Zuwã 2
2
Cana ãma dasina damrozé wasu'u
1Tawamhã maparane bâdâ ne pari, ma tô dasaihurizé hã dasiwi 'manharĩ ni, dasina damrozém na hã. Cana na 'ri wa'õtõ nhisi ãma, Galiléa ãma. Zezusihi na hã te tame dame tihâiba. 2Zezusihi zô zama, te tahârâ ni, isiré 're inomro mono norĩ zô zama, dasina damro u si'aba'ré da. Tahawa, te duré ta norĩ hã dame asimro. 3Tawamhã ma tô uwa 'rãi wa'u isé hã da'ãma ai'utõ, da te 'mahâpãrĩ mono õ ré. Tahawa, te Zezusihi ma ina hã tãma tinha, ãne:
— Uwa 'rãi wa'u isé hã ma tô da'ãma ai'utõ, da te 'mahâpãrĩ mono õ ré.
4Tawamhã Zezusi asa te tãma tinha, ãne:
— Ãté a hã ĩma waihu'u õ di za, marĩ te i'manharĩ da hã. Bâdâ zahadu iwa waptã'ã õ di, ãne te i'manharĩ da hã.
5Tahawa, te ina hã romhuri'wa norĩ ma tinha, ãne:
— Tiha te te aima waihu'u za'ra wa'aba wamhã, ma'ãpé imreme hã 'manharĩ za'ra wa'aba za.
6Tame te piza hã 're simasa ẽtẽ 'manharĩ hã, â ré hã 6 na ihâiba hã. Nima norĩ hã 80 na â za'ratazé hã, duré nima norĩ hã 120 na â za'ratazé hã. 'Re wasaihuri mono õ ré hã, wahi'rata norĩ nhimiroti zarina, wa 're wanhimisõ za'ra, wa norĩ hã zudeu wa. Taha da, te 're simasa, piza isa'ẽne hã. 7Tawamhã Zezusi te romhuri'wa norĩ ma tinha, ãne:
— Â hã nasi amrami za'ra wa'aba, piza 're sa'wari za'ra wa'aba da. Ma'ãpé asiwi 'masisi aba mono.
Tawamhã ma tô siwi te te 'masisi, piza 'remhã â hã. 8Tawamhã Zezusi te tãma nharĩ za'ra, ãne:
— Ma'ãpé, â hã oto amrami za'ra wa'aba, danhipi na dawada'uri'wai u 'wasari aba da, te te téiwa pibu da.
9-10Tawamhã ma tô itẽme 'wasa, te te téiwa da. Te te téiwai wamhã, â si õ di oto. Ma tô sirob'rãi wa'u. Nima hawi uwa 'rãi wa'u isé hã te te waihu'u õ di, danhipi na dawada'uri'wa hã. Romhuri'wa norĩ si ma tô waihu'u za'ra. Tawamhã te te téiwa wamhã, sina imro zahuré zô, te hâ, aibâ zô. Taha wamhã, te ãne tãma tinha:
— E niha ma bété isei uptabi si dawi ité, wasaihuri na'rata hawi, wa te âhuri tõ da. Dasaihuri na'rata hawi, te isei uptabi hã da te dama 're sõmri za'ra, da te 're âhuri mono da. Sa'ẽtẽ na da te 're âhuri mono wapsi, te za iwa'u zei prã hã da te dama 're sõmri za'ra. Tanei õ di, a hã. Nimosi ma tô isei uptabi hã dama i'ru, da te âhuri da.
11Ãne hã marĩ dama i'manharĩ waihu'u'õ hã te te dama i'manharĩzém na ma tô Zezusi hã dapawaptom na sãna'rata, tiwaihu'u pese na, Cana na 'ri nho'õmo nhisi ãma. Galiléa 'remhã, Cana hã. Tahawa, waihu'u pese wa, ma tô oto sina umnhasi za'ra, isiré 're inomro mono norĩ hã.
12Tawamhã Cafanau na 'ri nho'õmo nhisi u te oto mo, Zezusi hã. Ina zama te isiré mo. Ino norĩ zama te duré isiré ai'aba'ré. Isiré 're inomro mono norĩ zama, te duré isiré ai'aba'ré. Tawamhã sihutu wamhã, suru na te tame asimro.
'Re ihâimana u'âsi mono nhorõwa 'ri hawi, Zezusi te te idazate mono zé wasu'u
Mateu 21.12-17; Marcu 11.15-19; Luca 19.45-48
13Romhuture di oto, zudeu norĩ te, dato hã da te 're i'manharĩ za'ra mono zéb u hã, 'Re ihâimana u'âsi mono, Ezitu hawi te te idawaibuzém na ãma dasipo're pu'u za'ra da, Pascowa na dato nhisi hã. Tawamhã datoi u romhuture wa, te oto Zezusi hã mo Zeruzalẽ u hã. 14Zeruzalẽ ãma te 'ri za'ẽne hã 're sa, 'Re ihâimana u'âsi mono nhorõwa 'ri hã. 'Ri 'wawi wa'ra 're, te aibâ norĩ hã 're si'ubumro. Ta norĩ hã powawẽ te te dama 're wede za'ra, duré pone'ẽrebâ, duré utu'u. Ihâiba amo norĩ hã te duré rob'uiprazém na te te dawi ãma 're saprĩ za'ra. 15Tawamhã Zezusi, aibâ norĩ hã te te 'madâ'â za'ra wamhã, ma tô danhimizama pré'ézé hã wedenhorõ na sada 'ma'manharĩ za'ra, te te ãma sate mono da, rob u. Tawamhã taha na ma tô te te sate, pone'ẽrebâ hã duré powawẽ hã. Wedeza hã ma tô duré tiwi pizari za'ra, rob'uiprazé hã te te tiwi sãmra za'ra da, te te dawi ãma 're isaprĩ za'ra mono norĩ wi. 16Te duré tinha, utu'u wede'wa norĩ ma, ãne:
— Mo oto rob u sani za'ra wa'aba. Sahâri za'ra wa'aba, Ĩmama ãma 're idawata za'ra mono zém nherẽ, asima ãma 're irowede za'ra wa'aba mono zé hã, Ĩmama nhorõwa 're. Ãme dama 're rowede za'ra wa'aba mono õ di za oto.
17Tahawa, isiré 're inomro mono norĩ hã ma tô ãma tipo're pu'u za'ra, 'Re ihâimana u'âsi mono zadawa wasu'u'wai mreme ui'éré iwazéb zahi na. Ãne duréihã ma tô wahi'rada hã tinha, 'Re ihâimana u'âsi mono ma: “Asadawa wasu'uzé 'ri hã ĩma sawi uptabi di, unhama ro'o ne ĩpẽ'ẽ 'rem hã.”
18Tahawa, te dama ipire norĩ hã tãma nharĩ za'ra, ãne:
— E 'wa sadawa para, ma tô idazate mo, rob u. 'Re ihâimana u'âsi mono zadawa para, sate mono wamhã, e marĩ te za i'manha, dama i'manharĩ waihu'u'õ hã wa te ãma aiwaihu'u za'ra da.
19Tawamhã Zezusi te asa tãma nharĩ za'ra, ãne:
— Ã hã 'ri hã asiwi sãmra aba wamhã, wa za apâ 'ri. Bâdâ si'ubdatõ na te za ĩ'ãma ne, apâ te 'ri ré hã.
20Tawamhã asa te tãma nharĩ za'ra, ãne:
— E niha te za merẽ i'ri su. E niha bâdâ misi te za ai'ãma mo, apâ 'ri ré, a hã. Ã hã da te dasiwi 'ri su'u õ di, 'ri za'ẽtẽ wa. Wahub ahâ na ma tô da'ãma tiwahu, da te dasiwi 'ri za'ra ré hã. 46 na ma tô ãma dawi tiwahu.
21'Ri te te wasu'u wamhã, tihâiba te wasu'u, Zezusi hã. Sõ'awi siwasu'u õ wa, imreme hã dama pibu prã za'ra di. 22Ab're hawi hâiwa'utu wapsi, te za isiré 're inomro mono norĩ hã ãma tipo're pu'u za'ra, apâ za te te i'ri wasu'u na hã. Te za sima rowasu'u za'ra, ãne: “Tô sena na ma tô Zezusi hã tihâiwa'utuzém na dama siwasu'u. Tô sena na ma tô duré wahi'rata norĩ hã romhâ ré ihâiwa'utuzém na rob'ui'éré siromo za'ra ibaihâ na, 'Re ihâimana u'âsi mono zadawa 'mahârâ'wa norĩ hã.”
Zezusihi ma, uburé danhimirosa'rata na tãma idawaihu'u pese zé wasu'u
23Tawamhã Zezusi hã zahadu Zeruzalẽ ãma hâimana ré, ma tô Pascowa na dato nhisi hã dasiwi 'manharĩ ni. Tame sãmra ré, ma tô duré marĩ dama i'manharĩ waihu'u'õ hã te te dama 're ab'manharĩ wẽ, tiwaihu'u pese na, 'Re ihâimana u'âsi mono we te te isatõrĩ na, da te ãma waihu'u za'ra da. Tahawa, marĩ dama i'manharĩ waihu'u'õ hã danho'a te te dama 're ab'manharĩ mono wẽ te, ma tô da'ahâ na saze za'ra ni. 24-25Tane nherẽ, da te dasina i'umnhasi za'ra na, te te sina damreme zazei õ di, Zezusi hã. E marĩ wa. Uburé danhimirosa'rada hã tãma waihu'u pese wa. Ni'wa i'upana te te tãma 're da'awaihu'u mono õ di, Zezusihi ma. Si'uihâ na ma tô te te 're da'awaihu'u, danhimirosa'rata na hã. Tahawa, tô sena da te dasina umnhasi za'ra õ wa, te te sina damreme zazei õ di, Zezusi hã.
Currently Selected:
Zuwã 2: xavBP
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc.All rights reserved.