'manharĩ na. Duré abazei hâ 'manharĩ waré na i'usisizé hã. Te duré 're sa 'riti na, ropĩni na zama. 7Ãne te te dama 're rob'mahârâ:

— Ĩza'u si te za wei wi, ĩma ipire uptabi hã. Tahawa, wa hã e ĩwẽ bâ, sô ĩsiwẽ'ẽ da hã, ipara'uza wasisizé te tãma iwasihu da hã. 8Wa hã wa tô â na si te 're aihâiba ubu za'ra wa'wa, â dawabzuri hã te aima 're a'manharĩ aba mono wamhã. Tanei õ di za oto. Ĩma ipire hã wei wisi wamhã, te za oto 'Re ihâimana u'âsi mono Pẽ'ẽzani na te te 're aihâiba ubu za'ra wa'wa.

Zezusi hã â dawabzuri te te i'manharĩzé

Mateus 3.13-17; Lucas 3.21-22

9Tawamhã ãne te te dama 're wasu'u mono ré, ma tô Zezusi hã itẽme mo, Nazaré na 'ri wa'õtõ nhisi hawi, Galiléia na ti'a nhisi hawimhã. Itẽme wisi wamhã, Zuwã hã ma tô â dawabzuri hã Zezusihi ma 'manha, Zodã pa na â nhisi ãma. 10Tawamhã Zezusi hã â hawi watobro wi, ma tô 'madâ, hâiwa isi'ridawa na. Ta hawi, 'Re ihâimana u'âsi mono Pẽ'ẽzani, ma we isõ'õmoi baba si'ra, utu'u ne. 11Tawamhã hâiwa hawi, te we damreme hã tinha, ãne:

— A hã ĩ'ra, ĩma i'asawi uptabi. Ai'ãma ĩma rowẽ za'ẽtẽ di.

Wa'uburé hã Zezusi te te ipibuzé

Mateus 4.1-11; Lucas 4.1-13

12Tawamhã Zezusihi ãma ronomro õ ré, ma tô 'Re ihâimana u'âsi mono Pẽ'ẽzani hã saprõ, rop si 're irosa'wari mono u. 13Tame ma tô Zezusi hã tihâiba, 40 bâtâ na. Taha ré, te Satanasi hã nasi pibu. Tamemhã abaze zahi hã te 're hâimana za'ra. Tane nherẽ, te hâiwa hawi romhuri'wa norĩ hã siwi 'madâ'â pese.

Zezusi hã romhuri na te te isãna'ratazé

Mateus 4.12-22; Lucas 4.14-15; 5.1-11

14Tawamhã Zuwã Batista hã dazazéb 're, da te sẽrẽ pari, te Zezusi hã mo, Galiléia u. Tame ma tô Rowasu'u wẽ ité, 'Re ihâimana u'âsi mono te te tãma isõmri na, te te dama 're rob'mahârâ. 15Ãne ma tô te te dama 're rowasu'u:

— Bâdâ hã ma tô oto iwa waptãrã, 'Re ihâimana u'âsi mono, da'ãma 're isib'a'uwẽ mono zéb da hã. Ma'ãpé aiwasété na asisãmri za'ra wa'aba, 'Re ihâimana u'âsi mono ma, asiwẽ'õ za'ra wa'aba da, duré Rowasu'uwẽ hã saze za'ra wa'aba.

16Tawamhã Zezusi hã Galiléia isõ'u zaihâ na morĩ ré, ma tô tepe mrami'wa norĩ hã 'madâ'â zahuré, Simau Pedru isisãnawã Ãdréhé me. Ta norĩ hã te abazipara hã nasi wabzuri zahuré isõ'ui wa, tepe zô. 17Tawamhã ãne te Zezusi hã 'mahârâ zahuré:

— Ĩzarina we ane wa'aba. Ĩma 're da'awaibui wa'aba mono da oto, wa za ãma aima asanho wa'wa.

18Tahawa ma õne haré marẽme zahuré, abazipara ma. Zezusihi siré te oto tineb zahuré.

19Tawamhã suru na morĩ na pahâ wi, Zezusi hã ma tô duré 'madâ'â zahuré, Zebedeu 'ra norĩ hã Tiagu duré Zuwãhã me. Ta norĩ hã te uba're 're aimasisi zahuré. Abazipara sisinarĩ hã te apâ te te ãma a'rã'õtõ zahuré. 20Tawamhã Zezusi hã te duré ta norĩ zô tihârâ zahuré. Tahawa ma tô õne haré timama Zebedeu hã sisa'u rẽme zahuré, duré imama ma, romhuri'wa norĩ uba're 're isi'ubumro norĩ zama. Zezusihi siré te oto tineb zahuré.

Zezusi hã aibâ hawi, wa'uburé ma, te te irob'ruzé

Lucas 4.31-37

21Tawamhã Zezusi norĩ hã ma tô aihutu, Cafarnau na 'ri nho'õmo nhisi u. Tawamhã sabadu oto iwa waptã'ã wa, ma ãzé Zezusi hã, Zudeu norĩ te rowahutuzéb u, te te dama rowahutu da. 22Te te dama irowahutuzém na da te wapari za'ra wamhã, ma tô ãma tatob'uzu za'ra ni, Zezusi hã sada ipisutu wa, simirowahutu pire na te te dama rowahutu wa, 'Re ihâimana u'âsi mono nhimiroti zahi na rob'ui'éré na dama rowahutu'wa norĩ nhimirowasu'u nei õ wa. 23Tame te te dama rowasu'u ré, ma aibâ hã ãzé, rowahutuzéb u, wa'uburé ré 're imorĩ hã. Sébré wi, te sa'ẽtẽ 'mahâ ãne:

24— Zezusi, Nazaré ãma i'aiprédu, e marĩ te asima iwẽ, wa'ãma za'ra hã. E wa'uprosi da, te we aimo. Ĩma aiwaihu'u pese uptabi di, a hã ni'wa na hã. A hã 'Re ihâimana u'âsi mono te te i'aipisudu, aimawi tãma 're aihâimana mono da.

25Tawamhã Zezusi hã te sa'ẽtẽ tãma tinha, wa'uburé ma, ãne:

— Ari'iwi! Mo oto aibâ hawi aiwatobro!

26Tawamhã sisa'u te sa'ẽtẽ hâiba sãsã'ã, wa'uburé hã. Taha pari sadari sina, ma aibâ hawi watobro. 27Tawamhã uburé ãma datob'uzu za'ra wa, te 'râwi ãma tasisadanharĩ za'ra ni, ãne:

— E niha, õ hã. Rowasu'u itém na te simiroti pire na wama rowahutu za'ra. Wa'uburé norĩ ma, te te duré rob'rui wamhã, ma tô imreme hã wapari za'ra.

28Tahawa, ma tô waptu na ropé Zezusihi wasu'u hã, Galiléia ti'ai 're, daro mono bâ.

Zezusi hã Pedruhu maprewa, te te ipesezé

Mateus 8.14-15; Lucas 4.38-39

29Tawamhã rowahutuzém hawi wairébé parimhã, Zezusi norĩ hã ma tô ai'aba'ré, Simau Pedru norĩ nhorõwa u, Ãdréhé me. 30Tame te Simahã maprewa hã hâzé ré nomro, wa'ro za'ẽtẽ na. Tawamhã sisisi wi, te Zezusihi ma wasu'u za'ra, ihâzé na hã. 31Tahawa, ma tô itẽme sina rotété. Ma tô pa'â. Tawamhã ma tô ãma aime, wahutu da. Tame ma awa'awi tiwahâ. Taha pari ma tô tãma a za'ra, Zezusi norĩ ma, saihuri da.

Zezusi hã da'ahâ uptabi na te te ida'apesezé

Mateus 8.16-17; Lucas 4.40-41

32Tawamhã 'ma'rã wi, bâdâ sébré pari#1.32 bâdâ sébré pari Sabadu bâdâ hã Zudeu norĩ 're iwa'utu za'ra mono zé, 're 'rãsutu mono wa, bâtâ zasizéb u., ma tô itẽme tasi'ãwisi za'ra ni, Zezusihi u, uburé ihâzé ré norĩ hã, duré wa'uburé, da'ãma 're ihâimana za'ra mono norĩ zama. 33Uburé 'ri ahâ 're, 're idasi'ubumroi mono norĩ hã ma itẽme tasi'rã'õtõ ni, 'ridawa nho're u. 34Tawamhã Zezusi hã dahâzé mono bâ, ma da'apese, da'ahâ na. Duré wa'uburé hã ma dama anhamra, ahâ na. Ma tô duré wa'uburé norĩ hã sina sadawa uwati za'ra, te te dama wasu'u za'ra tõ da, te te siwi waihu'u pese wa, Zezusi hã 'Re ihâimana u'âsi mono 'ra na hã.

Zezusi hã a'ubuni wi, te te irowaptẽrẽzé

35Tawamhã zahadu robza'rã ré, ma tô udu Zezusi hã, 'ri nho'õmo nhiti morĩ da, a'ubuni u. Tame ma tô tihâiba, te te rowaptẽrẽ da. 36Tawamhã Simau duré tisiré norĩ me, te Zezusihi zô hã sõpré ropâ. 37Tawamhã te te siwi sõpẽtẽ wamhã, te tãma rowasu'u za'ra, ãne:

— Rowahutu'wa. Da'ahâ uptabi na te asô tarĩtĩ za'ra ni.

38Tawamhã Zezusi hã ma tô sada'âbâ za'ra, ãne:

— Oto wasi'aba'réi wa'aba, 'ri wa'õno 'râwi 're ihâimana za'ra mono u, tamomob zama te dama 're rowahutu mono da. Taha da, wa tô wei mo, wa hã.

39Tawamhã Zezusi hã daro mono bâ ma tô oto 're mo, Galiléia 're, 're idasi'ubumroi mono norĩ u, te te dama 're rowahutu mono da, Zudeu norĩ te rowahutuzé mono bâ. Wa'uburé zama te te dama 're anhamra.

Zezusi hã, aibâ i'wa're ré te te ipesezé

Mateus 8.1-4; Lucas 5.12-16

40Tawamhã aibâ lepra#1.40 Lepra hã da'wa're idâ'â waihu'u õ, isimihâiba upro. na i'wa're nhisi ré hã ma wi, Zezusihi u. Hi'rãtitõ ma aime ipapara. Te tãma tinha, ãne:

— Apito, ĩma waihu'u pese di, za ĩpese waihu'u pese na hã, asima wẽ wamhã.

41Tawamhã Zezusi hã ãma pẽ'ẽzé uptabi wa, ma tô sô mawẽ, te te upi da. Te te upi wamhã, te ãne tãma tinha:

— Wa ĩsima wẽ tô. Aihâiba pese oto.

42Tawamhã awa'awi pesere ma i'wa're hã tãma apa. Ma tô oto tihâiba pese.

43Tawamhã Zezusi hã ma tô satõ, mreme tete na te te sina sadawa uwati pese pari, te te dama sina wasu'u tõ da. Ãne te tãma tinha:

44— Ĩwapari pese. Ni'wai ma, ãne na hã rowasu'u tõ. 'Re ihâimana u'âsi mono ma, da'ãma romhuri'wa sasedoti u si aimorĩ, i'aihâiba pese zém na te te aiwaihu'u da. Taha parip si, 'Re ihâimana u'âsi mono ma asõprubzé marĩ mono hã te za isõmri za'ra sasedoti ma, Mozésihi nhimi'ui'éré zarina, i'aihâiba pese zém na da te aiwaihu'u za'ra da, sena na. 45Tane nherẽ, aibâ morĩ wi, ma rowasu'u na ropé. Tahawa, Zezusi hã sima iwẽ na 're zasi waihu'u mono õ di oto, 'ri nho'õmo mono u hã. A'ubuni wip si te 're hâimana, danhiti. Tame 're hâimana mono ré, te itẽme 're dasihutu, daza'rui mono hawimhã.

Currently Selected:

Marcus 1: xavBP

Highlight

Copy

Compare